كلنا فى الهم شرق

لو على عبد الله صالح كان انضرب فى قلبه بعد مبارك مباشرة كان زمانى  طايرة من الفرح 

وماشية شايفة ابتسامتى قدامى وفخورة بالعرب وممتنة لتونس وبدعى لليبيا 

دلوقت أنا مش عارفة مالى

لما سمعت الخبر فرحت طبعا ان ربنا خلصهم من شره 

وان حمام الدم هيقف بقى الله ينتقم منه ومن كل حاكم سمح لنفسه يقتل شعبه 


لكن قلت لنفسى ياترى يايمن هتشوفى اللى احنا شفناه ولسه عايشين فيه ؟

هتجرى يايمن تشوفى سرق كام وفين ومحدش هيعرفك حاجة؟

هتفتكرى نفسك كنتى عارفة انه فاسد ولما تتكشف الامور تلاقى نفسك تايهة من كم الفساد اللى انت مش متخيلة يحصل ازاى ؟

الاعلام يايمن هيلعب معاك نفس اللعبة الدنيئة ويشغلك عن أى حاجة ممكن يكون فيها مصلحتك وهيكون همه الاكبر انه يشغلك ويلهيك ويزيف وعيك ؟

نخبتك يايمن هيستعبطوا ويتكبروا على أهلك وكل واحد فيهم هيطلع ينظر ويتفلسف 
وهو أصلا مش هنا ولا فاهم الناس عايشة ازاى ولا عايزة ايه ؟

الداخلية عندك يايمن هتعمل فيكى ايه ؟
يادوب يعنى كل كام يوم كده واحد من عيالك هيموت فى قسم بوليس 
معلش دورته الدموية بتهبط هنعمله ايه ؟


معندكيش مسيحيين مش كده ؟
طب خافى على نفسك بقى ياحبيبتى من الفتن ومن صراع العصبيات بين القبائل 
ومن التعابين اللى هتطلع من الجحور بمواعيد ومنظمة قوى وبترجع تانى بمواعيد 
ربنا يسترها عليكى 

هتختلفوا يايمن على مدة الفترة الانتقالية والدستور أولا ولا الانتخابات أولا؟
ولا ربنا هيهديكم وتتفقوا ؟

عندكوا مجلس عسكرى ياحبيبتى ؟؟؟
خلاص خلاص ماتكمليش عارفة أنا الكلام ده 
ابقى قابلينى بقى لو عرفتى راسك من رجليكى 
وجهزى نفسك من دلوقت لمحاكم عسكرية وفض اعتصامات 
وتعذيب فى متحف ورصيد بيخلص
والبنات عندك بيشتركوا فى الاعتصامات ؟؟
طب ابقى خليهم يشوفوا الجرايد بتاعتناعلشان فيه حاجة بتوجع قوى حصلت لنا 

وسى صالح فلت منكم مش كده ؟؟
مينفعش يايمن والله العظيم ماينفع 
اهى دى بالذات بقى اوعى تفرطى فى حقك فيها 
شرع ربنا يايمن 
ولازم يتحاكم والدنيا كلها تعرف انك عملتيها
والعيال الصغيرين بالذات تعرف وتشوف ان الحرامى والقاتل والفاسد لازم يتحاكم 

والست هانم السعودية دى هتقعد تلم فيهم لغاية امتى ولا هو فعلا الطغاة لبعضيهم ؟


يايمن 
تقريبا يعنى ده اسمه اكتئاب مابعد الثورات 
أو يمكن احنا كنا عارفين انهم يستاهلوا الثورة ضدهم 
لكن مجهودنا كله كان اننا ندعى ربنا يخلصنا منه 
ومفكرناش هنعمل ايه فعليا لما يمشى 
يمكن بس علشان احنا مستجدين فى الثورات ولسه فى سنة اولى 
ولما نذاكر الماضى ونثبت رجلينا فى الارض ونسيب ارواحنا تحلم 
يمكن ساعتها ربنا يكرمنا من تانى وتكمل لنا على خير 
 ياريت 


أنا فرحانة علشانك قوى يايمن
وهادعى لليبيا ربنا يخلصها من المجنون ويسترها عليها من اللى عاملين نفسهم بيخلصوها منه 
وهادعى لسوريا يخلصها من الغبى اللى مش قادر يفهم ان الدبابة لو نطقت هتقوله أنا وظيفتى أقتل الاسرائيلى مش السورى

مبروك يايمن ويارب تكمل لنا كلنا على خير

4 التعليقات:



لورنس العرب يقول...

على فكره صالح راجع تاني
والبلد دي بالذات حالها لن ينصلح لأنهم قبائل واولاد صالح واقاربه ماسكين مناصب كثيره في الجيش
صحيح الاحمر قريبه لكن لو مشي صالح فالمقربين نه لن يتركوا الامر
وهناك في الجنوب "علي سالم البيض" التابع للحوثيين يراقب الموقف من بعيد لينفصل بالجنوب كما كان في الماضي
الموقف هناك معقد جدا جدا وليس كما هو في مصر وتونس

حفيدة عرابى يقول...

لورنس العرب
لأ ان شاء الله يافندم معادش فيها رجوع
وربنا يسترها عليهم
انا قرأت سريعا انه كان معتمد على قبيلة حاشد وهى اكبر القبائل اليمنية وانها انحازت للثورة فى النهاية
عارفة ان الموقف معقد ومش سهل
وفاهمة ان امريكا من مدة عاملة حسابها على فوضى خلاقة من فترة طويلة
لكن بصراحة احنا غلطنا فى حق نفسنا لما سكتنا على كل الروساء الاغبياء كل المدة دى
وفى الاول والاخر ربنا ينصر الحق ويحفظ البلاد

تحياتى لحضرتك

تامر علي يقول...

طريق الحرية طويل وشائك ومجرد اسقاط النظام الفاسد لايعني اي شيء الا ايقاف نزيف الظلم وبدء مرحلة العلاج ، ونحن كما تعلمين قد أكلتنا الأمراض الوطنية ونهشتنا المفاسد والفاسدون
عسى الله ان يجعل في همنا فرجاً

تحياتي

حفيدة عرابى يقول...

أستاذ تامر على
اللهم آمين
بخاف ساعات يعدى علينا وقت نقول قامت هنا ثورة
وارجع تانى أقول لنفسى ده وضع طبيعى ولازم نمر بكل اللى احنا فيه
مستجدين معلش :)

تحياتى لحضرتك