خالد


ماانت اسمك خالد
تعرف ان فيه ناس ليهم من اسمهم نصيب  
  
عرفت طبعا انه مشى 
كان ظالم ياخالد وبيقتلنا ولغاية دلوقت مش قادرة أفهم ليه  


 طيب يرضيك ان ربنا خلاك سبب عشان يخزيه 
وانك كنت سبب عشان الناس تبات فى الشارع 
لغاية ماهو يمشى 
 
معلش ياخالد
انا عارفة ان الطريق لسه طويل
وان الحقوق كتير 
وان حقك انت واللى زيك لسه مخلصش
بس هيحصل ياخالد بإذن الله 
صدقنى أنا مش قلقانة 
لما ربنا فى ملكوته يقسم بعزته وجلاله 
ينصر المظلوم ولو بعد حين
وانت مقتول ياخالد 
يبقى ياحبيبى حقك لازم يرجع 
ده مبدأ 
 
شوف هو لما قتلك يبان انه حرمك من حاجات كتير حلوة 
لكن أنا مش مصدقة الكلام ده ياخالد 
وعارفة بإذن الله ان اللى انت فيه أجمل
أنا بس صعبان عليا اللحظة اياها وانت مش فاهم اللى بيحصل ده ليه 


مش بعرف ياخالد اتكلم فى المواقف دى خالص
لكن  عندى شعور من زمان 
ان اللى بيموت بدرى لازم يبقى  أحسن منى 
ليه ؟ وأحسن منى فى ايه ؟
مش عارفة اشرحها ازاى 
بس أنا متأكدة


إنجى
لما اتكلمت عنك جابت سيرة حبيبتك 
اللى أنا كنت متأكدة انها موجودة 
وياما ظبطت نفسى بدور عليها بعينيا 
فى كل مرة بيجيبوا فيها أهلك وصحابك ياخالد 
لو تعرف يعنى وانت بتزور مامتك  تزورها هى كمان
وتطمنها عليك 
يمكن قلبها يصبر شوية 


ربنا يرحمك ياخالد 
انت وسيد بلال 
ومحمد البوعزيزى 
وكل شهيد 
مكانش عنده طريقة يغير فينا 
غير انه يموت


11 التعليقات:



لورنس العرب يقول...

وابعت اقول ازيك يا ميس- تقولي الله يسلمك- ابعت تاني ازيك يا ميس- تقولي تاني الله يسلمك- قلت طيب اسيب الميس شويه واشوف هاتيجي ولا لأ- الائي الميس بتروح كل حته إلا عندي- قلت يمكن عشان اليومين دول انا تقيل شويتين على الناس والعالم بتهرب من عندي لأختلاف الآراء بدل ما اتشتم- بس رجعت وقلت الميس مش بتعمل كده طبعا- قلت طيب فيه ايه- هو ايه الحكايه- مش فاهم- فهميني يا ميس- اعتبريها حصه مدفوعة الاجر لدرس خصوصي بس انا عاوز افهم

وقلت طيب هو فيه ايه- لعلمك- كان عندي استعداد اعمل المستحيل وابطل اتكلم عن الغالي (شوفي وصل بيا الامر لدرجه ايه) بس اعرف مالك

وقلت فيها ايه الخلاف في الرأي، هل ممكن يعمل قطيعه؟ ولله قالوا اني من الفلول والثوره المضاده- وايه يعني- اتشتمت في المدونه- قلت مش مشكله- بس انا اعرف الميس من سنتين- بطلت تيجي، ولا بتسأل، ولا عاوزه تعرفنا، ايه اللي حصل يا اخوانا

كــركــبــة دمـــاغ ㋡ يقول...

انتي وحشتيني قوي عــ فكرة والله

تامر علي يقول...

ربنا أمر بزوال دولة الطغيان بسبب خالد جعله مجرد سبب نرجو أن يتقبله في الصالحين ، وده أمر ربنا
مش قادر افهم احنا ايه اللي مخلينا لسه مش عاوزين نحاكم شخص لم تعد له اية سلطات ولم تعد له شرعية ولم يعد يشك شخص في خيانته

ربنا يبصرنا بما ينفعنا

حفيدة عرابى يقول...

لورنس العرب

طيب وهى ازيك ياميس يترد عليها بايه غير الله يسلمك يافندم؟ :)

حضرتك يافندم ماتعرفنيش لو كنت قلت لى من أول مرة مباشرة انت مش بتيجى تقفى ليه على باب الميكروباص وتعلقى على التدوينات وهى لسه طازة زى زمان كنت رديت على طول

هو بصراحة فيه سببين
الاول
ان حضرتك عارف اننا فعلا مختلفين فى الرأى
وفى الفترة الأخيرة أكيد حضرتك لاحظت انى قللت قوى من انى اناقش حد مختلف معايا فى الرأى
وأغلب الكلام فى فيس بوك كلام عام أو شير لمقال يكون عجبنى وحاجات كده

حضرتك تحديدا قلت لنفسى مينفعش كل ماينزل فيديو جديد تروحى تقولى له لأ انا مش موافقة على كذا وكذا وتخنقى فى الناس معاكى
ارحمى من فى الارض يرحمك من فى السماء



التانى وده الأهم

السبب التانى ده جديد ومن اسبوع بالكتير وده اللى خلانى زعلانة جدا بجد
وهوان الاخ فيس بوك قالى ان حضرتك معجب بالصفحة اياها عن اسماء محفوظ واسراء عبد الفتاح

دخلت زى العادة اتفرج على الصفحة
طبعا محتواها مش عارفة الاقى وصف ليه غير انه بيخوض فى الاعراض
وحضرتك ليك تعليقات هناك
تعليقات حضرتك مش ماشية معاهم فى نفس السكة البشعة دى أنا عارفة
بس اللى واضح ان جضرتك مختلف فى الرأى مع اسراء واسماء
بس يافندم هو الاختلاف فى الرأى يبيح انى اسكت واوافق واضغط على لايك واكتب تعليقات فى صفحة بتخوض فى اعراض بنتين لمجرد ان البنتين دول ليهم اراء مختلفة عنى
مش هاكدب على حضرتك انا زعلت جدا
وكنت مصدومة جدا

لو حضرتك سألتنى مباشرة من أول مرة
أنا كنت جاوبت

تحياتى لحضرتك

حفيدة عرابى يقول...

كركبة دماغ
:)
وانت كمان ياجميلة وحشانى قوى
امتى بقى ييجى رمضان
واشوف الهانم اللى بتضحك علينا وتفهمنا انها كركبة دماغ وهى شكلها غير كده خالص :)
ربنا يسعدك ياكراكيبو

-------
أستاذ تامر

ماهى العالم ماشية تكلم نفسها فى الشارع من ايه
ايه اللى كان يحصل يعنى لو من يوم 12 فبراير يتحاكم مبارك والعادلى وكل رموز النظام اللى خربوا البلد وقتلونا 30 سنة
مش ده الصح ؟

كان زمان حالنا بقى ايه لو ده حصل من اول يوم بعد رحيله ؟

ولا احنا هنفضل فى حسابات وتربيطات طول عمرنا

خالد كان سبب وبوعزيزى كان سبب

بس يتحاكم بقى اللى ظلمهم وظلمنا

يارب بقى الايام الجاية نلاقى أخبار تحسسنا اننا عملنا حاجة

تحياتى لحضرتك

لورنس العرب يقول...

لا
انا لم اخوض في أعراض احد سواء كان بنت او رجل
وممكن يكون اللي انا عملته خطأ- لكن مين اللي قال اني ملاك ولا اخطيء؟
انا تحدثت عنهم من منطلق تفكيرهم السياسي في المقام الاول
ومين اللي قال ان كل تصرفاتي صحيحه ومين اللي قال ان كل الكلام اللي بقوله صح او اني طول النهار مش بيطلع مني شيء غلط؟
انا بني آدم يا ميس وأكيد لي اخطاء
طيب ما انا قالوا عليا من الفلول ومن اتباع الحزب الوطني واتشتمت بأمي واهلي في المدونه ولهذا اغلقت التعليقات، ده مش مبرر- لكن انا بقولك حتى لو اخطأت
بس انا وجدتك ولا كأنك تعرفيني
وموضوع الاشتراك في الصفحه دي كان من قريب يا رشا- وانتي منقطعه بقالك حوالي 3 شهور، وده وقت كبير جدا
وانا معرفكيش من يومين
ولولا انك غاليه عندي مكنتش عاتبتك
عارف انك مش هاتيجي بسبب الخلاف في الرأي- وانا مش باجي عندك -ولو اني بدخل على صفحتك كل يوم- تجنبا للصدام مع اصدقائك المخالفين معي في الرأي والمتفقين معك-
على كل حال لو مش عاوزه تيجي عندي لأي سبب من الاسباب انا محترم رأيك- بس كل فتره يبقي عدي عليا بلاش تقطعي بالشهور

حفيدة عرابى يقول...

لورنس العرب
:)
لو حضرتك قرأت تعليقى مرة كمان هتلاقى انى اتكلمت عن سببين
الاول منهم انى مينفعش اضايق الناس باستمرار انى مختلفة معاهم فبسكت وخلاص

التانى قلت انه أهم وزعلنى جدا وكان من اسبوع بالكتير
وقلت ان تعليقات حضرتك مكانتش معاهم فى نفس السكة بتاعتهم

واساسا حضرتك طبعا حر فى رأيك وفى الصفحات اللى تختارها وتعجب بيها
بس حضرتك بتشتكى من رد فعل الناس لما بيختلفوا فى الرأى
يبقى مينفعش انا كمان لما اختلف مع حد اوافق ولو ضمنيا على مهاجمته بالطريقة دى

مش احنا مختلفين يافندم بقالنا اكتر من سنتين
وياما قلنا ان الاختلاف فى الرأى ده مش مشكلة خالص طول مافى احترام متبادل

طب ماهو اسراء واسماء وتوارة كمان حالا ليهم نفس الحق
ولا ايه يافندم ؟
احترام الرأى المخالف مش بيتجزأ يافندم مش كده ؟

حضرنك من الناس المحترمة ولولا انى متأكدة من كدة مكنتش اتكلمت بصراحة ولا عاتبت ولا حاجة خالص

تحياتى لحضرتك

لورنس العرب يقول...

معلش بأه يا رشا

انا لما كنت بكتب عند نواره تعليق مش بيعجبها كانت بترد عليا بتقول ايه؟؟؟

اكيد انتي عارفه، صح؟
حاليا انا لا ادخل هناك- بس انتي طبعا بتقرأي عندها الردود، صح؟
وبتشوفي تسميات المواضيع، مش كده؟
إذن الاختلاف معها مختلف تماما عن الاختلاف معاكي
يبقى طريقة التعامل معها غيرك تماما وانتي بنفسك بتدخلي الصفحه عندها باستمرار وبتشوفي كل حاجه
وبصفه عامه الناس سكتوا على الكلام اللي بيطلع من عندها واعتبروه لها حق، ولكن لما ارد عليها بنفس الطريقه ابقى وحش ليه؟

انا بس عاوز اوصل لك حاجه مهمه جدا

الاختلاف مع اللي زيك مختلف عن الاختلاف مع غيرك
لأن انتي مش زي غيرك
لازم تضعي ده في الاعتبار
يعني انتي مثلا عمرك ما هاتقولي الالفاظ الاعتراضيه اللي نوارة بتقولها
ولا عمرك هاتسبي حد او تشتميه بامه او تسبي له الدين
غيرك بيعمل كده والناس بتسكت ومفيش حد بيقول عيب، بياخدوا من شهرة الشخص دافع ومبرر إلى ان يتحدث بلهجه البلطجيه
وبالنسبه للصفحات فأنا بدخل كل الصفحات تقريبا حتى كلنا خالد السعيد وكلنا حسني مبارك وكل حاجه تقريبا ببقى حريص على اني امر عليها عشان اشوف اخبار الدنيا فيها ايه والناس بتتكلم في ايه
وبرجع وبكرر
لا تضعي مقياس لنفسك مثل الاخرين لأن الاخرين مش زيك

حفيدة عرابى يقول...

لورنس العرب

الفكرة كلها ان اختلاف الاراء ميخلينيش اهين اللى قدامى بالفاظ وتصرفات لو هو مش هيقدر يحاسبنى عليها فربنا هيحاسبنى عليها
حضرتك عارف ثقافتنا
لو بنت هى اللى ضايقتهم اهانتها بتبقى سهلة قوى بالنسبة لهم مع انها فى رأيى أصعب بكتير
يعنى الصفحة اياها بتاعة اسماء واسراء معرفتش تناقشهم فاشتغلت ضدهم مش فى التجريح
لأ لا سمح الله تجريح ايه
دى دخلت علطول فى قلة الادب والطعن فى الاعراض
واقسم بالله لو الظروف تسمح بس شوية واعرف ان فيه حد هيسمع كلامى فالناس دى لازم تعرف ان اللى بيعملوه ده جريمة وليه حد فى الاسلام
ولما يتجلدوا ويعرفوا ان الله حق هيتعلموا يختلفوا مع الناس بشرف ازاى

-----
أما بالنسبة لنوارة فانا بقالى فترة طويلة جدا مش بشوف صفحة التعليقات
بقرأ البوست بس
لو عجبنى بعمله شير على الفيس
معجنيش خلاص
عارفة الفاظها ومتخيلة ردها وطبعا هى غلطانة فى الجزئية دى
لكن برضه مش هعمل صفحة للطعن فيها والسخرية منها

------
الكلام ده كله مش على حضرتك أنا عارفة
الفكرة انى مش بحب اشجع الناس على غلط بيعملوه
بيكرهوا الثورة وأى حد من اللى بيتكلموا باسمها ..مفيش مانع
براحتهم خالص
بس فى مناطق فى الكلام استحالة نوصلها

لورنس العرب يقول...

ولله يا رشا انا ما بسخر من حد
بس تقدري تقولي اني لقيت حد بيتكلم وسط الكلام الفاضي بالكلام اللي انا عاوز اقوله- او تقدري تقولي اني لقيت حد رأيه في الناس دي متشابه مع اللي انا بقوله فدخلت الصفحه مش اكتر
وعشان خاطرك يا ستي هانسحب منها

حفيدة عرابى يقول...

لورنس العرب
حصل خير يافندم
خلاص الموضوع انتهى