وربنا انت غلبان

هو الملحد عايش ازاى ؟

أول ماعرفت التدوين اتكعبلت فى كام واحد ملحد
والفضول خلانى أقرأ يمكن أفهم دماغ الناس دى


بعد القراءة لقيتنى برضه مش فاهمة
ومش متخيلة الملحد عايش حياته ازاى 

يعنى مش بيحس فى أوقات كده انه ضعيف وضايع؟؟
مش بيحس انه ناقص ؟؟

أنا اسفة فى التعبير 
بس فاكرة وأنا فى ثانوية عامة فى منهج الفلسفة 
ان المعتزلة قالوا ان الانسان دايما بيحس بالنقص والعجز
وان احساس الانسان بالنقص دليل قوى جدا
على وجود الكامل المنزه عن النقص الله سبحانه وتعالى
لأ أنا مش هتكلم عن الأدلة العقلية على وجود ربنا سبحانه وتعالى 

كل الموضوع انى كنت بحمد ربنا انه انقذنى من مشكلة
وأنا بحمد ربنا 
فهمت ان مجرد ادراكى ان ربنا موجود 
دى نعمة 
وانه سبحانه وتعالى بيحمينى 
بصرف النظر عن انى مااستاهلش خالص
دى نعمة تانية 

طيب النعمة الاولى الجليلة دى
اللى أنا بتعامل معاها ببساطة
شكل حياتى كان هيبقى ايه لو أنا لاقدر الله محرومة منها
وزى مايكون اكتشاف مع انى عارفاه من زمان
حسيت انى مبسوطة قوى
 ليه مبسوطة ؟
لانى محظوظة ان ربنا عرفنى انه موجود 
وانه رحمنى من الحيرة والتخبط 
علشان أوصل للمعلومة المصيرية دى 

يعنى أنا لازم احمد ربنا انه عرفنى انه موجود  

ايه الجمال ده 

هى حياتى كان ممكن تبقى ازاى لو أنا معرفش؟
استنى يابنتى متعرفيش ازاى
الاية الكريمة واضحة 

(وَإِذْ أَخَذَ رَبُّكَ مِنْ بَنِي آدَمَ مِنْ ظُهُورِهِمْ ذُرِّيَّتَهُمْ وَأَشْهَدَهُمْ عَلَى أَنْفُسِهِمْ أَلَسْتُ بِرَبِّكُمْ قَالُوا بَلَى شَهِدْنَا أَنْ تَقُولُوا يَوْمَ الْقِيَامَةِ إِنَّا كُنَّا عَنْ هَذَا غَافِلِينَ)

سبحان الله 
 تبقى ايه العوامل اللى ممكن تشوه الفطرة دى 

الوالدين مثلا
ان ابويا وأمى مثلا يكونوا مقتنعين بالنظرية المعقدة 
اللى اسمها المادية الجدلية 
وان الرفيق ماركس كان مثلهم الاعلى بعد الشر
ماهو ده المثال الشهير بالنسبة لى عن الالحاد
وكانوا هيربونى على كده؟؟
لسه مش شايفاه سبب مقنع 
ولسه فيه مشكلة
هيعودونى أقول ايه عن الرب اللى بيعبده باقى البشر 
وأنا كنت هاعدى ازاى من المواقف اياها
اللى لاارادى مينفعش يتقال فيها غيريارب 

طيب ده الملحد بالوراثة 

نخلينا فى الاصعب بقى 
اللى فكر وقرر واختار الطريق اللى مفيهوش ربنا سبحانه وتعالى 
من وجهة نظره طبعا 
بسذاجة برضه هاقول ايه اللى ممكن يوصل انسان للطريق ده ؟؟

نقول انه صاحب عقيدة مثلا ولما شغل عقله حس انها عقيدة فاسدة 
وقرر يبعد عن السكة دى خالص 
امممممم
مش عذر 
ممكن يبحث فى العقائد الاخرى
ماهى دماغى اتركبت ان اللى بيعبد بقرة 
بيفهم عن الملحد 
اللى بيعبد بقرة عارف ان ليه رب 
وضل الطريق 
ودورنا ناخده فى الطريق اللى ربنا هدانا ليه
لكن اللى بينكر الحقيقة الواضحة ده مش قادرة أفهمه

شايفة ابليس معملهاش 
موصلش بيه الاستعباط للدرجة دى 

كفار قريش انكروا البعث 
علشان يهربوا من الحساب 
لكن ماانكروش وجود الاله 

ممكن نقول انه غضبان من الاستغلال السىء للدين 
سواء من رجال الدين أو من السلطة
واعتبر نفسه أرقى من التعرض للاستغلال باسم الدين 

برضه مش سبب مقنع

خلاص يبقى  حصلت ظروف 
والظروف دى اقنعته ان الحرية التامة هى الحل الامثل للارتقاء 
والكلام الغريب ده 

امممم
ماهو منهج الفلسفة فى الثانوية العامة كان بيقول ....
يادى منهج الفلسفة !!
لا بجد أنا كنت بحب المنهج ده قوى


منهج الفلسفة كان بيتكلم عن الفيلسوف الفرنسى جان بول سارتر 
وكان ملحد وبيقول ان الصدفة هى اللى قذفت بالانسان الى هذا العالم 
وان الانسان حر تماما وغير مقيد ولا حتى بالعبودية لرب
وانه مسئول تماما عن تصرفاته وارادته كاملة

والله هو أنا كان ممكن اكلم مسيو سارتر فى موضوع الحرية الكاملة ده 
بس الكتاب قال ان الظروف اللى عاشها سارتر 
كانت السبب فى مذهبه الوجودى
وقتها كنت مدمنة كتب أنيس منصور
وكان واجع دماغى بالوجودية هو كمان 
ومفهمتهاش برضه 

خلاص خلاص هارجع للموضوع تانى 

آه افتكرت 
الظروف اللى عاشها سارتر 
اللى هى هزيمة فرنسا فى الحرب العالمية التانية 
واحتلال المانيا لفرنسا بوظت دماغ سارتر 
وبقى ملحد 
ازاى ياعم المنهج ؟
لان سارتر كان حزين من اللى حصل لبلده 
وعايز اخواته الفرنجة يهبوا للتحرر من الاستعمار
ويبطلوا تخاذل واستسلام
فتطرف فى اعلاء حرية الانسان ومسئوليته عن افعاله 
لدرجة الالحاد 

طب يعنى سيادتك عايزة تقولى ايه من الرغى ده كله ؟؟
ماأنا جاية فى الكلام اهو 

مش لاقية أى مبرر للالحاد 

طب ايه الجديد ؟

مش فكرة ايه الجديد 

بس البنى ادم الملحد ده غلبان قوى
غلبان قوى بمعنى انه ظالم لنفسه 
 انه محروم من  كل الخير  من غير مايحس 
بمعنى انه غبى مع انه بيعتبر نفسه الأذكى
غلبان لانه فعلا يستحق الشفقة لو قابل ربنا بدماغه دى

بتكلم بجد 

بيعمل ايه لما يتعب 

لما ياخد مقلب محترم من الناس 

لما يشوف بس أى منظر حلو 
بيقدر يمنع نفسه ازاى يقول ..الله 

لما بيحتار 

لما بينجح 

لما بيحب 

لما بيتخنق

لما بيكسب 

كلمة يارب بيقدر يمنع شفايفه ازاى تنطقها 

شفايف مين يابنتى 
قلبه 
قلبه ..ايه وضعه فى الحكاية دى ؟

مش بيحن 

مش بيحس انه غلبان وضعيف 

مش بيحس انه عايز يقول زى جدتى الله يرحمها 
توكالى عليك يارب 

عزيزى الملحد 
وربنا انت غلبان
ربنا يهديك ويهدينا 

-----------------------------
الفكرة مستوحاة من 


بس نوران مسحت البوست المستوحى منه

2 التعليقات:



اندروميدا يقول...

في كلمات موجزه ... وان الموضوع يتسع فيه المجال لمئات الكتب اولا: الكفر ومنه الالحاد ... مرده الي نفس مريضه..كما قال عنهم رب العزه ... في نفوسهم مرض ... وقد يكون المرض في صوره تضخم في الذات .. اوعجز امام شهوات النفس او العقل ... والانكار هو سبيل العاجزين دائما ثانيا : ان الالحاد هو تجسيد لفكره ... الافراط .. او التفريط ... فالافراط في نهج العقلانيه يؤدي الي الماديه ومنها الي الالحاد ... كذلك الافراط في الحسيه يؤدي الي الغرائزيه فالدونيه حتي الالحاد .. اما الفطره السويه والدين القويم لا افراط فيه ولا تفريط ... الخلاصه ان الالحاد هو المرادف لمفهوم العدميه .. ايا كانت الاسباب لتلك العدميه .. وما انكار وجود الله او انكار البعث والحساب الا تعبيرا عن احساسهم بعدميه الحياه .. فهي ولا شئ من بعدها ... واخيرا كما قال ارسطو ... الحياه كوميديا لمن يفكرون، وتراجديا لمن يشعرون ...وكما قال خالد محمد خالد .. نحن نموت كما ننام ، ونبعث كما نستيقظ .. ومن انكر وجودهما عليه ان استطاع ان يحيا بلا نوم او بلا يقظه . تحياتي العطره

حفيدة عرابى يقول...

اندرو ميدا
أهلا بحضرنك
لأ مينفعش أنا اللى تحياتى العطرة لحضرتك وللتعليقات المميزة اللى بستفيد منها كتير
شكرا جزيلا يافندم
حضرتك شرفتنى