بص فى ورقتك

الظلم حرام على فكرة ومعادنا الخميس 

واخدة بالك ؟ هه؟ معادنا الخميس 

ده طالب الاعدادية اللى فشل فى الغش بسببى 

توضيح 
 الخبرة بتخلينى امنع الطالب من الغش بهدوء وحزم فى نفس الوقت 
وكمان بفهمه انا بعمل فيه كده ليه 
يعنى مثلا لازم اقوله انى مش اعرفه ومفيش مشكلة بينى وبينه 
وانى بمنعه من الغش لان ده شغلى اللى باخد عليه فلوس
وربنا هيحاسبنى عليه 

ولد لذيذ قوى استغرب كلامى 
وقالى يامِس انتوا بتقبضوا فلوس علشان تمنعونا نغش ؟؟
لأانتوا بتاخدوا فلوس علشان تشرحوا وبس

هحاول ..هحاول  اختصر
الاعداية كام لجنة وانت اشتغلتى كام وليه ؟
الاعداية 9 لجان وأنا اشتغلت اربعة 
منهم اتنين رسم ودين يعنى مش داخلين فى المجموع 

ليه اشتغلتى اربعه بس ؟
علشان يرحموا الولاد منى
وكمان مش ناقصين دوشة فى أوقات البلطجة دى 
ده كلامهم مش كلامى

مين سبب الغش فى اللجان ؟
المدرسين 

ازاى ؟
لو رئيس لجنة بيعمل نفسه مش هنا 
لو مراقب دور قلبه الحنين تلاقيه بيتقطع على العيال
لو معاون مراقب الدور بيلعب دور كبير
وبيفضل يلف على اللجان علشان يوزع الاجابات 
لو ملاحظ زميلك بينام فى اللجنة 
أو يعمل نفسه برضه مش هنا 
علشان تبقى انت اللى وحش وقاسى ومتعرفش ربنا كمان 

اللجنة المرة دى كان فيها احداث فارقة ؟
طبعا 

كم الالفاظ الرهيبة اللى سمعتها فى الشارع
الطوبة اللى اتحدفت على زميلتى 
المدرسين زمايلى اللى كانوا هيتجننوا عاوزين يوصلوا لتليفونى بأى طريقة 
علشان سمعوا فى التصحيح ان العيال هيضربونى اخر يوم
عقابا لى على فعلى الشنيع انى منعت الغش
اللى بعت تهديد الضرب مدرس ابنه كان فى لجنة من الاتنين اللى دخلتهم 
وانا ولا اعرفه ولا اعرف ابنه ولا اعرف ان فيه هنا ابن مدرس 
ولو عرفت مكانتش هتفرق 
بس فهمت ان اللجنة فيها طالب متوصى عليه بالقوى 
من القلق اللى شفته فيها 

ايه القلق ده ؟
محاولات مستميتة لشغلى عن الملاحظة
يعنى مراقب عام اللحنة اللى هى على الاقل ناظر مدرسة 
دخلت تكلمنى فى الجمعة 27 مايو ورايحة التحرير ولا لأ فى اللجنة 
ولما لقتنى مش مركزة معاها  
الست اضطرت تضغط على ايدى قوى يمكن افهم 
وارجع عن السكة البطالة اللى أنا ماشية فيها دى
بس طبعا مش بفهم خالص 
وبحب السكك دى تحديدا
تقوم الغلبانة تحرج وترجع بعد شوية تقولى رئيس اللجنة عايزك 
فى الاول قلت لها حاضر بعد اللجنة
لقيتها مصممة 
شغلت الابتسانات الصفرا ..
حاضر يافندم اتفضلى حضرتك وانا هاجى بعد دقايق 
طبعا استحالة كنت اسيب اللجنة واخرج 
فشلت محاولات مراقب عام اللجنة

يخلص الموضوع على كده؟
مش ممكن 

بعتت الدادة 
علشان خاطرى ..دول زى ولادك .
ده انا بقول لك علشان خاطرى وانت زى ولادى 

برضه الابتسامات الصفرا لما اصفريت أنا 
ربنا يسهل ياحاجة ..ربنا يسهل 

أنا عايزة حد يحط نفسه مكان طالب فى اللجنة 
بيتفرج على كل ده 
هيفهم وعنده حق ان مين غلطان ؟
لأ غلطان ايه ؟ مين عدوه وواقف ضد مصلحته؟
طبعا أنا 
ونخلى بالنا ان الطالب ده متربى فين ؟
   فى الشارع 
وده مش مجاز ولا تقليل من شأنه 
لانه فعلا طول النهار فى الشارع
 المدرسين مش بيشرحوا نهائى طول السنة
غير فى الدرس طبعا ومفيش شغل فى المدرسة
والولد لو راح هينضرب بالشلوت
ويتشتم شتايم 
شبه اللى انا سمعتها منه بالظبط على أقل غلطة هيعملها 

لأ لسه 
المدرسة فين ؟
فى حارة 
شكلها ايه المدرسة ؟
شبه العمارة بالظبط وليها بوابة وسلم زى العمارة 
ومش ممكن تصدق انها مدرسة 
ومع انها  فى نفس الحى اللى انا ساكنة فيه
طلعت عينى علشان اوصلها 
ارض المدرسة بلاط ومفيش حوش 
يعنى استحالة الولد يلعب 

اخصائية اجتماعية زميلتنا كانت فى المدرسة ونقلت 
قلت لها
الولاد  فى سنهم ده لازم يلعبوا رياضة مش كده ؟؟
بيلعبوا فين ؟
وطاقتهم دى تتوظف ازاى  وفين بدل ماكلها عدوانية كده
قالت لى مفيش 

بيبقوا صحاب قوى وبعدين يهرجوا برخامة مع بعض
التهريج يقلب جد ..الفصل كله يقوم يضرب بعضه 
ساعتها بقى كل مدرس حسب قدرته على الابتكار 
فيه اللى بيخلع حزامه وبينزل فيهم ضرب
وفيه اللى بيستخدم لسانه والشلاليت 
ربنا يديه الصحة 
وفيه اللى مالوش دعوة ومش هنا 

اقسم بالله انى مازعلت من العيال على الشتيمة اللى اخدتها
والتهديد بالضرب
ولا على صاحبتى اللى اتحدف عليها طوبة 

انا كان نفسى امسك السيد المحترم من هيئة الابنية اللى بنى المدرسة كده
والسيد المحترم من الوزارة اللى وافق على مكانها 
والناظر اللى سايب المدرس مش بيشتغل
طالما بيدفع النسبة اياها كل شهر
والمدرس اللى ممكن يشتغل أى حاجة
بس ميكونش فيها تعامل مع بشر لانه خطر عليهم 
والبيه المدرس اللى بيحرض ابنه وصحابه يضربوا الهانم 
احم 
اللى هو أنا يعنى
علشان اللجنة كانت شديدة 

شكلكم مضايقين 
فى عز النكد ده
ولد قالى 
ايه ياأبلة ماتفكيها شوية هو احنا فى لجنة ولا ايه ؟؟

طبعا ضحكت 
وقلت له بص فى ورقتك

11 التعليقات:



well يقول...

عارفة انا كتبت كذا حاجة ومسحتها قبل نشر التعليق
الموضوع مش سهل
ربنا يعينك
الوالد ملوش ذنب الذنب ذنب الاهل والشارع والمجتمع والحزب الوطنى .
عارفة وانا فى اعدادى كان معانا مدرس تاريخ وجغرافية كنا بنحبه اووى علشان دمه خفيف وعشان كمان كان بيدينا الامتحان بتاع اولى اعدادى وتانية اعدادى .. درس خصوصى
بس فى تالتة اعدادى اصدمنا علشان مش هو اللى بيحط الامتحان
تحياتى وبرضوا الموضوع مش سهل

حفيدة عرابى يقول...

well
:)
ازيك ياباشمهندس ياغايب عن التدوين وبتيجى كل سنة مرة
الامتحان فى الدرس ؟
سمعت عنها كتير قوى وبيتباع للعيال التانية كمان
السبب الرئيسى اننا كنا بنسكت ياويل
لما الولد فى اللجنة قالى انت مقفلة اللجنة واحنا مكناش بنيجى المدرسة
قلت له انت الغلطان ماتسكتش
قول للمدرس اشرح لنا يامستر
انزل للناظر
اشتكى فى الادارة
بس اتكلم بأدب وانت هتوصل لحقك
ربنا يسهل ياويل ويبقى فيه تغيير

شرفتنى :)

MR.PRESIDENT يقول...

تصدقي وتؤمني بالله إنتي مدرسه جدعه أجدها من أجدع شنب وقصه من اللي بيحاولوا يغششوا

انتي بتبني جيل ، وخلي الرسول اسوتك اتأذي عشان يوصل رسالته

أنا مبسوط والله بيكي

أنا لسه متدبستش في الامتحانات بس لو ادبست انتي هتكوني قدوتي باذن الله

صراحه أنا خايف من الضرب
بس اللي يخاف من الضرب أكتر من ربنا
يبقي أهبل

أنا طول البوست قلبي بتنفض لأن حاسس بالجو الارهابي اللي انتي كنتي فيه

عمي نفسك بس مش اعدادي لأ ثواني دايما بيروح في حراسة الشرطة وبيضرب كام طوبة علي كام بيضة ممششة

لورنس العرب يقول...

انا زعلان منك جدا جدا جدا ومتأثر كتير وقاعد أعيط كمان

حفيدة عرابى يقول...

استاذ بسام
لأ ماتقلقش علي حفيدة عرابى من الارهاب
احنا كنا رجالة ووقفنا وقفة رجالة :)
انا ببقى خايفة من الضرب برضه
بس يبان على مين ...مش أنا طبعا :)
شرفتنى

---------------

لورنس العرب
أهلا بحضرتك
ليه بس يافندم ؟
طب قول حضرتك زعلان من ايه

تامر علي يقول...

والله انا وانا صغنن كنت بكره المدرسين اللي بيغتتوا عمى :)))
لكن احياناً كان في مدرسين بيجيبوها بطريقة ظريفه ويحاولوا يتكلموا معانا قبل اللجنة عن شرف النجاح بالمجهود الفردي وان ربنا مش هيبارك للغشاش ومن غشنا فليس منا لحد ما نسخن ونقول مش هنغش وطبعاً بعد اللجنة نعض اصابع الندم هههههههههه
ربنا يكون في عونك والله المسألة دي معقدة جداً

حفيدة عرابى يقول...

أستاذ تامر
:)
ماهو أنا أحيانا كنت بكرههم برضه
لكن محصلش اننا اعتبرنا ان الغش حقنا المطلق
ومحصلش اننا هددناهم بالضرب
الغش على أيامنا كان محتاج مجهود منا
لكن دلوقت الطالب بيعتمد على مجهود المدرس وبييجى اللجنة مش جايب معاه حاجة يغش منها وعايزنى اتصرف :)
سيكولوجية الغشاشين اتغيرت خالص يافندم:)

ربنا يكون فى عون الجميع
تحياتى لحضرتك

مهندس مصري يقول...

ربنا يكون في عونك
البجاحة بتاعة الغشاشين زادت قوي

حفيدة عرابى يقول...

اللهم آمين ياباشمهندس
وشكرا جزيلا على الدعم المعنوى :)

يا مراكبي يقول...

إنه ذلك العصر العجيب والغريب الذي يصبح فيه الباطل حقاَ والحق باطلاً
:-(

حفيدة عرابى يقول...

باشمهندس أحمد
هييييييييى دنيا
هنعمل ايه ادينا بنحاول
أنا فرحت جدا جدا لما الحمد لله ماحصليش شرف الملاحظة فى الاعدادية دور تانى
ربنا كبير
تحياتى لحضرتك