فيس بوك ويوميات الثورة 5


10 فبراير
- وأنا خايفة ومش فاهمة

- ولو الثوار اعتبروا ان عرض الجيش مش مقبول ..رد فعله هيكون ايه ؟

- باختصار : لا تقلقوا من تصريحات جدو عمر سليمان لأن الكل يعلم وأولهم افراد القوات المسلحة ان عصر الأنظمة العسكرية قد انتهي وما كان الجيش لينهض الا ليملأ فراغا اخذناه نحن بالفعل واصبحنا نحن مصدر الشرعية..الجيش المصري لا يستطيع الانقلاب واقامة نظام عسكري وكل المصريين في الشارع يحتجون..وهذا هو الفارق بين 1952 و 2011 ..وما لا يريد ان يصدقه اجدادنا مبارك وسليمان!!!ه
(تايه فى وسط البلد)

- دايما التحرير أجمل ما فى الصورة

- ياترى ياشومان أنت مع مين وضد مين ؟ :(

- عزمى بشارة :)

- يارب تبقى اخر مرة أسمع فيها أوباما واللى زيه بيستظرفوا وبيتحكموا فينا وفى بلادنا

- اللهم إنا نجعلك فى نحورهم ونعوذ بك من شرورهم

- ايه الفرق بين التنحى ونقل السلطات كاملة لغيره ؟

 - قناة المحور ..لأول مرة أحس ان عبد الله بن سلول كان راجل طيب وابن حلال

- اذا ما اراد الجيش الانقلاب واعلان نظام عسكري كان فعلها قبلا..البيان رقم (1) اخذ هذا الرقم لأنه البيان الأول للقوات المسلحة في ظل الثورة المصرية الجديدة...الف مبروك يا شعب وجيش مصر
(تايه فى وسط البلد)

- النهارده ذكرى وفاة مصطفى كامل ......لا يأس مع الحياة يارجالة :)

- منظر ميدان التحرير فى منتهى الجمال

- العربية بتجيب الكلام البايخ ده منين ؟ :(

- بيقول نفس كلام العربية :(((((

- ربنا ياخدك ياشيخ ...كده حرام والله

- مينفعش على فكرة ...والله ماينفع لازم يطلع حد بعد الكلام ده يقول ان الراجل ده سافر ...مات ...لكن كده والله حرام :((

- عمر سليمان بيهددنا

- عزمى بشارة ...خطاب بائس ومثير للرثاء

- الليلة دى نهايتنا أو نهايته

11فبراير
- مش عارفة ايه الصح ...يروحوا العروبة ولا ماسبيرو ولا يفضلوا فى التحرير ؟
لكن أنا ندمانة على كل لحظة وافقت فيها انك تبقى ريس علينا

- نهارنا نادى ونهار الندل مش باين

- مش عارفة ..ممكن يكون انضمام الضباط للمتظاهرين رسائل من الجيش اننا نعمل حاجة ووقت الجد هيقف معانا ؟

- ياحى ياقيوم برحمتك نستغيث أصلح لنا شأننا كله ولا تكلنا الى أنفسنا طرفة عين

- يامصر قومى وشدى الحيل كل اللى تتمنيه عندى

- فهمنا ..السادسة وثلاث دقائق .. أول ماعرفت انطق بعد خطاب التخلى



- يارب لك الحمد كما ينبغى لجلال وجهك وعظيم سلطانك

- وأهم حاجة انى أنا ميس رشا هانم وبلافخر اللى هعيش بإذن الله أعلم أجيال كتير ايه اللى حصل فى اليوم ده :)

- مصر يامه ياسفينة مهما كان البحر عاتى فلاحينك ملاحينك يزعقوا للريح تواتى

- والعروبة فى كل دار وقفت معانا

- من النهاردة دي بلدك انت، ماترميش زبالة، ماتكسرش إشارة، ماتدفعش رشوة، ماتزوّرش ورقة، اشتكي أي جهة تقصّر في شغلها.. متسمحش لظابط يعذب مصري زيك.. اوعى تصنع "مبارك" تاني.. استمتع بحياتك.. اقرا وثقف نفسك.. حب نفسك وحب الناس اللي حواليك.. اوعى تعاكس بنات في الشارع.. اوعى تهين حد.. اوعى تسخر من حد.. أوعى تنسى حريتك أبداً.. خلي بلدك اجمل بيك ...منقول

- عايزة أنااااااااااااام

- القرضاوى بيقول ان التليفزيون المصرى بيفترى الاكاذيب
حرااااااام؛)

- ونهارنا نادى ونهار الندل مش باين
تسلم ياتميم :)

- ومن وقت للتانى كده فكرونى انه مشى وخد معاه سليمان :)

12 فبراير
- بلادي بلادي لـك حبي وفؤادي لـك دمي ونفسي
هل خلق الله وطنا أغلي مقاما وأسمى شأنا وأجل آثارا وأغنى تربة وأصفى سماءً وأعذب ماءً وأدعى للحب من هذا الوطن العزيز!!؟
اسألوا العالم كله يجيبكم بصوت واحد إن مصر جنة الدنيا وان شعبا يسكنها ويتوارثها لأكرم الشعوب إذا أعزها وأكبرها جناية عليها وعلي نفسه إذا تسامح في حقها
(مصطفى كامل)

- والله أم الدنيا وابوها كمان :) ......من التعليقات على الجزيرة 
(صاحب التعليق سودانى الجنسية )

- صباح شبابك يامصر بيغسلوا الميدان ...
طب والله كان نفسى أبوس ترابه قبل مايتغسل

- الف سلامة عليك
تسلم وتسلم وقفتك على السلم وميكروفونك اللى نادى وصحانا ياأستاذ محمد
كنت بحب جدا اصرارك حتى لو محدش واقف غيرك ...بس صوتك وصل :)
 (عن صورة لمحمد عبد القدوس مسحولا من قوات الأمن )

- صالحت بيك أيامي سامحت بيك الزمن....نستني بيك آلامي ونسيت معاك الشجن
كنت بغنى على فيس بوك من فرحتى انه مشى وبعدين نجرو كتب التعليق ده 
الحقى يارشا هانم ..مبارك رجع ..مبارك رجع 
لجزء من الثانية اتخضيت وعقلى وقف خالص وبعدين وقعت من الضحك 

2 التعليقات:



يا مراكبي يقول...

أحلى لقطة هي لقطة تعليق نيجرو :-))

حفيدة عرابى يقول...

نجرو ده مجرم أصلا :)