فيس بوك ويوميات الثورة 4


5 فبراير

- والحل الأمثل للخروج من الازمة السياسية الراهنة انى أقوم اضرب الرنجة اللى فى التلاجة وأعمل دماغ أقدر اتعامل بيها مع تصريحات المسئولين وبرامج الاعلاميين
نلتقى بعد الفاصل


- أنا مش فاهمة يعنى مفيش طريقة لتعديل بعض مواد الدستور الاعن طريق رئيس الجمهورية اللى بيقدم التعديلات لمجلس الشعب ؟


- شعار الحكومة والحزب
خليك هنا خليك ...بلاش تفارق
خايفة من بكره واللى هيجرى لما تغيب


- اكتفى الكاتب الصحفى فهمى هويدى بثلاث كلمات فى عموده الصحفى
" كلنا ميدان التحرير


- الشعر لازم يكون جميل وهو مكتوب والإلقاء يزود جماله.. مش العكس
الكلام عن هشام الجخ


- انها تمطر :)
الدعاء لله يكشف الغمة


- طيب من غير ماأضيع فرحة حد
قبل كده كمال الشاذلى دوره انتهى وبقى رجل المرحلة أحمد عز
مجرد وشوش بتتغير وبس على أساس انهم اتحرقوا ودورهم انتهى
مثال تانى
ياسر عرفات لازم يموت كفاية عليه كده والمرحلة الجديدة ينفع فيها ابو مازن
سياسة واحدة والله


  6 فبراير

- ولما تعبت من المناقشة بعد أكتر من ساعتين قلت لمديرة المدرسة الحل الوحيد انى اعمل لك حساب على فيس بوك وسيبك خالص من موظفين أنس الفقى
قالت لى لأ ياأختى أنا هتفرج على مهند
ومن هنا أعلن انى مبحبش مهند


- أمر على الديار ديار ليلى ......اقبل ذا الجداروذا الجدار
وماحب الديار شغفن قلبى........ولكن حب من سكن الديار

ده الاستاذ قيس بن الملوح لكن أنا بالبلدى يعنى عايزة أبوس أسفلت التحرير


7فبراير

- ماهو يوم واتنين كمان وهنلاقى كتير زهقوا والثورة هتبقى مجرد اعتصام زى ماكتير قالوا
وهيسبوهم لوحدهم فى التحرير يكلموا نفسهم ومش بعيد يطلع عليهم ناس مش قابضين ولاحاجة وزهقوا بجد وينهوا الحكاية


- عايزين نبطل أخبار وفيديوهات ونفكر نعمل ايه


- السيد عمر سليمان : اتعلم ديموقراطية ازاى وأنا معرفش يعنى ايه أنا انسان ولى حقوق
وأنا عارفة ان مجلس نيابى يعنى سرور وموافقة وان انتخابات يعنى تزوير
وأنا شايفة القاضى مقيد مع ان استقلاله شرفه
اتعلمها ازاى لما شيخ الازهر والمفتى وأنا موظفين والموظف لازم يطاطى علشان يقبض مرتبه
يافندم شباب التحرير جابوا الكتب وفصول محو الامية خلاص اتفتحت ويوم النتيجة متبقاش تقول اننا معندناش ثقافة ديموقراطية


- طيب أنا منعت نفسى كتير انى أبص ولو من بعيد على صور الشهداء
بس أقسم بالله لغاية ماأموت سواء الثورة نجحت أو لأ انى لى تار عندك ياحسنى يامبارك أنت وكل واحد فى نظامك


8فبراير 

- حتى لو التصعيد مقصود
حتى لو رتبوا البيت والكبار سيطروا على كل حاجة وفاضل بس انه يمشى
حتى لو اللى بيحصل جزء من الفوضى الخلاقة اللى بدعها الامريكان
الشعب يريد إسقاط النظام
النظام ...... مش مبارك لوحده علشان محدش ينسى


- بالله عليكم فى كل مرة بتقولوا فيها لحسنى مبارك ارحل
ماتنسوش تقولوها كمان لعمر سليمان
لو ماسمعهاش دلوقت وبنفس اللهجة اللى بتتقال بيها لمبارك يبقى احنا معملناش حاجة
خلينا دايما فاكرين ان الشعب يريد إسقاط النظام ....(النظام )


9فبراير

- ولما قلنا لازم نخلص الشقة علشان الواد يتجوز لقينا العمال فى التحرير :)


- حد ينصحه يرحل قبل الفالانتين ......الله يرحمك ويحسن اليك ياحريرى

---------------------------

الكلام هنا قليل لان كان فيه لينكات كتير 
وأنا بنقل الكلام كنت حاسة انى نفسى أجيب معاه التعليقات
وتعليقاتى أنا كمان عند الاصدقاء 
أول مرة أخاف كده على حسابى فى فيس بوك 
وأحس ان لى حياة هناك وتاريخ خايفة عليه وعايزة أحفظه 
ماليش دعوة أنا عندى حاجات حلوة قوى عايزة أحكيها
كل استيتس هنا نفسى احكى كان امتى وليه
كنت بعيط وبضحك فى نفس الوقت 
احنا عشنا أيام جميلة 
كانت كلها قلق ورعب وتوتر بس جميلة 
يارب لك الحمد كما ينبغى لجلال وجهك وعظيم سلطانك

5 التعليقات:



شمس النهار يقول...

انتي بتعيشيني الايام دي تاااااااني

بكل تفاصيلها ومشاعرها

وخصوصا اني كنت بنزل التحرير وبكتب علي الفيس والمدونة وبحار اللي حواليه اللي كانوا مش حابيين موضوع التحرير ده

كنت بحارب معاهم لحد مااخدهم هناك

حفيدة عرابى يقول...

شمس هانم
أهلا بحضرتك
ده انا امبارح كانت حالتى حالة
زى مااكون عايزة ارجعها تانى
لأ احنا ربنا كرمنا قوى اننا شفنا الايام دى
تكمل يارب على خير

نورتينى ياشمس هانم :)

خواطر شابة يقول...

عزيزتي اللي فرجها على شعب مصر وتونس قادر يتمها على خير عقبال الفرج القريب لشعوب اليمن وليبيا وبالنسبة لسوريا بشار الاسد يارب يا تهديه يا تأخذه أخذ عزيز مقتدر
دمت بكل الود عزيزتي

مهندس مصري يقول...

انتي بتجيبي الحاجات دي إزاي من فيس بوك
أنا ما بأعرفش أجيب الحاجات القديمة كده

حفيدة عرابى يقول...

خواطر شابة
اللهم آمين يفرجها ربنا ويتمها على كل الشعوب اللى بتطالب بس بحقوقها
وربنا ابتلاها بحكام فى منتهى الغباء

تحياتى ليكى


------

مهندس مصرى
حضرتك بتفضل تنزل بالماوس كتير وكل ماتلاقى مكتوب منشورات أقدم بتضغط عليها لغاية ماتوصل للتواريخ اللى عايزها

لو اخدتها كوبى لبلوجر بتلاقى مشاكل رهيبة فى تنسيق الخط
فبتحفظها فى ملف وورد بعد ماتضغط على ابقاء النص الأصلى فقط فى الوورد

أنا بعمل الكلام ده فى كل استيتس
ومش عارفة بصراحة فيه طريقة تانية أسهل وموفرة للوقت ولا لأ

هى طريقة بايخة ومملة بس معرفش غيرها
وكنت ناوية أطالب فيس بوك يعرفنى اعملها ازاى أو يضيفها كخاصية جديدة

تحياتى لحضرتك