فيس بوك ويوميات الثورة 3


4 فبراير
- أول سؤال ساذج
احنا بندرس سيرة الرسول عليه الصلاة والسلام ليه ؟
يعنى لما أعرف فعل ما للنبى فى غزوة من الغزوات هل أنا مطالبة باستخدام الاسلوب ده مع كفار قريش بس ؟
هتوصلونى لمرحلة انى أقول ان كفار قريش كانوا ولاد حلال وطيبين :((

- لو مبارك معملش فى حياته غير انه قلل سقف طموحاتنا واحساسنا اننا نستحق حياة أكرم كتير من اللى شفناها فى عهده فانا مصره انى أريداسقاط النظام


- شباب 25 يناير
طيب هاقولكم على حاجة
عارفين أحمد عرابى ...قالوا على ثورته هوجة وانه السبب فى دخول الانجليز مصر وانه قليل الادب ازاى يتهم الخديو بالخيانة وانه محدود الذكاء قليل الثقافة
وانه كداب وماقالش لقد خلقنا الله أحرارا وانه تخلى عن الثورة وتذلل للانجليز علشان يرجع من المنفى ولما رجع ماشاء الله عليهم كانوا بيبصقوا على وجهه
وكلهم ولا ليهم قيمة وهو أحمد عرابى

- أكيد يعنى مش بنصدق أخبار التليفزيون المصرى الرسمى والخاص وياريت كمان الاخبار المنقوله عنه
يعنى أى قناة اخبارية تكتب عن التليفزيون المصرى نبقى لا سمعنا حاجة

- هيرجعوا بالسلامة منصورين ومجبورين الخاطر ومبارك هيرحل بإذن الله
لكن خلينا فاكرين ان الهدف الرئيسى اسقاط النظام
يعنى لا عمر سليمان ولا أحمد شفيق ولا غيرهم
يعنى المعترضين على نزول الشباب النهارده يجهزوا نفسهم ان الحكاية مش مبارك مع السلامة وخلصنا

- قناة الرأى حالا

- طب والله نهايته النهارده بإذنك يارب:)

- هو السلام الوطنى حلو اوى النهارده كده ليه :)


- محمد يانجار عايزة اعمل لايك حرام عليك

- الجزيرة كانت بتموتنى كل ماأم كلثوم تغنى
أنا ان قدر الاله مماتى لاترى الشرق يرفع الرأس بعدى
بعد الشر عليكِ ياحبيبتى :)

- خالد صلاح
لمصلحتك انت واللى زيك واللى مشغلينك متحاولش تنظر وتتفلسف دلوقت
استخبوا شوية فى جحوركم على ماالايام دى تعدى علشان اقسم بالله مضمنش أنا شخصيا ممكن أعمل ايه لو ربنا أراد انى اتحكم فى حد فيكم

- المذيع فى القناة الاولى بيقول ان التليفزيون المصرى دايما كان بيعبر عن كل الاراء وبكل نزاهة ......الدمعة هتفر من عينى خلاص

- الاخوة اللى بيتكلموا فى التليفزيون عن الفوضى
أنا مش تعبانة ومش عايزينى أروح الشغل وأنا اللى بروح كل يومين كده أغلس عليهم وأنشر الافكار الهدامة بينهم وفى منتهى السعادة علشان معنديش وزير ؛)

- أخويا وهو داخل التحرير قابل شباب فى منتهى الذوق وفهموه ان الريس تنحى خلاص ومالوش لازمة ارجع
كلمنى فى التليفون قلت  له لأ ياحبيبى بيضحكوا عليك وماما كانت ناوية تبلغ عنى أمن الدولة :)

- فى واحدة على القناة الاولى بتقول مامعناه ان اللى راكبين جمال وخيول من أعداء مبارك وعملوا كده لتشويه صورته
والمذيع بيقولها ليه مش عارفين تحققوا نجاح على فيس بوك
البنت بتقول انها واقفة مع زمايلها على مداخل التحرير وبتقنع الشباب يرجعوا كفاية كده :)

- وبدأنا فى النكد
كلام أحمد شفيق كله استخفاف بعقولنا
مفيش فايدة

- استاذ عماد اللى كل نصف ساعة يتصل من التحرير على القناة الاولى وفاضل يقول
اجتازت مصر فترة عصيبة فى تاريخها الاخير ...ممكن تقولى بتشحن ازاى؟
أنا مش لاقية كروت شحن من اسبوع

- من تويتر
نداء من الطلبة للثوار والحكومة : متطولوش الموضوع , كتاب التاريخ كبير لوحده ! الحكاية مش ناقصة (دى من نجرو )

- الخطة كبيرة
رئيس الوزارة يقول العدد قليل ويعمل نفسه كان مسافر النهارده
والتليفزيون ماسك دماغ الناس مبهدلها وخصوصا بفيلم الأجندة
وحظر التجول بيقل علشان يقولوا للناس بطريق غير مباشر ولا هنعبر العيال دى وهنسيبهم يلعبوا والناس بتزهق والشباب المعتصمين بيتعبوا
ده غير الكلام ان الريس ابونا واحنا بقلة أصلنا عايزين نرميه فى دار المسنين بعد ماكبر وماما بدأت تقولى حرام بقى الراجل اتبهدل فى أواخر أيامه :(( 

- شباب التحرير
عارفة والله انى فى بيتنا وانتم فى الشارع وتعبتم وكتر خيركم
لكن ماتسمعوش كلامهم
لو سبتم الميدان مش هيسمحوالكم ترجعوا تانى أبدا
ده ممكن يبيعوا الميدان كمان واحنا نايمين :(

- الظاهر كده والله أعلم ان جواز مبارك من مصر كاثوليكى

3 التعليقات:



خواطر شابة يقول...

متابعة ومستمتعة واستعيد معك لحظات عشتها انا ايضا معكم لحظة بلحظة

شمس النهار يقول...

عارفة مره التليفزيون المصري علي الصبح قالك ان اللي في التحرير سلموا ورجعوا وانفض المولد

في اللحظة دي بناتي كانوا سبقوني مع اصحابهم وانا كنت بلبس وهحصلهم
رحت متصله بيهم قالوا لي ده كدب احنا كلنا هنا

بجد حسيت ساعتها ان ربنا هينصرنا علي الكدابين دول ونزلت ولاقيت العدد اكبر مماتوقعت

حفيدة عرابى يقول...

خواطر شابة
ومتابعتك واستمتاعك اسعدونى جدا
ومتأكدة من متابعتك ومن قلبك اللى كان بيدعى لنا
عارفة ياخواطر انى شفت تعليقك من بدرى ومعرفتش ارد عليه
كلامك عن اللحظات وقفنى عند أمنيتى انى نفسى احفظ كلامنا وتعليقاتنا وضحكنا ودموعنا وقتها
احنا عشنا تاريخ
الحمد والشكر لله
ربنا يكمل فرحتنا ويتمها علينا وكل بلادنا يارب
شرفتينى :)


-------------------

شمس هانم

أهلا بيكى
الاعلام كان أول حاجة لازم يحصل فيها تطهير بعد الثورة
التضليل كان منظم وممنهج وبافترا
لقيتنى اكتر من مرة بحس ان رمز النفاق عبد الله بن سلول ولا حاجة بالنسبة للى شفناه منهم
وعينا المغيب فى حاجات ووعى الناس المغيب فى حاجات تانية الاعلام مسئول عنه بنسبة كبيرة
كدب وتضليل مالوش حد
ربنا يكرمنا ويبقى عندنا مهنية تحسسنا اننا عايشين

حضرتك شرفتينى