فيس بوك ويوميات الثورة 2



2 فبراير 

- وهتفت الشعب يريد اسقاط النظام

- من يتظاهر دفاعا عن الرئيس ونظامه أخجل ان أصفه انه يستحق هذا الرئيس ونظامه

- الرئيس لم يقم بحل البرلمان أو الغاء الطوارىء أو وضع دستور جديد للبلاد

- طيب والخيول والجمال رايحة تهتف هى كمان مش هيمشى ؟ :((

-المكسب الوحيد الذى تم انتزاعه بالقوة هو دهس مشروع التوريث بالاحذية لذا فقائمة الطلبات المشروعة طويلة وهناك الكثير من الفواتير واجبة السداد

- بالله عليكم محدش يقول المصريين بيضربوا بعض
المواجهة دلوقت بين شرفاء بيعملوا لمصلحة الوطن وبين بلطجية بيعملوا لصالح نظام بيفقد اخر أوراق التوت

- اعتذر بشدة عن اعتقادى ان مشروع التوريث انتهى ...كل الاحتمالات متاحة وبقوة

- اللى فى ميدان التحرير بعت لهم الهجانة يخلصوا عليهم واللى قعدوا فى بيوتهم بعت لهم قنوات التليفزيون تجيب لهم جلطات
ارحمنا يارب

-المشكلة مش اننا نعمل ريموف فى فيس بوك للمنتفعين من نظامه لكن اللى هقابلهم فى الشغل والشارع والدنيا كلها أعمل فيهم ايه ؟ :(

- نفسى أفهم ايه الاضافة اللى حصلت فى خطاب 1فبراير 2011
انه قال مش هيرشح نفسه تانى !!!
طيب يرشح نفسه ليه بعد 30 سنة
ولا كان عنده أمل يعيش ويمتلك القدرة الصحية والعقلية على ادارة شئون دولة وهو فى التسعين

-  نقول تانى ... خطاب 1فبراير 2011
انه قال هيعدل المواد 76 و77 !!!
أكيد نسينا كلنا الاستفتاء المزور اللى حصل لتمرير المادتين
عن نفسى مش ناسياه على الاقل علشان حصل فيه تحرش وقح بالصحفيات وكل مرة بيتكلموا فيها عن المادتين بفتكر تحرشه بالصحفيات وبمصر كلها لتمريره

- خطاب 1فبراير 2011
مفيش كلام ابدا عن حل البرلمان ولا تشكيل لجنة لوضع الدستور ولا الغاء الطوارىْ
ليه الفرحة العارمة بالخطاب ؟
ايه الوعود العظيمة اللى قدمها
انا بحاول أفهم وأتناقش مش لاقية حد يجاوبنى

- والمصريين فرحانين و بيتصوروا مع الدبابات زى مابيتصوروا مع أبو الهول
بس أبو الهول كان ممكن يحاول يحميكم
ابو الهول والشعب ايد واحدة :(

- ولما اتقتل رفعت المحجوب عرضوا صور لاجانب يشتبه فى ارتكابهم للجرم الشنيع

- نقول كل اللى نفسنا فيه علشان معنديش أمل أستمتع بالكلام والنت وفيس بوك تانى

- المرة  دى بقى سؤال ساذج
لما القلة المندسة احتلت ميدان التحرير ونشرت الخراب والفوضى وسمحت للبلطجية والمساجين ينشروا الخراب والفوضى
اختفى فين الاخوة المختلين عقليا والاخوة هواة التفجيرات أسكت الله حسهم ابدا ؟


3 فبراير

- محدش يعتمد على أمريكا
بمنتهى البساطة رسائل أوباما كلها قنابل وكلها مساندة لحبيب قلبه صمام أمان اسرائيل
حتى لو شكل الكلام غير كده
أمريكا بتحب الحركات والمناظر
تحب يبقى عندنا منظر دولة ومنظر رئيس ومنظر ديموقراطية ومنظر اقتصاد

- يارب زيح الغمة وسببها

- اللى بيحصل فى التحرير مش فتنة ومش حرب أهلية ومش اقتتال بين فئات الشعب ولااضطرابات بين مؤيدى ومعارضى الرئيس ولافيها ناس من ايران ولاحزب الله ولا حماس ولايهود ولا أمريكان
اللى بيحصل فى التحرير بلطجة وقلة أدب و مؤامرات نظام فاشل حاسس انه فى معركته الأخيره وربنا مش هينصره

- الف سلامة ياشبكة رصد


- كنت متخيلة ان النت رجع علشان البوكس هيقف بضهره على باب فيس بوك وهيلمنا كلنا

بس زى العادة يعنى طلعت ساذجة

مرحبا بكل أخ مختل عقليا وبكل أخ اختار صورة مبارك لبروفايله والاجمل انه بعت لى طلب صداقة

انا عندى ميول ارهابية وسادية قوية ومكنتش عارفة أمارسها على مين بالضبط

ياهلا


- للمرة المليون اللى فى ميدان التحرير مش على بن ابى طالب والسيدة عائشة واحنا محتارين وخايفين من الفتنة ومش عارفين نقف مع مين

مع ان حتى الموقف ده ممكن نقول فيه كلام كتير

اللى بيحصل فى التحرير شباب رافض لنظام حكم ظالم وقاتل وخاين والنظام ده بيسحل فيهم وبيقتلهم ولو مش هنقدر ننزل يبقى على الاقل بلاش نضربهم فى ضهرهم بخوفنا وكلامنا غير المبرر عن مصريتنا وطنيتنا حماها الله

حماها الله ومن أسبابه شباب التحرير


- ممكن أقول من غير اتهامى بخيانة المؤسسة العسكرية والكلام الكبير ده انى استغربت من هدوء الجيش وانه ازاى وافق الدبابات تمشى فى الشارع مكتوب عليها يسقط حسنى مبارك

وان ده رمزيا مش مقبول ابدا الا لو الجيش فى حالة انقلاب

وان نزول وزير الدفاع والحكومة مقالة وزيارته للضباط كان غريب ولما أعلن انه فى الوزارة الجديدة قلت الستر من عندك يارب

وانى مقتنعة ان الجيش مش مؤهل لفض اشتباكات بين مواطنين بس كان يقدر يمنعها قبل ماتبدأ


- أحمد شفيق بيتكلم عن الملك فاروق وأكيد مااخدش باله ان فاروق خرج بعد 3 أيام بس من الثورة وفضل مصلحة البلد ومحدش يقولى الجيش والشعب كانوا ضده لأن أكيد مش كل الجيش ولا كل الشعب كانوا ضده

وأكيد كان ممكن يجيب هجانة ويدفع لهم جنيهات دهب كمان ويقضى على الانقلاب فى ثوانى


- كل المدافعين عن أخلاق أحمد شفيق ...المنظومة الفاسدة لاتنتج شرفاء

رئيس الوزراء المبجل بيتكلم عن حسنى مبارك الاب

أنا حسنى مبارك مش ابويا

حسنى مبارك موظف عندنا على درجة رئيس جمهورية


- هاقول الكلام كتير ومش هازهق

اللى بيحصل مش فتنة والنزول والمشاركة واجب واللى مش هيقدر ينزل مايقللش من عزيمة اللى بينزلوا

ومصر مش فى خطر من المظاهرات

مصر فى خطر من تلاتين سنة ويمكن ربنا أراد نشهد على انقاذها من الخطر ده


- أحمد شفيق توصل بيتك بالف سلامة ان شاء الله

خلصت المؤتمر الصحفى ؟ :((

بتفكرونى بكل وش اسرائيلى بيطلع وبعده بيبدأ الضرب فى أهالينا

الضرب شغال تانى فى التحرير


- أحمد عز وزهير جرانة والمغربى والعادلى موظفين

الوزراء فى مصر موظفين

عايزين محاكمة

يبقى نحاكم أبونا اللى ساكن فى شرم الشيخ


- أولا أنا بخاف من عمر سليمان وأول مابيطلع فى التليفزيون بحس انى هعترف


- عمر باشا سليمان

سيادتك بتستهبلنا

وكلام حضرتك كله غلط ومجلس الشعب لازم يتحل هو والشورى والمحليات وتتشكل حكومة انتقالية تعمل لجنة لوضع الدستور والدستور يحدد طريقة اجراء الانتخابات وبعدين نبقى نعمل مجلس شعب جديد

كان معك ميس رشا ومواعيد الدروس الخصوصية محجوزة كلها على فكرة يعنى


- كلام عمر باشا سليمان عن الشرطة المسكينة

فكرنى بتصريحات بوش عن حق اسرائيل فى الدفاع عن نفسها


- تصريحات أحمد شفيق وعمر سليمان فى يوم واحد مؤامرة لتحويل الجمعة لجمعة الخلاص فعلا لكن من الشعب مش من النظام


- حد يسكت العيال اللى على المحور دى قبل ماارتكب جناية


- بالله عليكم ممكن حد يقولى يعنى ايه فتنة وايه وجه الشبه بينها وبين اللى بيحصل وهيحصل فى التحرير ؟


2 التعليقات:



شمس النهار يقول...

كلام جميل جداااااااا

ومنطقي وكويس انك نقلتيه من الفيس بوك للمدونة
الحصول عليه هنا اسهل
والبلوجر بيأرخ مظبوط

حفيدة عرابى يقول...

شمس هانم
أهلا بحضرتك
:)
بس الكلام الجميل ده أنا غيرت رأيى فى كام نقطة منه بعد رحيل المخلوع
وكنت ناوية فى اخر بوست اكتب انا غيرت رأيى فى ايه
زى مثلا الاضطرار للموافقة على الانتخابات قبل الدستور
المهم ربنا يكتب للغالية علينا كل الخير

حضرتك نورتينى