نوستالجيا 2

من أغلى أحلامى 
وكان مسيطر على تفكيرى قوى 
انى اسكن فى عوامة 
وبعدين الحبيب المجهول 
احم ....
نمشيها سى عبده الحليم حافظ 
ييجى بمركب ومعاه جيتار ويغنى لى ( أنا لك على طول )

كنت بحب الاغنية دى بكل حاجة فيها 

لماكبرت شوية بدأت أفكر فى التفاصيل

أنا مش عاجبانى حكاية انه يجيب صحابه معاه 
صحيح كانوا بيعزفوا حلو قوى 
بس مش عارفة ...مش عاجبانى 
امممممممم
طيب خلاص
تنزل المرة دى 
المرة دى بس
مفيش مانع انه يجيبهم مرة واحدة 
علشان أنا بحب الجيتار والاكورديون قوى
وعلشان تكمل الصورة الحلوة 


بس أنا مش عايزاه يجيب معاه أحمد رمزى
آه صح كده 
مينفعش أحمد رمزى خالص 
هو أصلا مش لايق عليه يصاحب أحمد رمزى


فاضل مشكلة العوامة 
نعمل فيها ايه دى ؟؟؟؟ 
وكمان ماما استغربت من فكرة العوامة 
وواضح كده انى مش هعرف اقنعها بيها 

ولا مشكلة ولا حاجة
مش لازم عوامة 
ممكن يغنى تحت البلكونة 
لكن مينساش الجيتار 

يابنتى نخلى عندنا مرونة شوية 
يعنى لو جاب عود  مش هيحصل حاجة 

لأ لأ جو الاغنية والبلكونة مش جايب عود 
هو الجيتار كويس
ومش عايزةال..
احم ....
نمشيها سى عبده الحليم
مش عايزاه يقع خالص 
ولو وقع مش هاضحك عليه زى ايمان ماضحكت 
وبعدين هى ايمان دى حلوة قوى كده ليه 
يلا ماعلينا 

-------------

أنا عايزة أفضل كده طول عمرى 
ومش عايزة أعمل زى ماعملت النهارده 
سمعت الاغنية واستمتعت بيها 
بس قلت له ياسى عبده 
الكلام ده خيالى قوى

15 التعليقات:



شمس النهار يقول...

:))))

المفروض جيلك يمشيها عمرو دياب

اومال جيلي انا نماشيها ايه سي عبد الحمولي والست المظ

:))))

حفيدة عرابى يقول...

على فكرة ياشمس هانم :)
عمرو دياب كان مطرب الاغنية الشبابية لجيلى
بس سى عبده الحليم كان هو الأصل والمكتسح واللى أصلا مينفعش يتقارن بحد

(ست* جنى* الحسن) يقول...

سلامو عليكو
لا يا قمر مش خيالى اوى ولا حاجة
لسه فى ناس عندها شوية رومانسية
زيك كده
ربنا يفرح قلبك ويسعد ايامك ويرزقك ابن الحلال اللى يستهلك
انى احبك فى الله

حفيدة عرابى يقول...

(ست* جنى* الحسن)
أهلا بيكى
:)
لأ ماهو أنا عاتبت نفسى النهارده انى اعتبرته خيالى
تعليقك اسعدنى جدا
اللهم آمين
وأنا كمان حبيتك فى الله :)
أحبك الذى أحببتنى فيه

MR.PRESIDENT يقول...

الشعب يطالب
بخفض سقف التوقعات
عشان الغلابة اللي زيي
ومعندهومش لا جتار ولا عوامه ولا عود
أهم حاجة واحد يكون عارف ربه يخاف عليكي ويكون بيعزك

ويرزقني يارب ببنت الحلال

تامر علي يقول...

هههههههههههه
انا ذاكرتي ضعيفه كنت فاكر انها مريم فخر الدين مش ايمان :))
هي ايمان دي راحت فين صحيح كانت طيبه اوي وبنت حلال هههههههههه

والله يا فندم نأمل في المستقبل ان معاناة الناس تقل تدريجياً وبيتدوا يفكروا تاني في الرومانتيك :)

حفيدة عرابى يقول...

استاذ بسام
اللهم آمين
نبلغهم يافندم حاضر ولا يهمك ومش لازم عوامة وجيتار خالص
شرفتنى يافندم :)


استاذ تامر
ان شاء الله يافندم المستقبل خير ونرجع نفكر تانى فى كل حاجة حلوة
وبالنسبة لايمان هى سافرت
تيجى بالف سلامة :))
تحياتى لحضرتك

GigiWorld يقول...

والله ياتوته انت عسل وبوست دمه خفيف زيك


السياسه والتفكير خلاص هيجنن الناس
حتى الاغانى فلسفناها


مخك يارشروشتى

دلع قديم قوى
وحشتينى جدا

حفيدة عرابى يقول...

جيجى
ازيك ياقمراية
وانت كمان واحشانى :)
السياسة ؟؟؟
ده أنا حلمت بمبارك ياجيجى :(
كنا فى برنامج وهو قاعد فى الكرسى اللى جنبى وأنا بقوله مش هينفع اللى بيحصل ده
انك تتحاكم دى بديهية مش محتاجة لف ودوران
3 أغسطس ايه اللى لسه هتبدأ فيه أول جلسة
بتفكرينى ليه ياجيجى خلينى فى عبد الحليم وايمان وأنا لك على طول

بسنت يقول...

هههه
انا عجبنى رد شمس النهار فعلا
ماتمشيها عمرو دياب يا عرابيه
تملى معاك مالها بس

شوفى حقيقى جو الابيض والاسود دا رومانسى وشارعى بس مش عارفه ليه بحسه مزيف مش الحقيقه
يمكن لو مشيناها بوب هقتنع فعلا بالفعل
على العموم انا شفت يافطه فى القاهره غالبا مش متذكره بالظبط واحده بتشكر زوجها وبتعيد عليه فى عيد ميلاده حاجه رومانسيه كانت اول مره اشوفها فى الحقيقه
تنفع دى ؟

tarek momen يقول...

ممكن تمشيها محمد منير علي دقات الدرامز غي اغنية ازاي
معلهش حاسس جو الثورة مغطي علي اى رومانسية
حتي الرومانسية تحت القصف ليها طعم اعمق
فكرتيني بايام الحب الأول سنة 1973 مع حرب اكتوبر

حفيدة عرابى يقول...

بسنت
تعرفى انك اخترتى اغنية بحبها جدا لعمرو دياب
بس ماليش دعوة عبد الحليم برضه حاجة تانية
موافقة انه كتير مش منطقية وان افلام الابيض والاسود كانت بترسم حياة وردية حتى فى شكل الابطال ومشاكلهم
بس حلوة
تقدرى تنكرى انها حلوة ؟:)
شرفتينى يابسنت

حفيدة عرابى يقول...

استاذ طارق
ومحمد منير وازاى فى منتهى الجمال
وبعدين هو انا يعنى اقدر ابعد دماغى عن الثورة حتى فى الرومانسيات

تحياتى لحضرتك :)

يا مراكبي يقول...

طيب ما ينفعش الحبيب المجهول ده ييجي وهو راكب توك توك ومشغل كاسيت بسماعات أكبر من التوك توك؟

حفيدة عرابى يقول...

باشمهندس أحمد
بس التوك توك مش رومانسى خالص ولا يدى على حبيب مجهول اطلاقا
حضرتك مش ممكن تكون ركبته وتقول عليه كده
التوك توك ده بتاع المشاوير السريعة اللى التاكسى خسارة يروحها أو مينفعش كمان يدخلها وبيشغل شوية أغانى يااااااه
يااااه بجد
يعنى الحبيب لو معلوم وغنيتهاله أو حتى هو غناها هيبقى حبيب مفقود فمابال حضرتك بالمجهول كمان
هو التوك توك ممكن ينفع مع البنات فى المدرسة
أنا لاحظت فعلا ان فيه علاقة قوية بينهم وبين التوك توك ..لكن أنا مينفعش خالص
:)
حضرتك شرفتنى :)