عن الاخوان

أنا اعتبرت ان المجلس العسكرى فى بيانه رقم 59 
موقفنا طابور وبيدينا دروس فى الوطنية 
وبيعلمنا ازاى نشوف مصلحة بلدنا 
وبيكلمنا عن اختيار الشعب اللى لازم يُحترم
ينفع كده ؟؟؟
ده حتى المدارس خلصت امتحانات 
المجلس اللى احنا نازلين نضغط عليه علشان ننقذ ثورتنا 
يبقى هو اللى بينصح فينا وبيعلمنا الأدب !!

والسبب طبعا اللى حصل فى الجمعة 27 مايو

كلامى المرة دى هيكون عن الاخوان

لسبب مقنع بالنسبة لى 
وهو انى دافعت عنهم كتير
وكنت متخيلة ان أى تصرف غير مسئول منهم 
سببه القهر والمعتقلات ومصادرة الاموال
والعمل فى السر كجماعة محظورة 
وكنت فى منتهى الاصرار انى مش ملزمة ابدا
لابعداوات مبارك ولا صداقاته
وانى مينفعش اعمل ثورة وأخاف بعدها من فزاعاته 
وانهم كانوا ضحيته اللى بيستغلها علشان يقنع امريكا واسرائيل والمسيحيين 
ان وجوده مهم وبديل عن الفوضى 

ومقتنعة لسه ان الاخوانى مظلوم حتى بعد رحيل مبارك 
لان فيه ناس لله فى الله كده مخنوقة من أى تيار دينى 
ده غير الناس اللى ليها ملاحظات على الاداء السياسى للتيارات الدينية
وعندهم حق فى معظم كلامهم

وكنت دايما أقولهم لأ انتم متعرفوش الاخوان 
ده كفاية وقوفهم ضد مبارك والاذى اللى شافوه منه 
دول متفتحين كتير وعندهم قدرة على الحشد 
ودورهم فى التحرير ميقدرش ينكره منصف
وانهم حتى على المستوى الضيق أنسب ناس للانتخابات الجاية 
وشايفاهم يفرحوا 
شفتيهم فين ؟؟
فى اللجان الشعبية فى التحرير 
وفى الانتخابات فى الحى بتاعنا اكتر من مرة
موجودين فى الشارع وحاسين بالناس 
ومش بيتكلموا من ابراج عاجية زى كتير من النخبة

لكن موقفهم من يوم الجمعة كان غير مبرر ابدا 
مش المشكلة فى عدم نزولهم 
لكن تحريضهم للمجلس على المتظاهرين
واعتبارهم انها جمعة الوقيعة بين الجيش والشعب 
هو ده اللى ضايق ناس كتيروأنا منهم 

كلنا عارفين ان بعض المطالب فى التحرير مكانش عليها توافق 
أنا مثلا مش موافقة على مجلس رئاسى ولا تأجيل الانتخابات 
بس اللى ليه مطالب غير كده من حقه يقولها 
والاغرب  واللى يضايق بزيادة 
ان الناس اتفقت فعلا ان المطالب التوافقية هى اللى هتترفع 
طب ليه بقى مانزلتش؟؟

حتى لو انت معترض على بعض المطالب 
انت عددك كبير 
اعمل ياسيدى اكبر منصه وخلى صوتك عالى وقول اللى يعجبك
لكن مش تقول مش نازل 
وكمان علشان دى جمعة الوقيعة!!
الوقيعة كانت بينك وبين التحرير يومها يافندم 

واتمنى انك تبذل مجهود كبير
علشان تسترضى الناس اللى رفعت مطالب توافقية
وفى الاخر انت منزلتش معاهم
انت اللى خليت الناس كلها تهتف الجيش والشعب ايد واحدة
والهتاف ده تحديدا مستعدة اهتف بيه حتى لو لوحدى 
لكن يوم ماالجيش يرجع الثكنات بسلام 

لكن الهدف من الجمعة مكانش كده
انا كنت عايزة الجمعة تبقى ضغط على المجلس لتنفيذ مطالبنا 
مش يطلع بيان من المجلس يقولنا خليكم كويسين مع بعض
واتفقوا وشوفوا الشعب عايز ايه 

اللى خطر على بالى لما سمعت كلامك
انصر اخاك ظالما أو مظلوما 
المرة دى تحديدا أنا كنت شايفة ان التيارات التانية صح 
وانهم كانوا فى منتهى الوعى 
لما حاولوا يقنعوك انهم وافقوا على المطالب التوافقية 

أنا من يوم الخميس للنهارده وانا مستغربة جدا موقفكم
وقلقانة من اننا نتفرق

أنا لسه مصرة اننا بعد مبارك لازم نقبل بعض 
وان كلنا لازم نكون موجودين 
وان الاقصاء مرفوض 
وأى حد ايديه مش ملوثة بدمنا ولا فلوسنا ولا أفسد حياتنا
لازم يكون معانا 
لكن بجد انتم محتاجين شغل كتير قوى 
علشان تكسبوا ثقة الناس من تانى 
أو ثقتى أنا على الاقل
جزء كبير من المصريين اللى مالهمش ابدا علاقة لا بتيار دينى ولا غيره 
حاسس ان اللى حصل ده خصم كتير من رصيدكم 

طبعا دكتور صبحى صالح ومناقشة رأيه فى الزواج الاخوانى
ومين أدنى ومين خير ؟؟ مشكلة كبيرة 
أنا معجبنيش الكلام ابدا
اسفة يادكتور  بس أنا مش (أدنى) ومينفعش حد يقول عنى كده 
وبعدين مش انتم مسلمين وعادى يعنى المسلمين بيتجوزوا من بعض 
مش عيب ولا حرام 
تفرقوا ايه عن أى تيار معتقد انه بيحتكر الصح والباقى كله على باطل 
بلاش على باطل
والباقى أقل منه فى المكانة 
طيب هابقى مفترية لو قلت ان دى عنصرية ؟
البعض قال لان البنت الاخوانية هتكون متربية على مبادئهم
وهتكون فاهمة اللى مستنيها 
بسبب الاعتقال والمحاكمات والمشاكل دى 
بس ده مش مبرر لكلامك 
لان ذات الدين هتبقى فيها الصفات دى من غير ماتتربى مع الاخوان 
وليه تقفل على نفسك كده 
وتعتبر انك مختلف عنا
مش صح كده ابدا 

حوارك مع منى الشاذلى مقدرتش اكمله 
لانك كنت مهزوز ومش مقنع ولانى مش بستحمل اسمع خالد منتصر 
بس وانا بنام لقيت ماما بتقول 
لأ لأ بالطريقة دى مش هننتخبهم ابدا 
طيب يرضيك كده 
وانا اللى قاعدة ادافع عنك 
أنتخب أنا مين دلوقت ؟؟

مطلوب منكم جهد كبير قوى علشان تزيلوا أثر الجمعة 
ولازم أقول تانى اننا لازم نبقى سوا 
بس سوا باختيارنا ومش بحركات ولعب وسياسة 
عارفة ان ليك تحفظات كتير على أسلوب النخبة 
وعلى اداء الاعلام الفاشل وتحيزه ضدك 
بس أنا كلمتك الاول لانى بجد حزينة من تصرفك
أما النخبة العاقلة الفاهمة اللى حظها سىء مع الشعب الجاهل 
اللى مش بيعرف يفكر ولا يختار 
فدى محتاجة كلام لوحدها 
لانها لو استمرت بنفس اسلوبها 
فى التعالى على الشعب الجاهل 
أحب اطمنها ان الشعب الجاهل بيكرهها جدا 
ومش بيثق فى كلامها 
ووصل هو كمان لمرحلة تجاهلها 
وده كمان مش صح
نخلى النخبة لمرة تانية

2 التعليقات:



Ramy يقول...

كلامك صح على فكره جداً

المشكلة أن كل ما حد يختلف مع حد يحول الأمور لحاجات تانى علشان يطلع التانى غلطان

لا و مش غلطان بس و يعادى الباقى

حاجة بقت صعبة الصراحة

الكلام بصورة عامة على فكرة

حفيدة عرابى يقول...

استاذ رامى
:)
معلش سنة اولى ديموقراطية ومحتاجين بس شوية وقت لغاية مانتعلم نتكلم ازاى

تحياتى لحضرتك