رسائل للمجلس

عزيزى المجلس العسكرى 
أنا عمالة اكتب لك جوابات واحكى معاك بقالى يومين
لكن هنقول ايه مالكش نصيب فيهم 

حالا عرفت ان مبارك رايح الجنايات
تصدق انى فرحت جدا 
مع انى مكنتش ناوية اضحك وافرح دلوقت 
بس حبيت اسجل اللحظة دى

واكتب لحضرتك انك حتى لو أعدمت مبارك  فى التحرير قبل الجمعة
أنا ان شاء الله نازلة الجمعة برضه 
ماهو مينفعش يافندم كل يوم والتانى يترمى طعم واحنا نبلعه 
معدتى تعبتنى يافندم 
مش كل يوم والتانى هنقعد نستنى اللى تجود علينا بيه اربع وخميس 
قبل ماالناس تنزل الجمعة 
بس المرة دى انت غيرت عادتك والاخبار الحلوة بقت التلات 
فيها ايه لما طول الاسبوع نسمع أخبار المحاكمات واحنا رايحين شغلنا 
عادى يعنى 
طب جرب كده وشوف هنشتغل ازاى 
وشوف كل مسئول نفسه ينحرف ويبقى فاسد 
هيعمل ايه لما ينزل شغله وهو سامع أخبار محاكمات العصابة 

شوف سيادتك .....
ماهوعلى قد السلام النفسى اللى حسيت بيه 
يوم ماقررت تحول مبارك للتحقيق 
لكن صعقت لما عرفت اننا بقالنا 45يوم بنلف ورا بعض
ومبارك ماافتكرش انه عيان لما كان قاعد على قلبنا 
وافتكر بس دلوقت
وانت عامل نفسك مش سامعنا 
لغاية ماخلاص معنوياتنا بقت فى الحضيض 

الشعب يافندم يريد اسقاط النظام 

يعنى مبارك مع عشماوى زى الفل 
يعنى العصابة فى السجن بما يرضى الله
أوالعصابة مع مبارك فى ضيافة عشماوى 
مفيش مانع 
من غير تشفى ابدا 
بالعكس ده القصاص اللى يرضى ربنا 

 اسقاط النظام يافندم يعنى

 ميحصلش تانى أى حاجة من اللى كانت بتحصل أيام  المخلوع 
يعنى لما نوارة قالت مفيش خوف تانى ..مفيش ظلم تانى 
يبقى فعلا مفيش خوف ولا ظلم 

ولا يبقى شرطة عسكرية تبهدل فينا
ولا الفرق الغريبة بتاعتك دى  
اللى معمولة علشان تضرب اسرائيل مش تضربنا احنا 

اسقاط النظام يعنى مااقعدش اسمع مصرى بيشتكى 
ان نظامه وحكومته ماوقفتش جنبه فى مرضه 
فما بالك لو كان من مصابى الثورة 
الايام دى انتهت يامجلس 
ومش هترجع تانى

يعنى مفيش نزول على الركب 
حتى لو ترتيب الاولويات مكانش صح وقتها

يعنى بناتنا يامجلس محدش ينتهك انسانيتهم وكرامتهم زى ماانت عملت 

المحاكمات العسكرية يامجلسنا 
ماهو مينفعش باخلاقنا العالية نوافق ان مبارك يتحاكم قدام محاكم مدنية 
واحنانجرى على المحاكم العسكرية 

يعنى منسمعش صوت الرصاص يوم 9 ابريل وبعدين تقولنا محصلش 
ده مع انى مش موافقة على اعتصام الضباط مع المدنيين فى التحرير
لكن الترويع كمان مرفوض 
ومينفعش كمان ابقى مش عارفة حاجة عن مصيرهم 
بلدنا لازم تكون كل الامور فيها بشفافية يامجلسنا 
مبارك راح وراحت أيامه


يعنى يافندم مينفعش تستغل ان كل السلطات فى ايديك 
وكل القرارات والقوانين نسمع عنها بعد الهنا بسنة 
مش هنقبل يافندم تهميش تانى 
ولا هنقبل ان حد يتكلم عنا بصفتنا اجندات ودولارات 

يعنى الشرطة كان ممكن تنزل ومن زمان
وميبقاش فيه البلطجة اللى عايشين فيها
وقبل الشرطة ماتنزل كان زمان قياداتها اتحاكمت 
والباقيين خدوا دروس فى أساليب التعامل مع البشر وبالقانون 
اللى نزل منهم بيقل أدبه يامجلس
آه والله تخيل 
نعمل ثورة والشرطة ترجع تقل أدبها من تانى

يعنى القيادات الاعلامية كانت من أول يوم بعد الثورة 
لازم تعرف ان الوضع اتغير 
وان الاشاعات والكلام الفاضى والبلالين اللى اتنفخت واترمت فى وشنا 
من 11 فبراير للنهارده مكانش ليها لازمة
وكانوا يقضوا وقتهم يتعلموا يعنى ايه اعلام 

لو كلمتك فى الحاجات دى مش هنخلص
ولسه عندى كلام كتير بينى وبينك 
لكن مش هاقوله الا بعد الجمعة ان شاء الله 

دلوقت انا كلامى عن نفسى 
أنا مش موافقة على المجلس الرئاسى 
أو للدقة كنت ايام مبارك معرفش غير حاجة واحدة بس 
(هو اللى لازم يمشى )
ومكنتش فكرت ولا سمعت ايه ممكن يكون أنسب وأفضل 
دلوقت أنا رافضة المجلس الرئاسى وشايفاه خطر
كمان أنا رافضة تأجيل الانتخابات ولو ليوم واحد 

النقطة الأهم 
انى نازلة بهدف استكمال اسقاط النظام 
لكن مش هاقبل ابدا بأى خطوة تكون نتيجتها اسقاط الدولة 
والجملة دى تحتها مليون خط 
يعنى لازم أخلى بالى وأعرف امتى أقول كفاية 
وامتى أقول هجوم ..وربنا مايجيب هجوم

يامجلسنا العسكرى 
قدامك طريقين 
احنا أو طريق مبارك 
احكم البلد بطريقتنا واخدم ثورتنا 
وارجع انت وجنودك للثكنات 
وأنا أضمن لك اننا نكتب عن دورك فى حماية بلدنا وثورتنا ولو بدمنا 
افهمنا بقى
وابعد عن طريقة تفكير مبارك 
الدنيا تغيرت واحنا اتغيرنا 
ومش هنسكت تانى على بلد تبقى مش بتاعتنا 
يعنى لازم نعيش أحرار
ومفيش خوف تانى ...مفيش ظلم تانى

3 التعليقات:



شمس النهار يقول...

شوفي علي طنطاوي والمجلس العسكري ان يختار بين اما يدخل التاريخ من اوسع ابوابه او العكس ويدخله مع المبارك
وان شاء الله نازلين الجمعة الجاية

Ramy يقول...

كلامك لم كل الشعور اللى جوا البنى أدم العادى مش الثورجى

بجد كلام موزون بدون مجاملة

حفيدة عرابى يقول...

شمس هانم
أنا فى اللحظة دى عندى أمل كبير اننا هنعدى الفترة البايخة دى
وهو فعلا لازم يختار ولازم يعرف انه بيدير بلد مش هتقبل معاملة مبارك تانى
نورتينى :)


استاذ رامى
شوف حضرتك هو اناكنت ثورية وواخدة فى وشى لغاية الاستفتاء :)
بعدها أنا عندى خوف على البلد دى وحاسة ان بجد فى كتير عايزينا منعرفش نوصلها للى احنا عايزينه
فرأيى الشخصى انى لازم اسقط النظام بس والبلدوزر شغال نبقى صاحيين قوى علشان الدولة ماتسقطش معاه

تحياتى لحضرتك