هلاوس


التوتر
الاعصاب المشدودة
عدم التركيز
العيون اللى الكل شايف ارهاقها ومستغرب منه 
الدموع اللى بتنتهز أى فرصة تكونى فيها لوحدك ولو لدقايق 
علشان تخرج وتظهر وتعبر عن نفسها 
زمان كانت بتريحك 
المرة دى الدموع بتجيب غيرها 
كل ليلة صعب 
صعب ياحبيبتى
ذهنك مشغول بحاجات اكبر من احتمالك
مضغوطة
أنت خايفة المرة الجاية يبقى الدور عليك 
طيب هاقولك على حاجة 
لازم تحمدى ربنا على كل لحظة هى موجودة فى حياتك
حاولى تستمتعى باللحظات دى
ماتضيعيش الوقت فى الخوف من اللحظة اياها
انت من حبك ليها بتزعليها
خوفك وقلقك بيخنقها 
بتزعل لما بتشوفك تعبانة 
عايزاكى تخلى بالك من صحتك
وبتستغرب انك مش مهتمة بعلاجك
وانت عارفة ان خوفك هو اللى بيقتلك 
وان صحتك هتبقى كويسة لو بس اتطمنتى 
لكن يحصل ازاى
اللى حصل المرة دى هزك قوى أنا عارفة 
الخطر قرب...
ده شعورك اللى بقاله اسبوع هيموتك
يابنتى مش هينفع كده
هتقدرى تستحملى ؟
هتروحى ازاى ؟
وبعد ماالكل يمشى هتعملى ايه ؟
بتضحكى على نفسك
اعترفى
أنت تعبانة
آه تعبانة وتعبانة قوى
أنت تعبت من عدم اعترافك بكده
بس علاجك موجود فى مكان واحد
وانت بمنتهى الذكاء بتروحى كل الاماكن ماعدا هو
ارجعى ..
يمكن يبقى لسه بدرى
يمكن يبقى عندك صبر انت مش متخيلة انه موجود
بس ازاى هتصبرى ؟
أنت زعلانة عليها وعلى نفسك
كانت شبهك فى حاجات كتير 
أصعب لحظة لما حضنتيها 
مكنتيش عارفة امتى ممكن تحسى ان كده كفاية
مكنتيش عارفة تخرجيها من حضنك ازاى 
وتخرجى انت ازاى 
هو أنت كنتى بتطبطبى على روح مين بالظبط
أنا عارفة انك هتابعيها وهتاخدى بالك من كل تصرف بتعمله
ومن نفسها المكسورة
ومن دموعها اللى هتداريها
قبل الدموع اللى هتسمح لها تظهر 
وصفت حالتها بمنتهى الصراحة
وانت حسيتى بيها
تعيشى ازاى بضهر مكسور
لأ مش مكسور
ده من غير ضهر ولا سند ولا هدف
طيب والاصوات اللى هتعذبك
والذكريات اللى هتفضل تطاردك
يابنتى مينفعش كده
طب هاقولك على حاجة تانية
عيطى
صدقينى عيطى
سيبى كل الدموع اللى بتداريها تخرج
يمكن ترتاحى 
أنت من كتر حبك ليها 
مش عارفة تعيشى
النهارده صوتها وكلامها خلوكى زى العادة مش قادرة تدارى دموعك
دعيتى لها بالصبر وأنت مش فاهمة
انت فعلا لسه مش فاهمة الموقف 

عقلك بيرفض يصدق وببشاعة 
النهارده كنت متأكدة انك اضعف من انك تواسيها 
لما قالت لك اقعد علشان مين 
الكلمة قتلتك 
ماهو ده اللى أنت خايفة منه 
لمين ؟؟
ده أنت ممكن تتجننى 
ساعتها اكيد مش هتنفع الدنيا دى خالص 
بجد بجد تنفع ازاى ؟؟
ايه الهدف ؟
هيبقى ايه ؟
هيبقى مفيش 
وحياتك هتبقى أيام وبس 
وهتدعى ربنا يخلصها بسرعة
الناس فاكرة الأيام الاولى هى الاصعب
لكن كلامهم غلط 

وبعدين بقى
الاسبوع ده مش عايز يخلص 
طويل وحزين وكم الاخبار الوحشة فيه فوق الطاقة فعلا 
فوضى أمرك لله 
ماهو أصلا مين ممكن ينقذك ويخفف عنك غيره 
أنا خايفة 
أنا حزينة يارب 
وانت بس اللى حاسس بى وقادر تخفف عنى
عبادك كثير أما أنا فليس لى رب سواك
-----------------------------
أنا الحمد لله كويسة جدا 
دى مجرد هلاوس 
محدش يقلق :)

9 التعليقات:



MR.PRESIDENT يقول...

ربنا يذهب حزن كل حزين
ويقدر علي السعادة كل مسكين
ويسعدك
حتي لو سعيدة
يزود سعادتك أكتر وأكتر وأكتر

وإن شاء الله هتتعدل

ألم يعدِ الله الكريمُ بفضله * مع العسر يسراً ينجح السعي والقصدا

ومازال لطف الله يفرج أزمةً * إذا استصعبتً عقداً أواستحكمت شدا

فاتيما يقول...

محدش يقلق ؟!!!

حرام عليكى يا فيدو
انا اتنيلت اصلاً

انتى هتبطلى امتى وانتى بتكتبى تبقى غامضة وتخضينا عليكى ؟!!

طب انتى بتوجهى الكلام لمين ؟

لحد بتحبيها قوى
صديقة ولا قريبة ولا زميلة مقربة ف الشغل ولا لنفسك ؟!

يا لهوى بعد الشر

طب ايه ؟

انا حاسة بالوجع ف كل سطر

وحاسة كمان بإحساس عجز اللى كاتباه
عن انها تواسى

انا مش عارفة اواسيكى
لأنى مش فاهمة

بس حاسة

الله يخربيت الهلاوس والخطاريف والهذيانات
ويخليهالنا برضو عشان بيها بنخرج اللى جوانا بدل ما يلتهمنا احياء

طب انا مش عارفة اقول حاجة
ولا أعمل أى منظر

اكتفى بتلات كلمات

ربنا يريح قلبك


ومعاهم البوسات والحضونات يا حبيبتى

آه
ومعاهم



وحشتينى



بس كدا


لأ
معاهم سلام لطنط وللعريس بتاعنا


وخلاص كدا امشى يا فاتيما

حاضر

:)

حفيدة عرابى يقول...

ريسنا :)
اللهم آمين
ودعوات كتييير قوى علشان دعواتك الحلوة دى :)

حفيدة عرابى يقول...

طمطم
:)
وصلت البوسات والحضونات
ماتقلقيش :)

بجد والله أنا كويسة جدا الحمد لله

هى كانت طاقة سلبية بس شديدة قوى ومبهدلانى طول الاسبوع
وكان لازم تخرج
لو مخرجتش ...
ساعتها كنت فعلا هابقى مش كويسة

أنا فكرت كتير اخلى الكلام مسودة وخلاص وكفاية انى كتبته وهو ملخبط كده
بس عندت مع نفسى وقلت لأ وهو مسوده هابقى حاسة انه لسه محبوس

كلنا بخير الحمد لله
وأنا بخير صدقينى
بس حاسة انى مرهقة جدا وانى عايزة أنام .....يمكن عايزة اكل
ده بعد ماكتبت الكلام :)
حاسة زى اللى عمل عملية ودلوقت فى نقاهة
بس حاسة انى خفيفة قوى الحمد لله النهارده

أنا هحاول فى أقرب فرصة انى ابعت ايميل بس مشغولة جدا النهارده
لغاية ماابعته أنا الحمد بخير متقلقيش

بوسات وحضونات كتيير ياأحلى طمطم فى الدنيا
وخليكى هنا متمشيش:)

فاتيما يقول...

ميرسى انك رديتى بسرعة يا فدافيدووو
يا حبيبة قلب طمطم

الحمدلله انك بخير يا حبيبتى

الف حمد وشكر


وبراحتك ف الأيميلات
انا مقدرة خالص

norahaty يقول...

ربنا يستر
واللى تخافى
منه ميجيش احسن
منه:واللحظة اللى
انتى خايفة منها لما
حتيجى صدقينى ربنا سبحانه
وتعالى بيبعت الصبر قـبلها

حفيدة عرابى يقول...

فاتيما
ميرسى ياحبيبتى على سؤالك واهتمامك
لا تقلقى :)


دكتور نور
:)
يارب يادكتور

يا مراكبي يقول...

عايز جُملة مُفيدة :-)
الجملة المفيدة اللي دخلت دماغي بس ما صدقتهاش: أنا الحمد لله كويسة جدا دى مجرد هلاوس محدش يقلق :)


هحاول ما أقلقش ربنا يقدرني
:-)

حفيدة عرابى يقول...

باشمهندس أحمد
:)
يانهار أبيض
يعنى يوم مامدونتى تتشرف يتعليق من حضرتك يبقى فى اللخبطة دى :$
عندك حق طبعا مفيش جملة مفيدة
لانى بكلمنى وبكلم واحدة صاحبتى وبكلم ماما فى نفس الوقت
هى كانت طاقة سلبية فظيعة قوى وخرجت الحمد لله
الجملة المفيدة الوحيدة اللى حضرتك وصلت لها ومصدقتهاش
بجد حقيقية دلوقت
أنا فعلا الحمد لله كويسة جدا ومحدش يقلق :)
تحياتى لحضرتك