اهو كلام


نقول عندنا أمل ؟
النهارده الحمد لله احسن كتير عن امبارح
وأملى كبير فى ربنا وبعدين فينا نعدى منها
مؤامرة ؟
مقدرش انكر انها معششة فى دماغى وعندى كم مؤامرات عابر للقارات
ده كفاية بس الست كونداليزا رايس والفوضى الخلاقة
بس مع اعترافى بوجود المؤامرة واضحة فى أحداث ومن أطراف كتير
لكن أنا قررت تجاوزها
آه والله قررت اتجاوز المؤامرات
اللى شايفة انها دبرت فى قارات مش فى قارة واحدة
هل لديك أقوال اخرى ؟
كتير
كلنا متفقين ان اللى حصل مرعب
وكان ممكن يضيع البلد لكن ان شاء الله هتعدى على خير
احنا بنعانى من طائفية ؟
جدا وعلى كل المستويات ومن زمان
طب ده خطر ؟؟؟
هو فيه خطر على بلد زى مصر اكبر من فتنة طائفية
مين غلطان ؟؟
الكل
ياسلام ..ايه الروقان ده !!
لا والله 
اللى وقف قدام الكنيسة غلطان واللى نشر الاشاعة غلطان 
واللى ضرب واللى حرق واللى قتل 
وخصوصا ان الموضوع خلاص قدام النيابة
مع ان النيابة اتعاملت معاه بطريقة غريبة 

وخلينى اقول غريبة ومش حاجة تانية
المسيحى غلط فى ايه ؟؟؟؟
ياااه كتير ...بس مش وقته احتراما للظرف بس 
لكن سريعا كده ..لو عاوزين يبقى عندنا بلد 
لازم كلنا ومننا الكنيسة نستوعب الوضع الجديد 
وان مبارك مشى خلاص ومش راجع تانى
واننا عايزين دولة تعرف يعنى ايه سيادة قانون 
وللبابا سلطة دينية وبس 
لكنه مش رئيس جمهورية المسيحيين فى مصر
لكن برضه مش وقته خالص
احنا بنقول عديها على خير يارب 

ونتفاهم كمان شوية مش مشكلة مادام نيتنا خير
----------------
أنا ضد التيار
ومش شايفة السلفيين والاخوان خطر على مستقبل مصر
عندى تحفظات كتير على أفكارهم وتصرفاتهم سواء قبل الثورة أو بعدها
بس دلوقت بقى عندى ثقة اننا بنتعامل بنفس طريقة مبارك 
واننا بنستبدل فزاعة بالتانية
مبارك كان مركز مع المحظورة والمرحلة الحالية كل همها السلفيين
عن نفسى معترضة على التيار السلفى فى كام نقطة 
بس ده ميمنعش انى انكر ان السلفى اللى اعرفه من الشارع 
وجيرانى ومن التليفزيون 
مش قاتل متسلسل ومش ميال للعنف ابدا
ولا ليه فى السلاح والضرب والقتل 
لكن الاعلام الموجه بيهرج قوى من فترة 
ومحسسنى ان السلفى هو خُط الصعيد وأنا استحالة اصدقه
--------------
انتخابات مجلس الشعب الجاية ان شاء الله وفى دايرتى تحديدا 
أنا اتمنى الاقى الاخوان فى المقعدين 
لان لو الاخوان مش موجودين ...مين هيبقى موجود ؟
لا اله الا الله
نقول حاجات زى رجال الحزب الوطنى 

اللى ميعرفوش يعنى ايه حزب وطنى غير انه بتاع الريس 
اللى كل الكلام عنهم انهم تجار مخدرات أو آثار او فراخ فاسدة 
يبقى الاخوانى بكل عيوبه وعيوب جماعته
منتهى الامل بالنسبة لى 
ومبشر كمان 
طيب مانخلى الانتخابات ابعد علشان القوى السياسية تجهز نفسها ؟
شكرا ياسادة 
انتم قدامكم مش أقل من عشر سنين تجهزوا نفسكم
على ماتعرفوا تكلموا الناس 
أنا بقيت حاسة ان النخبة السياسية عندنا فى منتهى الفشل 
وواهمة ومش هنا من الاصل 
يعنى دكتور عمرو حمزاوى مثلا
فى الوقت اللى عاتبت نفسى انى مش بتابعه من زمان 
وبدأت اركز معاه واتابع مقالاته ومناظراته 
الاقيه بيصدمنى لما بيتكلم فى حاجات بعيدة جدا عن تفكيرنا 
واستحالة تبقى مقبولة فى مصر
-----------------
الشهداء ماتوا علشان مصر أفضل 
يبقى مهما اختلفنا على شكل الافضل لمصر 
وعلى الاساليب اللى هنوصل بيها للأفضل 
مش من حقك تستغل دم الشهداء علشان تقوى منطقك ورأيك
دمهم أسمى من كده بكتير 
----------------
خلصت المنهج فى أغرب وأجمل فصل دراسى فى حياتى 
عملت كل اللى نفسى فيه 
اشتغلت بمزاج على الاخر 
غنيت غنا التيرم ده أنا والبنات 
خليتهم يسمعوا أغانى وطنية عمرهم ماسمعوها فى حياتهم 
وللأسف قدمت تنازلات علشان أوصل للهدف ده
منها انى سمعت أغانى لتامر حسنى
ماضيعتش ثانية فى شغل موظف الارشيف 
ولا تظبيط الورق والملفات
اللى اتربينا عليه فى عهد الوزرا السابقين وعلى رأسهم ابن بدر 
كفاية ان صورته مكانتش ورايا على السبورة 

--------------

دماغك جميلة وتحليلك رائع والمصيبة انى بصدقك 
ومعنديش أدنى شك فى انك صادق
ازاى وأنا عاجبانى دماغك من قبل مايبقى ليك مكانك الخاص فى الكتابة 
بس اخيرا أنا مش معاك 
بمعنى أدق بفضل معاك فى كل حرف 
لغاية ماتوصل بالظبط للنهاية السعيدة من وجهة نظرك 
بلاقينى هنا اخدت بعضى وروحت بدماغى 
ومش عايزة اسمعك ومش عايزه اللى أنت عايزه يحصل 
وبتبقى نهاية تعيسة  للثورة بالنسبة لى 
-------------
اسامة بن لادن 
من أنت ؟
لو أنت اللى بتتكلم عنك أمريكا فانا ضدك
لو انت اللى بيتكلم عنك الشيوخ فانا معاك 

لو أنت زى ماانا شايفاك 
فانا معاك فى حاجات وحاجات تانية مع اعجابى بيها 
مش هاقدر أقف يوم القيامة وأقول لربنا انى وافقتك ولو قلبيا عليها
مهما كنت مين ..
مش من حق أمريكا ولا غيرها تقتلك ولا ترمى جثتك فى البحر
من حقك محاكمة عادلة ..بس فين وازاى مش عارفة 
ده على اساس يعنى انى مصدقة انك ميت امبارح وان الصورة صورتك 
انا مش عارفنى انا شخصيا يافندم
--------------
فيها ايها لماتهيسى  ؟؟
ايه اللى هيحصل يعنى 
ياسلام بقى لو كبرتى دماغك ...
لو خليتى بالك من نفسك شوية  .
هل ساعتها الدنيا هتخسر مفكرة عظيمة ومحللة سياسية لا يشق لها غبار 
احم 
استحالة طبعا
ليه بتخنقى فى نفسك ..ليه طبعك دايما ده شيال للهموم 
بيبان عليكى وبترهقى روحك وجسمك 
فوقى ياحبيبتى لنفسك ...خلى بالك منك شوية  
اتفقنا ؟

11 التعليقات:



لورنس العرب يقول...

ازيك يا ميس

فاتيما يقول...

صباح الورد يا فيدو

انا متفقة مع نقاط كتير ف اللى كتبتيه
بس اصابتنى غصة ف القلب
من جزئيتين

التانية ...انتى عارفها
ومفيش داعى أعلق عليها
:)


أما الأولى حكاية النخبة السياسية دى
وانك هترشحى الاخوان ..
لأن مفيش غيرهم ....

هوه كلام واقعى
لكن مؤلم
لأنه اتفرض علينا قصداً وبنظرية المؤامرة زى ما قولتى
ولأنى ببص لبعيد
فحاسة ان السحر سينقلب على كل السحرة وهذا الشعب سيفرض ارادته ولن يسلم زمامه لأحد ...تانى
ولو كانوا الاخوان بمواقفهم الاخلاقية القوية والسياسية الرخوة ...

اجمل حاجة
انك درستى التاريخ كما ينبغى
وزى ما بتتمنى
عشان انا متأكدة
انك هتفرقى مع كل حد بيقعد قصادك
ف الفصل وبيسمعلك

سلامى لماما
وبوساتى وحضوناتى الكتيييييير
ليكى يا فدافيدو

Ramy يقول...

كلام جميل كلام معقول

و متفق معاكى فى حاجات كتير

و ربنا يستر عالينا فى اللى جى

وجع البنفسج يقول...

اكيد في أمل ..

مؤامرة .. برضه فيه مؤامرة

الكلام .. كثير ..

مين الغلطان .. علشان نحاسبه

سعيدة بمروري هنا وتعليقي وان شاء الله من المتابعين ..

حفظ الله مصر بعيدا عن الفتن الطائفية ..

حفيدة عرابى يقول...

لورنس العرب
ازى حضرتك يافندم
بتحرجنة والله بذوقك وسؤالك
أنا الحمد بخير وشكرا جزيلا على سؤالك

---------------------
فاتيما
مساء الفل ياطمطم :)
والله العظيم يصعب عليا جدا كلمة غصة فى القلب

التانية اللى أنا عارفاها مش هاعلق عليها أنا كمان
بس ده والله مع احتفاظى بكل الود والاحترام والتصديق وكل حاجة


الاولى
عبارة عن حاجتين
اولا النخبة السياسية ..بجد ياطمطم بعيد قوى
ومعندهمش استعداد يقربوا للناس وبيتعالوا عليهم
اكيد الكلام مش على الكل
ولما حد منهم بيحاول يقرب من الناس بيبقى بعيد قوى وعايش فى دنيا تانية
يعنى دكتور حمزاوى كمثال
مع اعترافى ان دماغه جميلة جدا وانه نشيط ومجتهد وبذل مجهود كبير وعنده رغبة فى التوعية
بس لما يقولى انا عايزك يبقى عندك الحرية لكل الاختيارات
والمذيع الخبيث يصر يحرجه ويستفسر عن نقطة حرجة
ويكون رد حمزاوى انه عايز الحرية لدرجة انى ممكن اختار الاسلوب الشرعلى فى الزواج أو المدنى
انا فاهمة ان دكتور حمزاوى ميقصدش ده تحديدا
بس فيه رسالة ما ووصلت خلاص لناس كتير وانه مش بيفكر زينا ولا ثقافته زينا
اكيد شفتى مقال عمر طاهر النهارده
خلص كده خلاص بالنسبة لناس كتير
انا عن نفسى هاقرأ مقالاته وهاخد منها وانفذ اللى يعجبنى
بس عارفة لما تقرأى لكاتب بعيد عنك وشايفاه مش بتاعك ومش فاهمك
هو ده

أما الاخوان ..انا حسيت انك زعلتى لانك حسيتى انى مضطرة زى فكرتك اللى اخدتيها ساعة الاستفتاء
ياطمطم
أنا مش خايفة من الاخوان ولا السلفيين
عارفة ان الاخوان اتعودوا على شغل السر وعندهم كم انتهازية لا يحسدوا عليها بجد
وقياداتهم الكبار اتربوا فى ايام القمع والمعتقلات والتعذيب
بس ياطمطم اللى كان مالى قلوبنا رعب منهم مبارك
ايه اللى يخلينى اورث نفس عداوات مبارك
بعد مبارك ياطمطم كلنا موجودين ومينفعش نستثنى فئة حتى لو مش بتعجبنا الاراء بتاعتها

ليه منديش الاخوان وغيرهم فرصة يشتغلوا فى النور
شوفى هو انا مش عايزة ادافع عنهم علشان تصرفاتهم متبقاش محسوبة عليا لانى مش مرتبطة بيهم
بس متاخديهاش بالصورة اللى وصلت لك فى الاول

حفيدة عرابى يقول...

طمطم
كمان أنا مش حاسة ان الاخوان اتفرضوا عليا بمؤامرة
وشايفاهم فى منتهى النشاط وعندهم خبرة
ولو دخلوا المجلس ممكن نشوة الانتصار والمرحلة الجديدة فى الاول تخليهم ياخدوا تصرفات ممكن مش تعجبنا كلنا
بس بجد الاخوانى فى المجلس ايه خطره

طب خلينى فى البوست
أنا فى حى شعبى ياطمطم زى مانت عارفة والاخوان موجودين وبقوة
نائب بجد محترم وكان عايز قدام عينى يقدم لنا فى المدرسة خدمات كتير جدا لما كان عندنا امتحان الجوده
وعقلية الموظفين فى الادارة التعليمية خلت الادارة تستعين بالنائب التانى المستقل اللى دخل الوطنى بعد الانتخابات
والنائب التانى نصاب ومعملش حاجة غير انه يخوف المديرة من التعامل مع نائب الاخوان

الاخوان بالنسبة لى البنات القمرات والولاد اللى يفرحوا القلب اللى شفتهم فى انتخابات مجلس الشعب على ابواب اللجان بيتكلموا معايا بمنتهى اللطف

الاخوان بالنسبة لى شباب وبنات التحرير اللى كانوا ماسكين اللجان الشعبية فى التحرير وتحديدا يوم التلات اللى قبل موقعة الجمل
وهم كمان الشباب السكر اللى فى جمعى القرضاوى وانت شفتى كانت زحمة ازاى
جمعوا عدد كبير جدا من البنات فى بنات وعملوا علينا كردون امنى من نار ومنعوا الاقتراب والتصوير فى عز الحر والزحمة

برضه بدافع عنهم
المواقف السياسية الرخوة بتاعة القيادات الكبيرة اللى البساط بيتسحب من تحت رجليهم تدريجيا زى مابنقرأ

أنا مش منهم والله :)
بس سبتمبر قرب قوى وشايفاهم وخلينى اقول فى دايرتى انى هختارهم لو المرشحين نفس الوجوه الكئيبة بتاعة عصر مبارك
والله لو لقيت حد مستقل وعجبنى دماغه وتفكيره انا مش من الاخوان ومعنديش السمع والطاعة بتاعهم
الجملة اللى فوق دى علشان اقول انى عارفة عيوبهم
بس انا عايزة مصر تسعنا كلنا
وندى كل الناس فرصة تغلط وتتعلم ونتعلم معاها فى جو جديد
أغلب فكرتى دى أو علشان اكون واضحة
اغلب فكرتى عن عدم خوفى من التيارات الاسلامية حتى اللى دماغه مقفوله منها مقالة جميلة لهويدى بس مش عارفة اوصل لها دلوقت هحاول ادور عليها تانى

الكل ياطمطم قدامه الفرصة ويتفضل يشتغل وخصوصا اننا مستجدين ديموقراطية وهيتعلم ونتعلم معاه

مش فاكرة مين بالظبط بصراحة
هويدى ولا طارق البشرى اللى قال ان الديموقراطية مش هيبان نتيجتها فى مصر الا بعد دورتين برلمانيتين

فى كل الاحوال
ولا تساوى أى حد فى الدنيا مقابل غصة القلب دى ياطمطم
بعد الشر عليك

بوسات وحضونات اكتر بكتير قوى :)

حفيدة عرابى يقول...

استاذ رامى
أهلا بحضرتك
وشرفتنى فى اول زيارة
سعيدة ان حضرتك متفق معايا فى حاجات
واتمنى الزيارة تتكرر
اللهم آمين


وجع البنفسج
مدونتى نورت بمرورك وتعليقك
ولة الشرف فى تكرار الزيارة
اللهم آمين

فاتيما يقول...

انا فاهماكى يا فيدو والله

بس للأسف
انا مضطرة ارجع لتوصيف علاء الأسوانى للاخوان كحركة ليها جذور ف مصر
قال عنهم جملة بليغة جدا

انهم يملكون صلابة اخلاقية
يقابلها ليونة سياسية

ودا للأسف واقع الحال

وبقول للأسف
لأنى احسبهم ناس كويسين ف حاجات كتير واحترمهم عليها جدا
زى الاخلاقيات و مساعدة الجميع و التكافل الأجتماعى والتعامل اللين مع المختلفين معاهم فكريا وغيره

لكن لحد المواقف الساسية و الموقف بيختلف تماما
وفجأة تكتشفى ان ليهم حسابات اخرى وانتى كشعب كامل براها

ابسط مثال
جمعة انقاذ الثورة اللى رفضوا الإشتراك فيها
ولما الميدان اتملى
جم ف جمعة التطهير و زحموا الميدان بشكل مكثف لما حسوا انهم مش لازم يخرجوا م المشهد ...

القصة اتكررت ف مؤتمر الحفاظ ع الثورة بتاع ممدوح حمزة
قرروا عدم الأشتراك بالمرة
والحجة
انه مكرر وملوش لازمة
مع ان تواجدهم ضروى

هما قدام لما يلاقوا للإئتلاف دا قوة تذكر هتلاقيهم نطوا فيه وركبوا التوجه ...

مش بقول حاجة ف اختيارتهم

هما حرين جدااااا

بس انا بتكلم عن المبدأ الثابت
مينفعش انتخبك مثلا على مبدأ معين والاقيك ف نص السكة حولت العربية على اتجاه تانى ؟

وهذا للأسف ما يحدث منهم
قبل مبارك ولا بعده
هما كجماعة ليهم حسابات اخرى
وهيا اللى بتحركهم

وللأسف تاااانى
شباب الاخوان اللى هما زى الفل
عندهم نوع م الأنقياد عجييييب الشكل
رغم ثورية المرحلة والعقول بتاعت الجيل دا ...

ليا صديقة خطيبها اخوانى
كان بينزل الميدان ايام الثورة وما بعد تنحى مبارك حسب توجهات الجماعة ما بتقول
أسألها طب هوه رأيه ايه ؟
تقولى مش موافق وعاوز ينزل
طب يا بنتى ما ينزل
ل اصل هما ليهم وجهة نظر وفينى ما غيرش قناعاته ومرجعييته ...

!!!!!

ينفع دا طيب ؟

ازاى ادى صوتى لحد ..مرجعيته مش الشعب ولا الناخبين أكتر ما مرجعيته للجماعة وافكارها وتوجهاتها

وللأسف للمرة الألف
لو دايرتى فيها واحد وطنى وواحد اخوان هنتخب الاخوان على نن عينى
مضطرة
مفروض عليا

وبقول مفروض
لأن المجلس العسكرى وحكام البلاد من وراه فرضوا عليا هذا الاختيار بفعل المؤامرة لا غير
لما اصروا انتخابات الشعب تحصل قبل الرياسة والدستور الجديد ...

وبالتالى المجلس القادم
هوه اخطر مجلس ف تاريخ مصر الحديثة
وعلى اكتافه اعباء كثرة وخطيرة

ازاى اثق ف حد بقى ؟

النخبة السياسية انا معاكى فيها
دا كفاية البرادعى واللى بسمعه عنه ف الشارع والشغل والنقاشات الدايرة حواليه ...
بس على فكرة
المسألة مقصودة برضو
وطول ما اعلامنا القذر دا موجه
وتحت الأسر
هتفضل وشوش متلمعة عمداً
ووشوش متشوهة قصداً


انا ف قلبى غصة من حاجات كتير
لأن المسألة سهلة جدا
لو خلصت النوايا
ولأن النوايا مش خالصة
فشكلنا هنفضل كدا فترة طويلة

عموما
يوم الجمعة لناظره قريب
وربنا يسهل وهنشوف المليونية دى هتسير السفينة وتوديها لفين المرة دى


متزعليش منى يا فيدو انا مقصدتش حاجة ولا قصدت أعاتبك على أى حاجة
انا عارفة اللى ف قلبك من غير ما تنطقى كلمة والا مكنتش رميت عليكى حمولى وطلبت مساعدتك ...

بوسات وحضونات تانى وتالت وعااااشر

sony2000 يقول...

ياعييييينيييييييييي

معاكي فكل دا يااابلتي
ويلا نهييس:)

nigro يقول...

اتفقنا :)

حفيدة عرابى يقول...

فاتيما
:$
أنا تخيلت انى رديت على تعليقك
شفته وقريته وتخيلت بجد انى خلاص رديت
معلش ياحبيبتى



نجرو
:)
:)
:)
ابتسامات كتير جدا وبعدها اتفقنا :)