ديانا وكيت و.....أشياء أخرى

ديانا 

مش وقته خالص

لأ وقته بدال مانطق نموت
أعترف وأنا فى كامل قواي العقلية ومتحملة مسئولية كل أفعالى 
انى بحب الاميرة ديانا 
ممكن نقول انى كنت معجبة بجمالها وبساطتها ورقتها 
وأناقتها وفستان زفافها وتسريحة شعرها 
مفيش مانع لو قلنا انى تعاطفت معاها لما عرفت معاملة الراجل تشارلز ليها 
بقى ابن الاصول والقصور ياخد بنات الناس يبهدل فيهم كده 
يسمع كلام الولية كاميلا ويخليها تختارله عروسة المستقبل على ذوقها 
اتقهرت طبعا البنية لما عرفت ان جوزها مش بيحبها ولا حاجة واتجوزها بناء على نصيحة الحيزبونة صديقته 
اللى هى كانت متجوزة كمان ...ايه العالم دى صحيح !!!
ده ايه البرود الانجليزى ده 
مش محتاجة أقول انى مش موافقة على تصرفاتها اللا أخلاقية 
بس متعاطفة مع الانسانة البسيطة محدودة التعليم والثقافة 
اللى فرحت لما لقت عندها مقومات انها تبقى أميرة 
وكان باين عليها استعدادها للسعادة والكل كان بيتعامل معاهاباعتبارها اسطورة
وفى الاخر ماتت حزينة 
الكل بيتعامل مع علاقتها المتعددة كدليل على انحراف سلوكى واخلاقى 
وانا موافقة
بس كمان شايفة ده دليل على التعاسة
ورغبتها فى الخلاص من الشعور الكئيب ده 
يعنى حضرتى ببرر للغلط وشايفة ان أى حد تعيس
ممكن ينحرف عادى يعنى علشان يبقى سعيد ؟؟؟؟
طبعا لأ أنا بحاول أفهم بس مبرراتها ايه من تصرفاتها دى 
افتكرتها يوم الجمعة فى فرح ابنها ونسيت كل سقطاتها الاخلاقية 
وافتكرت بس انها أم وكانت هتبقى فرحانة قوى فى فرح ابنها 
تخيلت انها كانت هتبقى زى القمر زى عادتها
وهتبقى لابسة فى منتهى الشياكة والبساطة زى ماعودتنا 
وكنت هبتسم لما أشوف وأسمع عن علاقتها مع كيت 
واتخيل ياترى هيتعاملوا مع بعض ازاى 
افتكرت يوم جنازتها لما منعوا القاء النظرة الأخيرة عليها لان شكلها طبعا اتغير 
ولما بالصدفة شفت صورة مش واضحة ليها قبل ماتخرج من العربية 
وزعلت انى شفتها 
الولد ويليام كمان واصراره على الكنيسة اللى شهدت مراسم زواج والديه وجنازة والدته 
بعد وفاتها افتكرت ولادها ياترى نفسيتهم عاملة ازاى والاخبار مالية الدنيا 
ان والدتهم ماتت مقتولة 
لأ لأ ...ايه كان شعورهم لما سمعوا عن الخلافات بين والديهم وعن انفصالهم وعلاقاتهم الاتنين بآخرين قبل وبعد الانفصال 
ازاى عرفوا يعيشوا فى القصر المتهم باغتيال والدتهم 
اللى حبها ليهم كان واضح جدا 
والدهم والملكة الأم كلموهم ازاى عن والدتهم 
معلش أصل أنا تربية نهر الحب وزكى رستم ووصدقينى يانوال وامك ماتت والحاجات دى
الراجل تشارلز ده كمان حيرنى كتير 
لما عرفت انه مصريتجوز الولية كاميلا اتخنقت منه بزيادة وبعد شوبة برضه تعاطفت معاه 
ماهو أنا محتاجة استئصال لغدة التعاطف اللى عندى دى 
بس حقيقى ...الوحيد اللى متعاطفتش معاه نهائى ولا اتشحتفت
ولا عيطت ولا قلت له بحبك ياريس هو مبارك 
يييييييه
ايه اللى جاب سيرة السياسة فى الموضوع 
حلوة سيرة تشارلز ...خلينا فيها 
تعاطفت مع الراجل لما اصر بعد كل السنين دى يتجوز الوليه الحيزبونة
وقلت ياحفيدة عرابى يمكن بيحبها والسنين دى كلها يمكن تشفعله 
يمكن ...!!!
طب انت ليه متعاطفة مع ديانا قوى كده 
ومش متعاطفة مع الوليه الحيزبونة كاميلا ؟
مش عارفة 
ممكن أكون عنصرية عكس ماانا شايفة نفسى ...برضه مش عارفة 
يعنى سيادتك مضيعة وقتك ووقتنا علشان تتكلمى عن العالم دى ...
خلاص دول مثلك الأعلى وقدوتك ؟؟؟
لأ مش حكاية قدوتى ..كل الموضوع ان حنية قلبى مالهاش حد ؛) 
طب ممكن كده وبمنتهى الصراحة تقولى
ايه السبب اللى خلاكى كتبت البوست ده 
الفرح طبعا 
أنا بقول بمنتهى الصراحة 
طيب 
يبقى انى خايفة وزهقانة ومتوترة وحزينة ومش عارفة اكبر دماغى وانسى 
ياترى الثورة دى ممكن لاقدر الله بعد الشر يعنى تفشل ؟
والمجلس العسكرى ..
ايه الضمان انه هيسيب السلطة بعد الانتخابات
وبعد وجود البرلمان والريس الجديد
والمشاكل اللى بتظهر كل شوية دى ...
سببها الفلول ولا احنا اللى ظهرنا على حقيقتنا بعد ما الفرعون غاب 
ولا هى مقصودة علشان يزيد الخوف عند الناس
ويطلبوا من المجلس العسكرى يفضل معانا مدة أطول 
طيب اللى تم لغاية دلوقت مبشر ولا الثورة بتتسرق فعلا 
ايه المقصود بالظبط يعنى من اسقاط النظام ...
طيب اسقطهم ازاى وخصوصا ان مش كلهم زى بعض 
وايه اللى بيحصل مع عمرو موسى ده ...
اللى مش عاجبه عمرو ممكن جدا مش ينتخبه ..
وممكن يروح مؤتمرات عمرو ويناقشه ويفند رأيه
لكن السب والضرب ليه ؟؟
شايفين ان الفقى مش ممثل مناسب لمصر فى الجامعة ...زى الفل 
لازمتها ايه نفبرك صورة انا مش مصدقاها انه بيبوس ايد واحد من اياهم 
مبارك مايروحش طرة ليه ؟؟؟؟؟
كبير على طرة ؟؟؟
سنا ولا مقاما ؟
ولو مقاما ... يبقى كبير مقاما عند مين ؟؟؟
انت متأكدة ان الفلوس مش هترجع صح ؟ 

هو المصرى اليوم كشف عن أشد وجوهه قبحا ليه ؟
والدستور ليه قلبى شايل منها من ساعة الاستفتاء ؟
كاميليا ووفاء عايزاهم وشايفاها قضية مهمة جدا 
بس عايزاهم بطريقة تحافظ على البلد 
طب ايه الطريقة فى رأيك ؟ مش عارفة 
طب ايه الغلط اللى عمله المعتصمين عشانهم ...مفيش 
الكنيسة غلطانة . ؟ جدا 
بس أنا زعلانة من غلط رجال الازهر اكتر   
كمان يعنى نجيب جبرائيل ده مشكلة لوحده 
واختيار البابا ليه عامل أزمة بالنسبة لى شخصيا 
آه هو كده ..
.كلامه ونظراته وافعاله مستفزة ومش حريص ابدا على وأد فتنة
بالعكس كلامه واسلوبه بيشعللها 
محتارة ومش لاقية حد أثق فى قدراته وأنتخبه رئيس جمهورية 
يمكن البرادعى اللى بيتكلم مع منى حالا أحسنهم فى اللحظة دى ..
 .بس مش كل كلامه ولا كل صفاته 
كمان مرفوض شعبيا ببشاعة
على عكس عمرو موسى المكتسح شعبيا 

اللى بيتحرك بجد وسط الناس
مش بدى أهمية للضرب والخناقات فى كل مرة عمرو بيعمل مؤتمر 

لانى شايفة الناس حواليا معجبين بيه جدا ومقبول قوى كرئيس بالنسبة لهم
البرادعى بيتكلم كلام حلوومهم 
وبيعجبنى أحيانا انه بيحاول يرسم مستقبل للبلد 
بس  كلامه يتنفذ ازاى 
محتاج كتير قوى علشان الناس تفهمه وتوافق عليه 
هنحتلف اد ايه على اللجنة التأسيسية للدستور 
مين هيكونوا أعضاء المجلس الرئاسى المدتى ومين هيختارهم ومين هيحاسبهم 
الجيش هى اللى هيختارهم وده الارجح ؟
طب مايبقى المجلس العسكرى أولى
لو هو كده كده اللى بيحكم فى الفترة الانتقالية دى 
مانخلى شغله قدامنا كلنا بدل مايبقى من ورا ستار
ليه الكل خايف من الاخوان والسلفيين والاسلاميين 
فاهمة عيوبهم والله وخطابهم السياسى مش كله طبعا عاجبنى 
بس بمزاجنا أو غصب عننا كلنا قاعدين مع بعض فى البلد دى 
ولازم نتكيف على كده 
ياربنا 
مين جاب سيرة السياسة 
كيت جميلة وفى منتهى الطعامة ...بس ديانا أحلى 
بس كيت شكلها واعية كده وعاقلة مش زى ديانا 
الواد ويليام كمان يارب ميكونش وارث البرود الانجليزى بتاع عيلته ده 
فستان البت كيت حلو حقيقى وبسيط ولذيذة حكاية الحنطور دى ودرجن درجن وكده 
....
ماعلينا 
العروسة للعريس و ....

3 التعليقات:



قلب الأسد يقول...

:) مش تعملي شير للحاجات دي عشان نقراها !
سيبك إنت .. أحلى حاجة الفستان ;)

sony2000 يقول...

الجري مش للنتاعيس

للي خيفين يحسوا بالفرح

اناااا عوزا افرح ياجودعاااااان

حسه ان مصر خيفه تفرح

تعرفيشي ليه؟

حفيدة عرابى يقول...

قلب الاسد
ازيك ياشقية :)
أصلى بكلم نفسى ودى حاجات شخصية وكده :))))
الفستان فعلا جميل ؛)


سونى
مصر هتفرح ان شاء الله وهتبقى زى الفل
ربك كبير :)