مراسيل 2

عصام شرف

زيارة السودان وسيناء والخليج
نقابة الفلاحين وسمير رضوان وأحمد جمال الدين
تصرفاتك الشخصية والارهاق الواضح جدا عليك
تويتر اللى قرر يتسلى عليك 
واحساسى ان مبارك مشى وساب بلد كل مشكلة فيها كارثة
حتى قنا اللى حيرت الكل واختيارات المحافظين اللى معجبتش حد
عارفة انك مسئول ومفيش مسئول فى بر مصر هيبقى معصوم من الحساب
لكن أنا عايزاك تاخد فرصتك وعايزة وقتك يبقى طويل فى الوزارة
لما سمعت كلام السودانيين عن زيارتك فهمت انك ماشى فى الطريق الصح
ربنا يعينك


أحمد جمال الدين

تقولى مين من وزارء التعليم حسيتى بس انهم عايزين تغيير
أقولك محصلش  ....مشفتش يابيه
ولو تقولى ايه المنهج اللى كرهك فى حياتك
وماشية انت وصحابك تدعى على اللى بلاكم بيه ربنا يجازيه بعمله
اقولك منهج تالتة اعدادى
ومع ذلك كنت نايمة والتليفزيون مفتوح وصحيت لثوانى
لقيتك بتقول المنهج مش هيتغير السنة الجاية 
يعنى احنا شربناه سنة كمان
و مع ذلك نمت والله وغمضت عينى وأنا فى منتهى الرضا 
ومطمنة ان مصر بقى فيها وزير تعليم بيفهم ياربى
انك بس تقول انك مش ناوى تسمع كلامنا وتغير المنهج بسرعة 
ده حسسنى ان الأمل كبير 
وان الوزارة الأهم بدأت يبقى عندها عقل وخطط
تصدق يافندم ..كل حاجة زى ماهى ..
السبورات والعيال وأنا والكتب والمناهج وحتى المتابعين
حاجتين بس يافندم مخليين معنوياتى فى السما
صورته يافندم مش موجودة 
وأملى كبير فى ربنا أشوف على ايديك 
أيام فى التدريس تقرب كده لميدان التحرير


حضرة المصرى 

ياللى فى منك ملايين وملايين فى الشارع 
أنا اسفة يافندم 
ومن قلبى والله ...حكمتك لازم تبهرنى من وقت للتانى
عارف انت عايز ايه ومرتب اولوياتك كويس وسايب اللى يتكلم يتكلم 
راسى كده وهادى ومااخدتش من النيل ثورته
لكن اتعلمت الصبر من كتر مااستنيت فيضانه 
كل اللى بطلبه بس انك متخليش حد يطمع فيك تانى يافندم 
فاكر لما الاسكندر جالك وحب يعمل ناصح وراح زار امون 
والكهنة ضحكوا عليه وفهموه انه ابنه 
متعملهاش تانى الله يخليك 
بيصدق الفرعون نفسه وبيلاقى مليون هامان حواليه بيسبحوا بحمده
وبييجى جيل من المصريين مش عارفة مالهم وبيعبدوه ليه 
بلاش دى الله يكرمك
هرمنا ...هرمنا من أجل هذه اللحظة التى فارقنا فيها الفرعون الاخير

ريسنا الغالى 

طبعا ريسنا وغالى 
هو أنا شفت غيرك ..لأ الكدب حرام أنا شفت السادات شوية صغيرين 
انت مشيت ياريس خلاص ..مش كده ؟ 
صح ياريس ؟
اعذرنى لسه بتعدى أوقات الاقينى مش مصدقة 
اللى بيطمنى ياغالى لما اجرى اشوف وش عمر سليمان
وهو بيقرأ بيان التخلى ولا التنحى ولا الخلع 
ملامح سليمان بتنطق بالحقيقة ياريس 
بنام بعمق بعدها 
مع انى سبحان الله قبل البيان ده باقل من اربعة وعشرين ساعة 
كنت هاموت بسببك ياريس وبسبب النائب بتاعك لما قال عودوا الى دياركم 
ريس 
هو انت هتقول لربنا ايه ؟؟؟؟؟
بتكلم بجد 
الحمل تقيل قوى هتشيله ازاى
سيدنا عمر كان بيقول لنفسه ماذا تقول لربك غدا ؟
وانت كنت هتسجن ابراهيم عيسى لما فكرك انك ميت 
مصر كبيرة عليك 
خسرتها بعندك وطمعك وجشعك 
عارف لو كنت شفتها ..لو بعدت عنها ابنك 
لو راعيت فيها ربنا 
لو بس حبيتها ..بس نقول ايه !!
انت اللى نسيت ياريس ان الكفن مالوش جيوب 
انت اللى نسيت المنصة والسادات اللى راح فى يوم نصره 
انت اللى ماذاكرتش تاريخ 
انت اللى مسمعتش تميم لما قال 
شعب بغزاله اتخنق ..قلب التاريخ فى يومين
انت الغلطان بتخنقه ليه
شوف هو الكلام بينا كتير ..
كفاية بس النهارده اتعلم درس اسمك اللى اتشال من الميادين


اعلامنا الموقر 

ماما قالت لى مينفعش أقول كلام عيب 
بس ليه ؟؟؟؟؟؟
انتم بتتربوا فين ؟
مين بيعلمكم النفاق ؟
عبد الله بن سلول ؟
ده كان غلبان واتكشف وضاع وخلاص 
ييجى ايه فيكم بن سلول 
لما الصدفة بتخلينى اشوف حد من حضراتكم ولو ثوانى بستغرب قوى 
انتم بتشتموا مين طول الوقت ؟
الاشاعات دى اللى بتروجوها عن مين ؟
مش ده الريس حامى حمى الوطن 
مش ده الريس الرمز والاب 
مش ده ابنه الشاب الواعد والوريث المنتظر 
السيدة الاولى نسيتوا خلاص اياديها البيضاء 
فجأة كده بتنافسوا الثوار فى الحديث عن الفساد ورجاله 
كلكم فجأة بقيتم ثوار 
طب بلاش الاسئلة البايخة دى 
مش بتزهقوا ؟
مش بتحسسوا بملل من النفاق ؟
يعنى لو الحياة كلها نفاق ...نفاق ..نفاق 
ده مش بيضايقكم 
مش بتحسوا انكم عايزين تشموا هوا نضيف شوية 
ينفع يعنى انى اسمعكم والاقينى بدافع عن مبارك والعائلة الكريمة 
من كتر الكدب اللى بتكدبوه 
جمال خلاص هو اللى قتل سوزان تميم 
وهو اللى سرق الونش وهو السبب فى النكسة والنكبة 
امال مين اللى كنتم بتتحفونا بوشه السمح ليل نهار 
ده انتم خليتونى ادعى ربنا يطول فى عمر مبارك
علشان تقل المدة اللى هاشوف فيها ملامح الغالى ابنه 
على فكرة يعنى 
نفاقكم مفضوح ومكشوف ومقزز
ومش هتفع خلاص حكاية رجال كل العصوردى


الشعوب العربية الثائرة

من اليمن لسوريا لليبيا 
للعراق وفلسطين وكل بلد ربنا ابتلاه بحاكم فرعون غبى ومتجبر
هانت وبانت كلها كام يوم 
ونهارنا نادى ونهار الاندال مش باين بإذن الله

.................

النقط دى علشان اللى هيزعلوا من كلامى غاليين على قلبى جدا  
الجيش فعلا خط أحمر
وتحت أى ظرف اتمنى من قلبى ميحصلش ولا حاجة من الاتنين 
لاصدام بين الشعب والجيش 
ولا انقلاب من داخل الجيش 
لو المؤسسة العسكرية فيها فساد
زيها زى كل مؤسسة ماخدت نصيبها منه فى عهد مبارك
الحل الوحيد اللى ممكن اقبله
انى اضغط على المجلس العسكرى سلميا لتحقيق مطالب الثورة 
ومفيش أجمل من المليونيات فى الضغط
وأقلل وبشدة المدة اللى المجلس هيشرف فيها معانا 
واستنى لغاية مايبقى عندى ريس ودولة ودستور وبرلمان حقيقى 
ويبدأ الريس بهدوء يطهر جيشنا من نصيبه من الفساد
لكن جيشنا يخرج منه ضباط بسلاح وينقلبوا ضده 
شكرا 
مش موافقة ومش ناوية أوافق 


البرادعى 

نصيحة قلبية 
لو أنصار حضرتك فضلوا قاعدين معانا على فيس بوك 
وبيتكلموا عنك بنفس الطريقة 
يبقى حضرتك مش ممكن هتفوز ولا حتى بكرسى فى مجلس محلى 


6 التعليقات:



فاتيما يقول...

انا موافقة على كل المراسيل
اكيد
فيما عدا واحد
طبعا انتى عارفاه
..

هعلق عليه بس بجملة قريتها ف مقال
بيقول ان الخط الاحمر الوحيد
هوه حرية هذا الشعب
وفقط



الأعلام
انا متفقة معاكى ألف ف المية
لأنى عارفة كواليسهم
خصوصا ماضيهم ..
و منهم من كانوا يقبلون الأيادى والأرجل ودلوقتى بقوا ولا ثوار 25 يناير ...

وزير التعليم سمعته مع ريم ماجد
راجل محترم
وواضح انه متوزان ...
واما نشوف


الشعوب العربية الثائرة
كلنا بندعيلهم
وبفرح لما اسمعهم بياخدوا مبارك مثل وعبرةو يلوحوا بيه قصاد حكامهم
ويقولوهم مصيركم مصيره


المصرى بقى
فعيوب سنين
مش هتتحل ف ثوانى
والصبر من كتر ما كان سلبية وخنوع
محدش عاوز يرجعله دلوقتى تانى
بس اولوا الامر برضو يبطلوا استفزاز ويفهموا ان الرصيد الصبر نفد خلاص


عصام شرف
خليته للآخر
و مش هتكلم كتير عن التخاذل ف اشياء
والشطارة والوعى ف اشياء اخرى
بس هقولك يا فيدو حاجة واحدة
د. ستيتة قالتها
وانا موافقها جداااااااااااااا

الشعب المصرى خلاص
مش هيبصم لحد تانى على بياض
الناس خلاص عينها ف وسط راسها
معندهاش استعداد تهلل لحد
او تثق ف حد
او تسكت على حد
علطول
هتلاقي الشعب خلاص
مركز على كل خطوة
وحركة
ولفتة
ومنتقد ومبيسكتش
لأنته اتعلم م السكوت والخوف
ولأن الدنيا اتغيرت خلاص



رغيت كتير
بس معلش

مقولتش اهم حاجة

كل سنة وانتى طيبة
وحمدلله ع السلامة

حفيدة عرابى يقول...

الله يسلمك ياطمطم
وكل سنة وانت طيبة وبخير


موافقاك انت ودكتورة ستيتة جدا على رأيكم فى شرف وغيره
كل الموضوع انى عايزاه ياخد فرصة

شوية وقت
النهارده علشان كان فايتنى مقالات وكلام كتير قوى فى الجرايد مش فاكرة مين كاتب فى المصرى اليوم وامتى انه بيطالب شرف بالاستقالة
واحنا لسه ملحقناش ياطمطم
فيه حاجات كنت عايزاه فيهااقوى
بس عايزة شوية صبر عليه
عندى شعور قوى انه بيرسم مستقبل مش مجرد رئيس حكومة انتقالية
السودان والنيل وسيناء والخليج والفتن اللى بتطلع من الهوا مش شوية
هو مش شفيق ومعجبنيش شغل تويتر عليه النهارده


:)
الخط الاحمر حرية الشعب
صح ياطمطم
بس انا قلت الجيش مش المجلس العسكرى اللى هو سلطة
يعنى لازم يفهم انه هيتحاسب على تصرفاته زيه زى غيره
بس مش موافقة ياطمطم فى كل الاحوال على انقلاب عسكرى ضده
احنا نضغط ونطلع عينيه وناخد حقوقنا من بق الاسد مش منه يس
بس لو الظباط خرجوا بسلاحهم ضده ياطمطم يبقى جيش البلد دى ضاع خلاص ومعاه حريتها
الجيش لما خرج فى 52 كان ضد الملك والانجليز
لكن المرة دى لاقدر الله هتبقى أصعب كتير
اتكلمنا كتير قبل كده فى حاجات شبه كده ومغيرتش رأيى فى العسكر وحكمهم
بس النتيجة والاسلوب هما اللى انا محتلفة فيهم ياطمطم


فين الرغى ده اللى انت رغيتيه
ده انا صفحة تعليقاتى نورت بالغاليين على فلبى :)

انا بعت رسالة على الموبايل امبارح قبل رجوع النت وايميل بعد رجوعه مش عارفة وصلوا ولا ايه

فين البوسات والحضونات طيب ؟ :)

فاتيما يقول...

انا كمان مش مختلفة معاكى يا فيدو

بس الضباط منزلوش الميدان يوم 8 ومعاهم اسلحة ولا حاجة

بصى
الجيش بتاعنا مختلف
امبارح احمد ع التوتير عمل مقارنة هايلة ما بين جيش مصر وسوريا وليبيا و قال كل واحد ايه واننا مش شبه بعض بالمرة وبالتالى محدش يقلق

انا بزود على كدا ان دا حصل
لما شومان وزمايله نزلوا قبل تخلى مبارك بيوم تقريباً
والمرة التانية لما الولاد نزلوا ف جمعة التطهير
دى رسايل يا فيدو
بيقولوا بيها بشكل عفوى
ان لو حصل مواجهة بين القيادة والشعب ..الجيش هياخد صف الناس
مش اللى فوق ...
بس للأسف الرسالة موصلتش
واتقال عليهم خونة ف اسوأ الاحوال
ومتهورين ف أحسن الاحوال


عموما
الحكاية لسه قصادها وقت
وربنا هيظهر الحقايق اكيد
ان عايشين زمن .. مفيش فيه حاجة بتستخبى والمهم أى كان ما يظهر مستقبلاً اننا نفضل متفقين يا فيدو
انا عارفة اننا ولو اختلفنا
هنفضل برضو متفقين

:)


ووصلنى الرسايل يا حبيبتى
بس انا رديت ف إيميل
يا رب يكون وصل

والبوسات والحضونات اهم
بس هيكونوا فيهم زعل

مش منك

م الدنيا

ينفعوا ؟

لورنس العرب يقول...

ازيك يا ميس

حفيدة عرابى يقول...

فاتيما
انا اسفة على التأخير فى الرد
بس مكونتش فى بلوجر خالص
عارفة ياطمطم أجمل جملة قولتيها اننا هنفضل متفقين
وده هو الضمان فى رأيى لنجاح الثورة بعد توفيق ربنا سبحانه وتعالى

أنا اتكلمت عن انقلاب ردا على الفيديوهات المنشورة على فيس بوك قبل الجمعة الحزينة من الضباط اللى فى أمريكا

أنا رأيى ان ضباط الجمعة اياها كانوا متهورين مع انى كنت شاكة فيهم طول اليوم
لغاية مادارت المعركة الحربية فى التحرير وكمان المجلس انكر ان كان فيه رصاص
هنا كنت متأكدة انهم مش خونة
بس مش قادرة اقول غير انهم غلطانين ياطمطم وانهم ادوا فرصة للمجلس يفترى فى الرد ويسكت عليعم طول اليوم وينتهز فرصة الاعتصام ويعمل نفسه بيفضه وحجته ان من حقه يقبض على المنشقين عليه
وان موقفهم مختلف عن موقف شومان لاسباب كتير

كل الموضوع ياطمطم ان اللى بقرأه فى الموضوع ده تحليلات منطقية وعقلانية وداخلة دماغى قوى وانت عارفة
بس النتيجة هى اللى انا مختلفة عليها
مش الكلام بيقول ان فى فرق فى الجيش ولائها لمبارك أو لأجهزة تانية غير الشعب
طيب لما الضباط الشرفاء يخرجوا سواء بسلاحهم أو لأ ..الشرطة العسكرية والفرق زى 777 والحاجات الغريبة اللى أول مرة نسمع عنها دى
مش هيكون شغلها انها تعتبر تصرف الضباط دول تمرد وتحاول تقضى عليهم بمنتهى العنف
ساعتها هما كمان هيحاولوا يدافعوا عن نفسهم
الحال وقتها هيبقى ايه ؟؟؟
ومين يحكم البلد وقتها ونوقفها على رجليها تانى ازاى
رأيى المتواضع اضغط بكل الطرق اللى اقدر عليها علشان ناخد حقوقنا من المجلس
لكن مهمة تطهير الجيش دى عايزاها تتأجل شوية
وفى الاول والاخرربنا يستر ويلهمنا الصح

انا كمان رديت عليك فى ايميل ويارب يكون وصل
يارب ياطمطم تخلص حالة الزعل دى بمنتهى السرعة وتبقى أيام الزعل ونصيبك منها خلص خلاص
انت تستاهلى كل خير
:)
ولما نتقابل ان شاء الله هابقى اقولك ايه سبب الابتسامة اللى فاتت دى بعد الجملة اللى فوقيها
بوسات وحضونات ياأحلى طمطم

حفيدة عرابى يقول...

لورنس العرب
أهلا بحضرتك
أنا الحمد لله بخير
حضرتك عامل ايه ؟
شكرا جزيلا على سؤالك يافندم