حكومة شفيق ....وأنا

ليه كنت ضد وزارة شفيق ؟
ليه توقعت ان حكومة شفيق انتهت بمجرد مشاهدتى لبرنامج  بلدنا بالمصرى؟
البوست اجابة عن السؤالين فى نفس الوقت 

 رأيى عاطفى وانفعالى وغير موضوعى .......معترفة 

- الفريق شفيق اختيار مبارك ...وفى وقت قاتل كان بيلعب فيه مبارك بكل الاوراق لاجهاض الثورة
 وقبول شفيق للوزارة كان خصم من رصيده مش اضافة
 مع احترامى لاراء كل الاصدقاء اللى اتكلموا عن انجازاته فى وزارة الطيران
الحلقة فعلا أكدت لى انه يتمتع بدماثة خلق لكنها مش الصفة الوحيدة المطلوبة لرئيس الوزراء وخصوصا فى الوقت الحالى
معروف ان رئيس الوزراء فى مصر موظف ..لكن الوضع دقيق ولو أنا وزارتى مش هتكون اضافة للبلد فى الوقت الحرج يبقى الاستقالة أفضل 

-كان رئيس وزارة وقت موقعة الجمال والبغال اللى استمرت لمدة طويلة
 بدون أدنى استعداد من الفريق لايقافها أو التحقيق لمعاقبة المدبرين والمنفذين 
طبعا هيتقال ان فيه تحقيق ...أنا بتكلم عن رأيى الشخصى
 واحساسى ان الفريق الموظف عند مبارك و الموالى له  مش مستعد اطلاقا لمعاقبة المتسببين فى قتل وجرح المتظاهرين 
ولم أسمع ابدا عن أشخاص تم القبض عليهم وبيتم التحقيق معهم بتهمة الضرب والقتل أو التحريض

-الفريق وصل للشعب احساس انه غير مهتم بدماء الشهداء أو على الأقل مش بتحتل المرتبة الاولى عنده 

- التراخى الشديد فى اصدار قرارات المنع من السفر وتجميد أموال رموز النظام السابق 

-وقف اعادة حلقة ابراهيم عيسى ...يبقى حالنا مااتغيرش ومحصلش ثورة لما لسه البرامج بيتم منعها بتليفون 

-الاتصال التليفونى للرد على منى الشاذلى فى واقعة محمود سعد ...كان الاولى برئيس الوزراء انه يبعد نفسه عن الاهتمام بالرد الانفعالى على محمود سعد لانه كان خصم من رصيده واسفة بس كمان خصم من هيبته وكرامته 

-التاريخ العسكرى محترم جدا لكنه مش مجال للتفاخر وقت السؤال عن العمل والانجاز  كرئيس وزارء ...كمان مضطرة أقول مع احترامى الشديد لكل من اشترك فى أى حرب من حروبنا مش اكتوبر وبس وانى عارفة انهم ليهم فضل علينا ليوم القيامة 
لكن مادام قلت ان رأيى مش موضوعى ...مبارك عقدنى ...آه والله ...تلاتين سنة مبهدل فينا ومضيع بلدنا بشرعية الضربة الجوية ....حرام ..مش كده ؟

- مفهوم ان بعض الوزارات بتكون من اختيار رئيس الجمهورية أو المجلس العسكرى حاليا ..لكن فى الظروف دى مكانش ينفع ابدا اوافق على وزارة فيها وجوه مكروهة من الشعب بشدة ...والوجوه دى معبرة عن سياسات قامت ثورة للتخلص منها ..مش مجرد شعور شخصى زى ماتكلم  الرائع حمدى قنديل عن ابو الغيط مثلا 
 لكن ابو الغيط وجه كريه وتعبير عن سياسة مرفوضة ووضع مش ممكن نقبله لمصر بعد الثورة 

- مجرد التفكير فى اختيار مفيد شهاب للجامعة العربية كان رسالة فى منتهى السوء ان التغيير اللى بنحلم بيه لسه بعيد

-وزير الداخلية وكلامه اللى مش عارفة أوصفه بايه بصراحة ..... فى الوقت اللى الوزير كانت كل حسابات المنطق بتقول انه هيعتذر عن تصرفات رجاله وهياخد خطوات عملية وسريعة لمحاسبة المجرمين منهم ومااكترهم  ...كلامه كان صادم جدا ومستفز  ...متأكدة ان حقيبة الداخلية مش من اختيار شفيق  ...لكنه مسئول عن تصرفاته

-الفريق وصل لى أنا على الاقل انه مجرد موظف والوقت ده مش محتاج موظفين بينفذوا الاوامر وخلاص 

-اجابته على السؤال الخاص بعلمه بوجود تعذيب فى أمن الدولة ..انه مالوش فيه ..كانت ضده على طول الخط لانه وضح انه جزء من النظام الفاسد أيا كان رأيه الشخصى وانه لايكفى انغماسه فى عمله فى الطيران علشان يحمى نفسه من سمعة الانتماءلمنظومة الفساد 
ازاى أبقى عارف ان النظام اللى أنا بشتغل معاه وزير مش مجرد موظف ...ازاى أعرف ان النظام فاسد وبينتهك حقوق الانسان واتحجج انى ماليش فيه

-رئيس الوزارة مكانش عنده أى اجابة على أى سؤال مهم وليه تأثير على مستقبل البلد
ولما يسرى فودة حاول يحصل على مانشيت عن موضوع فى منتهى الاهمية وهو اعادة هيكلة وتنظيم جهاز أمن الدولة وايه الاليات والخطط اللى ممكن تستخدم لتحقيق الهدف الخطير ده ...رئيس الوزارة مكانش عنده أى اجابة مفيدة

-رأيى الشخصى ان الاسوانى كان منفعل ..مش اكتر من كده ومش شايفة الانفعال فى الوقت ده وعن الدم والقضايا المهمة غلط
- الاسوانى كان بيتكلم باسم الثوار والشهداء ووقت الكلام عن الدم والثورة مينفعش نقول انه احتد فى الكلام مع الاكبر منه سنا ورئيس الوزارة 

-مضطرة أقول انى بستغرب جدا على تصرفاتنا كشعب وازاى بنستخدم العاطفة واخلاقنا فى غير مواضعها 
يعنى مبارك يخرب بلدنا ويقتلنا تلاتين سنة ونتعاطف معاه
 وشفيق رئيس وزارة فى وقت حرج ونزعل جدا لمجرد ان الاسوانى اتعامل معاه بندية 

- بمناسبة الاسوانى ...البعض انتهز الفرصة للطعن فى الاسوانى والاباحية الموجودة فى بعض كتاباته ..أنا شايفة ان الموقف مختلف 
وانى دلوقت بتكلم عن موقف محدد وواضح للاسوانى
 بيدافع فيه عن حق ودم لينا عند النظام ولسه محصلش قصاص 
يبقى التجريح مش وقته ومش منطقى

-الفريق تصرفاته كانت بتوصلى رسالة ان وزارته بتخصم من رصيد الثورة وبتسمح لمنظومة الفساد تاخد وقتها لحماية نفسها والهرب

- مكانش لى أى دور فى موضوع البلوفر وكنت مستغربة فى البداية من الضجة المثارة عليه ...بالعكس أنا شايفة ان البلوفر دليل على التواضع والعملية  والبساطة وبيدى رسالة ايجابية مش سلبية 
لكن ممكن فى نفس الوقت أفهم موقعة البلوفر من ناحية تانية وكان لازم توصل للفريق بسرعة وبنفس الطريقة 
ان هيبة الفريق ومكانته كرئيس وزارة ضاعت ...وانه كان مطلوب منه مجهود خرافى لكسب ثقة شباب التحرير لكنه مهتمش من الاصل بكسب ثقتهم 
يمكن محاولش يستوعب ان مصدر الشرعية اتغير ...يمكن مش متخيل ان ضغط الميدان  ممكن يجبره على الاستقالة ...أو ممكن يجبر المجلس العسكرى على اقالته 
لكن أنا شفت الموقف من ناحية تانية 
انى لو حسيت لاقدر الله ان هيبتى ومكانتى واحترام الطالبات لى قل ...مينفعش اكمل ولازم بمنتهى السرعة أسيب المدرسة مش الفصل وبس 

كان معكم ميس حفيدة عرابى هانم :)

9 التعليقات:



لورنس العرب يقول...

شوفي يا ميس
طالما انكم تظاهرتم ضد الرجل وهو لم يعمل سوى 15 يوم فيحق لي تقييم عصام شفيق بعد شهر واحد من الآن
كله يتحدث ويقول لي انه لم يفعل شيئا- يبقى اتفقنا
مقياس العمل مع رئيس الوزراء الجديد هو ان نرى انجازاته في شهر واحد- ايه رأيك؟
طبعا هتقولي هو الراجل هايلحق يشتغل- أقولك هو انتم تركتم شفيق يشتغل؟

يا ميس رشا
العمليه انا اراها حاليا مسألة عند ليس أكثر
وحب المتظاهرين في اختيار شرف -فقط- لأنه كان موجودا بالتحرير مع المتظاهرين ودي انا أراها مشكله كبيره
وانتي عايشه كتير في مصر -واعتقد انك تصغريني بسنوات- تقدري تقولي هايعمل ايه عصام شرف؟
لن قول لك انه خرب وزارة النقل وجاء منصور وأصلحها إلى أن حدثت حادثة القطار، ولن اعدد في عيوب لارجل او مميزاته، لكن المشكله هنا يا رشا اننا بنحب ونكره، وهذا الاسلوب لا يصلح في ادارة فريق كرة قدم، فما بالك بالبلد بأكملها
نجيب فلان لأننا نحبه، ونترك فلان لأننا نكرهه، ولأننا نحب فلان نحضر له المميزات ونتكلم عنه كويس جدا، ولننا بنكره فلان نفضل نبحث عن المصائب التي عملها وفي النايه لا أحد سيعمل في هذا البلد
حكومة شفيق ظلت شهرا في منصبها- لا يمكن ابدا الحكم عليها، ولو كل واحد سلم على مبارك هانقتله يبقى من الاولى اننا نقتل كل الموجودين في المناصب الحكوميه حاليا
_____________________
شفتي بوروندي عملت ايه- راحت انضمت مع اثيوبيا، تخيلي لو احنا فعلا بنبحث عن مصلحة البلد هل كنا خلينا واحد زي عمر سليمان يجلس في بيته وهو كان ماسك هذا الملف بعنايه، اوعي تقولي اي حد يمسك بعده، انتي عارفه ان اللي بيبدأ م الاول في الامر دي بيكون الموقف صعب عليه جدا
________________
يوميا على الله أرى الماجرات في لبيوت بسبب الخلاف في وجهات النظر
مش عارف لمتى هايفضل الوضع على الحال ده
اللي موافق على الثوره يرى انه دائما على صواب ولا يرى أخطاء ويتصرف بطريقة "حبيبك يبلع لك الزلط"
ومن لا يوافق على الثوره يتمنى حدوث مصيبه داخل البلد ليثبت صحة وجهة نظره!!!

حفيدة عرابى يقول...

يافندم
الثورة قامت لاسقاط النظام وهدفها كان واضح
مبارك حاول التحايل على الثورة بعد أول خطاب بوزارة شفيق
لا أنكر امتلاك شفيق لبعض الصفات الشخصية الحميدة لكنها مش أسباب كافية لنجاحه رئيس وزارة

يافندم حضرتك شفت حلقة بلدنا بالمصرى؟
أنا أصريت أشوفها الصبح مش بليل
ومن قبل ماالحلقة تخلص وقبل مااسمع انه خلاص استقال
قلت خلاص شفيق خلص واستحالة هيكمل تانى رئيس وزارة
هيبته ضاعت وانتهى فى البرنامج خلاص

يافندم ده موظف
ممكن يكون موظف شاطر ومؤدب وابن ناس ومتواضع
لكن مش رئيس وزارة وفى وقت حرج زى ده

متأكدة ان رئيس الوزارة موظف حسب الدستور وان المجلس العسكرى حاليا هو اللى بيختار الوزارات السيادية
لكن يافندم فين دوره ؟
ايه سياسته ؟
فين فكره ؟
معرفش يجاوب على ولا سؤال مهم فى الحلقة ؟
وخصوصا سؤال اعادة هيكلة أمن الدولة

نفسية الموظف متنفعش فى الايام دى يافندم


لو حضرتك مستعد تعارض عصام شرف من دلوقت ...حقك يافندم
احنا فى عصر الحرية خلاص

مسمعتش عن عصام انه خرب وزارة النقل
بس مش هينفع أنكر انى سعيدة انه مش محسوب على النظام السابق وان مده وزارته كانت قليلة وانه كان مع الثوار فى التحرير وانه راح التحرير النهارده وقال انه لو معرفش يحقق مطالبنا هيكون معانا فى التحرير
------------
مع كل الامل فيه مستنية أولا التشكيل الوزارى وبعدين أعماله

عرف يكسب قلوبنا وده مش عيب ولا غلط وخصوصا لو عرف بعد كده يقنع عقولنا

شفيق يافندم معرفش يستوعب النقطة دى
مقدرش يفهم ان الشرعية فعلا من التحرير

يافندم دى الحقيقة الجديدة اللى لازم نتكيف معاها
شفيق بيتعامل ان الدنيا لسه زى زمان
وان الاوامر والتكليفات من الريس أوالمجلس العسكرى و بس وكان بيغفل ميدان التحرير
لو كان حاول يطمن ويكسب ثقة الميدان
كان الشباب وافقوا يمنحوه اكتر من فرصة
---------------
موضوع دول حوض النيل قديم ومأساوى
وهاقول فيه كلام مش هيعجب حضرتك

انه بسبب الفشل الذريع اللى كنا عايشين فيه فى عهد مبارك
ومحتاجين وقت علشان نعرف نتعامل مع الدول دى ونفهم مطالبها وتصرفاتها وايه المشروع فيها وايه اللى بضغط قوى معادية
---------------
عمر سليمان
اقنعنى يافندم انه مش مهندس المفاوضات الفلسطينية الاسرائيلية
وانه مكانش فى صف اسرائيل ضد الفلسطينيين وانه مش مسئول عن عمليات تعذيب لصالح أمريكا
وانه مش حامى حمى مبارك الفاسد اللى نفسى فى رقبته
وساعتها يافندم أنا مستعدة اروح له بنفسى اقوله ارجوك اتولى ملف حوض النيل الله يعمر بيتك
مش قادرة أقنع نفسى ان الغاية تبرر الوسيلة
ومش قادرة أقتنع ان البنى ادم الفاسد
اللى ممكن يقبل على نفسه تعذيب واهانة غيره ممكن نوصل لمصلحة من وراه
مش عايزة المصلحة من ورا عمر سليمان

معترفة ان رأيى انفعالى وعاطفى ومش موضوعى
بس ده أنا للأسف

يافندم حضرتك ماسألتش نفسك ليه دول حوض النيل بتعاملنا بصلف وكره شديد كده

ولو حضرتك قلت ان اسرائيل هى السبب
وأنا موافقة جزئيا

ازاى عمر سليمان صديق اسرائيل هيحل مشكلة حوض النيل اللى حصلت بسبب اسرائيل

-------------
احنا فى وضع انتقالى يافندم
وطبيعى أوضاع كتير تبقى ملخبطة
ربنا يستر

شمس النهار يقول...

معاكي في كل اللي قلتيه عن شفيق
كمان مش معني اني اكون وزير طيران شاطر اني اكون رئيس وزراء شاطر
كمان الطيارين عموما واسأليني انا عنهم دماغهم ناشفه غير عاطفيين عندهم كبر عالي جدا
حاسيين دايما انهم من عجينه غير طينة البشر متشبثين بالراي علي اساس انهم علي حق دايما


شفيق كمان انسان لايجيد فن الحوار وثقته الذائده بنفسه اللي وصلت حد الغرور ودي بداية السقوط
هي اللي افقدته هيبته في نظر الشعب وحوار اول امس

شفيق بكل المقاييس لايصلح ان يكون رئيس لوزارة بتعيد تشكيل مصر
فهو من المتحولون المتلونون

اما الاسواني انا لااحب ان اتكلم عنه لاشخصا ولا ادبا(كاكاتب يعني)

وبحمد ربنا ان شفيق مشي اخيرا
وعلي فكرة شفيق قدم استقالته اربع مرات والمشير يرفض
وبعد الحلقه مالقاش بد من قبولها
بصراحه الوقت صعب واللي بيقبل الوزارة دلوقتي ربنا يكون في عونه
ولازم الشعب يعرف ان ليس لديه عصا سحريه

مهندس مصري يقول...

أنا متفق معاكي في كل كلمة قولتيها
و أظن إنه حيحقق في شهر إنجازات ما بيحلمش بيها البعض
:)

لورنس العرب يقول...

خلاص
يبقى طالما اننا بنحكم على الناس من 15 يوم شغل إذن على الوزاره الجديده ان تفعل شيء في موضوع حوض النيل
لكن انا شايف أن كل لما نفشل في حل مشكله في المستقبل هانقول ان مبارك هو السبب
تماما كما كان يقول مبارك عندما يفشل في تحقيق شيء "حرب اكتوب هي سبب رجوعنا للوراء"

حفيدة عرابى يقول...

شمس هانم
أهلا بحضرتك
مش عارفة ياشمس هانم أنا ساعات بحس ان بعض المتحمسين لشفيق مستكترين علينا نطلب وان طلباتنا واوامرنا تتنفذ
من أول خطاب لمبارك والتأنيب مستمر
كفاية كده ..انتم عايزين ايه تانى
ماالراجل شال الوزارة ..ماالراجل عين نائب
دى نقطة خلاف جوهرية على فكرة
وهنفضل نختلف عليها مع كل موقف يعدى
النهارده الصبح قرأت بوست دكتورة ستيتة وعجبنى جدا
آه أنا عايزة وراضية أعيش كده
معنديش سقف مطالب
مادام مطالبى مشروعة وبالعكس ده كل اللى بطالب بيه حقوق
ايه المانع انى أصر لغاية ماأوصلها

حاسة ان الخلاف مكانش شفيق فى حد ذاته
اللى انا مقتنعة تماما انه لايصلح رئيس وزارة
وانه كان جاى يضيع وقت لغاية ماالبهوات يلموا حاجتهم ويمشوا

لكن كل مرة هنقول فيها لأ هنسمع فيها نفس الكلام وتخرج فيها نفس المظاهرات من مصطفى محمود
ده تشتيت للجهد على فكرة

الاهم من ده كله
ان حضرتك شرفتينى وان تعليقك بيدينى دفعة ضد الاحباط
تحياتى لحضرتك

حفيدة عرابى يقول...

مهندس مصرى
ياريت يافندم ...ربنا كبير ونفرح بقى بالبلد اللى حيلتنا دى :)


-------------------
لورنس العرب
اقول لحضرتك الحقيقة ؟
فعلا
أنا كل مرة هتحصل فيها مشكلة هاقول مبارك السبب وحتى لو مبارح اتحاكم على أفعاله
أنا مش مسامحاه على الخراب اللى عمله فى بلدى ولى حق عنده وعايزاه وهاطلبه يوم القيامة بإذن الله
مبارك 30 سنة بيخرب بمنهجية
ده أنا كتير قلت لنفسى البلد دى كانت عايشة بستر ربنا وبس من غير مايكون عندنا أسباب من اللى ربنا طلب مننا نقوم بيها

حوض النيل مشكلة مأساوية بقالها سنين
والمخلوع مكانش فاضى يبص للدول دى ويشوفها عايزة ايه
كان مشغول بابنه وتوريثه وبس
ده وصلنى لمرحلة الاحترام والتقدير الشديد لمحمد على مع انى على المستوى الانسانى بكرهه جدا
مبارك عمل كل حاجة عكس محمد على
ومحمد على كان بيبنى دولة

حوض النيل زى ماهى مشكلة قديمة محتاجة وقت علشان تتحل وهتتحل ان شاء الله لما يكون عندنا ريس بيفهم سياسة وعارف الاولويات والمصلحة الحقيقية فين

تحياتى لحضرتك

واحد من العمال يقول...

النقاش جميل وممتع
ولكل صاحب رأى أن يستمع للرأى المخالف
ويفكر فيه
مش يقول رأيه وخلاص أنتهى الموضوع
وعلى فكره احنا لسه فى سنه أولى حريه وديمقراطيه ولازم نستحمل بعض
وجميل اننا نستمع لكل الاراء وإللى أحياناً بتلخبطنا
لكن المصر على معرفه الحقيقه وهل هو على صواب أم العكس بيوصل فى الاخر للرأى الأصوب
وأنا لم أسترح للفريق شفيق ولا حكومته وكنت عارف انها حكومه مؤقته ومش حتطول
ومستريح للدكتور عصام مش عارف ليه رغم ان انجازاته لم تظهر بعد
يمكن عشان متواضع ومترف بالوضع الجديدعكس سياده الفريق
ولازم نفهم اننا الأن فى زمن الشعوب
وأن الشعوب ستفرض ارادتها على الحكومات
كما أسقط الشعب وزاره شفيق من ميدان التحرير
وغداً سيفرض الشعب المصرى ارادته بواسطه صناديق الأنتخاب

المهم مبروك الحريه لمصر كلها على بعضها

ودمتِ بخير حال

حفيدة عرابى يقول...

واحد من العمال
أهلا بحضرتك
الله يبارك فى حضرتك فرحتنا كلنا
أنا كمان مستبشرة خير بحكومة عصام شرف وفى التربية والتعليم على الاقل حاسة ان فى نية للتغيير ..ربنا يسهل

الفريق شفيق خلاص انتهى فى رأيى وحتى مش متخيلة انه ممكن يواصل او يكسب لو رشح نفسه فى انتخابات مقبلة
هو من رموز مرحلة انتهت

يارب يافندم نشوف الحرية وفرض الشعوب لارادتها بسرعة

حضرتك شرفتنى
واسفة جدا على تأخير الرد