جدى الغالى

ياجدى الغالى 

يافتى أحلامى 

يابرىء 

ياشجاع 

ياصادق 

يامظلوم

يا أنقى ثورى 

ياملهمى 

دايما كنت فى بالى 

كل ماالظالم يقول 

كل هذه الطلبات لاحق لكم فيها وما أنتم الا عبيد احساناتنا 

الاقيك هتفت  فى قلبى 

لقد خلقنا الله أحرارا ولم يخلقنا تراثا أو عقارا 

فوالله الذى لا اله الاهو لن نورث ولن نستعبد بعد اليوم 

لن نورث ولن نستعبد بعد اليوم 

لن نورث ولن نستعبد بعد اليوم 
:)

مبارك هرب  ياجدى

وابنه  نسى حلم عمره 

والديب مقدرش يرجعنا بيوتنا بعد ماكان بيخوفنا 

والامريكان كانوا بيرهبونا  بس ومفكروش يدخلوا مصر من القناة 

ومفيش سلطان يتهمك بالعصيان 

ولا التل الكبير وترجع منها حزين 

وسلطان باشا بقى يشتغل فى التليفزيون 

لو سمعته النهارده ياجدى يمكن يصعب عليك

ومفيش سيلان 

ولا نفى ولا غربة 

ولا حد يقولك صغارا فى الذهاب وفى الاياب 

وكان فيه ميدان التحرير ياجدى 

لو شفته مش هيفرق كتير عن عابدين 

الميادين منورة بأهلها ياغالى 

عايزة أبوس ترابها 

اللى مشيت عليه أنت 

ومشى عليه أحفادك

النهارده مصر فرحانة ياجدى 

وهتنام بدرى 

علشان وراها شغل كتير 

من هنا ورايح مصر ناوية تقول للكل 

لقد خلقنا الله أحرارا 

أنا قلت لك قبل كده انى بحبك ياجدى ؟ :)

31 التعليقات:



جيجي يقول...

تعرفى انى حاسه النهارده الناس لقت نفسها

ربطت كل حاجه فهمت


حسيتك وحسيت حبك لقائد محنك زي البرادعى

وازاى كل واحد فهم كان ايه وعايز ايه


مش عارفه انا مش عارفه اعبر عن اللى عايزاه

بس ببساطه كتير مننا الماضي واليوم والمستقبل فهمه وقدر يربط كل حاجه ببعضها


بحبك ياحفيده عرابي من وجهه نظرى حفيدته بجد

د. ياسر عمر عبد الفتاح يقول...

فكريتنا بيه ,,, واإن كنا منسيناهوش
ثورته بس هيه الوحيدة اللي ممكن نقارنها بثورة 25 يناير
غير كده مفيش


مش هحلف
بس أنا أتمنى على الله ألا نورث بعد اليوم
وانتظروا تسونامي التغيير في الشرق الأوسط

شمس النهار يقول...

الف الف الف مبروووووووووك

لـــولا وزهـــراء يقول...

والديب مقدرش يرجعنا بيوتنا بعد ماكان بيخوفنا

والامريكان كانوا بيرهبونا بس ومفكروش يدخلوا مصر من القناة



" يارب مصر بكرة افضل وافضل وافضل وارحم شهدائنا"
لولا

مهندس مصري يقول...

لقد خلقنا الله أحراراً و اليوم إستعدنا حريتنا و أصبحنا أحراراً كما خلقنا الله
الحمد لله
و سنعمر مصر ان شاء الله
و سنصبح دولة عظمى في خلال سنوات قليلة
و سيرى العام كله من هي مصر و من هم ابناؤها
تحيا مصر
عاشت مصر حرة مستقلة
الله أكبر

حفيدة عرابى يقول...

جيجى
معلش ياحبيبتى مكنتش عارفة أركز وأرد على التعليقات قبل كده
اما مشغولة ومهمومة ومش عارفة اقول ايه
أو بايته فى فيس بوك أشعل نار الثورة المقدسة :)

مبروك ياحبيبتى
ماتقوليش حاجة ياجيجى ..مين عارف يتكلم
الحمد لله اللى خلانا عشنا وشفنا يوم زى ده
ويقدرنا نشكره على نعمته وفضله ونعيش نبنيها وبس

يارب لك الحمد كما ينبغى لجلال وجهك وعظيم سلطانك

من هنا ورايح مفيش قائد محنك ونتفق او نختلف عليه
من هنا ورايح ان شاء الله فى دستور بيدى كل واحد حقه وبيحدد لكل واحد سلطاته
ونعيش بقى شويه :)

حفيدة عرابى يقول...

دكتور ياسر
فهمتنى يادكتور
ثورته مكانتش انقلاب بالرغم من الجيش هو اللى عمله
جماله ان الناس اعتمدت عليه علشان فلاح وصادق أيا كان مكانه

يارب
نشوف أيام حلوة ونفرح بجد ومانوصلش تانى لايام التوريث والاستعباد

حفيدة عرابى يقول...

شمس هانم
الف مبروك :)
مش عارفة اقولك حاجة والله غير ابتسامة كبيرة جدا فى قلبى ومش عارفة اداريها
افتكرت لما عرابى بقى وزير والمصريين اللى ميعرفوش بعض كانوا بيحضنوا بعض فى الشارع من فرحتهم
انا دلوقت بغنى
يااصحابى ياأهلى ياجيرانى أنا عايز اخدكوا فى أحضانى :)

حفيدة عرابى يقول...

لولا
الديب عمر سليمان
كان أخطر كتير من مبارك وربنا نجانا من شره بتاع اليهود ده

والامريكان يالولا بتوع مصلحتهم وبس
اللى يكسب يبقوا معاه
استنوا يشوفونا هنعمل ايه
لو تخاذلنا ورجعنا هيساندوه ماهو حبيبهم
ولو وقفنا وقفة رجالة
ربنا هيكتب لنا النصر وكتبه الحمد لله

تكمل يارب على خير ومننساش الروح اللى خدناها من الايام اللى فاتت

شرفتينى يالولا :)

حفيدة عرابى يقول...

لقد خلقنا الله أحرارا
وأجمل حاجة لما نرجع لفطرتنا اللى اتخلقنا عليها
ومننساش فرحتنا دى علشان مانضيعهاش

الف مبروك ياباشمهندس
مبروك علينا مصر

لورنس العرب يقول...

اللهم لك الحمد كما ينبغي لجلال وجهك وعظيم سلطانك
لم اتوقع أبدا موقف الحرس الجمهوري وكنت خائف على الناس
لكنه وقف موقف مشرف
وفي النهايه مبارك لم يركب دماغه لأنه عنيد
الحمد لله انه مشي دون نقطة دم واحده

حفيدة عرابى يقول...

لورنس العرب
الحمد لله
أنا حسيت ان نصر ربنا قريب ..الحمد لله
الناس اخدت بالاسباب وقالت لأ
ودعوا ربنا ينصرهم واستجاب سبحانه
جمعة امبارح واللى قبلها وصلاتهم الجمعة سوا كانت رهيبة
الحمد لله
الحمد لله

لورنس العرب يقول...

اناعندي شعور اننا في زمن المعجزات
ما تفكري في حاجه كده تكون مستحيله يمكن تحصل؟

حفيدة عرابى يقول...

أنا عندى حالة من الرضا والامتتنان لربنا سبحانه وتعالى بتخلينى مش عارفة افكر :)
أنا بحلم بس ربنا يكمل فرحتنا بالبلد اللى مفيش زيها دى
الحمد لله

جيجي يقول...

حفيدة عرابى


اسفه ماقصدتش خاااااااااااااااااااااالص البرادعى ده انا جالى هبل قصدي عرابي


كتبته البرادعى


ده انا اول واحده ضد البرادعى
ياخبر على النهييس

جيجي يقول...

انا اقصد اننا كده ربطنا كل احيالنا ببعض

ربطنا عرابي عرابي مش البرادعى بجيل دلوقتى


كل واحد كان بيحب حد زامن عرفنا اننا متداد ليه وربطنا بينهم فهمتينى

أع ـقل مـ ج ـنـونــة يقول...

الحمدلله
كلنا بنحب جدنا :)

لقد خلقنا الله احرار
:)

تحياتي

حفيدة عرابى يقول...

جيجى
ياحبيبتى براحتك خالص وكلامك مفهوم ماتقلقيش
انت الفرحة مش سايعاك وده جميل
افرحى واطمنى وان شاء الله الايام الجاية أحلى

حفيدة عرابى يقول...

أعقل مجنونة
نورتينى ياأعقل العقلاء
لقد خلقنا الله أحرارا
وتحيا مصر :)

ghada mOhsen يقول...

ألف مبرووووووك

فعلا طعم الحرية حلو أوووووي
أووووي أوووووي

ربنا لا يحرمنا منه

^_^

كلمات من نور يقول...

تحية إلى ارواح الشهداء التي تحلق في سمائنا فرحة فخورة بنا

تحية إلى كل أهالي الشهداء الذين ارتفع صوتهم مزغردين فرحين بنصر مصر ولو بالتضحية بهم

تحية إلى مصررررررررررررر

حفيدة عرابى يقول...

غادة محسن
أهلا بك شرفتينى فى أول زيارة
وزيارة بطعم الحرية
مبروك علينا :)
------------------------
كلمات من نور
لسه مش فخورين بينا يانهى هانم
احنا بس اللى مديونين لهم بكتير وربنا يقدرنا نحافظ على البلد اللى ماتوا علشانها

غير معرف يقول...

ثقافة الهزيمة .. أنها حقا عائلة محترمة‏

فى 6 فبراير 2011 نشرت شبكة الأخبار الأمريكية CNN كشفت صحيفة الجارديان البريطانية نقلا عن محللين مختصين بشؤون الشرق الأوسط قولهم أن ثروة الرئيس المصري حسني مبارك بلغت نحو 70 مليار دولار، جزء كبير منها موجود في بنوك سويسرية وبريطانية، أو على شكل عقارات في لندن ونيويورك ولوس أنجلوس، أضافة إلى ممتلكات خاصة على طول شاطئ البحر الأحمر، وقال تقرير أن المصدر الرئيسي لهذه الثروة هو أطلاع الرئيس على صفقات أستثمارية حققت مئات الملايين من الدولارات لمصر، ولهذا تم نقلها إلى حسابات سرية في بنوك أجنبية، أو أستثمارها في البورصات العالمية والعقارات، وأكد التقرير أن علاء وجمال مبارك هم إيضا من أصحاب المليارات، ونقلت الصحيفة عن أماني جمال، أستاذة العلوم السياسية في جامعة برينستون، قولها أن ثروة العائلة تتراوح ما بين 40 و 70 مليار دولار، وهي أرقام تقارب ثروات بعض من زعماء دول الخليج، الغنية بالنفط...

باقى المقال ضمن مقالات ثقافة الهزيمة بالرابط التالى www.ouregypt.us

well يقول...

اصبحنا احرار بالكلمة والفعل ..

مدونتك اسم على مسمى

تحياتى لمدونتك ولحريتك

تحياتى يا حرة

لورنس العرب يقول...

على فكره
تقديمي للتهنئه لم يكن ركوبا لأي موجه
انا مش بعرف أعوم
انا بتكلم بصدق وأقول ما بداخلي فقط

نحمد الله على كل حال

حفيدة عرابى يقول...

ثقافة الهزيمة
شكرا جزيلا لحضرتك
-------------------
باشمهندس well
الحمد لله على نعمه اللى تمت ويسترها معانا وتكمل على خير يارب
عشت حراً:)
--------------------
لورنس العرب
انا رديت على تعليق حضرتك فى مدونتك وفيس بوك

أم مالك يقول...

بنت عرابى الغالية
رشا الحبيبة
انا جاية اسلم عليكى واقولك وحشتينى
وكنتى منورة اسكندرية ياقمر
اما عن عرابى وثورته يكفى انه
طلع احفاد مثلكم قادرين على القيام
بثورات للتغيير
تحياتى حبيبتى

حفيدة عرابى يقول...

أم مالك
:)
أهلا بحضرتك ..عاملةايه ؟ وأخبار صحة حضرتك ايه ؟
يارب تكونى بالف خير
اسكندرية منورة باهلها
كان نفسى أشوف حضرتك هناك وفاتيما كل مرة بصراحة بتبقى نفسها تكلمك وتشوفك
مبروك عليناكلنا الثورة اللى اسعدت أيامنا
الحمد لله
فرحت جدا بتعليق حضرتك
ربنا يبارك فى عمرك ويرزقك الصحة ويبارك لك فى أولادك ومنحرمش من طلتك وتعليقك عندى :)

ابراهيم رزق يقول...

نسيتى تقولى له ان احنا اتعلمنا من اخطائه لازم نحرص و لانعطى الامان

مخطىء من ظن يوما ان للثعلب دينا

خالص تحياتى

صوت من مصر يقول...

مفيش خوف
فى حرية

حفيدة عرابى يقول...

أستاذ ابراهيم رزق
أهلا بحضرتك
ياريت والله ناخد بالنا وتبقى الايام الجاية أجمل
ونخلى براءة عرابى للى يستاهلوا نتعامل معاهم بيها
شرفتنى يافندم

----------
صوت من مصر
أنا هاخد كلامك ثقة يابطل ومن هنا ورايح ان شاء الله مفيش خوف وفيه حرية
اللهم آمين
شرفتنى