حاسب لحلمك يتسرق

أنا مش فاهمة اللى بيحصل

ومعنديش المعلومات ولا القدرة على التحليل

وممكن أفهم ان الناس خايفة من الفوضى ومش فاهمين دور الجيش 

ومش عارفين تدخل الجيش حتى لو كان فى صالحنا 

ياترى هيكون كده على المدى البعيد ولا هنحس اننا رجعنا سنين كتير لورا 

الحاجة الوحيدة اللى أنا فاهماها ومتأكده منها 

ان الشعب يريد إسقاط النظام 

ولو الشعب وافق على النظام 

انا أريد إسقاط النظام 

أنا من حقى أعيش فى بلد تحترمنى

من حقى أعيش فى بلد أفرح بيها وأموت وأنا مطمنة على مستقبل ولادى 

لما رحت التحرير لاول مرة لقيتنى بتمنى يبقى عندى ولاد

 علشان أشوفهم زى الورد اللى فى التحرير 

ودلوقت متأكدة ان ولادى وولاد غيرى يستحقوا يعيشوا فى بلد

 مايشاركناش فى هواها مبارك ونظامه

مينفعش نرضى بريس بيستهين  بمطالبنا وبدمنا 

اللى لسه فاكرين ان المطالب اتحققت 

هاقولهم فرصة تانية ان شاء الله 

يوم عن يوم ومع كل خطاب ليه أنا بحس بالاهانة اكتر

لا فيه ريس مشى ولانظام سقط 

ولا دستور اتلغى ولا قانون طوارىء اترحمنا منه 

بالعكس يوم عن يوم الحالة بتسوء اكتر 

انا مش مستعدة بعد النهارده  انى اتعامل معاملة أقل من اللى أستحقها كانسانة 

مش مستعدة بعد النهارده أشتغل مع منظومة تعليم فاسدة

و بمنهجية بتخرب فى عقول بنى ادمين ربنا هيحاسبنا على اللى بنعمله فيهم

مش مستعدة أقبل تهديد نائب الريس  

وهو بيقول عودوا الى منازلكم 

مش مستعدة حد يموت اخواتى و يعتذر اعتذار باهت عن دمهم 

وعلشان يهين فينا بزيادة بيتكلم عن تحقيق ومحاسبة 

تحقيق مع مين ودمهم فى رقبتك وفى ايديك 

اللى خايفين من بوارج أمريكا وتحركات اسرائيل

ماتخافوش 

أمريكا واسرائيل أذكى من انهم يعملوها وفى الوقت ده 

كل ده جزء من الخطة اياها

اما أنا واما الفوضى 

وأنا بعد الليلة اللى مصدقتش انها خلصت 

مش عايزاك

 وربنا يحمينا من الفوضى 

اللى بيتكلموا عن اهانة الريس رمز البلاد 

الريس أهان بلدنا وخلى كرامتها وكرامتنا فى التراب 

كفاية تشويه شباب كتير اتولدوا وعاشوا

 ومش عارفين بالظبط مين أعداء بلادهم ومين لأ

أنا مش عارفة اتكلم 

وان النهار طلع وربنا الحمد لله  أراد انى أكون سليمة 

ده حدث يستحق التسجيل 

ومش عارفة غير انى أقول 

لشباب مصر اللى حقق لى  أغلى حلم فى حياتى 

( انما النصر صبر ساعة )

أما هو فمينفعش أقوله غير 

ارحل وخد معاك سليمان 



8 التعليقات:



لورنس العرب يقول...

لا نريد مبارك- ومشي مبارك
وبعد ان يمشي مبارك سيبقى المتظاهرون لأنهم لا يريدوا سليمان!!!
ولا يريدوا النظام بالكامل!!!
طيب وبعدين؟
ليس هكذا تورد الابل يا ميس
الآن سوف يكون هناك صداما مع الجيش نفسه
لو وقع ضحايا سيكون دمهم في رقبة المتظاهرين نتيجة للعناد المستمر بهذا الشكل
أنا اكاد اتخيل ان الناس لما شافوا المطالب يتم تنفيذها بيسوقوا فيها وظهر طباع المصريين الأصيله في اسلوب الضغط المستمر، ولكن بكم من الضحايا؟
لماذا لا تقتنعوا ان مبارك قد انتهى بالفعل؟
رئيس الجمهورية الآن اسمه عمر سليمان
المتظاهرين لا يريدون سليمان- لو صح هذا الامر فالموضوع اسمحيلي تحول إلى لعب وتهريج وكده مش هاينفع
الصدام مع الجيش لن تكون عواقبه مضمونه
ممكن يكون فيه احكام عرفيه والجيش ينزل إلى مده هو فقط من يحددها ولا يعلم مستقبلها إلا الله

لورنس العرب يقول...

وبعدين يا ميس انا شايف أن سقف الاماني عند الناس رهيب ومرتفع للغايه ويتحدثون وكان مبارك بعد ان يمشي بكره الصبح المرتبات سوف تكون 3000 جنيه
يا اخوانا
ولن اكون متشائم إن قلت أنه لن يحدث في مصر التغيير الذي ينتظره الناس لأني لاحظت الأيام الماضية أن سقف الأماني عند المصريين قد وصل إلى السماء
فالناس يتحدثون عن رواتب شهرية بألوف الجنيهات تنتظر الناس عقب إنتهاء عصر مبارك وكأن "علي بابا" سوف يأتي حاكما لمصر
وهناك الكثير من الناس يتحدثون في التليفزيون عن أن مبارك ظلمهم لأنهم يعملون في وزارة الثقافة أو الثقافه أو غيرها من الهيئات الحكومية ومرتباتهم هزيله وكأن لو مبارك ترك منصبه غدا سوف يتحول راتبه إلى 5 آلاف جنيها وسوف يجد السكن المناسب
أغلب الناس يتحدثون وكأنهم سوف يملكون المرسيديس وفيلا في مارينا ولكن العائق بينهم وبين تحقيق ذلك هو وجود مبارك على رأس السلطه في مصر
فمهلا يا إخواني لأن الطريق مازال طويلا جدا
نحن جميعا نعمل من اجل الأبناء والأحفاد وتنتظرنا أياما عصيبه سوف نتحمل خلالها تبعات السقطات الماليه للسياحة والإقتصاد والإستثمار الأجنبي الذي هرب ولن يعود الآن
كما اننا سوف نتحمل غياب الأمن والمساجين التي فتحت على مصراعيها لفتره ليست بالقصيره
وكل هذا من اجل توفير معيشه كريمة للأبناء والأحفاد والصعود بمصر إلى مراتب عاليه
نحن فقط في أول خطوه

لورنس العرب يقول...
أزال المؤلف هذا التعليق.
لورنس العرب يقول...

أنا عارف ان كلامي مش بيعجب الناس
لا يرضون إلا بموافقة رأيهم
انا لست حزب وطني ولا آخذ قرشين من عضو مجلس شعب
فقط أنا معك ولكن ليس في كل الخطوات
او قد تكون لي وجهة نظر مختلفه في معالجة الامور- قد تكوني انتي صواب وانا خطأ أو العكس

دي بس ملحوظه قبل ما الهجوم يبدأ وتبدأ معه الإتهامات

شمس النهار يقول...

لورنس العرب

الناس دي من اول يوم عارفه بتعمل
ايه تعالي نعمل سيناريو بعيد عن الهبل اللي حصل

من اول تلات ايام

رؤؤس الفساد معروفه يشالهم وعلي رؤس الاشهاد

ويعتذر للناس

ونشيل كلمة سوفا ووسيتم

لو هتحلل مش هتلاقي اي شئ اتعمل لحد دلوقتي

هات لي قرار واحد علي ارض الواقع اتعمل
حتي التحقيقات لم تتم واللي يقول لك تمت يبقا عيب عليه
هو الريان كانوا بيحققوا معاه ويسيبوه يروح ولا كان مسجون وبيتحقق وعاه

الفساد معروف
يقعد قعدة عرب مع ابنه وشريف وسرور ونظيف وغالي وباقي الاربعين حرامي
ومن غير محاكمه هيلموهم

واللي ضربوا وقتلوا الناس في التحرير
وباقي الجمهوريه معروفين

ولو هنيجي للحق السادات اللي مش عاجبنا لمهم في ساعه واحده

اللي عايز يحل بيحل

واللي عايز يطولها ويمد المده علشان ايه الله اعلم

الناس دي عارفه الشعب عايز ايه ومش عايزين يعملوه

ليه الله واعلم
وحركة امبارح دي حركه غريبه ماكانتش محتاجه خطاب ولعب بالاعصاب
لمصلحة مين تههيج الناس وتنزلها من بيوتها علي امل التنحي
واللي بيحضر العفريت يصرفه بقا
حسبي الله ونعم الوكيل في دي شله جاره البلد علي فين مش عارفه
ربنا يستر

مهندس مصري يقول...

بعد اللي قريته عند أحمد سعيد هنا
http://egyptioneng.blogspot.com/2011/02/blog-post_08.html
معنديش ثقة بنكلة في قيادات الجيش
ثم مطلبنا واضح
يتنحى مبارك بعد حل مجالس الشعب و الشورى و المحليات و رفع حالة الطوارئ
و يمسك البلد بصورة مؤقتة رئيس المحكمة الدستورية العليا
و تتعمل حكومة مؤقتة تضبط الدستور الجديد و تجهز للإنتخابات الحرة
و كل الفاسدين يحاكموا

هل حصل اي حاجة من الكلام اللي فوق ده
لأ محصلش

يبقى ما يستعبطوش علينا

حفيدة عرابى يقول...

لورنس العرب
شمس هانم
مهندس مصرى
-----------------
هتسامحونى انى مش عارفة ارد على التعليقات مش كده ؟ :)
مبروك لينا كلنا وربنا يكملها على خير ونفرح ببلدنا يارب :)

حفيدة عرابى يقول...

لورنس العرب
نداء عاجل وهام وضرورى :)
ارجع يافندم اكتب واتكلم وقول رأيك زى ماأنت عايز
من غير مانشيل هم الناس هتقول علينا ايه

كلنا بنحبها يافندم بس كل واحد بطريقته
اللى بيكرهوها خلاص مش موجودين معانا
نسيبنا بقى من الكلام القديم
ونلحق نبنى فيها شوية ونفرح بيها كتير قبل مانموت