الورد اللى فتح فى جناين مصر

كفاية تظاهر المطالب خلاص اتحققت 

محصلش

 بالعكس كل المطالب الريس اتعامل معاها بمنتهى الاستهانة 

طلبنا تغيير الدستور فاتكلم عن تعديل المادتين 76و77

والمادتين دول بالذات مستفزين جدا بالنسبة لى لاسباب أخلاقية مش قانونية 

لان الريس نفسه هو اللى طلب تعديلهم علشان خاطر عيون ابنه

 وساب الكلاب تتحرش بالصحفيات لاعتراضهم على المادتين

ولا نسينا ؟

طلبنا حل مجلس الشعب المزور 

قال هننظر فى الطعون

 وده مجلس مينفعش يشهد على المرحلة الجديدة اللى هتعيشها مصر

والريس نفسه من مدة قليلة كان بيتكلم فى نفس المجلس

 عن نزاهة الانتخابات ولما سمع عن البرلمان الموازى

 قال بمنتهى الاستخفاف خليهم يتسلوا 

نسينا مش كده ؟

الريس كمان نسى سيرة قانون الطوارىء نهائى 

مش عارفة بعد المدة دى ممكن يتلغى قانون الطوارىء امتى 

الريس صمام الامان للبلد 

فعلا 

بدليل ان العادلى الموظف عند الريس

 سحب الامن وخرج المساجين وعيشنا فى رعب 

مكانش يعرف 

اللى ميعرفش يمشى 

لو مشى هتحصل فوضى 

هو اللى عمل الفوضى وهو اللى بيحاول بكل الطرق يهددنا بيها

الريس صمام أمان لامريكا واسرائيل 

لان تحييد أنا بقول تحييد وماقلتش كلمة اكبر من كده 

تحييد مصر أكبر خدمة ممكن يقدمها الريس لاسرائيل 

الريس أبونا وعيب نتعامل معاه كده 

لأ الريس مش ابويا أنا شخصيا ولا زى أبويا 

الريس مع احترام سنه موظف عند بلدنا بس بدرجة رئيس جمهورية 

وده يديله بس سلطات رئيس الجمهورية لكن مش سلطات أبوية 

وحتى سلطاته كرئيس جمهورية كتير كمان

 ولازم فى الدستور الجديد تتعدل عن كده

 لان الدستور الحالى بيديله سلطات مطلقة 

رئيس الوزراء أحمد شفيق قال ان الملك فاروق غادر البلاد بمنتهى التكريم

 ولمح انه عيب لما نطلب رحيل مبارك

رئيس الوزراء ماكملش درس التاريخ

 وماوضحش ان الملك اللى كلنا درسنا انه فاسد

حافظ على مصلحة البلاد وخرج يوم 26 يوليو من غير مايعرض مصر للخطر

 ومن يغير مايسلط الكلاب يضربوا ويقتلوا ويخربوا 

ومن غير مايبعت الجمال والخيل يضربوا فى المتظاهرين ضده

مع ان الملك كان ممكن يعمل اكتر من كده

 بس هو علشان فاسد مشى بعد 3ايام بس 

الريس رمز للبلد واهانته عيب 

اهانة أى انسان فى الكون عيب وماتصحش

بس اهانة شعب ايه وضعها 

و اهمال شئون بلد وتخريبها لمدة تلاتين سنة ممكن نسميها ايه 

وال500 واحد اللى ماتوا فى الايام اللى فاتت بس دمهم فى رقبة مين ؟

الحال واقف والبلد خربت والاقتصاد باظ والسياحة انضربت 

والمرتبات لسه مااخدنهاش

الله ينتقم منكم ضيعتوا مصر 

لأ مصر ماضاعتش ومش هتضيع ان شاء الله 

مصر بتنفض عن نفسها الغبار والران اللى نسانا شكلها من تلاتين سنة واكتر 

وفئات كتير فى مصر ولا تفرق معاها البورصة وأنا منهم

والاقتصاد خربان من زمان ده احنا عندنا أمل نصلحه 

والمرتبات هو اللى مانعها علشان يضغط علينا

 واحنا شعب ضعيف بيقع بسرعة 

لكن النبى اللى هو النبى صلى الله عليه وسلم هو والمؤمنين

 يتم حصارهم شهر فى غزوة الاحزاب

 ويجوعوا ويربطوا على بطونهم حجر

 والنبى عليه الصلاة والسلام يربط حجرين

 والقرآن يقول عنهم انهم زلزلوا وان القلوب بلغت الحناجر

 وانهم قالوا متى نصر الله 

لما النبى والمسلمين يجوعوا ويقولوا متى نصر الله 

مش قادرين نصبر احنا

اللى فى التحرير مش شباب 25 يناير 

دول مأجورين وخونة وعملاء حماس وايران وحزب الله واسرائيل وامريكا وفى ناس 

اشكالهم اجانب موجودين هناك 

ماشى مليون واحد خاين 

فين أجهزة الامن الجبارة ماتصرفتش معاهم ليه من بدرى 

فكرتونى بالامن 

طول الفترة اللى فاتت ليه ماسمعناش لاقدر الله عن تفجير فى كنيسة 

ولا لاقدر الله عن مختل عقليا يقتل المسيحيين

يوم العيد أو فى القطر

اللى فى التحرير بيقبضوا وبياكلوا من كنتاكى ولسه ولد ظريف بيقول فى التليفزيون وانا بكتب ان بيدخلهم مخدرات كمان 

هنا أنا مش هاقدر بجد أرد علشان أكيد هندم على الالفاظ اللى ممكن أوصف بيها الكلام ده

دى فتنة والنبى عليه الصلاة والسلام نهانا عن الاشتراك في الفتن

لأ طبعا 

اللى فى التحرير مش فتنة 

لان اللى فى التحرير مش سيدنا على بن ابى طالب والسيدة عائشة

و بيحاربوا بعض واحنا محتارين ومتلخبطين

 ومش عارفين نحارب مع مين 

مع ان حتى الموقف ده لينا فيه كلام 

الموقف فى التحرير واضح جدا

شباب واعى بيكافح نظام حكم فاسد وقاتل وظالم

 وبيستخدم أحقر وأخس الاساليب 

ولاد مصر بيضربوا بعض حرام عليكم

لأ اللى بيضربوا بلطجية الحزب الوطنى والداخلية

وشباب التحرير اضطروا يدافعوا عن نفسهم

ده بعض من حوارات فيس بوك امبارح بس 

لما افتكر حاجة تانى هاقول :)

قبل ماامشى 

كلنا فرحنا وعيطنا لما شفنا منظر المليون متظاهر بيصلوا النهارده هناك 

متخافوش على مصر :)

حاجة كمان 

تصبحوا على مصر زى ماتستاهل  وزى مانتمناها

31 التعليقات:



غير معرف يقول...

bravo
to all using islam to let their brother down please read those links:

http://www.alasr.ws/index.cfm?method=home.con&contentid=11713

and:

http://www.onislam.net/arabic/ask-the-scholar/128297-2011-02-03-09-29-08.html

فاتيما يقول...

تانى هخدها برضو التدوينة دى
هه


:)

لـــولا وزهـــراء يقول...

مصر اولاً
لا للتخريب
نعم للشرعية
لا للفوضى
لا لهدم رموزنا
لا للتدخلات الخارجية

معظم اللي بتقوليه حصل بس مش وقته مصر بتولع مش وقت فتنة من فضلكم مصر الاول كل كلمة ممكن تسفك دم من غير ما نشعر ممكن كلمة تقلب الدنيا من غير ما نحس ابوس ايديكم مصر بتشتعل مصر مش بخير
لولا

مهندس مصري يقول...

أوافقك على كل كلمة
و اللي بيقولوا مصر بتولع
مش إحنا اللي بنولعها
اللي بيولعها النظام بغباؤه و عناده و ظلمه و جبروته

عجبت لمن يطالب الضحية بالسكوت و لا يمنع المجرم من جريمته و يحميها منه

Menmwaledkanoneltwarek يقول...

الله عليكى بس ممكن يتقال عليكى من الاخوان وجبوليك وجبة كنتاكى وخمسون جنية ,

شمس النهار يقول...

ميه ميه تسلم ايدك

وكل اللي اخدناه لحد دلوقتي سوف نقوم بعمل
سوف يتم
وحتي اللي سوف يتم وتم تغيير الحكومه
والابقاء علي كل الوزراء الا اللي رفضوا دخول الوزارة الجديدة القديمة
يعني كله ضحك علي الدقون
وسوف اقابلك لو حاجه اتغيرت طول ما الناس هاااااشه كده
مصيبتي كبيره في اهل مصر

مصطفى الراوي يقول...

ربنا يكتر من أمثالك ويكتر من الشباب الواعي الفاهم للي بيحصل في البلد، ولعل وعسى تبقى مصر مش شباب بيعرف يستخدم الكمبيوتر ومش فاهم أي حاجة في أي حتة...
بالمناسبة، خدي التحليل ده لكل واحد بيقول مبارك يفضل:
موقف مبارك من الفساد:
1- عارف إن في فساد وساكت - في أحسن الأحوال - يبقى ماينفعش رئيس.
2- مش عارف إن في فساد، يبقى بذمتكم يبقى رئيس دولة إزاي وهو مش عارف شئونها الداخلية... اختصري أي حوارات تخص مبارك وإذا كان ينفع أو ماينفعش

لورنس العرب يقول...

بصورة عامه الاتهامات طالت الجميع ولم ينجو احد من الاتهامات من الطرفين
نظرية المؤامرة تطغي على جميع الناس
كل واحد يتهم الطرف الآخر بالخيانه وبقبض الاموال والضغط على الطرف الآخر من اجل المصلحه
لكن اللي انا شفته واتضح جليا ان مفيش حد بيسمع
ربنا سبحانه وتعالى خلق للناس اذنين ولسان واحد لكي نسمع اكثر مما نتحدث
لكن انا رايت من يتكلم ويرفضك رفضا تاما ويرفض حتى تعليقك على الحدث

انسي يا ميس

احنا محتاجين نتعلم الاول



سلام

مصعب صلاح يقول...

السلام عليكم
وهناك الكثيرين منهم شهيد الحرية عندي على وحي القلم
--
النظام خلق جماعة من الطفيليين الذين ارتبط بقاؤهم ببقاء النظام
رحم الله النظام وأعوانه
**
عفوا لا اقول رحم الله النظام بل لعنه الله وأذله دنيا وآخرة بحق كل امريء ظلم منهم

حفيدة عرابى يقول...

أنا اسفة تانى انى دايما متأخرة فى الرد على التعليقات بس مش ببات فى بلوجر
تلاقونى بايتة دايما فى فيس بوك :$

غير معرف
شكرا جزيلا على اللينك
----------------

طمطم

:) ده شرف لى ياحبيبتى

---------------

لولا
ربنا يستر يالولا وان شاء الله مصر بخير
وتبقى أحسن بكتير
احنا بنحاول نبنى والله ومحدش قصده تخريب

-------------------
مهندس مصرى
هما خايفين عليها لكن شايفين انه من الصعب منع المجرم من جريمته فلا ارادى بيطلبوا من الضحية تسكت
ربنا يستر ونفرح بيها
------------------
من مواليد الطوارىْ
الاخوان بس اللى بياكلوا كنتاكى وبياخدوا خمسين جنيه ؟
خسارة :)
انا كنت فاكرة كل اللى فى التحرير بياكلوها

حفيدة عرابى يقول...

شمس هانم
الله يخليكِ ده حضرتك اللى تسلم ايديك
البوست اللى حضرتك كتبتيه كان جامع مانع
ده اللى تاعبنى ان حتى المساندين للثورة شايفين انه اتحققت مطالب كتير وانا متأكدة ان اللى اتحقق حاجات شكلية وهتتلغى بعد فترة كمان
ربنا يستر ونتقابل فى ظروف أحسن :)
شرفتينى :)
--------------------
أستاذ مصطفى
الله يكرمك ويكتر من أمثالك

لأ مبارك استنفذ كل مرات الرسوب ومش فاضل غير انه يتحول منازل خلاص :)
أهالينا واللى يهمونا ليهم واجب علينا نوصلهم وجهة نظرنا
كل مااقول اختصر المهنة تحكم وارجع اتكلم من تانى
ربنا يستر بس على بلدنا وتكون الايام الجاية أسهل

حفيدة عرابى يقول...

لورنس العرب
كويس والله انك كتبت تعليق
أستاذ طارق مؤمن مفتقد تعليقاتك على فيس بوك وسألنى عليك
قلتله انك تعمدت الاختفاء وانك زهقان من الكلام معانا وانى خطة لاعادتك للتدوين تانى وهى انى اكتب بوست أوضح فيه مميزات الغالى :)
وأنا واثقة انك هترد عليه بعدة تدوينات أبو قصة ده :))

لما انا كمان سألت عليك وماردتش على خالص ولما استاذ طارق يسأل هو كمان
يبقى فيه اللى عايز يسمع

كنت واثقة اننا هنختلف ومش هنتفق
بس كنت واثقة كمان ان محدش فينا هيخون التانى ولا هيتهمه بالعمالة ولا انه بتاع اجندة وكنتاكى :)

انا كتبت تعليق على الفيس وفى الاوتوبيس وفى شات الاوتوبيس
يانهار أبيض لو نصر الله عرف انى بتعامل كده مع اعدائه مش بعيد يسلمنى لاسرائيل :)
الناس مضغوطة علشان كده ردود الافعال بتبقى عنيفة
------------
مصعب صلاح
عامل ايه ؟ والمذاكرة اخبارها ايه معاك ؟
يارب تكون دايما بخير
تابع الثورة يامصعب وانت بتذاكر لو سمحت وسيبك من مصير النظام لو سمحت :)

لورنس العرب يقول...

عارفه انا حصل معايا ايه من يومين؟
كنت جالس في مكتب انترنت لأن سنترال المعادي 3 خرب من يوم الجمعه الشهيره
وقعدت اكتب واكتب في المدونه- وكان فيه بنت جنبي كانت بتقرأ اللي انا بكتبه، لكن انا مكنتش واخد بالي منها أصلا وكنت مركز في اللي بعمله- وسألتني- حضرتك صحفي- قلت لها لأ دي هوايه وببعت الحاجات دي لأصدقائي، وعلى الرغم من ان اللي كنت كاتبه في نحن والغرب لا علاقة له بمبارك او الثورة وكنت برصد حال الناس، إلا انها وقفت وفرجت عليا مكتب الانترنت واتهمتني بأبشع الاتهامات واني راجل خائن وعميل للحزب الوطني ولا اهتم بدماء الشهداء واني بكتب كده عشان انا لم اتعرض لأمن الدوله في يوم من الايام ولقيت الناس كلهم واقفين يتفرجوا عليا وانا باصص لها وساكت تماما لغاية ما خلصت كلامها-
وبعد ما خلصت بصت لي وقالت لي "انا آسفه" !
يا ميس ده اللي يقول لوحد انه مش عاجبه تصرف معين هايتفضح
طيب ايه رايك ان انا اخويا اللي اكبر مني لما بيدخل البيت انا بسيب البيت وامشي؟

لورنس العرب يقول...

مش كده وبس- ده مفهم اصحابه ان أنا من أتباع الحزب الوطني ومش عاوز مبارك يمشي لأني قلت له اني شايف كفايه تظاهر وننتظر النتائج!
وكل لما اصحابه يشوفوني في الشارع يفضلوا ينادوني عشان يتريقوا عليا
مش كده وبس
بيتعمدوا انهم يذكروا امامي ان الاعداد بالملايين في التحرير تحسبا إلى ان انا هاتضايق واتنرفز
وبعد كل ده عوزاني افتح الفيس بوك واكلم الناس؟ طيب تيجي ازاي؟
شوفي
فيه حديث عن سيدنا النبي عليه الصلاة والسلام بيقول فيه ان وقت الفتنه الانعزال واجب وانا قررت اني انفذ الحديث حرفيا
اتكلم مع مين واتكلم ليه
ومين اصلا يهمه اللي بقوله او حتى هايناقشني فيه
انا ذهبت للتحرير وتحدثت مع الناس ولقيت دماغهم انشف من الحجر
وذهبت لمصطفى محمود وتكلمت ع الناس ولقيتهم بردو دماغهم ما يعلم بيهم إلا ربنا
طيب انا ايه اللي يجبرني على وجع القلب
ما أرجع زي زمان ادخل النت واشوف الاخبار واتفرج من بعيد وابعت لأصحابي عن طريق الميل مناظر طبيعية وصور وخلافه ارحم
على الاقل مفيش حد يطلع يقولك كلمتين يحرقوا الدم

لورنس العرب يقول...

اننا نختلف ده وضع عادي
انا شايف ان الامور ممكن تتعالج بطريقه تانيه مختلفه عن اللي الناس بيعملوها، وكمان مش موافق على الاعتصام إلى الآن، ولا موافق على ان حد يقول على حد انه من بلطجية الوطني او بتوع كنتاكي والخمسين جنيه
بس يا ترى لو حد شاف تعليقي عندك هايكون رد فعله ايه؟
أنا أقولك
هايقولي انت كنت قاعد في البيت واحنا عملنا كل حاجه، وانت عمال تهندس علينا ومش عارف حاجه، وتبدأ الاسطوانه اللي بشوفها في اماكن كتيره، عوزاني ادخل اقول عندك اني مش موافق على استمرار الاحتجاجات او ان ما حدث هو حركه احتجاجيه وليست ثوره لأن الثوره لها مواصفات عشان الناس تدخل تشتمني ويقولوا لي انت الحزب الوطني باعتك؟

شوفي يا ميس
اللي حصل يوم 25 يناير كان نتيجه لشغل 10 سنين كامله من صحف المعارضه والبرامج الفضائيه والكلام على المنتديات والمدونات، يعني انتي وغيرك وانا منهم ساهمنا في اللي حصل بشكل كبير جدا، لكن من يقوم بالتنفيذ ليس بالضرورة الجميع ولكن فئه معينه هي اللي هاتقوم بالعمل النهائي وقد كان ولله الحمد
الآن هناك نظره استعلائيه من البعض تجاه الآخر على انه فعل كل شيء وانت لم تفعل شيء- وهناك اتهامات بالخيانه والبلطجه-
انا الحقيقه رأيت ان افضل شيء هو
كما ان الجميع دفع الثمن، من وقف في الشارع دفع الثمن، ومن توقف عمله دفع الثمن، ومن لم يقبض راتبه دفع الثمن، معنديش استعداد اني ادخل واسمع كلام غري تعليقا على كلامي اللي مش هايعجب ناس كتير
البعد عن كل ده والجلوس في منزلي أفضل، بس ده لا يمنع ان سؤالك عني على راسي من فوق وعلى فكره انا مدخلتش عند حد غيرك ولا تقريبا دخلت المدونات بتاعتي باستثناء نحن والغرب

لورنس العرب يقول...

وانك انتي بالذات تزعلي ده شيء يصيبني بالحزن
هو انا بشوف زيك كل كام سنه

حفيدة عرابى يقول...

لورنس العرب
طيب اسمح لى انى مش هعلق بالترتيب على تعليقاتك وهقول انطباعات مش مرتبة
--------------------
اولا اللى حصل فى التحرير ده كان حلم وكنت بصبر نفسى ان ربنا ان شاء الله هيخلينى اشوفه فى الدنيا
ده انا كنت اتجننت خلاص وعايزة فى الجنة ان شاء الله اتفرج على مظاهرة عابدين واقعد انا وعرابى نتكلم سوا :)
اكيد متخيل حماسى هيكون ازاى لحدث زى ده
-----------------
ثانيا أنا من كلامك حسيت ان التعليقات عندى هى السبب فى زعلك
هاقولك على حاجة
مش دفاع عنه اد ماهو انى فاهمة هو بيفكر ازاى
مش الرسول عليه الصلاة والسلام قال التمس لأخيك سبعين عذرا
هو أولا سنه أصغر فبتلاقى الاندفاع بيكون أكتر
ثانيا كان راجع حالا من التحرير
اكيد مرهق واكيد زهقان وتعبان ومخنوق من الغاز وتعبان من الجرى وبردان من الماية اللى اترشوا بيها
انا تعاملت مع الموقف وقتها انه لما يكون حد فى اقصى حالات انفعاله لازم نسيبه شويه بصفتنا أصدقاء حتى لو افتراضيين لغاية ماسبب الانفعال ده يروح ونقوله تعال بقى شوف انت قلت ايه وعملت ايه
----------------------
انا موافقاك كمان اننا معندناش ثقافة اختلاف خالص
ومحتاجين كتير علشان كلنا نتدرب عليها
بس مع بعض الاحترام لبعض هنحاول نتعلمها بالتدريج
-----------------------
انا على فيس بوك وهنا بقول رأيى عندى أولا وبعدين فى تعليقاتى عند الاصدقاء ثانيا
يعنى زى ماقلت لك قبل كده الراجل اللى عمل بلوجر وفيس بوك ده كان محترم اوى وادانا فرصة نعبر ونتكلم عن نفسنا بحرية من غير مانشيل هم حد ولا رأى حد
بس ان جيت للحقيقة مفيش مانع انى ارمى عينى كده على الاراء المخالفة حتى ولو من بعيد علشان استفيد منها تنور لى طرق مش واخدة بالى منها

حفيدة عرابى يقول...

على فيس بوك وخصوصا لما النت رجع كان كل كلامى اشعال لنار الثورة المقدسة :)
بعد شوية صغيرين لقينا هجوم من ناس لسه داخلة فيس بوك حالا بجروبات ورسايل وتعليقات محفوظة كلهاو محتواها واحد والناس دى مش بتتناقش دى بترمى التعليقات وتجرى وتعليقاتها مستفزة جدا
فده زود كراهيتنا للاراء المخالفة مع اللى شايفينه بيحصل فى التليفزيون للمتظاهرين والقتل والضرب
---------------
شوية كده ولقيت اننا بمعنى الكلمة بنكلم نفسنا وان اللى انا بتناقش معاهم اللى رأيى من رأيهم بالمللى
دورت على صحاب تانيين لقيتهم ساكتين خاااااالص أو بيتكلموا بالقطارة
الناس دى انا بحترمهم وفاهمة تمام ان كلنا بنحب البلد دى بأساليب مختلفة
حضرتك واثق انى بعتبرك منهم لكن حضرتك مكنتش موجود
رحت للباقيين أسألهم عن تفاصيل رأيهم
البعض رفض يتكلم تماما
والبعض اتكلم قليل بسبب نفس فكرتك عن الزهق من اساليب المناقشة والاتهامات بالعمالة والتخوين
بس أنا أنانية وبمنتهى الامانة كنت محتاجة جدا فى الفترة دى انى أسمع
علشان محسش انى قطر واخد فى وشى وفى الاخر البس فى حيطة والحاجات دى

حفيدة عرابى يقول...

عارف شعور اللخبطة لما تلاقى حد رأيه عكس رأيك تماما بس دماغه بتفكر حلو ومش قادر تنكر ده
عارف لما تلاقيك متحمس جدا والطرف التانى كل شوية يعرض مخاوفه فتقلق من حماسك
وتبص كل شوية لمخاوفه وتحاول تدرسها من خوفك أنت كمان
ولما تبقى بتدعى ان ربنا يحقق لك أحلامك العظيمة وفى نفس الوقت بتقول يارب لو فيه شر هييجى من ورا الاحلام دى خليه يارب يقول كتير يمكن لو قال اخد بالى
لو الكلام اللى فوق ده مفهوم منه حاجة فده حالى مع بروفايلك ومعاك طبعا من ساعة ماالنت رجع
--------------------------------
الكلام اللى فوق ده كان تحديدا تعليقى امبارح عند أحد الاصدقاء اللى كل فترة كده بيكتب عن مخاوفه
مش هاكدب عليك انا رأيى عكسه زى ماقلتله بس محتاجة جدا أسمعه
يمكن يخفف من غلوائى شوية
يمكن ينور لى سكة مش واخدة بالى منها

يبقى كلامنا سوا مع احترامنا لطريقة تفكيرنا المختلفة مفيد جدا والله ومش حاجة تزعل
حتى لو مااقتنعتش بوجهة نظرك
حتى لو فضلت اقاوح واقولك رأيى انا اللى صح
ثق حضرتك انى بينى وبين نفسى هستفيد من كلامك ومن رأيك فى تعديل رأيى
علشان كده أقسم بالله كنت محتاجة اسمع
وحضرتك معتزل والبعض مصر على الصمت والكلام فى مواضيع تانية
والبعض بيتكلم قليل اوى

يمكن شغلانة التدريس دى اللى محسسانى انى لازم اقول اللى عندى ولازم اقول واعيد وازيد
بس بالله عليك انت وكل اللى بيحبوا البلد دى ورأيهم مخالف لازم تتكلموا
لان الغلطة المرة دى بمستقبل بلد
اتكلم حتى لو بتكتب لنفسك

انا لما لقيتك كتبت فى نحن والغرب
مع انى بتغاظ من باب التعليقات المقفول :)
بس خطوة كويسة وممكن تعمل كده على فيس بوك متهيألى
اكتب وقول رأيك لان ده حقك ولانه وده الاهم واجبك اللى ربنا هيحاسبك عليه

سيدنا عبد الله بن عمر بن الخطاب اعتزل الكلام فى الفتنة وبعدين قال والمجاهد أفضل
مع انى رخمة ومصرة ان اللى بيحصل فى التحرير مش فتنة :)

-----------------
أكيد حضرتك اتعودت على اعتذاراتى المتكررة من الرغى :$

حفيدة عرابى يقول...

حاجة أخيرة معلش
اتعامل مع اللى يزعلك بنفسية المدرس
مش بتدى دروس رياضة وهاقول لزمايلى عنك :)
اللى يغلط محتاج اللى يعلمه انه غلط
اللى مش فاهم لازم يفهم
اللى مش عارف لازم يعرف
بس بالتدريج وبصبر كبير
ازهق وقول انك مش هتتكلم تانى وانك بتحرث فى بحر
بس بعد شوية ارجع تانى اتكلم علشان الكلام سلاحك الوحيد والحاجة الوحيدة اللى هتقول لربنا انك كنت قادر تعملها وعملتها

لورنس العرب يقول...

لا يا ستي ولله مش التعليقات عندك ولا حاجه- هو الموضوع كان بشكل عام جاء بالوضع ده، أصل بيني وبينك الواحد بردو بالدرجه الأولى بيدخل النت من باب الترفيه، ولما بقعد امام الجهاز بنسى كل حاجه، لكن لما تقعد وتلائي وجع القلب جاي لغاية عندك بتبقى صعبه شويه، ما انا بقولك البنت قاعده جنبي في مكتب النت شافتني كاتب حاجه مش على مزاجها قامت مزعقه زي المجنونه وفضلت تشتم وانا باصص لها وساكت خالص
واكرر لك
الانجاز اللي حصل ده أحنا اول ناس شاركنا فيه بكلامنا عبر سنين على النت
والتراكمات جابت النتيجه دي في النهايه، لكن اللي هاينفذ لازم يبقى واحد بس مش ممكن ال 85 مليون ينفذوا الامر
والعالم اللي تحرق الدم موجودين في كل مكان- لكن السؤال اللي انا سألته لروحي هو انا ايه اللي يجبرني على تحمل القرف ده؟

لورنس العرب يقول...

ولله انا اعذر الناس انهم زهئوا، انا عن نفسي مكنتش بنام لأيام كامله، واصحابي كانوا بيلحقوني بأي خبر سواء كان صح او غلط على الفضائيات، ومر عليا اسبوع كان من اكثر الاسابيع اللي اتكلمت فيها في الموبايل في حياتي كلها، وفجأه قررت مرة باليل اني افتح فيلم عربي اتفرج عليه وقلت بلا ثورة بلا نيله، خلاص انا نفسيتي تعبت، مفيش حد فاهم اننا مش بنكره مصر ونريدها في احسن الاحوال، وعلى فكره انا قمت بزيارة المعسكرين، ميدان التحرير ومصطفى محمود، لا ده مأجور ولا ده واخد فلوس
وعن رأيي في الاحداث هايكون صعب شويه
لأن يوم الجمعه الدامي -بمنتهى الصراحه- المتظاهرين هما اللي استفزوا الامن اولا، وبعدها بدأ حرق السيارات الخاصه بالامن المركزي، والبوليس كان بيضرب قنابل مسيله للدموع ورصاص مطاطي فقط ومنه كانت الاصابات، وبعدها حصلت عملية حرق لأقسام الشرطه بشكل منظم جدا جدا وفي وقت واحد- ومفيش حاجه اسمها بلطجية للحزب الوطني، اللي حصل ان دول دخلوا على دول، فكانت المصيبه اللي حصلت يوم الاربعاء والسبب ان الاعداد كانت ضخمه في الطرفين، انا شاهدت الاحداث من فوق كوبري اكتوبر وكنت عائد من مصطفى محمود للمعادي سيرا على الاقدام، وكمان كان هناك قناصه فوق الاسطح الله أعلم دول تابعين لمين، لكن اللي شفته بعيني ان فيه واحد من عندنا بالمعادي تابع للحزب الوطني طلع ناس التحرير عشان يقابلوا المتظاهرين في اليوم ده، وتجمعوا بتوع الحزب من حلوان للمعادي، وكانت الاعداد كبيره وحصل الصدام
لا وجود لمؤامرات باستثناء موضوع الجمال وده اللي سمعته انه من جانب الناس اللي في الاهرام بس مين مسلطهم الله اعلم

لورنس العرب يقول...

شوفي
فيه كلام غير منطقي
أي حد من متظاهرين التحرير يحصل له أي حاجه يبقى الحكومه مسلطه الناس عليهم عن طريق البلطجيه، شكلهم ايه البلطجيه دول الله اعلم، والبلطجيه هما اللي حرقوا سيارات الشرطه عشان يتهموا المتظاهرين فيها؟!!! طيب تيجي ازاي بس؟
وبعد كده قالوا ان الحزب هو اللي حرق اقسام البوليس- وهو اللي قام بإخراج المساجين من السجن- وهو اللي عمل كل شيء عشان يتهموا فيها المتظاهرين
ده كلام غير منطقي بالمره
لأن السجون اللي اقتحمها اهالي المساجين وانا شاهد على عمليه فاشله في سجن طره، وهرب منه عدد قليل كانوا يجوبون المعادي يوم السبت ليلا، وسجن وادي النطرون تم اقتحامه بلودر عن طريق الاهالي، مش كل حاجه تبقى الحكومه هي المدبره للأمر وان الامر عباره عن لعبه لكي يتهموا فيها المتظاهرين، الكلام ده غريب وغير مقبول، انا اقدر اقولك ان كله غلط، حتى المتظاهرين يوم الجمعه الاسود كان معهم مولوتوف واحرقوا سيارات الشرطه وهم من احتك بالشرطهأولا على اساس ان فيه مجموعات الله أعلم تابعه لمين -غالبا الاخوان المسلمين- هما اللي احتكوا بالامن لأن العمليه كانت عاديه للساعه 3 العصر وبعدها بدأت المصائب، وانا كنت على علم بان الاخوان سيفعلون مصيبه من يوم الخميس مساءا وتم توجيه الدعوه لي في الشارع على اساس اني بدقن وكانوا فاكريني منهم، وأمر غير مقنع بالمرة أن اقسام البوليس يتم حرقها في نفس الوقت- كما انه بردو غير مقنع الاختفاء الرهيب للشرطه، وعلى فكره، مش كل البوليس جري، والدليل ان فيه مأمور سجن قتل وهو يدافع عن السجن هو والقوه الموجوده معه

لورنس العرب يقول...

ومش كل المتظاهرين على حق فيما فعلوه، أنا شايف ان بردو مهما كان لازم رئيس البلد يكون له احترامه لأنه لازال في السلطه، وعيب واحده تطلع في التليفزيون وهي في الجامعه وتقول ان كلام عمر سليمان مش عاجبها لن عمر سليمان ده راجل بيتفاوض مع اليهود، معقوله كلامه بالنسبه لها غير مقنع؟
وأنا شايف بردو ان الشباب في التحرير زودوا العمليه اوي أوي اوي، وفيهم اللي ظهر في التليفزيون بيتحدث وكأنه جمال عبد الناصر، وفيهم اللي بيغلط في الراجل الكبير بشكل مبالغ فيه، وفيهم اللي دماغه ناشفه -كلهم تقريبا- ويااما تنفذ اللي انا عاوزه او مش هقعد معاك، وفيهم اللي شعر بعد حدوث الحركه الاحتجاجيه ونجاحها ان البلد والمسؤولين في الدوله بيخافوا منه وعلى هذا الاساس بيفكر في التمادي في افعاله، ولأننا بلد فوضوي، اليوم كان هناك حركات احتجاجيه في السكه الحديد لصرف الحوافز، وفي وزارة الصحه من اجل زيادة الرواتب، وفي عدة اماكن وكله بيهدد بالاحتجاجات وايقاف العمل من اجل تنفيذ المطالب
ده يا آنسه رشا في عرفي انا اسمه لعب عيال وكلام فارغ وعدم الشعور بمسؤوليه الحريه المعطاه إلينا

لورنس العرب يقول...

ده رأيي وده اللي انا شايفه

وطبعا انا لو قلت الكلام ده كله في الميكروباص او على الفيس بوك كان زمان الناس قالوا لي بلاوي سوداء، ده انا قلت للناس كفايه تظاهر ونشوف النتيجه قالوا عليا عميل، انا اللي بشتم مبارك من 10 سنين على النت هو والحكومه بيقولوا عليا حزب وطني!

بس شفتي باه
صحيح اليوم انا كتبت عن الغالي
بس اعتذرت لك انتي بالذات علنا في تسمية الموضوع قائلا "سامحني ياللي في بالي"

لورنس العرب يقول...

على فكره
نسيت أقولك على حاجه مهمه اوي
استفسار بسيط
هو الناس اللي اتقتلوا من البوليس في المواجهات من عساكر الامن المركزي والضباط دول ايه ظروفهم عند الناس؟
يعني دول شهداء ولا دول مش تبع الليله اللي بنتكلم فيها؟
الناس دي محدش بيجيب سيرتهم ليه؟
واللواء اللي اتقتل في سجن الفيوم ده بردو ايه وضعه عند الناس؟
ولا الاموات من عساكر الامن المركزي رايحين جهنم؟

حفيدة عرابى يقول...

لورنس العرب
أكيد طبا حضرتك واثق انى مختلفة معاك فى أغلب النقاط :)



أى حدث كبير زى الثورة بيحصل بيكون نتيجة لتراكمات كتير
أنا بعتبر ان حركة كفاية مثلا لما كانوا بينزلوا الشارع بالعشرات ليهم دور كبير فى تشجيع الناس على النزول للشارع
ومتفقة معاك ان وقت الثورة مش هينفع كلنا نكون فى الشارع
وان اللى مش هيعرف ينزل ممكن جدا يبقى مفيد للثورة ولبلده فى مكانه ووطنى زيه زى اللى نزلوا مفيش فرق
حتى لو مختلف معاهم فكريا ..مطلوب منه بس يشجعهم وينصحهم
-----------------------

كلنا شفنا أيام لا فيها نوم ولا أكل وفى أقصى حالات توترنا والنشاط الوحيد اللى بنمارسه هو اننا نتفرج على التليفزيون
وأنا اتكلمت مع زمايلى وقرايبى وكتير منهم مع مبارك أو كانوا مع مبارك :)
بس من غير مايكونوا بيقبضوا ولا حاجة
احنا شعب بيخاف من التغيير والريس عودنا ان وجوده استقرار وامان وغيابه فوضى واستغل فينا اننا شعب عاطفى
طبعا انا مش مع الكلام ده لكن متأكدة انهم مش مأجورين
----------------

يوم جمعة الغضب
الدم كان فى مكانين
التحرير ومش موافقة حضرتك ابدا ان المتظاهرين استفزوا الامن
مينفعش
لان انى خارجة لمظاهرة ..الامن اتعامل معاهم بغباء ووحشية لفضهم وكلنا شفنا الصور
استفزوا الامن دى مش فاهماها حقيقى
ماهو الحاجة الوحيدة اللى هتريح الامن انهم يرجعوا
والثوار مش ناويين يرجعوا
هل ده يبقى استفزاز !!؟
أنا لى مطالب وهو بيمنعنى من تحقيقها لازم أقف قصاده ولما يطلب منى الانصراف أكيد مش هارجع بسرعة على بيتى

حفيدة عرابى يقول...

طبعا الجهاز فصل وضيع تعليق طويل
فاصل طويل ونواصل ان شاء الله

لورنس العرب يقول...

مين اللي حرق سيارات الامن المركزي؟

حفيدة عرابى يقول...

مش عارفة اركز والله علشان أرد على التعليقات
يمكن نفرح الليلة دى ونهنى بعض :)

جيجي يقول...

مبروك ياروشي





مليوووووووون مبروك



دم الشهدا ماراحش هجر

افرح ياكل شهيد









افرح قوى ياكل مصري




وكمان ياكل عربي



هى دي مصر
هدى دي مصر


هى دى مصر