عندما أجبروه أن يفهمهم

مبارك نجح فى نشر حالة من الخوف فى نفوس المصريين 
خوف من الفوضى والبلطجة والفقر والانهيار والاحتلال 
مبارك نجح يقنعنا ان فيه ميزان ووضع نفسه فى كفة ومعاه الاستقرار اللى أنا بسميه جمود وموت بطىء وفى الكفة التانية خراب ودمار وأمريكا اللى هتحتلتنا واسرائيل اللى مستنية الفرصة والبلطجية اللى واقفين على الباب والعراق اللى هنبقى زيها 


أولا 
مبارك مش ربنا 
واذا كنا متأكدين من الجملة دى نظريا لازم نكون على يقين منها قلبيا والا هنكون فى مشكلة كبيرة 
فعلا مبارك مش ربنا 
وموت مبارك أو سفره أو اسقاط نظامه مش سبب أبدا لخراب مصر 
ليه ؟
لاننا فى تاريخنا الطويل مااتعلمناش ان طلباتنا دى طبيعية جدا وعادية ومش محتاجة أبدا ثورة وشهداء 
مبارك لما يسقط نظامه بمنتهى البساطة ممكن تشكل حكومة انتقالية وتكون أهم أعمال الحكومة انها تشكل لجنة لوضع دستور والدستور يحدد سلطات رئيس الجمهورية ومدة حكمه وينظم الحياة فى البلد اللى متعرفش غير الفوضى كأسلوب حياة 
الدستور اللى بنحلم بيه هينظم اجراء انتخابات نزيهة هنقسم بالله اننا اول مرة نشوفها فى حياتنا والانتخابات دى هتخلينا نختار رئيس وأعضاء برلمان يعرفوا ربنا لانهم هيكونوا متأكدين اننا هنحاسبهم على تصرفاتهم 
أنا مش بكتب أحلام 
اللى بتكلم فيه ده بديهيات الحياة فى أى بلد بتعامل شعوبها على انهم بشر ولو فيه حد ناسى عيوب نظام مبارك ياريت يفتكر ان من أهم العيوب اننا ماتعودناش نتعامل زى البنى ادمين فى عهده


ثانيا 
المتعاطفين مع خطابه الاخير شايفين ان الريس قضى تلاتين سنة من حياته فى خدمة مصر وانه كفاية انه جاب لنا الانتصار فى حرب اكتوبر 
طيب كلمة تلاتين سنة لوحدها من غير مانقول عمل ايه فى كل السنين دى تكسف والله 
ماعلينا 
مبارك سنة 73 كان بيعمل شغله وفى التلاتين سنة كان بيعمل شغله واللى بيعمل شغله مينفعش يمن علينا انه عمله
 بالعكس من حقنا نحاسبه ونشوف مستوى الاداء بتاعه كان شكله ايه ؟


مبارك وأنطمة الحكم فى مصر نجحوا يوصلو لنا احساس بالدونية وأننا أقل من ان سقف مطالبنا يبقى زى أى دولة تانية 
نجرب كده نروح أى مكان فى مصر ونطلب بس اننا نتعامل معاملة ادمية 
معاملة بنى ادمين بس والله مش معاملة فيها تمييز ولا اى حاجة تانية ونشوف الناس هتبص لنا ازاى بمنتهى الاستنكار والذهول وازاى العيون هتتهمنا بوضوح اننا مجانين 
مبارك استغل اننا فاهمين دين غلط علشان يستغل ان الايمان بالقدر عقيدة ويقولنا نصبر على حاجة وحشة فى حياتنا ولا نبقى كفرنا بقى 


مش هتكلم عن العبارة وقطر الصعيد والزراعة والنيل والسرطان والفشل الكلوى وكرامتنا واقتصادنا والتوريث وحكومة رجال الاعمال والاعلام الفاسد الفاشل اللى ميعرفش ربنا وكل حاجة ضاعت مننا فى كل الفترة اللى حكمنا فيها مبارك 


أنا هتكلم فى الفترة اللى حكم فيها مبارك بداية من 25 يناير 2011
نراجع مع بعض سريعا عمل ايه مبارك فى الفترة القليلة دى 


 سمح لوزير داخليته يضرب فى أشرف عيال خلفتهم مصر ويوم الجمعة اتعامل معاهم نظامه بمنتهى البطش والحقارة والوحشية ودمهم على اسفلت التحرير


مبارك اتعامل معانا كحيوانات وقطع علينا الاتصالات والنت وحبسنا فى  قفص وكان هاين علينا نخبط راسنا كلنا فى الحيطان علشان مش عارفين نتصرف ومش عارفين نطمئن بس على أهالينا 


كل شوية يقفل قناة الجزيرة مع انى متأكدة ان الجزيرة مش بتجيب كل الحقيقة وانها غيرت سياستها معاه بعد زيارته لقطر بس اهى كانت أرحم من قنوات الشلل والتخلف العقلى اللى هتقضى علينا


مبارك سحب جيشه بتاع الداخلية ونشر البلطجية والاشاعات علشان يرهب شعبه ولو معملش فى حياته حاجة غير الليلة اللى مصر كلها معرفتش تنام من الرعب يبقى كفاية عليه كده


في ريس فى الدنيا يسهر شعبه كله رجالته فى الشارع وستاته فى البلكونات والدبابات رايحة جاية علشان الامن بتاعه قرر يختفى شوية ويربيهم 


في ريس فى الدنيا يفتح السجن ويخرج المساجين 
طيب والله المساجين أشرف من اللى خرجوهم وانى مخفتش منهم وماتخيلتش ان كل مسجون خارج علشان يقتلنى أو يسرقنى لكن بتعامل مع كل واحد من نظامه على انه مصدر أذى وارد جدا بالنسبة لى 


مبارك استغل ان شعبه العاطفى الساذج عنده ثقة فى قواته المسلحة لانه على الاقل مش بيتعامل معاها وماشافش منها كم الرشوة والبلطجة اللى بيشوفها فى تعاملاته مع الشرطة 
لكن استغل الثقة دى وسابهم يتصوروا بسذاجة مع الدبابات ووقت الجد 
الدبابات سابت البلطجية يدخلوا ميدان التحرير بالجمال والخيول


مبارك من امبارح فرحان بالهجانة وبأمنه المركزى اللى لابس مدنى وهو بيضرب فى شباب التحرير للمرة الاخيرة ان شاء الله


مين اللى قفل البنوك والبورصة ونشر الفوضى والخراب 
محدش يقولى طوابير العيش لانى وقفت فيها كتير قبل 25 يناير وسببها الرئيسى انه مش بيزرع قمح تنفيذا لاوامر أبانا الذى فى البيت الابيض
محدش يقولى الاسعار غالية علشان كلنا عارفين انها دايما غالية وعمرنا مافهمنا غالية ليه 
محدش يقولى البلد بتنهار لانها بتموت موت بطىء بقالها أكتر من تلاتين سنة ومحدش بيتكلم 
لو التعليم بس سبب كافى لخراب البلد دى يبقى خدوها منى كلمة ثقة وصلوا صلاة الجنازة على البلد دى لان كل يوم والتانى قرارات بتسرع الانهيار التام 


حرام والله نسيب السبب الرئيسى للفوضى ونمسك فى اللى حاول يلغيها ويصلحها ونسمع كلام زى
 حرام ده معانا من زمان ....عيب ميصحش ده زى ابونا .....ماخلاص شكل وزارة 
رئيس الوزارة فى بلدنا ياسادة مجرد موظف عند رئيس الجمهورية علشان كده  متفرقش 
عاطف صدقى من عبيد من على لطفى من نظيف لشفيق 
السمكة تفسد من رأسها 
وأخيرا 
الشعب يريد إسقاط النظام 

5 التعليقات:



فاتيما يقول...

الله يفتح عليكى
يا فيدو
وهعمل لينك للتدوينة دى
عشان الصورة تبقى واضحة


بس عاوزة اعلق على عنوان البوست
واقول انه على رأى حد سمعته ومش فاكرة مين ... قال
ان خاصية الفهم عند النظام
مش موجودة أصلاً


صباح الحرية والكرامة
يا حبيبتى

توتو يقول...

ماشاء الله عليكى


واخرها الشعب يريد اسقاط النظام



بس هو ده من الاخر وارحمنا بقه


جيجي والعالم

sony2000 يقول...

اللهم انا نستودعك بلدنا مصـــــ♥ــــــر فلا تفجعنا ولا تسؤنا فيها يــــــــــــــارب

الحــب الجميـــل يقول...

مصر تحتاج للدعاء

أرجوكم ادعوا لها

اللهم لك الحمد كله كما ينبغي لجلال وجهك وعظيم سلطانك

اللهم صل على محمد وعلى آل محمد كما صليت على إبراهيم وعلى آل إبراهيم وبارك على محمد وعلى آل محمد كما باركت على إبراهيم وعلى آل إبراهيم

اللهم الطف بأهل مصر

اللهم احفظهم بحفظك واكلأهم برعايتك و احفظ بلادنا يا رب العالمين

اللهم انصر المصريين في أرض الكنانة وحكم فيهم شرعك واكفهم شر كل طاغية جبار

ربِ انصر إخواننا وأهلنا في مصر و لا تنصر عليهم، ربِ ثبت أقدامهم وارحمهم

ربِ رد كيد كل من أراد بهم السوء يا عزيز يا جبار
اللهم احفظ مصر واهلها وكل ما فيها

يا الله يا رحيم يا حي يا قيوم برحمتك استغيث

اللهم انت ثقتي في كل كربة ورجائي في كل شدة وانت لي في كل امر
اللهم يا قادراً على كل شيء .. اغفر لنا كل شيء وارحمنا برحمتك الواسعة التي رحمت بها كل شيء وإذا وقفنا بين يديك لا تسألنا عن أي شيء فإنك أهل التقوى وأهل المغفرة .
اللهم عجل الفرج وأرح العباد والبلاد ممن خربوها وأذلوا أهلها
اللهم كن لأهلنا في مصر ناصراً ومعيناً
اللهم ارزقهم الأمن والأمان والسلامة والإيمان
اللهم اعصم دماء المسلمين و أعراضهم و أموالهم
اللهم أمين
يارب العالمين
استغفر الله العظيم الذي لا إله إلا هو الحي القيوم وأتوب إليه.
نسألكم الدعاء

حفيدة عرابى يقول...

أنا اسفة اتأخرت فى الرد على التعليقات
كنت بايته فى فيس بوك امبارح :$
----------------------------
طمطم
انا لى الشرف ياحبيبتى
وطبعا مش بيفهموا

--------------
جيجى
وحشتينى جدا
وبجد الشعب يريد اسقاط النظام

----------------

سونى
ان شاء هيحفظها ويفرحنا بيها
------------------

الحب الجميل
اللهم آمين
ماتقلقيش