اعتذار

أول شعور كان الخوف 

خايفة من البهدلة ومش هاقدر اتحملها وعمرى ماخرجت فى مظاهرات 

وأقصى نشاط كان ممكن أعمله وأحس انى فخورة بنفسى كمان 

انى مارست حقى وشاركت فى الاستفتاءات والانتخابات 

بمرور الوقت ومع الكلام حسيت ان خوفى ده اسمه جبن 

وكنت عايزة أكتب على فيس بوك أقولهم 

هو أنا لو ماخرجتش معاكم مينفعش أقول انى بحب البلد دى تانى
حسيت انى مش عارفة اتكلم معاهم فى الموضوع وأنا خايفة 

وان كلامى وكل لينكات الجرائد والفيديوهات اللى طول الوقت بنقرأها ونشوفها ونبعتها لبعض 

مالهاش أى لازمة لما وقت الجد أنا مش موجودة 

وان صورة بو عزيزى الله يرحمه سواء العادية أو لحظة الحرق 

مينفعش اتكلم عنها تانى وأقول انها بتوجعنى جدا 

وواجهتنى مشكلة تانية هى اللى قللت خوفى شوية 

البنات اللى أنا بدرس لهم 

وكنت بعتبر الوقت اللى بشرح لهم فيه مظاهرة عابدين من أسعد أوقاتى 

وكنت بضحك معاهم واقولهم انتم بتشتروا البومات وصور تامر حسنى 

وأخباره هى محور أحاديثكم طول الوقت 

وأنا فتى أحلامى أحمد عرابى 

واستمتع بالدهشة فى عيونهم وصوتهم 

ياميس ده شكله وحش !!

ياميس ايه الشنب ده !!

وأنا مش عارفة أبطل ضحك وأقولهم بس يابنت انت وهى 

شكل مين اللى وحش !!؟

وبعدين ده الشنب ده كان مشكلة وقتها شوفوا كده صور باقى الزعماء فى الكتاب 

ده من علامات الحمشنة والرجولة مش المياعة زى اياهم

ده كفاية وقفته زى الاسد وطريقة كلامه مع توفيق 

وازاى الشعب وثق فيه وقاله أنت اللى هتعرض مطالبنا 

والخديوى والحكومة حاولوا يجهضوا مظاهرته السلمية قبل ماتبدأ 

بس المصريين اللى نسبة الامية  كانت كبيرة بينهم ومكانش عندهم تليفزيون

 ولا قناة الجزيرة من قطر حسوا ان مشهد المظاهرة مهم 
ولازم يكونوا مع زعيمهم يساندوه واتجمعوا فى الميدان من قبل وصوله

نجحوا يومها علشان كانوا مع بعض 

وكان عندهم وعى 

وأفضل اتكلم عن الوعى السبب الرئيسى لقيام الثورات وحدوث التغيير 

واحنا حالنا أصعب  بس معندناش وعى 

وخلوا بالكم و ....

البنات دول أقولهم ايه ؟ 

لما أنا ساعة الانتخابات ببقى فخورة بنفسى قوى
وبحفزهم لازم أول مايكملوا السن يعملوا بطاقة انتخابية 

لو سألونى انت نزلتِ ياميس يوم 25 ؟ 

ممكن أقولهم كنت خايفة أنزل واتبهدل ؟

مش هاعرف أقول كده 

طيب ما فى مواقف أهم وأصعب من كده كتير وأنا عارفة حلها ببساطة جدا 

بفوض أمرى لله 

ومحصلش ابدا  الا كل خير مكنتش أحلم أوصل له 

خوفى بدأ يقل 

وفضلت العقبة التانية الكبيرة 

أقنع ماما ازاى ؟

هى دى المشكلة الحقيقية وبدأ كلام من عينة ..

ماما يعنى انت عاجبك اللى بيحصل 

على فكرة أنا بس وأنا قريبة من المكان هصورهم وخلاص

طيب مش هاكون لوحدى هشوف مين من المدونين هينزل وهابقى معاه 

دى سلمية خالص وهياخدوا معاهم العلم ويغنوا أغانى وطنية 

طيب يرضيكِ أبقى ميس أى كلام 

أقول للبنات حاجة وأعمل حاجة تانية خالص 

مفيش فايدة 

أمى وأنا عارفاها 

وعارفة ايه النتيجة من قبل المناقشة ماتبدأ 

البعض لمح بس أنتِ مش صغيرة 

فعلا 

بس كل ماأكبر كل مابسمع كلامها أكتر
مع انى ساعات ببقى مش موافقة ومش عايزة أسمع 

بس أنا مقدرش أزعلها 

أنا بتمنى من ربنا بس صحتها ووجودها فى الدنيا 

وأى حاجة تانية تهون 

وعلى هذا 

يا أمى الكبيرة 

اللى موجودة فى المكان ده من قبل الزمان بزمان 

لما تلاقينى بحكى كتير كده 

أكيد بتبقى عارفة انى متوترة وضميرى تاعبنى 

وبحكى يمكن ارتاح 

انت عارفة انى بحبك ومن زمان قوى 

وانى بجد مكنتش عارفة أنا بحبك ليه كده 

وانى بحمد ربنا انه رزقنى بلد زيك ورزقنى حبك

بجد والله ممكن تقبلى اعتذارى وتسامحينى 

أنا مش هانزل النهارده 

ممكن بعد النهارده تسمح لى عادى يعنى زى اللى نزلوا 

انى اتكلم عنك وأقول انى بحبك 

أما اللى نازلين النهارده وبينزلوا وبيتحركوا كل يوم 

معنديش غير 

أناديكم 

أشد على أياديكم ..

أبوس ألارض تحت نعالكم 

وأقول: أفديكم

وأهديكم ضيا عينى 

ودفء القلب أعطيكم 
-----------------------------------

وربنا يحميكم وترجعوا بالف سلامة 

عندى شعورغريب قوى ان اخواتى نازلين يواجهوا عدو ظالم 

وخايفة عليهم من بطشه 

واننا فى حرب مش مجرد نزول للشارع 

وان اللى هيشوفوه فى الشارع ويقف ضدهم ده حاجة كده شبه اسرائيل 

مش وقته نقول ليه وازاى 

اللهم انصرهم وردهم سالمين وكف عنهم أذى الظالمين 



9 التعليقات:



جارة القمر يقول...

تعرفى انى حاسة باحساسك اوى يمكن عشان انا زيك برضو بقول ازاى هأقف ادام ولادى وبناتى فى المدرسة واقولهم انتوا املنا فى بكره وانكم لازم تشاركوا

فكرت زيك لو سألونى انتى نزلتى يا ميس ولا لأ هقولهم ايه !!!

مالقتش رد عشان انا كمان فى البيت عندى خايفين عليا ومش عايزنى انزل

ياريت أمنا الكبيرة تقبل اعتذارك واعتذارى معك

فاتيما يقول...

امك الكبيرة هتعذر
يا فيدو
لأن حضنها رغم كل القهر
واسع ولاممنا



و الحال من بعضه
خوف الامهات الفطرى الطبيعى
من امبارح وانا بتخانق مع ماما على العلم اللى هيتعلق ف البلكونة
وأخيرا وصلت لحل
غسلته اول ما قمت م النوم
و ماما صحيت لقته منشور ع الحبل
بصتلى ..
وسكتت


احساس عجيب قوى وانا بنشره
كان نفسى جدااااا
يوسف يكون معايا
واقوله كلام كتير قوى
ولو قالى ننزل يا مامااحنا كمان ؟
معرفش كنت هقول ايه
بس كنت هبقى ف نفس موقفك
مع بنات المدرسة


عشان كدا فرحت ببوست نوران وشجعتها هيا وداليا ما كورنر وذا لوست برنسيس وكل حد نازل
وعامل فرض كفاية عننا كلنا
وعاوز بكرة بتاع عيالنا يبقى احسن


انا معاكى قلباً
وقالباً
واماً يا فيدو
ومنتيش لوحدك
و الموجه اليها إعتذراك
أكيد قبلاه من قبل حتى ما تنطقيه
ومن هوه بيتكون حرف حرف
جوا قلبك


اقولك ايه ؟


تموت آيات النغم فى حلقى
أنطق بسر الحياة..
اَريدك
تكتب سنين الخرس نهايتى
أنطق بسر الوجود ..
أَعيدك


أنا كنت عيدك


:)

مهندس مصري يقول...

متفهم موقفك
ربنا يستر و اليوم يعدي على خير و يبقى بفايدة

MR.PRESIDENT يقول...

علي الإقل امن قولتي الصراحة .
مشاعرك صادقة .
ربنا يوفقك ويعينك
ويعين كل اللي هينزله
أنا والله اللي قلقني جرح العملية يتفح من الجري ولا حاجة أو من الاشتباك
ويمكن دا اللي مخوفني
عشان كدا جتلي فكرة إني ألهب الحماسة
بس أبويا نازل
وعمي نازل .

صيدلانيه طالعه نازله يقول...

تخيللى

و انا بقرأ الكلام بتاعك دموعى نزلت

اصل انا برضه كان نفسى انزل

بس مين هيسيبنى اعمل كده

كلنا نفسنا نعمل حاجه و نقول كتير

ربنا يستر على اللى نازلين و يرجعهم لينا بالسلامه يارب

فاتيما يقول...

شفتى اللى بيحصل يا فيدو ؟!!!!
مش قولتلك
متعتذريش يا حبيبتى

مصر النهاردة هتبات بكرامة
وحرة
وفرحانة

:)))))

حفيدة عرابى يقول...

شفت التعليقات وشفت اللى حصل ياطمطم
ومش عارفة ارد
وعمالة أعيط وأضحك وأغنى
ومصر يامه ياسفينة مهما كان البحر عاتى
فلاحينك ملاحينك يزعقوا للريح تواتى
ربنا ينصرهم ويرجعهم بالسلامة
فرحانة بيهم بشكل ...
اللى خرج النهاردة أيا كانت النتيجة خلاص عمره ماهيخاف تانى من الخروج

صيدلانيه طالعه نازله يقول...

شوفتى بقى اليوم كل شويه بيحلو اكتر ازاااااااااااااى
يفصلوا النت
يفصلوا الموبايلات
خلال الشراره بدات و ان شاء الله مش حتنطفى ابدا

amira يقول...

السلام عليكم ورحمة الله وبركاته

اذا عرف السبب بطل العجب
مش علشان بعمل حاجة مهمة واو و مشغولة و اي كلام فارغ من دا
مش علشان مكتئبة ومليش نفس لا اكتب ولا ارد
مش علشان الدنيا سودة وواطية او بمبة ومزهزهه

علي رأي عزيز عندي اتقلي عليا حبة وافهمك

بس انا بتطمن عليكي من البلاكبيري بين الحين والحين و احيانا يوميا :)

دعواتك ييسر ربنا الصعب ويهونه