نصر الله حسن


وأنَّـهُ فـي قتالـهـم رَجُــلٌ.......وأنـه فـي جدالـهـم لَـسِـنُ 


( تميم البرغوثى عن حسن نصر الله )


من اسمه لايذكر الامصحوبا باللعنات 

من الصعب  ان تجد نفسك معجبا بشخصية مكروهة  لهذه الدرجة 

فى الوقت الذى تعتبره أنت من المناضلين 

لا تسمع عنه الا كل مايشين 

ليت الامر اقتصر على ماتسمعه  عنه
 
وانما يتعدى الى اتهامك بما يمس عقيدتك وأحيانا عقلك  

السمة الغالبة على المناقشة فى هذا الموضوع

 هى الاستنكار الشديد الذى ينتاب المتحدثين معك 

ينتابهم شعور انهم خدعوا فيك 

كيف تعاملوا معك كل هذه المدة وانت تبطن احترامك

وحبك لهذا الرافضى
 
من يقتات على سب الصحابة الكرام وأم المؤمنين عائشة 

تجد نفسك مضطرا الى اثبات عقيدتك وانك لاترضى

 بالتشيع عقائديا أو سياسيا

 ولا يمكن أن يضلك عقلك لاتباع مذهبهم الدينى 

والسياسى لاسباب منطقية وواضحة

ولكنك تهوى وتجل المقاومة 

وتحس ان أصحابها نالوا شرفا حرمت أنت منه 

تحاول اقناعهم أن مشاعرك نحوه لم تكن تختلف

 لو أنه  كان على دين اخر 

ساعتها تجد الآيات الكريمة من سورة الممتحنة أمامك

 وتجد المحور الاساسى للنقاش تحول الى الولاء والبراء 


تعترف بايمانك العميق به ولكنك لا ترى أى تعارض

 بين اعجابك وتقديرك ومساندتك ان استطعت

 لمن حمل شرف المقاومة وبين الولاء والبراء


تذكر أمثلة لمن احتلوا قلبك من ديانات مختلفة

 فقط لانهم قدموا أرواحهم لقضاياهم 


تتهم أنك تتناسى شخصيات اسلامية عظيمة هى وحدها من 

تستحق ان تشغل قلبك 

تجد نفسك مضطرا لرسم ابتسامة كبيرة

 بمعنى ان الله قد وهبك قلبا كبيرا يتسع لبشر من كل الاديان 

اذا اعترفوا له بالمقاومة اتهموه بالتهور والنزق

 وانه تنفيذا للاجندة الايرانية

  قد خرب ودمر بلاده عندما استفز اسرائيل

تحوقل أنت استنكارا لان يكون استفزاز اسرائيل

 جريمة وسبة وليس شرفا وعزا 

نتحدث هنا عن الاستفزاز وليس الحرب

 والعداء المباشر وتجييش الجيوش لا سمح الله

يحاصرك الكلام عن ان فئات لبنانية كثيرة تكرهه 

ولكنها لبنان ياسادة بلد الطوائف

 متى اجتمعت على شخص ورأى !!

وكم من الدول تدفع وتساند بعضهم لتحقيق مصالحها فيها 

يتهمونه بالحنجورية 

وأستنكر أنا بشدة ...... نصر الله !!

يصرون على رأيهم والا ماذا فعل لغزة 

وماذا كنتم تنتظرون منه ؟

من منكم ياسادة الذى خطف الجنديين الاسرائيليين

 تخفيفا للضغط الاسرائيلى على غزة مما كان سببا مباشرا

 وليس حقيقيا للحرب ضده 

لماذا لايحرك جيشه لانقاذ غزة مادام مناضلا كما تزعمين 

ترد بسرعة 

والقوات الدولية على حدوده مع اسرائيلكيف يتعامل معها

 ثم تضطر الى الاستعانة بالخرائط لتحديد أى الدول 

العربية تمتلك حدودا مع غزة

 التى اختزلنا القضية الفلسطينية فيها 

يتم تجاوز الدهشة

و يأتى الرد سريعا وقويا

 وهل تطلبين من مصر ان تساند غزة 

واحنا مالنا 

مع رفضى التام لمنطق واحنا مالنا

 الغير متوافق اطلاقا مع ماسمعته عن الأمن القومى 

وأهمية تأمين بوابة مصر الشرقية

 وايمانى المطلق ان دعمنا ان تم لفلسطين ليس اختيارا

 وليس مما يمن به على الشعوب

 وانما هو مسئوليتنا تجاه حدودنا وأمننا قبل مسئوليتنا 

الانسانية الواجبة للاشقاء

هنا تصل الى القناعة الرئيسية التى تدفع الناس الى كراهيته

 الا وهى مذهبه الدينى 


يتبع ......

 

29 التعليقات:



حفيدة عرابى يقول...

عنوان البوست ( نصر الله حسن )
مقتبس للأمانة من فاتيما
وأنا عارفة انه هتسامحنى :)

وجهة نظري يقول...

عايز أقول، مش كل حاجة بتسمعيها أو تشوفيها بتبقى الحقيقة. انتي مدرسة تاريخ وفاهمة.

حفيدة عرابى يقول...

وجهة نظرى
أهلا بحضرتك يافندم فى أول زيارة وأتمنى تتكرر

أنا لسه ماقولتش كل اللى عندى يافندم ولسه مااتكلمتش فى كل الاتهامات الموجهة ليه وللشيعة عموما وخصوصا عقائديا
بس تقديرا لقلق حضرتك الواضح فى التعليق
هاقول انى ان شاء الله مش خايفة على عقيدتى من احترامى ليه
كل الموضوع ان التاريخ فهمنى نوعا ما
ليه الشيعة كده ؟
ازعم انى فهمت لكن مش اقتنعت
ومقتنعة اكتر اننا لازم نتناقش ونفتح كل الملفات من غير مانخلط بين الدينى والسياسى وبين المتفق عليه والمختلف فيه

تحياتى لحضرتك

لورنس العرب يقول...

أولا: إن كان هذا هو سبب أسر الجنديين الاسرائيليين فإنه بذلك يكون رجل احمق، فمنذ متى وكان الضغط على غزه عن طريق اسر جنديين؟
لا الضغط خف ولا اليهود تركوا لبنان، ولله الحمد ساووها بالارض
ثانيا: تذكري انه عندما تم اطلاق صاروخ على اليهود سارع بنفي الاطلاق عنه لأنه كان يعلم ان اليهود هايطربقوها على دماغه لو قال انه من عنده
ثالثا: حرب 2006 كانت عباره عن ان اليهود دخلوا لبنان كسروها وخرجوا، وبعد ما خرجوا طلع نصر الله وقال انه انتصر وان اليهود خرجوا خوفا منه!
والناس يا عيني عشان نفسهم يشوفوا حاجه في اليهود -أي حاجه- بيهللوا لأي حد يطلع ويقول كلام كبير وهو اساسا مش في حجمه

لورنس العرب يقول...

أما بالنسبه لعقيدته
فأحب اقولك ان العقيده هي اساس كل شيء
والدنيا لم تضيق علينا لكي نعجب بواحد سب الصحابه من اساس دينه
وإن كان الامر كذلك
فلماذا نكره أمريكا على الرغم من أن أمريكا هي التي انقذت المسلمين في البوسنه بعد أن ضربت الصرب؟
__________
أقولك ليه بنقول وهو عمل ايه لغزه؟
لأن هو اللي قال سأحرق تل أبيب
والأخ التابع له في ايران قال انه سيمحو اسرائيل من الوجود
فما الذي منعه من أن يحرقها؟
_____________-
يا ميس رشا
ده راجل ارسل أتباعه لتخريب مصر والتسرب من حدودها بحجة مساعدة فلسطين ولم يفعل ذلك من على حدود بلده لكي ينفذ مخطط اسياده في ايران
وعندما امسكت بهم الحكومه المصريه قال أنصاره -حتى المصريين منهم- في أول الامر ان الحكومه بتفتري عليه!
للدرجه دي تريدون ان تساندوا نصر الله ضد بلدنا؟
ولما ظهر على شاشة البلازما وقال انهم أتباعه، قلتم وايه يعني، فيها ايه، أصله عاوز يساعد المجاهدين

لورنس العرب يقول...

شوفي يا ميس
فيه موقعين أخبار لازم تدخلي تشوفيهم او تتابعيهم بصوره مستمره
الموقع الأول هو مفكرة الاسلام وده موقع أخبار سعودي
www.islammemo.cc
الثاني هو شبكة الدفاع عن أهل السنه
www.dd-sunnah.net
وتابعي أيضا شبكة الجبهه العربيه لتحري الاحواز
http://alkarkha.com/

وقبل كل هذا تذكري أن هذا الرجل قام بتخريب بلده وسعى لتخريب بلدنا وعقيدته مختلفه عنا

حفيدة عرابى يقول...

لورنس العرب
:) خلينا فى المهم وهو العقيدة زى ماحضرتك قلت
وطبعا كلامك مظبوط والعقيدة هى الاساس لكل شىء
بس الخلاف فى كذا نقطة
اولا انا ماسمعتش نصر الله بيسب الصحابة
طبعا حضرتك هتقول ان ده جزء من التقية المشهورة عند الشيعة هاقولك انى بتكلم على الظاهر قدامى
واننا بنتكلم عن عقيدة يعنى ماعقد عليه فى القلب من الامور الصحيحة يهمنى هنا يافندم كلمة( فى القلب) يعنى محدش يقدر يكشف عقيدتى شكلها ايه ولا عقيدة أى حد

ثانيا
نقطة سب الصحابة
انا سمعته مرة بصراحة بيقول ان ابو سفيان بن حرب كان ليه مشروع سياسى ومعنى الكلام ان ده سبب اسلامه
فى نقطة دى سبب اسلامه انا ضده بصراحة
لانى هطبق نفس المبدا على ابو سفيان وهو انى معرفش قلبه كان فيه ايه من ناحية الاسلام فبالتالى كلامه ده مايصحش

هنا السؤال اللى شغلنى وخلانى استفسرت فيه وهو مين هو الصحابى
وعرفت ان المعنى اللى وصل لنا مش ادق تعريف للصحابى وان العلماء مختلفين على تعريفات كتير للصحابى واحنا واخدين بالاوسع والاشهر وهو ان الصحابى كل من استهل او ولد لدقائق قبل وفاة النبى صلى الله عليه وسلم وكان مسلم طبعا
المفهوم ده واسع قوى وخلى اعداد الصحابة كبيرة جدا
ايه مشكلتى فى ان العدد كبير
ولا حاجة
بس شيوخنا بيمنعونا نتكلم فى حق الصحابة كلهم وعددهم الكبير ده بصفتى ميس زى ماحضرتك قلت بيحرجنى لانى لازم اشرح تاريخ واذكر احداث حصلت منهم

حفيدة عرابى يقول...

السؤال دلوقت
هل الصحابة كلهم على نفس الدرجة
اجابتى انا لأ
ايه دليلى ؟
سيدنا عمر بن الخطاب نفسه لما كان بيوزع العطاء فى عهده كان بيميز السابقين للاسلام والمهاجرين والانصار على غيرهم ومن شهدوا الغزوات وما الى ذلك
يبقى الصحابة مع كامل تقديرى ليهم مش فى نفس المكانة

أنا مش قادرة اقتنع انى ممكن اساوى فى المكانة الدنيوية فى قلبى بين سيدنا عثمان بن عفان الاموى ومعاوية بن ابى سفيان الاموى
لو اخدنا بس السبق بس فى الاسلام سيدنا عثمان اولى طبعا ومن جوانب كتير


هل لو اعترضت على تصرف او قرار اتخذه معاوية بن ابى سفيان ده ضد الدين ؟

أنا مش شايفة كده يافندم لان النبى المعصوم توفاه الله وتصرفات كل البشر فى حياته او بعد وفاته صلى الله عليه وسلم
ممكن ترد عليهم لانهم مهما علت مكانتهم بشر
المهم انى بناقش قرار سياسى

الاجمل انى فهمت انى حتى لو ينفع اتكلم فى فقه وانا متأكدة انى معرفش
بس حتى لو بنتناقش فى حكم فقهى ما فاانا مش ملزمة بتنفيذ اى رأى الا اللى حصل على اجماع العلماء
والاجمل ان العلماء لم يجمعوا على راى فقهى ماعدا الامور الواضحة قطعية الثبوت فى القرآن حسب مافهمت

يعنى يافندم الاختلاف وارد جدا وصحى فى الامور الفقهية مش هنخلف سياسيا

حفيدة عرابى يقول...

ايع علاقة الرغى ده بموضوعنا
معلش عندى أمل ان حضرتك تستحملنى

بس عايزة اوصل انى سياسيا مش موافقة ابدا على تصرفات سيدنا معاوية مع سيدنا على بن ابى طالب
وشايفة سياسيا ان الخلافة كانت من حق على
مش لقرابته من النبى وبس ولكن لخصاله وصفاته ولان البيعة تمت اولا له فى المدينة
حتى ولو معاويه مكانش له بايعه
المهم ايه دور المسلمين فى اللخبطة اللى حصلت دى وخصوصا بعد مقتل الحسين ؟
سكتوا يافندم تماما ووافقوا معاوية فى حياته على تحويله الخلافة لملك
وعلى توريثه الحكم لابنه وعلى قتل الحسين فى عهد يزيد بعد كده واعتمدوا على مبدا درء الفتنة وظهرت الاراء عن وجوب طاعة ولى الامر ولو كان ظالما درءا للفتنة
هنا بقى ظهر التشيع ببشاعة لان انصار سيدنا على حسوا ان اسرة سيدنا على ظلمت مرة على ايد الامويين وكمرة بسكوت علماء الامة
فانعزل الشيعة لوحدهم وبقى ليهم كتبهم والا راء الفقهية الخاصة بيهم
مع الاضطهاد اللى شافوه من الامويين ومن العباسيين بعد كده
منطقى جدا يكرهونا ويكرهوا الصحابة


انا مش موافقاهم على اتجاههم بس فاهمة مجرد فهم عملوا كده ليه وبحمل علماء السنة جزء من الذنب بعدم وقوفهم مع الحسين او مع عبد الله بن الزبير بجدية تمنع عنهم خطر الامويين
كان فى ثورات فى المدينة انا عارفة والكعبة ضربت بالمنجنيق ايام الزبير
بس مش دى المقاومة الفكرية اللى انا كنت عايزاها

حفيدة عرابى يقول...

سؤال تانى ؟
لما اشوف ان معاوية غلط فى بعض القرارات
هل ده ليه علاقة بالدين بصفته من كتاب الوحى
وهل ده يطعن والعياذ بالله فى اختيارات النبى صلى الله عليه وسلم


اجابتى للمرة مش عارفة الكام لا طبعا
وعندى دليل
هو ارتداد عبد الله بن سعد بن ابى السرح عن الاسلام وكان من كتاب الوحى وده لم يؤثر على الدعوة اطلاقا سواء اثناء ارتداده او عودته للاسلام

الشيعة كرهوا من الامويين بعض التصرفات ومننا الصمت التام والتسليم فبدات تحصل الفجوة

طيب وسبهم لابى بكر وعمر

استحالة اقبل بكده وشايفاه غباء منقطع النظير بس محدش سال نفسه قبل كده ليه بيسبوا الشيخان

رأيى ان دى مجهودات عبد الله بن سبأ واتباعه واشباهه اللى شوهوا صورة الصحابة واشتغلوا تمام على الفتنة
وفهموما الشيعة ان كان فى وصية للنبى عليه الصلاة والسلام لسيدنا على وان الشيخان منعوا تنفيذها وفى بعض اقوالهم كتابتها من الاساس
طبعا الكلام ده غلط بس ده فكرهم

بقول ان ايام الفتنة مكانش ينفع كلام
لكن بعد الفتنة بمئات السنين ليه العلماء المعتبرين من الجانبين مايقعدوش مع بعض ويتناقشوا ونقنعهم بادلتنا
وطبعا ده هياخد يمكن سنين كتير بس نبقى بدأنا وكسبنا مسلمين زينا فى صفنا

شمس النهار يقول...

السيااااسة
مش بحبها خااالص

عارفة ليه علشان احنا مابيتقلناش كل حاجه وبمرور السنين طلعنا مش فاهمين حاجه
وهوبا تلاقي كل شئ انكشف وبان

وميت علامة استفاهم في كل مكان اللي بيحصل في لبنان سواء حوة لبنان او مع اسرائيل او مع سوريا

اللي بيحصل في غزة وبين الفلسطنيين

والعرااااق دي علي راس القائمة
همه دلوقتي بيقتلوا في بعض ليه
وهيخلصوا علي بعض ليه

اما موضوع الشيعه مش مهم همه بيعلنوا ايه ومايعلنوش ليه
المهم علشان تسمي شيعي وتكون شيعي لازم تؤمن بأيه
واكيد انتي عارفه همه بيؤمنوا بأيه

حفيدة عرابى يقول...

هتكلم فى جزئية صغيرة كمان
ان الهجوم الكبير ضد الشيعة ونصر الله وايران مرتبط بشده بحاجات محددة انه بيقاوم وان ايران بتدعمه وان ايران مش على وفاق مع امريكا وان امريكا عندها اصرار ومن سنين وللاسف بيتنفذ دلوقت لتقسيم العراق بعد السودان مااتقسم خلاص الله يخرب بيتهم
مجرد ماايران هتحسن علاقتها مع امريكا هنتفرج كلنا على اعلامنا الراقى بيتكلم عن الشيعة خصوصا ازاى

النقطة الاهم
لما ادعى انى فاهمة الشيعة بيفكروا ازاى وبيكرهونا ليه مش معناه انى موافقة او بحلل تصرفهم لكن مجرد تفهم مش اكتر


مش هناقش تصرفات نصر الله السياسية
لانى تعبت بجد ولانى شايفة ان اختلافنا فيها مش فى نفس درجة الخلاف على العقيدة

حفيدة عرابى يقول...

شمس هانم
اهلا بحضرتك
موافقاك على كلامك
بس احنا بنحاول على اد مانقدر نربط الاحداث ببعضها ونستدعى شوية عبر واحداث من التاريخ ونشغل الاستنباط وبعدين ندعى اننا فهمنا
بنحاول يعنى :$
بالنسبة للشيعة عقيدتهم فاسدة أنا عارفة
بس عارفة كمان ان مش كلهم
وان الزيدية مثلا قريبة جدا من مذهب اهل السنة والجماعة
وانا مش ببر ليهم تصرفاتهم بس عندى امل ولو بعد مئات السنين اننا نتصالح ونصلح لهم الغلط فى عقيدتهم
نعتبرهم مع انى مش موافقة كفار وبنتمنى ليهم الهداية
يعنى المسلم ده مايستحقش منى الامنية دى


كمان انا بحترم المقاوم أيا كان جنسه ولونه ودينه
بحب نصر الله وجيفارا ومانديلا وغاندى وشافيز واردوغان والحسين وحتى سبارتكوس كمان :)

وكلامى واحترامى لنصر الله سياسى
بس بلاقى نفسى غصب عنى رحت على الخلافات فى العقيدة

معلش كلمت حضرتك فى السياسة تانى

تحياتى لحضرتك:)

تحياتى لحضرتك

خواطر شابة يقول...

انا مثلك تماما احترم الرجل جدا وأجله جدا جدا احترم المقاومة ورجالها ولا ثأثير لهذا على عقيدتي وحتى الرجل لم ارى او أسمع منه شيئا عقديا ينفرني منه
ارجوك ان كانت عندك قصيدة تميم عنه اعطني الرابط اكيد ستكون قصيدة جميلة وراقية ومميزة
دمت بكل الود عزيزتي

خواطر شابة يقول...

انا مثلك تماما احترم الرجل جدا وأجله جدا جدا احترم المقاومة ورجالها ولا ثأثير لهذا على عقيدتي وحتى الرجل لم ارى او أسمع منه شيئا عقديا ينفرني منه
ارجوك ان كانت عندك قصيدة تميم عنه اعطني الرابط اكيد ستكون قصيدة جميلة وراقية ومميزة
دمت بكل الود عزيزتي

حفيدة عرابى يقول...

خواطر شابة
شكرا يافاهمانى :)

اتفضلى ياستى
http://www.youtube.com/watch?v=OnHK2jZ75ws&feature=related

أى خدمة :)

sony2000 يقول...

طب انا عوزا اسال سؤال
احنا ليه بنبص لكل الناس
علدياااااااااااانه عدل
طب نبص عملوا ايه مايكن فيوم
نقدر نعمل زيهم

وجهة نظري يقول...

أنا كان قصدي إن في فرق بين خلاف تاريخي وخلاف ديني وخلاف سياسي. الخلاف التاريخي والديني بين السنة والشيعة قائم ووتيرته تتصاعد أو تتباطأ كأي خلاف فالدنيا، إنما الخلاف السياسي وحكايات غزة وحزب الله والخلاف مع سوريا وحرب جنوب لبنان وحرب غزة وتأمين الحدود هو دة إلي قصدي مش كل إلي بنسمعه أو بنشوفه أو إلي بيحصل هو الحقيقة، زي جبل الجليد، فقط ١/٩ منه ظاهر والباقي تحت البحر أو وراء الكواليس.

فاتيما يقول...

اولا
يا لهوووى اسامحك ؟

دنا متشرفة
وبعدين انتى عارفة
انا بحب انطق اسمه كدا
لأنى بحس ان الراجل دا ربنا بينصره
وبيدينا امل بيه


بصى انا عادة مبحبش الأيقونات
ولا ادى دماغى كاملة لحد ف عالم السياسة والدين تحديداً
جيت لحد الراجل دا
وغيرت مذهبى تماماً

بغض النظر عن اختلاف المذاهب
واللى هيا صناعة بشرية
ومحض فتن برضو

لكن انا يهمنى افعاله
وسبحان الله
حرب لبنان كانت الفرصة الدهبية بالنسبالى
عشان اعلم يوسف ابنى ..يعنى ايه اسرائيل هى العدو

انا هتكلم عن تجربتى كأم
مش اوحدة ناشطة ولا بفهم ف السياسة
انا هتكلم عن انى قعدت كتييييير اقول ليوسف اسرائيل بشعة وسيئة و...و..
وهوه مش فاهم وواعى ..ليه؟

لحد ما حصلت الحرب
ولبنان ف ساعات بقت ساحة معركة
واسرائيل بتمارس الخسة المعتادة

لقتنى بمنتهى السلاسة
وانا ويوسف بنتابع الاخبار اول باول على كل القنوات الاخبارية عمالة اشرحله يعنى ايه تفاوض سلمى وهما معملوش كدا
يعنى ايه مينفعش حصار وهما عملوا كدا
يعنى ايه لا تهاجم مدنين وهما عملوا كدا
يعنى ايه قتل الاطفال
وهوه شاف المذبحة معايا لايف ع الجزيرة
كنا بنتابع خطب نصرالله
والراجل لم يخذلنى لحظة
فى ثباته
واتزانه
وقوته
راااااااااجل بمعنى كلمة راجل
قادر يقول لكل الكلاب
انتوا ولا ليكم قيمة
وكونه بيدفع تمن تصريحاته دم وشهداء
فيعنى مش الشجاعة والنخوة والكرامة ليهم تمن ولا فيه شىء ببلاش ؟!!
اللى ببلاش مواقفنا المخزية كأنظمة عربية ودى كانت فرصة برضو
عشان اشرح ليوسف يعنى ايه كان المفروض نقف جنب لبنان وغزة من اول الازمة ومن قبلها كمان ..
والمفروض نعمل ايه ..الخ

كل دا سببه هذا الرجل
اللى خلق لإبنى وعى سياسى ..وهوه ابن سبع سنين يا دوب
ومظنش هينسى ...بل هيتراكم
زى ما حصلنا واحنا اطفال لما كنا لسه بنسمع الحكايات عن الحرب


القومة نوعين
قوة صريحة
قوة ناعمة
والراجل دا بيستخدم القوتين
وف النهاية خلى لكلمة المقاومة معنى
وشرف
وقيمة


انا ميهمنيش مين اللى كتفه بكتفى فى خندق المعركة والقنابل نازلة علينا
طالما بيدافع معايا عن نفس الأرض والأهل والقيم الواحدة
تفرق ف ايه شيعى ولا مسيحى ولا أى ملة ..ما دام دمه مختلط بدمى فى قضية واحدة ؟!!!


نصر الله حسن شرف للعرب
وللمسلمين
وليتنا ف مصر عندنا راجل زى دا
بس متهيألى لولا خربطات لبنان ..مكنش لقى فرصة يظهر ويبقاله مكان وانصار
لو ف مصر او أى دولة تانية
متهيألى كانوا خلصوا عليه بدرى بدرى

لكن الجميل بقى
ان اسرائيل بكل بشاعاتها ..مش قادرة عليه وعشان كدا بقول ربنا ف ضهره
لانه بجد
آخر الرجال المحترمين


هستنى اللى ما بعد يتبع

بوسات وحضونات
يا من قلبها على الاحباب .. يتلفت

:)

MR.PRESIDENT يقول...

البوست جه علي الوجيعه
بس أنا وصلت لرأي شخصي
أنا اتفق معه كمقاتل .
وأختلف معه عقائديا .
كما أتفق مع جيفارا كمقاتل .
وأختلف معه عقائديا .

وجهة نظري يقول...

فاتيما جابت هدف سليم ..... علمت يوسف يعني إيه العدو إسرائيل. كلنا لازم نزرع في ولادنا يعني إيه إن إسرائيل ألد أعدائنا، وحتفضل كدة طول حياتنا لحد ماتزول أو نزول كلنا، ومش ممكن نثق فيها وفي أي حاجة من طرفها أبداً.

كنت عايز أسأل، هي أمريكا لما حبت تطلع روسيا من أفغانستان بعتت جيشها ولا كانت حرب بالوكالة بملة تالتة بناس من شعوب تانية؟

حفيدة عرابى يقول...

سونى
ياريت فى يوم نعمل زيه ( مع اسرائيل )
شرفتينى



وجهة نظرى
:)
طيب ارد على السؤال على طول مع انى يعنى بخمن سببه
طبعا امريكا اعتمدت على ملة تانية هو احنا اللى بمنتهى الذكاء انساقنا للطعم ورحنا نحارب السوفيت الملاحدة
انا شفت بنفسى وانا فى صغيرة الاعلانات فى الشوارع والجوامع وهى بتشجع الشباب على السفر والجهاد فى افغانستان ولما الحرب خلصت كان دورهم انتهى والوضع اتغير والاصدقاء بقوا اعداء خلاص

تخمينى ان حضرتك بتلمح ان ايران بتستخدم حزب الله لتحقيق اهدافها هى
لو تخمينى صح يبقى انا موافقة على كلام حضرتك وتبقى ساعتها ايران دولة عندها استراتيجية وبتعرف تنفذها صح
والاجمل انى اخلى بالى ان حزب الله ايران بتسلحه وبتستخدمه ضد مين ؟
لغاية اللحظة دى ضد اسرائيل ومش موجه ابدا لجهات تانية مع ان فى فئات تانية فى لبنان مدعومة من السعودية ومن امريكا واسرائيل وأشد على حزب الله من اسرائيل نفسها
طيب ايران عايزة يبقى ليها نفوذ فى المنطقة ؟
حقها وحق الكل كمان يحاول زيها ويتعاون معاها او ينافسها حسب الظروف وقتها
طيب ايران عدو ولا حبيب :) ؟
لا عدو ولا حبيب هى صديق محتمل ومضمون عن غيره على الاقل هى مش اسرائيل
ودولة فى محيطنا الاقليمى ولينا مصالح معاها
أنا متعاطفة معاها ليه ؟ لان أمريكا ضدها
أنا مش عاجبنى فيها ايه ؟
ولاية الفقيه وشوية هبل من بتوع الخمينى
حسب ماكان بيوصلنا من الاعلام ومفيش ديموقراطية وعندهم قمع والحال من بعضه يعنى
لكن فى كل الاحوال الغلط انى أصادق اسرائيل واعادى ايران

لو انا تخمينى غلط ياريت حضرتك تنبهنى
وماتسيبنيش بتخمينى ده

تحياتى لحضرتك

حفيدة عرابى يقول...

طمطم
الهى ربنا يسعدك
تعليقك شرح كل اللى فى قلبى ناحية الراجل المحترم ده
فاكرة لما قالهم اثناء الحرب انتم انصاف الرجال
انا مش عارفة اضيف او أعلق على كلامك غيرانى سعيدة جدا بامومتك الواعية اللى استغلت الفرصة وعلمت يوسف ربنا يحميه معانى الاكبر منه بعشرين سنة مايعرفوهاش
حاجة كمان بس صغننة
هو مضغوط عليه من كل الجهات فلو سياسيا عمل تصرف مش مريح بالنسبة لنا
مينفعش نحكم عليه واحنا قاعدين فى بيوتنا
كفاية الامل اللى زرعه فينا من تانى فى اهمية المقاومة
ولو مكانش هو مؤثر وخايفين منه مكانوش استغلوا علماء الدين وهجموا عليه الهجمة دى

فكرتينى بكلامك مع يسوفة بشارون ايام الانتفاضة ومحمد الدرة وولد قريبنا بتاع اربع سنين ماشاء الله زى السكر
كان بيسمع الاخبار واحنا مش واخدين بالنا وبنقوله كل سنة وانت طيب بكره وقفة عرفات قالنا بمنتهى البراءة
طيب امتى وقفة شارون
وحشتينى جدا ياطمطم :)

حفيدة عرابى يقول...

رئيسنا المبجل
وكمان بتجيب سيرة جيفارا :)
ماهو انا كده فعلا بحترم جدا كل واحد عنده قضية ايا كان دينه وجنسه
انا اتمنى ان كل حبايبى يبقوا مسلمين ولما ماقابلتهمش فى الدنيا ربنا يرحمنا ونقعد مع بعضينا فى الاخرة
بس حساب كل واحد فينا مع ربنا وهو الادرى بايمانا وقلوبنا
والراجل جيفارا ده من اللى قاعدين ومربعين
الا لما اسمع جيفارا مات من الشيخ امام بحس انى مش عايزة اقفلها
النهارده فى الفصل لقيت الكلام مودينا على فنزويلا رحت كلمتهم عن شافيز والبنات عارفين ان أى حد ضد أمريكا يضحكوا بسرعة ويقولوا يبقى حبيب قلب الميس وقاعد فى قلبها جنب البطين ومربع كمان
شوية ولقينا الكتاب بيتكلم عن كوبا
جبنا سيرة كاسترو
لما الكتاب جاب سيرة روما مارضيتش أجيب سيرة سبارتاكوس علشان الوقت :)
الخلاصة يعنى
كل واحد عنده قضية ايا كان دينه وجنسه يبقى بطل ويستحق مننا كل تقدير

شرفتنى يازميل الهم التدريسى

MR.PRESIDENT يقول...

ومين سمعك .. أغنية تقهر اللي ميعرفش .. ارنست تشي جيفارا مبالك اللي يعرفه .. ويعرف إنه ساب الحكم .. والوزارة عشان يخلص بلاد من المستمعر المغتصب

وجهة نظري يقول...

بوصي كل إلي حقوله دا تخمين انما من وجهة نظري أقرب للحقيقة.

أمريكا اعتمدت على ناس تانية بملة تانية علشان مش حتنزل عساكر امريكان يحاربوا السوفيت في دولة تانية. أهي جت مسلمين علشان طبيعة المكان، انما ممكن لو مكان تاني يبقوا بوذيين مثلاً والا أي حاجة.

1- حرب العراق وحرب أفغانستان دي مش علشان بترول زي ما بيقولوا، بترول إيه ما أمريكا تقدر تاخد كل دا من غير مايموت كل الامريكان دول في الحرب. كل الحرب دي تمهيد وتدريب للمنطقة علشان حروب أكبر وأهداف بجد، وأكتر من كدة علشان يفضلوا فالمنطقة ويعرفوا التكتيكات المحتملة.

2- إيران ماهياش العدو لينا أبداً، ولا في خلاف معاها غير في "بعض الاطماع وتاريخ تنفيذها".

3- إسرائيل مش من الاطماع المباشرة لإيران انما يمكن من الاخطار الغير مباشرة المؤجلة ليها.

4- حزب الله وحماس مش عدو لينا أبداً برضه، دا جزء من تكتيك أكبر. طالما احنا مش داخلين حرب مباشرة مع إسرائيل لأسباب كتير، والعين علينا، يبقى علينا وعلى حرب العصابات (مع الفارق في اللفظ) ... تهديد ووعيد ومخابرات وجس نبض. أهو كلنا عرفنا مثلاً إن إسرائيل لوحدها متصمدش كتير في حرب حقيقية، وعساكرها خيخة .... وممكن إسرائيل بتمثل كدة كخدعة، بس أدينا عرفنا اسلحتهم وتكتيكهم... مثلاً مثلاً.

5- نفس حكاية أنا وبن عمي على الغريب، إيران بتمول، والسعودية بتمول، وسورية بتدي أسلحة، ومصر بتدي أسلحة لحماس وتهرب فلوس شوية وتمسك فلوس شوية، وتمسك حبة أسلحة مرة..... ماهو لازم نعمل كدة. تفتكري مصر والمصريين كلهم خونة ومرميين في حضن إسرائيل؟؟ داحنا نبئ هبل بريالة، داحنا حتى لو عايزين نترمي في حضنهم مش حنسلم من لدغهم!! عمر ما مصر كانت هبلة، ولا المصريين خونة.

6- مش كل إلي عايزينه طبعاً بيتم بالسهولة دي، في مصالح لسة متداخلة زي نووي إيران، ومضايقة إيران للخليج، وفي ضغوط في كل حتة ومن كل حتة، بس لو مبيتعملش كدة نبقى على رأي الكبير: "دزرة وجتمها دحش".

على فكرة، أنا مش الواد الفتك إلي عالم بخفايا الأمور، انما أنا بحلل كل الاخبار من سنين وبتمنى استنتاجاتي تكون صح، ومتفتكرش الكلام دا خافي عن إسرائيل خالص، هما برضه فاهمين وبيلعبوا لعبتهم.

حفيدة عرابى يقول...

رئيسنا المبجل
نجم وامام كانوا البداية وشجعونى اجرى اشوف ايه حكاية الراجل المحترم ده
جيفارا من الناس اللى أكدوا احساسى ان فى بشر كده عمرهم قصير علشان عمرهم ده ملهم لغيرهم
تحياتى لحضرتك


وجهة نظرى
ومين فينا مش بيعتبر رأيه تخمين :)
احنا مجرد بنحاول نربط الاحداث ببعضها علشان نوصل لصورة واضحة شوية

معنديش أى اعتراض على كلامك لكن رقم خمسة وقفت كتير عندها
لان ده كان رأيى لغاية فترة قريبة بس الاحداث بتقول ان ده مش الواقع دلوقت
وان خلافات مصر مع حماس حقيقية
وصداقة مصر لاسرائيل اللى معرفش ازاى تحصل
لكن بتكسب ارض جديدة كل يوم
اكيد مصر واسرائيل فاهمين انهم اعداء مش اصدقاء
بس الغاز وضغط مصر المتواصل على الفلسطينيين فى المفاوضات والاعلام اللى بيفهم الناس كل يوم مساوىء حماس ومصطفى الفقى اللى قالها صريحة ان مصر مش عايزة امارة اسلامية على حدودها
والسعودية اللى بتمول السنة فى لبنان وبتعتبر ان حزب الله عدو ليها لانه ذراع منافستها ايران
كل ده بيحسسنى انننا فعلا اتغيرنا
وان المفاهيم البديهية والثابتة عن مين العدو ومين الصديق اختلطت
وان حكومات عربية كتير بقت مصلحتها الضيقة اهم من أى أمن قومى ليها ولغيرها

أتمنى ان رأيك فى النقطة دى يبقى صح
وان حكامنا يكون عندهم استراتيجية بينفذوها واحنا مش واخدين بالنا
بس حاليا مش قادرة بجد اقتنع بكده
لكن النقط التانية موافقة على رأى حضرتك

تحياتى لحضرتك

مهندس مصري يقول...

حسن نصر الله سيبقى دائماً شخصية مثيرة للجدل
تعجب بقتاله ضد إسرائيل و مواقفه الشجاعة و تتخوف من عقيدته و ما يبطنه
تحب خطبه الرنانة التي تذكرك بأن الأمة فيها رجال و لكنك تخاف من أن يصيبه كل ما أصاب من قبله من أصحاب الخطب الرنانة

ربنا يوفقه لما فيه الخير

حفيدة عرابى يقول...

مهندس مصرى

رأيى المتواضع اننا لو سبناه لوحده يقاوم اسرائيل هيتعرض لما أسوأ من مصير أصحاب الخطب الرنانة

تحياتى لحضرتك