نصر الله حسن 2

متى بدأ التشيع ؟

 البعض بيقول ان البداية كانت بعد سقيفة بنى ساعدة مباشرة 

وان على بن أبى طالب كان حزين من توقيت السقيفة

 وعدم دعوته ليها 

وان عمه العباس حرض( سيدنا على) على الذهاب

 لاجتماع السقيفة لكنه رفض 

ودليلهم تأخر سيدنا على فى بيعة ابى بكر 

رأيى الشخصى ان الكلام ده مينفعش يكون صح

 وانه عبارة عن تخمينات بينفيها التاريخ 

و بتنفيها سيرة سيدنا على قبل السقيفة

 وسيرته مع الشيخان أثناء خلافتهم 

أنا برجح الرأى اللى اعتقد ان سيدنا على كان عليه واجب أهم من السقيفة

 وهو تجهيز جثمان النبى عليه الصلاة السلام للدفن 

و شايفة ان الظروف وقتها كانت بتستدعى فعلا

 ان الخليفة يكون من المهاجرين ويكون من كبار السن نوعا 

ويكون ابى بكر خاصة 

وسببى بالاضافة للاسباب المذكورة فى كتب التاريخ

 عن فضل ابى بكروسبقه وجهاده و تصديقه

 وامامته للمسلمين فى الصلاة 

بالاضافة لكل ده عندى شعور ان ابو بكر كان الانسب

 لانه الاقرب والاشبه بالنبى صلى الله عليه وسلم فى كل تصرفاته وخصاله

أنا عايزة اقول بس انى مش بتكلم لا فى دين ولا تاريخ ولا سياسة 

وانى فى البوست ده تحديدا بفضفض وبقول انطباعات واحاسيس 

ممكن قوى تطلع غلط زى ماممكن تطلع صح 

سيرة سيدنا على بتخلينى مش مصدقة

 انه ممكن يحزن من تجاهله الغير مقصود فى السقيفة 

واعتزاز سيدنا على بنفسه  بيخلينى اعتقد انه شايف نفسه

 يستحق الخلافة لكن مش هو الشخص اللى يسعى ليها 

طبعا انا مش مصدقة كل الروايات

 عن تعمد سيدنا ابى بكر اغضاب السيدة فاطمة الزهراء

 وان على بن ابى طالب  غضب لغضبها 

لكن ممكن أفهم شعور ونفسية الزهراء

 فى المدة القليلة اللى عاشتها بعد وفاة النبى 

وانها لو كانت حزينة من ابى بكر على الميراث 

فده مكانش اتهام منها ليه فى امانته


 فى نقل الحكم الشرعى عن النبى عليه الصلاة والسلام

اد ماكان حزن على حالها

 بعد وفاة النبى عليه الصلاة والسلام 

الرأى التانى 

بيقول ان أحداث معركة الجمل وصفين والتحكيم والنهراوان 

كانت نقطة مهمة جدا فى مسيرة التشيع 

لان الظلم اللى تعرض ليه سيدنا على كان فوق الطاقة حقيقى 

وانه يضطر يواجه ناس كانت نيتها حسنة

 وحزينة فعليا على سيدنا عثمان وعايزة تقتص من القتلة

 زى السيدة عائشة وطلحة بن عبيد الله والزبير بن العوام

 رضى الله عنهم أجمعين 

أو يضطر يواجه فئة تانية زى معاوية بن ابى سفيان 

وهنا سؤال مهم ايه تصنيفى لمعاوية ؟

بمنتهى الامانه محتارة 

مقدرة جدا صفاته الطيبة وانه رجل دولة محنك 

وعاجبنى قوى ازاى كسب قلوب الشاميين فى فترة ولايته 

وعاجبنى كمان قصة ولادته

 وازاى أمه كانت متيقنة ان ابنها هيكون ملك على العرب 

نيجى لاول نقطة خلاف مع معاوية 

وهى قميص سيدنا عثمان ورفعه على المنبر

 والاصرار على القصاص وبسرعة

 ورفض البيعة لسيدنا على 

ايه موقفى ورأيى هنا 

طبعا أنا مع سيدنا على وشايفاه الاصح 

ايه دليلى ؟

شوية انطباعات عن شخصية سيدنا على

 ورفضه من البداية للخلافة

 لولا اصرار المسلمين عليه بعد استشهاد سيدنا عثمان 

ومعلومات عن ظروف وحال المدينة

 قبل وبعد استشهاد سيدنا عثمان 

وان أهل الامصار اللى حملوا السلاح وبعضهم قتل عثمان

 عددهم كان كبير وصعب التحقيق يجيب نتيجة سريعة 

ان اعتبارات الامن واستقرار الدولة

 كانت أقوى من التسرع فى القصاص

وانى مش متخيلة ان  معاوية ممكن يرفض بيعة على

 أو يلمح مجرد تلميح ان على مش مستعد للتحقيق

 والقصاص من قتلة عثمان 

هنا انا انحزت للرأى اللى اعتقد ان سبب تصرفات معاوية 

قرابته  لسيدنا عثمان وان العصبية بدأت تظهر من تانى 

وان الصراع الطويل والقديم بين بنى هاشم وبنى أمية

 هيدخل فى مرحلة جديدة 

هتكون الغلبة فيها للامويين وهيضيع نفوذ الهاشميين 

فى اراء وكتب مؤيدة لرأيى 

واراء وكتب تانية ضده تماما وبتعتبر ده تفتيش فى النوايا 

لكن صفين كانت مرحلة مهمة فى تاريخ التشيع
يتبع ......

25 التعليقات:



MR.PRESIDENT يقول...

في اعتقادي ان احسن من كتب في الفترة دي خالد محمد خالد وخصوصا الكتاب اللي مكتوبة عن مقتل سيدنا الحسين .المهم مهما اخطئوا هما صحابة منهم اللي قاتل جنب النبي .. أنا مش بقول انهم منزهين علي الغلط لأ .. انا أقصد انهم تربوا في مدرسة النبوة .. برضوا زي ما قلتي .. كانوا لسه التعصب متلغاش عند بعضهم .. وكان فيهم منافقين ..
مفيش حد مش بيغلط وسبحان الله .. دار سفيان جابت مثيل عمر فيما بعد .

ربنا يبعدنا عن الفتن . قدار يا كريم

ولد تحت الصفر يقول...

أول معرفتي بالحكاية دي كانت من خلال ول ديورانت في قصة الحضارة ، و اللي قال فيه ان علي رفض يبايع أبو بكر ... بصراحة ما صدقتش و قعدت أدعبس و أدور لحد ما وصلت لسعد بن عبادة و حكاية السقيفة دي


الحكاية كانت مقسومة فرقتين : مهاجرين و أنصار ، الأنصار كان على راسهم سعد بن عبادة .. الصحابي اللي جوايا دافع غامض يخليني بحترمه جداً جداً . و المهاجرين كان على راسهم أبو بكر اللي رشح عمر بن الخطاب و صحابي تاني - مش فاكر مين - انهم يبقوا خلفاء ، و كان متشدد جداً لرأيه ان واحد من قريش ، من قريش بس و اللي هينفع يمسك الدولة ... ما انكرش ان الطرفين كان يهمهم ان الدولة تبقى موحدة ، الدولة هنا مش الدين ، ده صراع سياسي مش ديني ، عصبية قبلية ... بدأ الأنصار يتجمعوا في السقيفة ، و لا أبو بكر و لا عمر و لا أي قرشي اتعزم على الحفلة دي ... طبعاً لما عرف أبو بكر و عمر راحوا جري على هناك و قعدوا يقنعوهم ، و عمر بن الخطاب قال لهم اللي هيبايع واحد " واكل دماغة " لا له بيعة و لا نيلة ( طبعاً مش فاكر النص الصريح ) .

رحت ويكيبيديا ، النص العربي عرفت انه سني ... لأنه باختصار أنهى المسألة دي بأن أبو بكر أقنع الأنصار و سعد بن عبادة بمبايعته ... حتى ان سعد بن عبادة قال له " نحن الوزراء وأنتم الأمراء "

اللنص الانجليزي بقى ، قال ان عمر بن الخطاب "تشاجر" مع سعد ، و أبو بكر قال لهم رفقاً .. و فجأة نادى الناس ان سعد اتقتل !!!!!

و العجيب بقى اني لسه عارف من شوية قريبة انه مات في عهد عمر بن الخطاب


ما فيش شخص كامل ، و دايماً التاريخ ده محير ، يكفي مثلاً انك تطلعي على قصة من كتاب تاريخي محدش يعرفه ، و تروحي تقوليها لأي حد ، أحمد خالد توفيق قال كده على يوسف زيدان و سيد القمني ، قال انهم بيدوروا على النقط السودا اللي محدش يعرف أو يحب يطلع عليها و بعدين ينشروها

و افتكرت كلام مريد البرغوثي "علمنا التاريخ درسين اثنين أولهما: أن تصوير الفواجع والخسارات بوصفها انتصار هو .. امر ممكن. والدرس الثاني هو أن ذلك ... أمر لا يدوم"

بالمناسبة السنة بيقولوا ان أبو بكر بالخلافة للأسباب اللي ذكرتيها ، و الشيعة بيقولوا ان علي هو أول ذكر اعتنق الإسلام ، ابن عم الرسول الأول و الأقرب ، زوج ابنته ، 11 من نسله أصبح لهم الحق في الإمامة ، ينفع تحاولي تقنعي حد بغير الشئ اللي هو مؤمن بيه ؟ ... مش عارف ليه صراع سياسي اتحول بقدرة قادر لاختلاف في العقائد كده

آسف ان تعليقي طويل ..... لا مش بتأسف على طوله طبعاً إنما بتأسف على التكرار اللي فيه .. اعتبريني براجع مع مدرستي .. ايه اللي ممكن يحول صراع سياسي لاختلاف في العقيدة من وجهة نظرك ؟

ولد تحت الصفر يقول...

فاكرة لما نوارة بنت نجم قالت اننا مش بنحب الأشخاص لسواد عيونهم ، اننا بنحبهم للي بيمثلوه لنا

أنا شايف نصر الله حسن ( على رأي فاتيما :) بطل ، و في كلامه كله ما شتمش صحابي سوى معاوية ، و ما شتمهوش كمان بشخصه ، ده شتم الظلم و القهر و الفساد اللي حصل بسببه - معاوية اللي أنا مش بحبه .. و لا بكرهه .

حسن نصر الله من فترة كنت بتفرج على خطبة ليه في قناة المنار عن بر الوالدين ... الراجل ده أبويا الروحي

:)

حفيدة عرابى يقول...

سيادة الرئيس
عارف هو الاختلاف ان البعض عايز يلغى عقولنا انها تفكر
ومش عايز يخلينا نحاول نفهم ولو غلطنا يفهمونا مش مشكلة
وكلامى مقصدش بيه طعن فى حد
أنا بس مش مقتنعة ان كل الصحابة مكانة واحدة
لأ هما درجات
ومش شايفة انى لما اتكلم فى تاريخ واحداث على الاقل الموثوق فى صحتها ابقى بهدم دين

من النقاط اللى ناوية اتكلم عنها جزئية ان معاوية كاتب وحى واننا مايصحش نجيب سيرته للسبب ده والا ببقى بطعن فى جمع القران والدين
بس ده حكاية تانية نخليها لبعدين

شكرا على متابعتك
انا كنت فاكرة انى مش هلاقى حد بيدخل المدونة هنا خلاص وانى هكلم نفسى وقلت اهى مدونتى حبيبتى وهتستحملنى يعنى :)

خواطر شابة يقول...

تعرفي ان زيك دائما محتارة في معاوية ابن ابي سفيان لكن انا اميز بين معاوية الصحابي وبين معاوية السياسي نقط حيرتي تتركز كلها في معاوية السياسي.
تعرفي حسن نصر الله لاأعرف لم عندما اسمعه او اراه لاافكر مطلقا في انني سنية وهو شيعي لا يخطر هذا الامر في بالي مطلقا لعدة اسباب
-كلامه لا يذكرني بهذا ابدا ولا احس ابدا انه موجه لشيعي دون سني
-صدقه في كل كلامه
- ابنه شهيد يعني هو رحل افعال لا اقوال
-انه شوكة في حلق اسرائيل ويجيد التعامل معهم
-السياسي العربي الوحيد الذي انتظر خطاباته بشغف واتابعها ولو كانت بالساعات دون ملل بل واعيد مشاهدتها مرات ومرات (خطاباته السياسية) عنده فصاحة وبيان سبحان الله
عزيزتي في انتظار تدوينتك المقبلة تقبلي تحياتي

حفيدة عرابى يقول...

ولد تحت الصفر
تعليقك جميل قوى علشان هيخلينى افضفض فى حاجات بحبها :)

أول مرة سمعت كلام مش تقليدى عن موضوع السقيفة كان فى كتاب الشيخان لطه حسين
وعلى اد ما أسلوب طه حسين كان مرهق بالنسبة لى وقتها وكان بيستخدم مذهب الشك بس عجبتنى استنتاجاته جدا ومنها ان كلامك عن تأخر سيدنا على فى المبايعة

هو أنا مش قادرة أحدد سبب قوى
بس كمان مش مصدقة ان سيدنا على يرفض البيعة لاسباب شخصية
فى روايات بتقول انه غضبان من السرعة فى الاجتماع
أو انه كان أقسم لايخرج من بيته الا لصلاة حتى يكتب مصحفه وروايات كتير على نفس المعنى


النقطة التانية اللى عايزة اكلمك فيها جزئية السقيفة وليه الاصرار على ان الخليفة يكون من المهاجرين
النقطة دى بأمانة ماريحتنيش من اول ماسمعتها وكان سكوتى عجز عن فهمها وضيق منها
لانى مش شايفة الانصار أقل من المهاجرين
مع تقديرى للاتنين
لغاية ما فهمت ان السبب العرب
بمعنى ان العرب واغلبهم لسه حديث عهد بالاسلام مش ممكن هيقبلوا بخليفة الا لو قرشى لمكانة قريش الكبيرة فيهم من قبل الاسلام
هو ده السبب لكن مكانش عصبية من المهاجرين لكن خوف من عدم استجابة القبائل العربية


القمنى قرأت له مقتطفات ومعجبتنيش ابدا
لكن يوسف زيدان أنا قرأت له عزازيل وعجبتنى جدا
تقصد مقالاته فى المصرى اليوم أنا مكنتش متابعاها وعارفة انى غلطانة وهحاول اركز معاها شوية

حفيدة عرابى يقول...

ولد تحت الصفر
شعورى اللى معنديش دليل عليه ان على بن أبى طالب كان بيرى نفسه أهل للخلافة
وهو شخصية أهل لها فعلا
يمكن وجد فى نفسه من أصحاب السقيفة الله أعلم
اللى كان فيها للمناسبة ابى عبيدة بن الجراح مع الشيخان

نقطة أحقية على أو ابى بكر
رأيى ان ابى بكر أولى ومش للاسباب الموجوده فى الكتب وبس
لكن المسلمين كانوا فى صدمة وفاة النبى
وأكيد قدرتهم على التحمل كانت ضعيفة
فهما عاطفيا حتى محتاجين حد شبه النبى عليه الصلاة والسلام فى الخصال وصديق الصدوق
يمكن يديهم نوع من التعويض حتى لو صحيح
لكن سن على مش هيؤدى نفس التأثير


بتتكلم عن نصر الله !!
ده مبهر بالنسبة لى
مش قادرة اتخيل ازاى يكون بيخطب ويبلغوه ان ابنه استشهد فيحمد الله انه شرف عائلته بالشهادة وانه بقى زيه زى عوائل الشهداء وان ابنه مامتش فى شارع الحمرا فى بيروت لكن فى اسرائيل
لو دى بس حسنته الوحيدة تكفينى

ليه صراع سياسى يتحول لخلاف عقائدى
مش عارفة بجد
بس يمكن لاننا كده طول عمرنا وتاريخنا
نستخدم الدين علشان يدعم وجهة نظرنا
ونقهر بيه اراء الاعداء
حتى لو الاعداء دول اخواتنا فى الدين

حفيدة عرابى يقول...

خواطر شابة
بترفعوا معنوياتى اللى كانت ضاعت خلاص
مش عارفة أضيف حاجة على كلامك
بحب اسمعه كلامه جدا فعلا ويكاد هو السياسى الوحيد اللى بستنى خطاباته وبحس بالاضافة للفائدة التثقيفية انها متعة
بالنسبة لسنى وشيعى فدى اكتر لعبة اتلعبت ضده وللاسف أقنعت ناس كتير قوى

تحياتى لك :)

richardCatheart يقول...

البوستين فى منتهى الجمال يا رشا

تعقيبى على البوست الاول
انا معاكى فى حب البعض لنصر الله
لانه الواحيد اللى ظاهر على الساحه المفروض انه بيقاوم والناس فى حال يرثا له زى ما انت عارفه ونفسها تعمل اى حاجه

انما لو دققنا النظر هانلقيه مش فعال اساسا ولا له لازمه بس طبعا الناس تقول نقطه مياه احسن من قلتها بالرغم انها لا هاتحيها ولا هاتحيى كرامتها

وكفايه عندى سب الشيعه لامنا عائشه
وعمر وابى بكر وانت ادرى منى
ممكن اه نحارب العدو مع بعض انما مايكنش تحت لوائهم


البوست التانى متفقه معاكى قلبا ومضمونا فى حكمك على سينا على كرم الله وجهه
المهم فى البوست دا
انا افضل من حكم دين وسياسه
كان المصطفى صلى الله عليه وسلم وال بيته وصحبه اجمعين ليوم الدين
ومن بعده عمر وابو بكر وضعفت فى عصر عثمان كرم الله وجههم
لغايه عصرنا هذا فشلو فى الحكم الدينى السياسى وبالتالى النهار الدين
تدريجى لان الوحيد المؤهل لدا كان المصطفى صلى الله عليه وسلم تسليما

تحياتى على البوست يا ابله رشا وهاتبع

لورنس العرب يقول...

""واعتزاز سيدنا على بنفسه بيخلينى اعتقد انه شايف نفسه
يستحق الخلافة لكن مش هو الشخص اللى يسعى ليها ""

الكلام ده خطير يا رشا
وللسبب ده انا قلت لك على الفيس بوك ان الواحد يقرأ التاريخ ولا يقول رأيه لأنه لو قال رأيه ممكن يتكلم بكلام فيه خطوره هو في غنى عنها
من أستحق الخلافه هو من تولى بالفعل وكان لك تدريجيا من سيدنا ابا بكر ومن بعده عمر وعثمان رضي الله عنهم أجمعين، ولا يمكن التحدث بالقول بأن سيدنا علي كان الأفضل ويستحق

نقطه اخرى خطيره وهي التحدث عن سيدنا معاويه
لا يمكن القول بأننا معه كصحابي ولكن ضده كسياسي، فالاثنان لا يمكن ان ينفصلا، وسياسيا هو صاحب مثل "شعرة معاويه"
ويكفي أن سينا النبي دعى له قائلا:
«اللهم اجعله هادياً مهدياً واهد به»
وانظر إلى التعليقات واجد واحد يقول أنه لا يحبه!!!!!!!!!!!!!!!!!!!!
عرفتي ليه يا رشا الواحد مش بيحب يتكلم في الامور دي
لأن الناس بيطلع منهم كلام غير معقول

لورنس العرب يقول...

يا سلام يا ميس
ثقافه وألتزام وأدب وكل حاجه في الدنيا
الملاحظه الوحيده اللي واخدها عليكي انتي عرفاها كويس






هههههههههههههههههههه


منه لله البعيد

حفيدة عرابى يقول...

مارو
ازيك ياجميلة
وطومان باى أخباره ايه ؛)
شوفى ياستى
مع انى بحترم دماغ الراجل ده سياسيا جدا
بس لما بسمع حد بيقول عليه مالوش لازمة والحاجات دى مش بحاول ادافع عنه قوى
ليه ؟
علشان ده رأى سياسى عادى يعنى لما نختلف فيه
انا بس بحس ان من الظلم الهجمة ضده واننا نصرف الناس عنه لانه شيعى


لا أنا ولا أى حد عاقل يقبل سب الصحابة وخاصة ابى بكر وعمر والسيدة عائشة
بس اصبى عليا شوية وانا هاوضح وجهة نظرى
ماشى يامارو ؟ :)

جزئية الرسول عليه الصلاة والسلام مهمة جدا
الوحى طبعا
لما بلاقى نفسى معجبة جدا بواحد من الصحابة زى عمر بن الخطاب مثلا وبعدين تتعمقى شويه فى سيرته
تلاقى الجميل فى شخصية عمر جزء بسيط قوى من الجميل فى الرسول عليه الصلاة والسلام

الاستاذ خالد محمد خالد فى مقدمة كتابة
رجال حول الرسول كان عنده فصل جميل قوى اسمه ( النور الذى اتبعوه)


سلامى لولادك والحاج ريتشارد ولولو وعليا ودودو وكل أهالى الاسكندرية الكرام والبحر الله يخليك :)

حفيدة عرابى يقول...

لورنس العرب
أهلا بحضرتك
طيب كده أنا مظلومة والله
لو حضرتك كملت قراءة البوست مع التعليقات هتعرف انى قلت ان رأيى ان ابى بكر الاصلح لتولى الخلافة للاسباب المذكورة فى كتب التاريخ عن سبقه للاسلام وصدقه وحبه وتصديقه للنبى وانه كان مستشاره صلى الله عليه وسلم والصحبة فى الهجرة والسن واختيار النبى ليه امام للمسلمين فى الصلاة وقت مرضه
بالاضافة لده كله هو الاشبه بالنبى فى خلقه وخصاله ورأفته بالناس والمسلمين بعد صدمتهم فى وفاة النبى كانوا محتاجين حد فى رأفته بيهم كنوع حتى من التعويض النفسى مع ان مفيش مجال للمقارنة بين وضع النبى ووضع ابى بكر



وده لا ينفى الفضل للصحابة ومنهم على
ولما أقول انى استنتجت ان سيدنا على بيرى نفسه يستحق الخلافة وعنده اعتزاز بنفسه لكن مش بيسعى ليها
ده مش غلط لاننا بنتكلم عن منصب سياسى
الخلافة فى رأيى منصب سياسى


وده اللى عامل الازمة على فكرة ان المسلمين خلوا الخلافة منصب دينى وسياسى
ورأيى المتواضع ان النبى صلى الله عليه وسلم هو الوحيد الذى يمتلك السلطتين الدينية والسياسية

الخليفة مسئول عن تطبيق الشريعة
تطبيق
يعنى بيجتهد وبيستشير الصحابة بس ممكن يغلط
ده طبيعى جدا وصحى ولو قلنا مش بيغلط
يبقى الغلط عندنا احنا



عارف حضرتك انا بحب جدا سيدنا عمر وصفاته لانى كمان بحب شدته وقوته فى الحق ونفسى فى حاكم زيه
بس تفتكر انى لما قرأت شوية فى سيرته مالقتش حاجة اختلف عليه الناس فيها
لأ طبعا لقيت
والصحابة نفسهم بعضهم لما ابى بكر رشحه للخلافة اعترضوا عليه شخصيا وعلى شدته
وهو كمان فى أول خطبة تكلم عن كده وقال بلغنى ان الناس خافوا شدتى
ووضح لهم سياسته فيهم وانه هيكون شديد فى الحق



لكن هنا أنا سعيدة لسبب تانى ان حضرتك شايف الصديق الافضل والمستحق للخلافة لان ده اللى حصل فعلا
مش هناقش حضرتك فى الجزئية دى بس يبقى الصحابة كلهم مش على نفس الدرجة
ويبقى ابى بكر أفضل من عمر و عمر أفضل من عثمان وعثمان أفضل من على ...صح ؟
وده الرأى اللى أنا سمعته فى القنوات الدينية وماقرأتش فيه نهائى للامانة


هستغل الفرصة أنا وأقولك انى مش قادرة أساوى سياسيا حتى بين موقف على بن ابى طالب وبين موقف معاوية
سياسيا على بن ابى طالب الاحق للخلافة
وهو كمان نال دعاء النبى فى غزوة خيبر
لما الرسول عليه الصلاة والسلام قال فيما معناه لأسلمن الراية غدا لرجل يحبه الله ورسوله ويحب الله ورسوله

ده مثال واحد ...صح ؟
وسياسيا سيدنا على كان فى منتهى الذكاء والدهاء بس هو مكانش بيفضل أساليب معاوية وعمرو بن العاص فى قضية زى رفع المصاحف على أسنة الرماح والسيوف فى غزوة صفين


أقولك حاجة تانية لما النبى صلى الله عليه وسلم قال لعمار بن ياسر
ياعمار تقتلك الفئة الباغية

وفى صفين قتلت عمار جيوش معاوية ومعاوية بذكاؤه قال قتله من أخرجه يقصد سيدنا على


الخلاصة انى مكنتش عايزة ابدا أعمل مفاضلة ابدا فيها جانب دينى بين معاوية وعلى
بس القضية كلها من الاول سياسة تم خلطها بالدين

لكن مازلت مصرة انى مش موافقة ابدا مع احترامى لمعاوية عن تحويل الحكم وراثى

سؤال مهم لو الرسول عليه الصلاة والسلام كان موجود كان ممكن يوافق على الاستغناء عن الشورى بمعناها الحقيقى واستبدالها بالوراثة ؟
والبيعة اجبارية ولمين؟

ليزيد اللى مش هحكى كتب التاريسخ قالت عنه ايه وهكتفى بس بكربلاء


أنا مقدرة جدا لحضرتك حماسك وغيرتك على الدين والصحابة
بس مش مقصود ابدا أى اهانة ليهم
احنا بنتكلم عن رأى سياسى والرأى السياسى بسيط قوى ومن حقنا نختلف معاه فيه والوحيد اللى مينفعش نناقش سنته هو الرسول عليه الصلاة والسلام


رأى حضرتك عنى أنا أعتز بيه جدا مع انى مصرة ان حضرتك فى خلال مدة السنتين ونقاشنا الافتراضى تمتلك نفس الصفات وأحسن منها كمان


لولا بس اختلافنا فى حكاية القريب دى :)))
الجملة دى ضحكتنى جدا على فكرة

تحياتى لحضرتك

حفيدة عرابى يقول...

ربنا يكون فى عونك والله والمعلقين فى التعليقات الطويلة ببشاعة دى :$:$

مهندس مصري يقول...

أولاً أتمنى من حضرتك قراءة هذه الدراسة الرائعة للفتنة الكبرى في موقع قصة الإسلام في هذا الرابط
http://www.islamstory.com/%D9%82%D8%B5%D8%A9-%D8%A7%D9%84%D9%81%D8%AA%D9%86%D8%A9/
أو هنا
http://egyptioneng.blogspot.com/2009/12/blog-post_31.html

و هي فعلاً من أروع ما قرأت عن هذه الفترة

و شوفي برضه كتاب العواصم من القواصم
http://www.waqfeya.com/book.php?bid=345

صدقيني حتلاقي أجوبة لحاجات كتيرة محيراكي و حترتاحي و لما تخلصي قرايتهم حأنتظر رأيك في بوست جديد

و بالنسبة لحسن نصر الله فأنا أحب مقاومته و لا أحب عقيدته

حفيدة عرابى يقول...

مهندس مصرى
شكرا جزيلا لحضرتك
أول ماشفت الرابط على الفيس حالا حسيت انه جاى فى وقته بالظبط
شكرا جزيلا
بالنسبة لعقيدة نصر الله محدش بيحبها يافندم
بس هى رغبة فى فهم ليه بقينا سنة وشيعة
وليه بيكرهونا وانعزلوا وانفصلوا عننا كده
وليه تم الخلط بين الدينى والسياسى
وهل لاهل السنة دور فى الغلو الواضح عند الشيعة
أنا أقصد دور أهل السنة سياسيا
بس خلاص
شكرا جزيلا لحضرتك

مهندس مصري يقول...

العفو و ما تنسيش تحملي كتاب العواصم من القواصم و تقرأيه برضه لأنه مهم جداً جداً جداً
:)

ولد تحت الصفر يقول...

معاوية بن أبي سفيان : صحابي جليل ...لا أحبه ... لا أكرهه .. هل أنا آثم أومخطئ في قولي شيئاً كهذا ؟

نفترض جدلاً أنني لا أملك احداثيات عن الشخصية تجعلني قادراً على التحدث عنها - و لم أفعل بالمناسبة ، هل أنا مخطئ ؟!

أنا شخص أحمق غير متمكن من النحو و ينصب المبتدأ و يجر الخبر .. لكن هذا لا يجعل مني الغبي الذي قد يتفوه بكلام قد لا يدري كنهه ( حلوة كنهه دي )

:)

ولد تحت الصفر يقول...
أزال المؤلف هذا التعليق.
ولد تحت الصفر يقول...

الروابط أكثر من رائعة يا بشمهندس

جاية في وقتها فعلاً.. مش وقتها قوي بس طالما عرفت مكانها يبقى جزاك الله كل خير


:)

حفيدة عرابى يقول...

مهندس مصرى
عُلم يافندم وجارى التنفيذ :)

ولد تحت الصفر

اعتقادى ان جملة ما سبب تعليقك والجملة بتتكلم عن كلام غير معقول من وجهة نظر صاحبها
ولو زعلان ياسيدى حقك عليا أنا
لكن انا شفته اختلاف فى وجهات النظر ومفيهوش تجريح
ولو زعلان أنا غلطانة وماتزعلش نفسك

مهندس مصري يقول...

ولد تحت الصفر
=============
أي خدمة يا فندم :)

ولد تحت الصفر يقول...

:)

ياأستاذتي ما انا عارف انهاختلاففي وجهات النظر ، و قدرت ده فعلاً

"أنا مقدرة جدا لحضرتك حماسك وغيرتك على الدين والصحابة
بس مش مقصود ابدا أى اهانة ليهم "

أستاذي لورنس افتكر ان في كلامي اهانة ما .. يمكن ، بس أنا حبيت أوضح .. زرت مدونته و حسيتها من المدونات العالية ذات المقام الرفيع
و تملي اختلاف الرأي لا يفسد للود قضية

تحياتي ، ووردة جميلة لحضراتكم جميعاً

--<@

------------
يا بشمهندس ده من ذوق حضرتك
:)


محمد

شمس النهار يقول...

بالرغم ان دي احداث تاريخيه بس برضوا اتلعب فيها

عارفه انا قريت سلسلة العقاد لاقيتها منطقيه وحياديه وصاغت الاحداث صح

وبالنسبة لأبو بكر رضي الله عنه

مش معقول ان الرسول يصر علي انه هو اللي يؤم المسلمين كده عبث
وخصوصا ان عم رضي الله عنه وعلي رضي الله عنه كانوا موجودين
يعني الرسول قصد ده
وطبعا الحوار مثبت في كل كتب السيرة

ياريت تقري سلسلة العبقريات هتعجبك جدااا

كل سنه وانتي طيبه عام سعيد ان شاء الله

:))

حفيدة عرابى يقول...

مهندس مصرى
لأ شكرا فعلا
الموقع اسلوبه جميل قوى مفيد وممتع

ولد تحت الصفر
طاااااايب :)

شمس هانم
حاضر يافندم نراجع على العبقريات :)
بس أنا مكنتش أقصد ان سيدنا ابى بكر مش أولى بالخلافة
ده أنا قلت بالاضافة لكل الاسباب المذكورة فى كتب التاريخ انا رأيى ان ابو بكر الاولى لقربه من النبى طبعا وخلقا فهيكون بمثابة مسكن نفسى للمسلمين المصدومين بوفاة الرسول عليه الصلاة والسلام
فكرة اضافية بس لكن مش تقليل من شأنه
:)
حضرتك شرفتينى