مش هتكلم

اياك والكلام  عن عمرو خالد 

ده داعية ومضطهد وكان محروم من الدعوة فى بلده

 وجات له فرصة يكلم الناس عن ربنا 

لازم يستغلها

 وخصوصا ان نيته كويسة ومالوش دعوة خالص بالسياسة 

حاضر مش هتكلم 

اوعى تتكلمى عن المناهج وملف الانجاز والتقارير

 ولا عن أى حاجة مطلوب منك تعمليها فى المدرسة


 وبتعطلك عن وظيفتك الاصلية التدريس

لان ده تعلم نشط وتقويم شامل واستراتيجيات جديدة

 وانت دورك ميسر للعملية التعليمية مش مجرد ملقن 

حاضر مش هتكلم 

ماتجيبيش سيرة نصر الله 

لانه شيعى رافضى بتاع ايران الفرس المجوس عبدة النار

 واسمه أصلا عبد اللات

لانصره الله 

ده فتنة ويارب اسرائيل تخلص عليه وتخلصنا منه

 ده أخطر على الاسلام من اسرائيل

لانه عدو خفى وبيتمسح فى الاسلام 

ولو اتكلمتى عنه تبقى زيه وتبقى ضعتى

 وربنا هيحشرك معاه 

حاضر مش هتكلم 

الا الاخوان 

دول مضطهدين والحكومة مبهدلاهم

 لمجرد انهم عايزين الاسلام يبقى هو الحل

 ومرشدهم بيدعو المصريين للصيام

 والدعاء ليهم بالنصر فى الانتخابات

 اللى دخلوها مضطرين ياحرام

 ولازم نشارك احنا كمان فى الانتخابات

 وننتخبهم لانهم ضحوا بنفسهم عشانا

 وداخلين الانتخابات دى بس

 علشان احنا اترجيناهم يرشحوا نفسهم 

حاضر مش هتكلم

لسانك ده ميقولش أى كلمة تخص رأى أو فتوى لرجل دين

 لان لحوم العلماء مسمومة 

حاضر ماأنا أصلا استحالة اتكلم عنهم باستهانة

 وفاهمة انى لازم احترمهم حتى لو مختلفة معاهم

 لشرف العلم اللى بيحملوه بس هما بشر وبيغلطوا 

تبقى كده بتشجعى الناس يستهينوا بيهم 

بس أحيانا بيقولوا حاجات مش ممكن تكون من روح الاسلام 

وأنت ايه فهمك فى الحاجات دى!

فى اراء فقهية تانية عكس كلامهم خالص

 ومتفقة مع روح الدين وسيرة الرسول عليه الصلاة والسلام 

آه مش آراء فلان وفلان وفلان و..

دول مخربين وفكرهم علمانى

 أوعى والمعتزلة

 وماتسمعيش كلام الاشاعرة والتصوف كله فاسد 

والشيعة كلهم كفار

بس هما بيفرضوا مذهبهم فى التفكير

 ومش بيعرضوا الاراء المعتبرة الاخرى 

هما بس اللى صح وكل الفرق التانية فى النار

حاضر مش هتكلم 

كل اللى فات ده كوم والكلام عن  المسيحيين كوم تانى

لان مفيش موضوع يستحق الكلام

احنا طول عمرنا عايشين مع بعض من غير مشاكل وايد واحدة

 وأيام ثورة 1919 كنا بنقول عاش الهلال مع الصليب

وأصلا يعنى الفتنة نائمة ولعن الله من أيقظها 

بس السكوت على المشاكل بيخليها تكبر

 وحلها بيكون مستحيل 

مالكيش دعوة

بس اللى بيحصل ده غلط ولازم نتناقش ونطهر الجروح

 قبل مانضطر نعمل بتر 

ماتتكلميش أنت بس و كل حاجة زى الفل

بس الدولة والكنيسة بيلعبوا لعبة خطر قوى

 والحريقة لو قامت مش هنعرف نطفيها 

اطلعى منها انت بس وبطلى كلام 

طيب أنا عايزة الدولة تقوم بدورها

  وتفهمنا كلنا ان فى سيادة قانون

 وتدى كل واحد حقه ومش هتحصل مشاكل 

اسكتى خالص 
طيب الكنيسة بقالها مدة بتصعد وبتستغل ان الدولة ضعيفة

وليها مصلحة ما عندها

 ده حتى مناصب كبيرة بقت بتتكلم كلام طائفى جدا

 وده مش بيشرخ بس  ده فتت الوحدة الوطنية

انت مالك ومال الكلام ده

ماهو اللى يغلط لازم يعرف انه غلطان ويتحاسب

 وبعدين المسيحى طول النهار بيتكلم عن المواطنة فيما يخص الاسلام بس

 ووقت الجد تلاقيه جرى عمل مظاهرة جوه الكنيسة

 وبقت الكنيسة سلطة دينية وكل شوية بيهددونا بأمريكا

 واهو دلوقت خرجوا بره الكنيسة واشتبكوا مع الدولة 

أنت مالك!!

والدولة كمان بتستعبط وبتسيب الامور تتأزم

 وبعدين تعمل نفسها جاية فى اخر لحظة

 وكده ممكن تتأخر فى مرة

 وتعمل زى البوليس فى الافلام العربى القديمة وهتبقى مشكلة 

ماهو مينفعش بعد العمر ده كله وبقالنا 7000 سنة فى المنطقة دى

ويبقى لسه معندناش دولة ولا لينا حقوق فيها 

ولا عارفين نتكلم معاها كلمة ترضى ربنا 

اسكتى خاااااااااااااااااااااااااااالص 

خلاص سكت

22 التعليقات:



هبة النيـــــل يقول...

لا حول ولا قوة إلا بالله

بس كونهم يسكتوكي أو يحاولوا يسكتوكي إنتِ وكتييييييييييير زيك يا حفيدة عرابي

كإن بالضبط بيشغلوا قنبلة موقوتة وماهماش عارفين وقت الفرقعة امتى.

طيب هنفضل ساكتين لحد امتى؟؟

ماتعرفيش

وفعلا على رايك بيستغلوا "ضعف الدولة"

وحشتيني يا حفيدة عرابي :)

كل سنة وانت بألف صحة وسعادة

احاسيس آيوشه يقول...

وهيفضلوا يسكتوا فيكى على طول واعتقد دا لسببين يمكن اللى بيحاولوا يسكتوا دول لما خايفين والخوف جواهم اتغلغل وعايزين يمشوا جنب الحيط
لما من النوع اللى مش عايز حد يفهم ولا يفكر ولا يشغل دماغه
بلاش تسمعى كلامهم انا ربنا خلقنا لنا عقول علشان نشغلها مش علشان ناس تفكر وتقرر بدلنا

حفيدة عرابى يقول...

هبة النيل
حمد لله على السلامة نورت البلوجر
الف مبروك على الدكتوراه
ربنا يوفقك دايما

هى حكاية القنابل الموقوتة دى ياهبة
علشان لو الكلام طالع أول باول مكنش طلع بالطريقة دى

موضوع الكنيسة والاحداث دى أكيد انا ماقولتش كل اللى عندى
والانصاف يخلينا نقول ان كل طرف ليه بعض الحقوق وعليه أخطاء كتير وقديمة وتراكمها مش هيجيب خير ابدا
ربنا يستر
شرفتينى ياهبة
وماتغيبيش تانى


أحاسيس أيوشة

لأ ماانا قلت شويه وطلعت شوية من المخزون :)
البعض منهم خايف والبعض مش عايز يشغل دماغه
والبعض مقتنع برأيه
وان جيتى للحق كلامهم أحيانا فيه منطق
وممكن قبوله
بس اعتراضى انى اتخنقت من سكوتى
ومن اللى بسمعه لو اتكلمت ومطلوب منى دايما اوافق على حاجات مش راضية عنها
وتلاقى كل فئة من اللى اتكلمت عنهم ليه انصاره اللى مستعدين أصلا يتناقشوا
وربنا يكرمنا نشغل عقلنا :)
تحياتى لك

well يقول...

حلو الحوار ده بس يا ترى ده كان مع نفسك ولا مع مين ..اوعى حد يبلغ عنك
بس هو انتى بجد كنتى عاوزة تتكلمى عن عمرو خالد .. هو عمل حاجة ولا اى

..
السكوت علامة الرضا وسعات علامة عدم الفهم وسعات علامة قلة الحيلة وضعف القوة
.......اممممممممم هو مش ضعف قوة بس هما مفتريين شوية
والله اليومين دول انا حاسس انى مرتاح اصلى ما بتابعش اخبار ...بس بالصدفة كدة شوفت موضوع العمرانية النهاردة ..هى مش العمرانية برضوا ...
( وتفهمنا كلنا ان فى سيادة قانون)..مش لاقيلها قانون ..ده قانونها اللى ماشى غلب قانون الغابة
...اممممممم بصراحة مش عارف اقولك اى فى التعليق بس نصيحة قلبية ماتيتبعيش الاخبار ونصيحة قلبية اسكتى احسن ونصيحة قلبية اسمعى عمرو خالد
وشكرا ....
وتصبحى على خير

حفيدة عرابى يقول...

باشمهندس وليد
الكلام شوية مع نفسى لكن بفكرها من اللى بيتقالى من اكتر من جهة

ماتقلقش :)
مش بسكت
مش بعرف اسكت وسكوتى بيبقى قليل وبرجع تانى اتكلم
لو بطلنا نتكلم نموت
شوف ياسيدى
موضوع عمرو خالد انه بعد تقريبا 8سنين
تم السماح له يمارس الدعوة فى مصر
بس فى مؤسسة بيرأسها المحجوب محافظ الاسكندرية السابق وعضو الوطنى وفى نفس الدايرة اللى نازل فيها مرشح اخوانى
كان نفسى جدا عمرو خالد يعتذر
ولو عايز يرجع للدعوة فى مصر ميبقاش ده تمنها
مش اخرتها يعنى دعاية للحزب الوطنى

مش بعرف ابطل اتابع اخبار
ادع لى :)
تحياتى لك

Haytham Alsayes يقول...

طيب المفروض اتكلم ولا اسكت دلوقت
لا طبعا هاتكلم
كل اللي حضرتك قولتيه كوارث في مصر ولسة كمان الانتخابات والمهازل اللي هتحصل فيها
فعلا بجد ربنا يستر
نخطو خطي حثيثة نحو الفوضى

تحياتي

فاتيما يقول...

لأ

أتكلمى يا فيدووو

هقولك اللى مكتوب فوق صندق تعليقاتك
واكرره

ياعندليب
ماتخافش من غنوتك
قول شكوتك
واحك عن بلوتك
الغنوة
مش هتموتك
انما
كتم الغنا
هو اللى هيموتك


هوه كمان الكلام
هيحرموه علينا ؟!!



وحشتينى

حفيدة عرابى يقول...

أستاذ هيثم السايس
لأ طبعا اتكلم حضرتك براحتك
عندك حق هى كوارث وربنا وحده يسترها ويحمينا من اللى جاى



فاتيما
أنت كمان وحشتينى جدا والله
حاضر :)
ماانا عمالة اتكلم اهو هو انا ببطل :)
حتى لو حرموه هما أحرار
احنا شايفينه حلال

sony2000 يقول...

طيب
وماذا بعد السكووت
هو دا السؤال

شمس النهار يقول...

يعني هو لوسكتي وسكتنا كلنا
المواضيع دي كلها هتتحل

طيب حتي لو اتكلمنا وفضلنا نتكلم ليل نهار

برضوا في حاجه هتتحل

اللي بيقولوا لك اسكتي همه نفسهم المستفدين من السكات

اصلهم عايزين يناموا مش عايزين دوشه

:)))

تامر علي يقول...

انا مبسوط جداً من حضرتك علشان متكلمتيش وعملتي مشاكل زي الناس التانين :))

حفيدة عرابى يقول...

سونى
المهم بالنسبة لهم السكوت
تحياتى لك :)

شمس هانم
يمكن الكلام يمكن يجيب نتيجة
يمكن نتعود على الاعتراض والمناقشة لاسمح الله
حضرتك شرفتينى


أستاذ تامر
أنا على فكرة غلبانة جدا ومش بعمل مشاكل خالص ومش بتكلم أبدا زى ماحضرتك شايف كده :))

مهندس مصري يقول...

كل ده و ساكتة :)
أمال لما تتكلمي ؟
زعلت من عمرو خالد و صدق من نصحه يفكر شوية قبل ما تفتنه الكاميرات

حسن نصر الله لا أتمنى أبداً إنتصار إسرائيل عليه و لكن أدعو له بالهداية و ان يكون جهاده خالصاً لله

الإخوان عملوها و شاركوا و أمرنا لله

و كلٍ يؤخذ من كلامه و يرد إلا الرسول المعصوم صلى الله عليه و سلم فمفيش تعصب للمذاهب في الإسلام الصحيح

بالنسبة لموضوع الكنيسة و الحكومة دوري على كتاب قذائف الحق للشيخ الغزالي الله يرحمه لإن الكتاب ده محظور في مصر لحد دلوقت بس موجود على النت

:)
لا أسكت الله لكي حساً

(ست* جنى* الحسن) يقول...

سلامو عليكو..
برافو عليكى

بالله عليكى لما نسكت عن كل ده امال نتكلم عن ايه؟؟؟؟؟؟؟؟؟؟
الطماطم.اللحمة.السكر
حتى دول دخلو فى السياسة!!!!!!!!

ربنا يرحمنا ويسامحنا ويعذرناويقدر قلة حيلتنا

انى احبك فى الله

re7ab.sale7 يقول...

المفروض انك تسكتي خالص
متتكلميش ولا تقولي رأيك
وان شوفتي الغلط
قولي مشوفتش عشان متجبيش لنفسك المشاكل
امشي جنب الحيط
لاء جوه الحيط
عشان تعرفي تعيشي مكتوم صوتك ومش طالع
بس تفتكري ان هو ده الحل ...؟
تفتكري سكاتك وخوفك هو الحل...؟
ويعني لو خوفتي وعملت زي ما هم عايزين هيسبوكي ف حالك...؟
اجدت الوصف جدا يا حفيدة عرابي
تحياتي لقلمك المبدع

حفيدة عرابى يقول...

مهندس مصرى
ياااااه ياباشمهندس فين حضرتك من زمان

موافقة حضرتك على كلامك وخصوصا رأيك ودعائك لنصر الله
بشوف الكتاب حاضر
شكرا جزيلا يافندم :)


ست ( جنى ) الحسن
وعليكم السلام ورحمة الله وبركاته
لأ ماهى الحقيقة انى فعلا مش بسكت وهما كمان بصراحة بيحاولوا يسكتونى
بس لاية اللحظة دى محدش فينا قادر على التانى
شرفتينى واتمنى تعليقك يكون بداية لتعارف بينا :)


رحاب
لما بسكت شوية بتخنق وبكتئب
ولما بتكلم شوية بتخنق برضه وبكتئب :)
بس يعنى هو الكلام والاندفاع فيه طبعى الاصيل
على اساس يعنى انى لقد خلقنا الله احرارا وكده :$
مش هاكدب عليك البعض عنده وجهة نظر معقولة
بس ماتبقاش على حساب سكوتى انا
شكرا جزيلا يارحاب

مهندس مصري يقول...

الجواز بقى خلى الواحد مش لاقي وقت للإنترنت خالص
:)

re7ab.sale7 يقول...

انا جيت اقولك اني عرفت انك كنت في لقاء المدونين البؤجة
وانا للأسف مروحتش
بس كان نفسي بجد اشوفك
تتعوض ان شاء الله

هبة النيـــــل يقول...

ربنا يبارك فيكِ يا حفيدة عرابي

همّا قالولك ماتتكلميش في مدونتك كمان؟؟

فينك كدا من زمان؟؟

حفيدة عرابى يقول...

مهندس مصرى
لا يافندم مش لازم نت خالص :)

رحاب
أنا اسفة جدا انى اتأخرت عليكِ بس انا شفت التعليق وافتكرتنى رديت عليه:$
انا كمان اتمنى انى اشوفك وتتعوض فى أقرب فرصة ان شاء الله :)

هبة النيل
ازيك يادكتورة أخبارك ايه ؟ :)
لأ هو الحقيقة محدش قالى ماتتكلميش بس بعانى لأ مش بعانى الحقيقة
أنا مستمتعة بادمانى لفيس بوك
بحاول أخطف شوية وقت لهنا لسه مش عارفة
بس انا عندى ارادة وهاجى تانى بسرعة ان شاء الله
بتكلم هنا كتير يادكتورة بس كلام كله سياسة ومشاكل وبحس ساعات ان الناس مش ناقصة خنقة ومش مستحملين نقاش فى حاجة هما عايشينها طول النهار
فبخليها مسودات وخلاص
تسلمى على سؤالك :)

momken يقول...

علمون ان الكلام فى السياسه سيودى بنا الى السجن
وعلمونا ان الكلام فى الحب سيودى بنا الى الخطيئه
وعلمونا ان الكلام ى الدين سيودى بنا الى النار

وماتوا قبل ان يعلمون ان السكون سيقتلنا


تحياتى

حفيدة عرابى يقول...

momken

أهلا بحضرتك
تعليق حضرتك ملهم وشجعنى اتكلم تانى فى موضوع من اللى بسكت قهرا من عدم جدوى مناقشتها
اتمنى ان حضرتك تشرفنى برأيك على البوست التالى
تحياتى لحضرتك