مكرونة بالباشاميل

احنا كنا هنروح فى داهية لكن ربنا ستر
اه والله
أختكم كانت هتاخد حاجة كده بتاع أسبوع خصم
وحرمان خمس سنين من أعمال الامتحانات وبهدلة مالهاش اخر
مقلب محترم جدا اتعمل فينا فى الكنترول من بنى ادم من محبى الاذى للاذى بدون فائدة ممكن تعود عليه من الاذى
يمكن علشان بقاله فترة مش كان السبب فى اذى حد فصعبت عليه نفسه وقرر يتغلب على الظروف ويمارس هوايته الاثيرة فى الاذى
الله أعلم
وشاء الله العلى القدير اننا نكتشف المصيبة اللى كنا هنقع فيها بطريقة فى منتهى البساطة وان البنى ادم المؤذى تضطره ظروف معينة يكتب ورقة رسمية تكون فيها نجاتنا
الكلام ده كان يوم الخميس اللى فات
طبعا اتنرفزت جدا وكادت خطتى المحكمة أن تفشل لو مكانتش فشلت بالفعل
لكن الفرج كان أسرع مما توقعت ويوم السبت كانت كل الامور منتهية
أنا قلت شعب البلوجر هيحس بغيابى ويقول راحت فين والمعتصمين هيزيدوا
وهترتفع أسعار الحلاوة علشان الاصدقاء اللى هيحبوا يجاملوا ويزورونى فى مكانى الجديد
لكن الحمد لله ربنا ستر
عموما الكل أجمع ان البنى المؤذى لا يعرف اليأس وان ضربته التانية بتكون موجعة أكتر من الاولى
فتحسبا لكل هذه الظروف قررت أقولكم علشان تعملوا حسابكم
انى ماليش قوى فى الحلاوة
ولو سيدات التدوين يشوفونى بصوانى المكرونة بالباشاميل حبيبتى يبقى كتر خيرهم
واهو تبقى حاجة تسلينى لو غدة الاذى رجعت تشتغل تانى عند أخينا اياه تانى
بجد أنا مش عارفة هو ليه كده!؟
هى المقالب الشديدة دى ممتعة للدرجة دى!!
وياترى ايه التصرف الامثل للتعامل مع الشخص ده
انا فى الاحوال العادية مش بستحمل اتعامل معاه
لدرجة انى فى فترة مكنتش بصلى جماعة فى المدرسة لانه كان بيصر يصلى بينا امام
والحمد لله لاحظت قبل المصيبة مباشرة انه بيمدح فى جدا وبيشجعنى اكون عضو فى الحزب الوطنى
وبيتكلم عمال على بطال كده عن ان الكنترول هو حبه وحياته وانه يفديه بروحه
انا مش ببالغ على فكرة هو فعلا قال اكتر من كده كمان
وانا مستغربة واقول لنفسى خير يارب فى ايه
عموما ربنا سترها معانا ورد كيده فى نحره
ادعوا لنا يديم ستره علينا
ولو ربنا اراد الابتلاء ماتنسوناش فى المكرونة الله يخليكم

33 التعليقات:



Wanda يقول...

و الله كنت بدور اسال عليكى و اقولك ربنا يكرمك بامك و تكون ديما بصحة
بس لاقيت مفيش تعليقات و قولت ابعت ايميل اقولك قفله التعليقات ليه
ملقتلكيش اميل
و اخر ما كان فى حيلى ارجع بعج شوية و اشوف ايه الموضوع
و الا ابعتلك نداء عندى

بس ممكن بدل الحلاوة شوية عسل :-)))
و بدل العيش بيتى بان ؟؟
اما المكرونة اعذرينى
و الى اقدر اعملة
ادعى ربنا يحميكى و يكيد المؤذين فى نحورهم

tarek momen يقول...

مادام بينك و بين الله عامر
فلا تخشي كيد الكائدين
و علي الباغي تدور الدوائر
تحياتي

لورنس العرب يقول...

ولله انا بقيت بستعجب
هو الواحد هايروح الشغل عشان يشتغل ولا عشان يحارب في الاشكال اللي ما يعلم بها إلا ربنا

لورنس العرب يقول...

لما كنت شغال في مصنع لبن بودره من 6 شهور وبعد ما قعدت فيه 5 سنين جابوا لي واحد دبلوم زراعه وقاللوا لي ده مديرك!!!
كانوا عاوزين يطفشوني بأي طريقه
كان كل يوم يدخل يغلس عليا ويشتم العمال لغايه ما قلعت البالطو وطلعت جريت وراه في المصنع -وانا مدير المصنع وهو مدير الجوده- وهو عنده 46 سنه- وكنت هاقتله لولا اولاد الحلال مسكوني
ولما كنا نصلي جماعه كان بيدخل هو يبقى امام وانا لما كنت بشوف كده الحقيقه كنت بمشي لأني كنت بكرهه
والحمد لله تركت لهم الشغل
وبعدها بشهرين عرفت انهم رفدوه لأنه ادى المهمه اللي كان جاي من اجلها وهي انه يطفشني

سمع هوص (Abo 3li) يقول...

والله مش عارف اقولك ايه... لسه واحد معايا في الشغل سابوه بسبب العااالم المؤذية دووول... حاجة مقرفة بجد...


ربا يحفظك ديما ويبعد عنك كل الشرور...

خواطر شابة يقول...

المؤسف انه في كل مكان تجدين مثل هذه الاصناف من البشر وأنا أكيدة ان كل من علقوا قابلوا نماذج مثله في حياتهم.
لانملك امام شرور امثاله الا الدعاء ان يرد الله كيدهم في نحورهم ويحفظنا من شرهم
دمت بكل ود

ňįĝŗő يقول...

الزمبئة و دق الأسافين و فقع المهاميز أولى خطوات الطامحين المتسلقين السائرين في الطريق السريع نحو المقدمة
و لهذا
أدعي ربنا إنه يبعدك و إيانا عن طريقهم و يكفيكِ و إيانا شر هؤلاء الطامحين الغر الميامين

ثم إن أنا عندي سؤال
هو ليه الكلام مخيّش كده في بعضه
ده أنا كنت بأسلّك كل سطر من أخوه علشان أعرف أقرا


سلامـُه عليكم

حفيدة عرابى يقول...

واندتى
اللهم امين
متأكدة انك حنينة ياحبيبتى
وعارفة انك ممكن تعملى نداء على مدونتك
وأى حاجة مقبولة منك ياحبيبتى
مش مشكلة المكرونة
ممكن لو كلمت ندى تعملهالى مش هتتأخر:)

حفيدة عرابى يقول...

استاذ طارق مؤمن
يارب يكون اللى بينى وبين ربنا عامر
تحياتى لحضرتك

حفيدة عرابى يقول...

لورنس العرب
أهلا بحضرتك
التعليق لمس حاجات كتير قوى
اولا جزئية احنا بنروح الشغل علشان نشتغل ولا علشان نحارب الاشكال اللى مايعلم بيها الا ربنا
فعلا والله لو على الشغل بس الواحد يستحمل
لكن تحس ان الناس متعمدة تعطلك وتزهقك وانك بتحارب طواحين هوا


موضوع الصلاة ده انا هاعمل بحث عنه لانى بجد مش بحب أصلى وراه
والاراء اللى سمعتها مش متأكدة منها



موضوع جريت وراه والناس انقذوه منك
مغرى بشكل لا تتخيله:)
تحياتى لحضرتك

حفيدة عرابى يقول...

ابو على
اهلا بحضرتك
لا سابه مين احنا فى حكومة
انا بتصعب على نفسى ان حد يزهقنى من مكان
انا أمشى لما المكان يكون مش مناسب لظروفى الشخصية
وانا من ساعة مااتعينت من 7000 سنة ماغيرتش المدرسة
تحياتى لحضرتك:)

حفيدة عرابى يقول...

خواطر شابة
اهلا بحضرتك
انا قلبى لسه بينغبش:)
هما موجودين للاسف فى كل مكان
الحمد لله اننا طلعنا لقينا أهالينا مش كده
جزاك الله خيرا على دعائك
اللهم امين
تحياتى لك

حفيدة عرابى يقول...

باشمهندس نيجرو

تعبيراتك جميلة ومعبرة
زمبئة ومهاميز وأسافين
لكن المشكلة ان مفيش مقدمة يوصلها الطامحين
يعنى مش هيوصلوا لحاجة
عارف لو فى استفادة من الاذى كنت فهمت هما بيعملوا كده ليه
لكن احنا شغالين فى التربية والتعليم
وفى مدرسة مش الادارة
وهو مدرس مادة غيرنا
ومش عايز يكون مكاننا فى الكنترول
مش هيوصل لحاجة لان طريقنا مسدود ياولدى
هيبقى ايه لما احنا نروح فى داهية؟
ولا حاجة
ده زمايلنا لما حد فيهم بيحب يضايق التانى يقوله يامدرس
هيترقى المدرس يبقى ايه مثلا؟


بالنسبة للخط سيادتك
دى مش اول شكوى
وده مش أول نداء أوجهه عبر مدونتى الحبيبة

انا شايفة الخط عادى جدا
لكن من كمبيوترات صديقة شفته مرة بشع جدا
رجاء التكرم بتوضيح الخلل بدقة
وعرض الحلول المتاحة
لانى عبقرية فى أى حاجة تخص الكمبيوتر

وتفضلوا بقبول فائق الاحترام

تحياتى لحضرتك

د. ياسر عمر عبد الفتاح يقول...

أنا مش شايف البوست
الكلام كله داخل في بعضه

حفيدة عرابى يقول...

د/ ياسر
أهلا بحضرتك
أنا غيرت القالب يمكن المشكلة تتحل
لانى مش فاهمة ايه السبب بصراحة
شكرا لحضرتك على الزيارة والتوضيح

ňįĝŗő يقول...

التاريخ : 26 / 05 / 2010

سعادة/ حفيدة هانم عرابي الموقّرة
رئيس تحرير مدونة لقد خلقنا الله أحرار

السلام عليكم و رحمته تعالى و بركاته
تحية طيبة و بعد ،،،

الموضوع : تداخل أسطر المواضيع المكتوبة بالمدونة

يسعدنا أنا نتقدم إليكم بخالص تحياتنا و صادق تمانينا بدوام التوفيق و السداد . بالإشارة للموضوع أعلاه نرجو من سيادتكم فقط إخبارنا عن كيفية كتابتكم لمواضيعكم بالمدونة ؛ بمعنى هل مثلا تكتبونها أولا في برنامج الوورد ثم تنقلونها بطريقة القص و اللصق بداخل صندوق الكتابة ببلوجر أم تكتبونها مباشرة بصندوق الكتابة ببلوجر أم غير ذلك .

شاكرين حسن تعاونكم معنا
و تفضلوا بقبول فائق الإحترام و التقدير

محمد النجار
واحد كده

حفيدة عرابى يقول...

محافظة القاهرة
ادارة مدونة لقد خلقنا الله احرارا

السيد الاستاذ المهندس الدكتور الوزير/ محمد النجار اللى مش واحد كده

تحية طيبة وبعد


يسر ادارة المدونة ان تقدم جزيل الشكر لسيادتكم على ما أبديتموه من اهتمام فى اصلاح الخلل بالمدونة المذكوره عاليه
هذا والمدونة تحيط سيادتكم علما بأن التدوينات الاخيرة كتبت فى ملفات وورد أولا
مع رجاء التوضيح هل المشكلة مازالت موجوده فى القالب الحالى أم لا

ولا أراكم الله مكروها فى تنسيق مدونة لديكم
وتفضلوا بقبول فائق الاحترام

مقدمته لسيادتكم
حفيدة عرابى
(خوجه)

ňįĝŗő يقول...

طبعا المشكلة لسه زي ما هي لأنها ملهاش علاقة بتاتا بقالب المدونة
بتقولي إنك كتبتي التدوينات الأخيرة في ملف وورد الأول و بعدين كوبي و بيست على بلوجر
بالتحديد يعني آخر تدوينتين .. صح ؟
ماتعمليش الحركة دي تاني
انك تكتبي في الوورد و بعد كده قص و لصق في بلوجر
لأنك لو عملتي إيه هتظهر المشكلة دي كده كده
فالأفضل و الأحسن انك تكتبي في بلوجر علطول
بس خلاص


سلامـًـه عليكم

حفيدة عرابى يقول...

باشمهندس نيجرو
شكرا جزيلا على النصيحة
معلش صدعتك
جزاك الله خيرا

osama44 اسامه 44 يقول...

بجد ربنا يهدي عليكم
الاشكال دى بشوفها كتيير فى البشر

وربنا يسترها معاكى
تحياتى

حفيدة عرابى يقول...

اسامة
حمدا لله على السلامة
فينك من زمان مختفى ليه؟
شفت وليد قلقنا عليك ازاى

شكرا جزيلا على الدعاء

Haytham Alsayes يقول...

ينهار ابيض

الحمد لله ربنا ستر
ربنا يسترها مع الغلبان دايما واكيد حضرتك نيتك طيبة بس نقول ايه للناس المؤذية ولو الواحد اتكلم ممكن نقعد للصبح بس انا شفت الحزب الوطني في البوست عرفت ان في اذي بقيت اكره كلمة حزب وكلمة وطني
دة انا حتي لما كنت بشرح للعيال الحزب الوطني بتاع مصطفي كامل بلاقيهم يعلقوا تعليقات علي قبيل ييييييييه هو ورانا ورانا
من الواضح ان المؤذى دة عضو فيه لو كدة يبقي اعوذ بالله بجد

ربنا ستر وخدي بالك كويس

دمتي مطمئنة

مهندس مصري يقول...

حصلت لي قبل كده
كنت كاتب موضوع عن الشغل و منتقد رئيس قطاع في شركة الكهرباء اللي كنت شغال فيها
و يشاء ربنا يلطش في المدونة مهندس من الشركة شغال رئيس قسم في تخصص بعيد خالص عني بس حب يكسب بنط عند رئيس القطاع فطبع البوست و قدمه له و الراجل عمل ضدي مذكرة لرئيس مجلس الإدارة و كنت حأتجازى جزا شديد لولا المدير العام بتاعي لم الموضوع قبل ما يوصل لرئيس مجلس الإدارة
و المهم إني ما كتبتش أسماء في الموضوع خالص و كان كلامي كله صح بس حب الأذية عند بعض الناس بتحسي إنه بيكون شهوة طاغية

ربنا ينجيكي من كل شر و يبعد عنك أسافين الزملاء الخبثاء

ده لينك موضوعات رجل الحمار اللي كان موضوعي عن المديرين فيها سبب المشكلة
http://egyptioneng.blogspot.com/search/label/%D8%B1%D8%AC%D9%84%20%D8%A7%D9%84%D8%AD%D9%85%D8%A7%D8%B1

حفيدة عرابى يقول...

استاذ هيثم السايس
أهلا بحضرتك
ربنا يكفينا شرورهم
لكن فعلا هو عرض على انضم للحزب الوطنى مع انه حريص يعرفنا انه وفدى
وزى ماحضرتك قلت باكون حريصة افصل فى اذهان البنات بين حزب مصطفى كامل
وهمنا الحالى

تحياتى لحضرتك

حفيدة عرابى يقول...

مهندس مصرى
أهلا بحضرتك
بعد التدقيق فى كلامك حسيت ان المؤذى زميلك كان ليه غرض حتى لو تافه فى نظرنا انه يكسب رضا المدير
لكن اللى خانقنى ان زميلنا مش هيستفيد اى استفادة غير متعة الاذى
الحمد لله الذى حرمنا منها

ربنا يديم ستره علينا

تحياتى لحضرتك

بدراوى يقول...

ازى حضرتك
ربنا يحميكى من هواة المقالب و الأ

بدراوى يقول...

قصدى

و الأذى

و ياريت حضرتك متزعليش منى
عشان انا مش بسأل

و شكراً لتعليقك وسؤالك الدائم عنى

ولد تحت الصفر يقول...

أنا طلعت ناصح و قرأت الموضوع في صفحة التعليقات

بس يا ريت تعدليه و تصغري الخط ... أو أسهل لك تنسخي البوست في برنامج ال Notebad .. و ترجعيه هنا تاني على الأقل شكله يتعدل

---------



أنا قلت دي هتحكيلنا ايه اللي حصل ... و ان الموضوع له علاقة بالمكرونة بالبشاميل ..


ان شاء الله -" من حفر حفرة لأخيه وقع فيها " - هيقع اللي ما يتسمى دع على جدور رقبته .... و هيوفر علينا الحلاوة و المكرونة بالبشاميل


نصيحة أخوية ... أكل المكرونة الكثير بيضر
طلب أخوي ... اعملي حسابي في صينية أو اتنين

:)

يا رب ما تقعي في مأزق تاني

ولد تحت الصفر يقول...

الزمبئة و دق الأسافين و فقع المهاميز ؟


هي ايه ترجمة الكلمتين دول ؟

حفيدة عرابى يقول...

بدراوى
اهلا بحضرتك
مش انت زى اخويا الصغير
انا كنت عايزة اطمن عليك بس
خصوصا انك غايب عن مدونتك بقالك فترة
ولما عرفت انك حضرت اللقاء اطمنت الحمد لله
لا تطل الغياب أخى :)

حفيدة عرابى يقول...

ولد تحت الصفر
أهلا بحضرتك
بص ياولد تحت الصفر يااخويا الحكاية ومافيها انى خفت تزهقوا وتقولوا احنا مالنا بتفاصيل الشغل
لكن مادام فكرتنى انا هاحكى ايه اللى حصل
بس مش دلوقت لانى راجعة من تصحيح الاعدادية مش شايفة حاجة قدامى



اما المكرونة بالباشاميل
حاضر من عنيا اشوفك بصينية ولا اتنين دى حبيبتى


المدونة انا هتجنن لانى مش فاهمة اولا
ولانى شايفة الخط عادى جدا ثانيا

ليه انا بشوفه عادى مش عارفة
بالعكس انا صغرته كمان

وبعدين ناس كتير بتكتب فى ملفات وورد
ومش بيحصل عندهم كده وانا كتبت فى الوورد لان البلوجر ساعات بيبقى بايخ وبيضيع كل الكلام بعد كتابته


الخلاصة يبقى الوضع كما هو عليه
حتى التدوينة الجديدة



الزمبئة والمهاميز والاسافين دى مصطلحات استخدمها الباشمهندس نيجرو
تعبر بدقة عن فعل الاذى للاذى

لكن حقيقى انا كنت اول مرة اسمع مصطلح زمبئة
الواحد بيزيد خبرات كتير من أصدقاء التدوين :)



تحياتى لحضرتك

أليس في بلاد العجائب يقول...

السلام عليكم ورحمة الله وبركاته

هو واضح ان كلنا في الهوا سوا
ايا كان المجال
هتلاقي المؤذي الذي يستمتع بالأذي

:) بس ان ربك لبالمرصاد :)

فكرتيني بزمان ودلوقتي و دائما وابدا
اصلي عندي واحد من هذا الصنف الذي لا يخلو مكان عمل ولا عمارة ولا منطقة من امثاله

هو طبع بجد
دي بعد 9 سنين شغل والراجل دا قدام عنيا
بجد هو طبع

الأذية دي كيف
بيتكيف لما يعمل مصيبة لحد
ولا يطلع واحد غلطان في حاجة و يدور يفضحه
اصل اللي عندي بعيد عنك كان سنين و سنين المراجع الوحيد في الشركة
بس يشاء السميع العليم انهم يجيبوا فوق ادارة كاملة من 3 سنين
ما شاء الله ما جمع الا اما وفق صحيح و فيهم اشباهه
بس هو متفوق علي نفسه دائما بردة
يعز الاذية زي عنيه
سماوي بدرجة امتياز - ربنا يهديه ويعافينا جميعا

بس بجد ربنا دايما بينصر المظلوم
و ثقي انك هيتجبر خاطرك لو في يوم اتاخد منك حقك غصب

خليكي مع الله و ربنا لن يضيعك
وان شاء الله منصورة مجبورة الخاطر

تسلمي علي سؤالك علي :)
عندي عنب انا
علشان كده مش بلحق لا اقرا ولا اكتب ولا حتي انام زي الناس
بس هانت ان شاء الله
كلها شهر و يعدي
:) ربنا يطمنا عليكي و يسمعنا منك عنك كل خير ان شاء الله

-----

انا معرفش صح اني ارفض الجماعة علشان في حد في الصلاة دي مش بحبه او في بينه وبينه حاجة ولا لا
بس حصلتلي بس مكنتش برفض
كنت بدعي ربنا ينزع اي حاجة وحشة من قلوب المصليين علشان يتحقق غرض الجماعة في جمع الناس علي قلب واحد متجهة لله
بس مكنتش ببقي مرتاحة في الجو دا .. بس مقدرش ارفض الجماعة بردة :(

ربنا يصلح احوالنا ان شاء الله

حفيدة عرابى يقول...

أليس
وعليكم السلام ورحمة الله وبركاته
شكرا جزيلا على دعواتك وتشجيعك وأمنياتك الطيبة
وربنا يبعد عنا شرور من يتمتعون بالاذى


انت عندك حق
كتير من زمايلى قالوا لى انت غلطانة
ماتحرميش نفسك من ثواب صلاة الجماعة
لكن انا كنت بحتج ان الهدف من صلاة الجماعة مش هيتحقق بالطريقة دى
يعنى ايه أصلى ورا امام وانا شايفة انه بيؤذينى وغيرى وانه لا يستحقها
ماكده هتخلص الصلاة وانا الشيطان ماسك دماغى وعمال يفكرنى بكل تصرفاته
هو ساعات لما الوقت يعدى بنسى شوية
لكن هو بيرجع بتصرفاته يفكرنى تانى

مش عارفة بجد الصح ايه
ربنا يهدينا للخير


اسفة على التأخير فى الرد لكن 5 ايام الكمبيوتر عطلان وبعدين كنت مشغولة جدا
سامحينى :)

تحياتى لك