من وحى زيارة الوزير

أنا معلم دراسات اجتماعية اعدادى
معلومة ليست جديدة....!
أزعم أنى وعدد كبير من زملائى قد حبانا الله بضمير يقظ
نقصر أحيانا فى مهام وظيفتنا ولا نجرؤ على اعتبار أنفسنا قد أتممنا أعمالنا كما نرجو لها
ودائما فى مخيلتنا تصرفات مدرسينا معنا طوال مراحل دراستنا ونستشعر دائما الفارق
الكبير بيننا وبينهم
زار وزيرنا الهمام احدى المدارس وكانت تلك الزيارة مادة خصبة للحديث طوال المدةالسابقة
الكثير من أولياء الامور والمهتمين بشئون هذا البلد
اعتبروا أن هذه الزيارة بداية لاصلاح حال التعليم
ولكننا لانعتقد أن هناك نية صادقة وحقيقية لاصلاح التعليم فى مصر
لانه لو توفرات هذه النية فخطوات الاصلاح ليست معجزة
لفت نظرى تأييد كثير من المواطنين و أولياء الامور خاصة للوزير لدرجة ان البعض طالب بجلدالمعلمين
مع انى أعرف أن الجلد كعقوبة شرعية يكون على أمور لم يرتكبها أى من مدرسى
( المزبلة)على حد وصف الوزير
احساسنا بالاحباط دفعنى رغم رفضى للفكرة فى البداية ان أحاول الدفاع عن ماتبقى من
كرامة لنا بعد الزيارة الغير الميمونة
لذا كان الاتى
نعمل بالتعليم فى ظروف محبطة
(1) منهج
أتحدى السادة واضعيه أن يقوموا بالانتهاء من تدريسه فى المواعيد المحددة بطريقة يبتغون
بها وجه الله
أنا أتحدث عن منهج الدراسات الاجتماعية لصفوف المرحلة الاعدادية
أى مدرس مهما كان سنه أو كانت خبرته يخبرنى أنه انتهى منه حسب التعليمات
أعلم مباشرة أنه من أنصار فعل ( الكروته )
بدون مبالغة الشهر الاخير فى كل فصل دراسى انتحار
حصص متصلة
وارهاق لا يوصف
وحنجرة تعاند كى لا تصبح رجالية فى تلك الفترة من العام
ودعوات حارة لنا من مدرسى الاقتصاد المنزلى والتربية الفنية والتربية الرياضية عندما
نستأذن منهم حصصهم لاكمال منهجنا
وأيضا مدرسى المواد الاخرى الذين يخافون من طاقة الحقد بداخلنا عندما يتخيرون سويا
الميعاد المناسب والقانونى للانتهاء من الاستاذ المبجل المنهج ويعرضون علينا حصصهم
لكى ننال نحن أيضا شرف الانتهاء منه(لانهم زهقوا من العيال)
لاحظوا أننى لم أتحدث عن محتوى هذا المنهج
وعن كم الغباء الذى يعترىه و واضعيه أحيانا
لان الانصاف يقتضى اعترافنا بتميزهم أحيانا أخرى
(2) نظام امتحانات
مهما تحدث الخبراء
امتحانات مصر فى المرحلة الاعدادية تركز على الحفظ والاستظهار
حتى الاسئلة التى تتطلب اجابتها مستويات عليا من التفكير
تكمن مهارة المدرس فى تدريب الطالبات على اسلوب اجابة الاسئلة
وان الكلمة الفلانية لو جاءت فى سؤال
تكون الاجابة كالاتى
ومن منا لم يضطر الى فعل ذلك أحيانا كثيرة
ثم تدخل الطالبة الامتحان
مهازل من الغش المقنن والمنظم والشرعى
أدعى اننى منذ فترة طويلة قد أقسمت الا أسمح به فى اللجان سيئة الحظ التى أدخلها
ومن أسباب تمسكى بالكنترول فى المدرسة رغم انه مكان لا تسكنه الملائكة رغبتى فى
البعد عن اللجان
ودائما أدعو الله ان التحق بالكنترول الداخلى فى أى لجنة خارجية ننتدب للملاحظة فيها
لنفس السبب
الغش وصل لمرحلة ان الطلاب قد امتنعوا عن ابتكار أساليب جديدة للغش
بل جاءوا الى اللجان وهم ينتظرون من المدرس أن يقوم بواجبه فى نقل الاجابات لهم
بعد الامتحان تكون أعمال الكنترول الخاصة بالرصد ومراجعته والرفع
وهنا لنا وقفة مهمة جدا
مطلوب منا كل عام نسبة ما لنتيجة المدرسة والا لن تعتمدالنتيجة من الادارة
نغير النسبة بالرفع طبعا ونعيد النتيجة الى الادارة
فتعود الينا مرة أخرى مع تهديدات عظيمة ان السيد فلان والسيد فلان اصروا ان تكون نسبة
مدارس الادارة هذا العام كذا
أرجوكم لا تطلبوا منى الاعتراض
لانى اعترضت وكثيرا ووضحت ان هذا لا يمكن تسميته الا بالتهريج
(واننا نقفل الكنترول ونروح نقعد فى بيوتنا ومش لازم التعب اللى تعبناه على الفاضى
كل هذا قلته أو فعلته)
طيب والله هقولكم على حاجة
مرة فى الدور التانى فى اخر يوم فى الامتحانات كان عندنا 300 طالبة فى الدور التانى
يعنى تقريبا مدرسة صغننة كده
واوراق امتحان اخر مادة مازالت بتصحح
عارفين حضراتكم كان ناجح معانا كام
7 طالبات
بالظبط كده
أنا كتبت الرقم صح
7 طالبات نجحوا بما يرضى الله
لا
انا مش هقولكم فى النهاية نجح كام
سأترك الاجابة لخيالكم
لكن القرار النهائى ليس قرارى وليس مسئوليتى
وأحمد الله كثيرا انه ليس قرارى حتى لا أضطر الى تحمل تبعاته أمام الله سبحانه
وتكون النتيجة المنطقية نجاح طالبات لا تستطيع الكتابة
فى سنة ما كنت اشرح بمنتهى الاخلاص والانفعال أسباب الازمة المالية فى عهد اسماعيل
للصف الثالث الاعدادى
تعرفون الشعور بالرضا عن النفس ؟
تعرفون الشعور بالتميز؟
وانك هنا قد أديت عملا عظيما
شرحت
وربطت المنهج بالاحداث الجارية
ووضحت
وأعدت الشرح مرات
ورجوتهم أن يوجهوا لك أسئلة
وعندما جاء دورك أنت فى توجيه الاسئلة صدمت من طالبة لم تفقه شىء
رغم المجهود الذى اعتبرته أنت مرضيا
ثم انتهت الحصة وبعدها مباشرة مهمة أخرى
مطلوب منى متابعة الطالبات أثناء كتابة الاستمارات
وفوجئت ان الطالبة المسئولة عن شعورى بالاحباط
لا تستطيع ان تكتب اسم المدرسة صحيحا
وهى فى الصف الثالث الاعدادى وباقية للاعادة أيضا
بمعنى انها قضت فى المدرسة اربع سنوات لم تتعلم فيهم كيف تكتب اسم المدرسة
بمنتهى الحزن اعتذرت لها على تعجبى من عدم استطاعتها الاجابة عن سؤال الازمة المالية
فى عهد اسماعيل
لانه سؤال فى غير وقته ولا ظروفه ولا محله
(3) متابعات
لو من الادارة أستطيع القول بمنتهى البساطة انها تتمتع بغباء لا نظير له
الناس دى حافظه مش فاهمه
لو اكرمنا حظنا بمتابع بيفهم من الادارة اتخيل أحيانا انه لابد سيعاقب على مايتمتع به من
فهم لطبيعة عمله
نعلم جميعا ان بعض الاعمال الروتينية مهمة جدا ومفيدة لتنظيم العمل وامكانية متابعته
وتقويمه
لكن اختراع اجراءات روتينية جديدة لتكبيلنا شىء غير انسانى بالمرة
متابعين الوزارة فى السابق لانى لم أجربهم حاليا ( اللهم اكفنا شرهم )
كانوا أحسن حالا بكثير
وأكثر تخصصا وفهما
واستفدنا منهم على المستوى المهنى كثيرا
أذكر ان أحدهم كان يشبه البرادعى وحدث موقف بيننا كان موترا لى بشدة
لكنى أشهد انه كان رجلا فاضلا استفدت منه مهنيا واداريا الكثير
(4)
لن أتحدث عن الدفاتر والملفات وملف الانجاز والتعلم النشط والتقويم الشامل لانها
موضوعات مكررة
ولن أتحدث عن المستوى المادى للمعلم
لانى متأكدة انكم تعلمون
ان مرتب الحكومة فى بلدنا مبيأكلش عيش
تبقى بعض الاسئلة
هل معلمى مصر حاليا ليس لديهم ضمير؟
نعم
الاغلبية لاتعرف معنى الضمير من الاساس
لدرجة اننا نتخيل ان كل من ترتبط بمدرس لابد أنها قد تحرت كثيرا وكثيرا لتتأكد أن
ماله سيكون حلالا
هل المدارس أصبحت مجرد مكان شرعى للقاء غير الشرعى بين المدرس والطالب للاتفاق
على الدرس الخصوصى؟
نعم
الغالبية العظمى من المدارس تحولت لهذا الشكل
لكن مدرستى
مش دايما الحقيقة
برغم الكثير من السلبيات لكننا نعتبر من المدارس (الخنقة )
التى يهرب منها المدرسين لان فيها شرح فى الفصل
لاحظوا اننا نعتبر الشرح فى الفصل انجاز وقربى الى الله ونتيه به على غيرنا لانى اعترف
أنه أصبح نادرا
هل الخوف والرعب من زيارة الوزير أصلح من عيوب مدرستنا؟
أصلح بعض الاشياء الظاهرية
(لكن اللى بيشتغل بيشتغل واللى بيستعبط مستمر على حاله)
هل يتوقع فى الايام المقبلة ان تنمى زيارات الوزير الهمام ومتابعيه الضمير لدى المحرومين
منه؟
أنا أعرف الاجابة
استحالة
لذا كانت هذه بعض اسباب اعتراضى على العرض المميز للوزير
لان النتيجة فى النهاية صدقونى
صفر لن يتغير شىء
النقطة الاهم فى كل ماسبق
الا توجد صلاحيات محددة للوزير؟
اليس كل فعل اهمال وتقصير له عقوبة محددة تخص فاعله؟
هل من العدل ان يتخيل مسئول ما انه يمتلك صلاحيات الهية تمكنه من نقل طاقم مدرسة
بالكامل
من خلال مكالمة تليفون
هل عدد عمال النظافة كافى فى المدارس؟
هل مستوى الالتزام والانضباط والاهتمام بالنظافة فى مدارس البنات يساوى مثيله فى
مدارس البنين؟
هل أولياء الامور الحزانى على حال التعليم اهتموا فقط بتربية ابنائهم
هل تهتم لجان المتابعة التى يفخر الوزير انه أطلقها فى وجوهنا
بأى شىء جوهرى وحقيقى وهام فى العملية التعليمية
الهاجس الاساسى لدينا عند تشريف المتابعات
(ياترى هما عايزين ايه)
(أو هيكدرونا ليه المرة دى)
اليست الادارة التعليمية التابعة لها المدرسة المنكوبة مسئولة بصورة حتى ولو جزئية عن
حال المزبلة التى زارها الوزير
الوزير حسين كامل بهاء الدين
زار ادارتنا ورأيته أنا بالصدفة فى الشارع
وطبعا وصلت للخبر للمديرة والزملاء قبل ميعاد المدرسة وشكرونى كثيرا فى الحقيقة:)
واستمر الامر فترة طويلة حتى تهدأ الادارة بالكامل وحتى تنسى المديرة ان تأتى بى لاحكى
لكل زائر للمدرسة ظروف رؤيتى للوزير
(يارب لا أرغب فى رؤية المارشال)
لكن بعد الزيارة عاد الامر الى سابق عهده ولم يتغير شىء
وهنا أسئلة اخرى
هل من حق أى انسان توجيه الاهانات والسخرية من انسان أخر حتى ولو كان مقصرا فى
عمله
هل من حق أى مسئول ايا كان منصبه ان يتخذ قرارات تخص مستقبل وحياة وكرامة بشر
يعملون فى وزارته دون تحقيق
حتى لو كانوا يعملون فى مزبلة
فى حديث الوزير للعاشرة مساء عندما اكتشف تلاعب البعض فى مركز تطوير المناهج
نقلهم لوظائف عادية
هل اخطاء (مدرسى المزبلة) كانت أكثر خطرا من أخطاء هؤلاء الذين تحايلوا واستغلوا
مناصبهم للتكسب غير المشروع
الم يكن من الافضل توجيه طاقات الوزارة لبناء مدارس جديدة تقلل من كثافة الفصول
وتلغى نظام الفترات
أو تطوير المناهج
أو لزيادة مرتبات المعلمين
أو تطوير نظم الامتحانات
أو حتى رفع المستوى المعيشى للبشر الذين يقطنون مصر
ليتمكنوا من توفير غذاء متوازن لابنائهم يمنحهم الفرصة للتركيز واستيعاب المناهج الرائعة
انها بعض الاسئلة
وشرح لبعض الظروف
وتقدير لكل رأى ناقم على طائفة من المعلمين
و(فرحان فيهم)
ولكنى وكثير من زملائى لسنا منهم

31 التعليقات:



لورنس العرب يقول...

كانت أختي بتحكي لي انها وهي بتصحح في الثانوي التجاري بيكون مع المدرسين قلم أزرق مع الاحمر عشان يكتبوا للعيال ويعدوا السنه
لأن النتيجه لو طلعت وحشه يبقى ده دليل على سوء مستوى الاداره والمدرسه - يعني المدرسين مش شايفين شغلهم صح
ونظام الامتحانات طول عمره بنفس الطريقه
انا فاكر لما كنت في الاعداديه كنت بحفظ زي الحمار
أي حاجه تجيبيهالي كنت بحفظها
وجبت في الدراسات الاجتماعيه 57 من 60
الحاجه الوحيده اللي كان بيبقى فيها تفكير (شويه) هو سؤال "ماذا يحدث لو"، وكان بيعطيك التخيل لو ان مثلا عرابي لم يقوم بثورة 19، وغيره، وانتي طبعا عارفه النوعيه دي من الاسئله
لكن بعدها بفتره طلعت الكتب الخارجيه وكان سؤال ماذا يحدث لو- منتشر جدا بالاجابه النموذجيه اللي لمفروض انك تحفظها وتكتبها، مع انه كان سؤال حلو فيه تفكير واحيانا ابداع
ولما دخلت كلية العلوم -ودي كليه عمليه- كان عندنا ماده اسمها كيميا حيويه
كان الامتحان معروف- السؤال الاول تكتب الباب الاول- السؤال الثاني تكتب الباب الثاني- السؤال الثالث تكتب الباب الثالث
وكنا بنبدأ نحل قبل ما تيجي ورقة الامتحان
موضوع التقويم مش مشكله اعدادي بس ولكنها مشكله البلد بالكامل في جميع مراحل التعليم بجميع الكليات وجميع المستويات

well يقول...

انتى عندك ضمير حى ...فى حياتى قبلت كتير عندهم ضمير من المدرسين ...لكن الاكثر ..كان شايف نفسه هو الاحسن هو اللى فاهم الدنيا ماشية ازاى هو اللى يعرف امتى يهرج وامتى يكون جد هو ..صانع ..من صناع المشاكل
يعنى اى زيارة ...زيارة قصيرة...كل اللى يهمه الشكليات ولكن المضمون لا يهم ...اساسا هو لا يفهم ما هو المضمون

(ربى ذدنى علما)
(كان ناجح معانا كام 7 )اكبر مشكلة اننا مابنعترفش بالحقيقة ...لو كنا واجههنا نفسنا بالحقيقة كان حالنا اتعدل من زمان
تحياتى

حفيدة عرابى يقول...

لورنس العرب
أهلا بحضرتك
الله يكرمك
طيب ماانا كده مش بحكى حاجات غريبة
فعلا فى قلم ازرق
لكن بعد امتحان اعدادية واحد استخدموا فيه معانا الاسلوب ده
تحايلت على الموقف وضايقت نفسى
واخترت سؤال بايخ والطالب الراسب
استحالة يكتب فيه كلمة
علشان اقولهم الورقة فاضية مقدرش ارفع
ولما عدت سنين بقينا نعمل نفسنا مش واخدين بالنا
والموجه لو تعبان قوى وعايز ينفذ التعليمات الشفوية يتفضل يرفع هو




الحفظ
وما ادراك ما الحفظ
كنا فى الكلية بندعى ربنا ان الوقت يكفى اننا نكتب المطلوب
وكنت بحفظ تمام
انا مش ناسية سؤال فى سنة تالتة
عن احوال العرب فى الحرب العالمية الاولى كانت اجابته 20 صفحة فلوسكاب وش وضهر
لو مكناش بنعرف نحفظ كنا ضعنا
ودايما مواد التاريخ كانت امتياز او جيد جدا
احب دكتور لقلبى ومادته كنت بموت فيها
ادانى تقدير جيد
ولما بكيت وسألته استفسر منى انا عملت ايه
قلت كتبت الباب من اوله لاخره وكنا فى سنة رابعة
قالى انا طلبت منك جزئية محددة
ولما قلت له ان ده النظام
السؤال معناه الباب
استغرب جدا وقال الكلام ده مش عندى

الله يكرمك بلغ تحياتى لأختك
واعتذارى لحضرتك عن الرغى ده
بس ذكرياتى فى الكلية بحب احكيها بتوسع



اه

عرابى باشا ليس له علاقة بثورة 19:)

تحياتى لحضرتك

حفيدة عرابى يقول...

باشمهندس ويل
أهلا بحضرتك
شكرا جزيلا
انت عندك حق
المدرسين اللى انت قابلتهم انا اتعاملت مع كتير منهم
لكن انا كان حظى طيب
فى عصرنا البائد
كان المدرس الغير مؤثر وغير ملتزم
نادر
هييييييييه دنيا
تحياتى لك

مصعب صلاح يقول...

السلام عليكم
يا فندم لازم يكون فيه كبش فدا لكل ده
أنا رايي ان اصلاح التعليم يبدا من مرحلة الابتدائي مش من الثانوي

حفيدة عرابى يقول...

مصعب صلاح
حمدا لله على السلامة
أخبارك ايه؟
والمذاكرة عاملة ايه معاك؟
واخبار الامتحان التجريبى؟
يارب تكون بخير

بالنسبة للجنرال
انا كنت متأكدة انه مش هيقدر يكمل بالاسلوب ده وينقل كل المدرسة
لانه كان تصرف فاشل

مهندس مصري يقول...

ياه دا انتي كشفتي بلاوي
ناس كتير حاسة بيها بس مش عارفاها بالصورة القاتمة الفضيحة اللي شرحتيها دي
طيب ما تشوفي إيميل الوزير و تخبطي الحقايق دي كلها في وشه بدل حملاته العنترية المظهرية دي

و لا اقول لك الدكتور نبيل فاروق شانن حملة عليه في جريدة الدستور
ابعتي له البوست ده و خليه ينشر الفضايح دي على مستوى أوسع

و بعد ده كله بنحلم بتصليح البلد
دا لو الجيل الجاي عرف يفك الخط تبقى كرامة

منهم لله اللي وصلونا لكده

و انتي حاولي على قد ما تقدري تبعدي عن التلوث ده
ربنا معاكي انتي و كل اللي زيك

قلم رصاص يقول...

فعلا احنا بنعيش ايام سوده في التعليم

سلطتي الضوء على بلاوي بتحصل في مدارسنا والجميل في الامر انه من واقعك اللي بتشوفيه بنفسك .. وما خفي عنا وعنك كان اعظم

السيد الوزير معندوش اي نية للاصلاح ودا مش تجني عليه ابدا..هو كل مافي الامر انه عاوز شوية شو اعلامي زااااااااائد ان دي تعليمات عليا لامتصاص الغضب والهاء الناس


احييكي على الطرح المثمر

تقبلي مروري وتحيتي

حفيدة عرابى يقول...

مهندس مصرى
اهلا بحضرتك
انا ماكشفتش ولا حاجة
دى حاجات عادية جدا
ومش مقتنعة ان الوزير والوزارة كلها ماتعرفش حاجة عنها
او انه مغيب ومخبيين عليه ياحرام
انا أصلى مش مصدقة ان الناس دى عندها رغبة فى الاصلاح
تصرفات الجنرال
مجرد الهاء مش اكتر

اقتراحاتك محل دراسة:)

حفيدة عرابى يقول...

قلم رصاص
أهلا بحضرتك
انا مع حضرتك فى رأيك ان الوزير معندوش أى نية للاصلاح
وموافقة جدا على موضوع الالهاء
لكن حظنا اللى خلانا مصدر الالهاء المتاح حاليا

تحياتى لحضرتك

أليس في بلاد العجائب يقول...

ما بالك باللي في 3 ثانوي ومش بيعرف يستهجي اسمه .. مع ملاحظة اعادته ل 3 اعدادي لوحدها مرتين ومرة منازل

يعني عمره 20 سنة
ولو سالتيه معاك 100 جنية وصرفت 20 يتبقي كام هيقف يقولك معرفش .. مش هقولك منهج في كتاب .. لا دا 1+1 = كام

دا مش حال مدرستك بس
دا حال كل بيدرس في البلد دي مدارس وجامعات

والله مش بس دراسة
دا حتي الشغل كده

اعمل زي ما بيقولك مديرك لا تزود حرف ولا تنقص حرف
ولو عايز تبدع و تسهل لنفسك ولا حتي يا ربي تعمل نفس اللي مطلوب منك بس في اختلف في الخطوات .. شوفلك حتة غير دي

لا ..انت مش فاهم حاجة وارجع اربط الحمار زي ما يعوزه صاحبه

ولا حد داري بالحمار ولا صاحبه فاهم ليه عايزه هنا

ربنا يهونها علينا ويرزقنا علم ينفع وينفعنا بما علمنا

-----------

هوني علي نفسك
ارضي ربنا واعملي اللي عليكي
بس متفكريش في اليأس .. اكيد بيفرق اللي بتعمليه باخلاص مع بنات كتير عندك .. و افتكري دايما " ان الله لا يضيع اجر من احسن عملا"

ربنا يراضيكي ويرضي عليكي وعلينا


وما طار طير وارتفع
الا كما طار وقع

وبكرة نقعد جنب الحيطة :)

Wanda يقول...

عرابية
اولا الجزء الاخير خلتينى ارجع لريدير علشان اقراه

بصى يا عرابية
انا درست خارج مصر و داخل
مدرسة خاصة و حكومية كبيرة و حكومية صغيرة
قبلت الى بتقولى عليه كله و مش غريب عليا

اولا :-) اول مرة اعرف انك درسات اجتماعية
يعنى تاريخ و جغرافيا و تربية قومية مش كده ؟
ربنا يعينك ده دربكة

ثانيا: منهج :-) هما مبيخلكومش تلغوا ثلثينه قبل نهاية السنة ؟؟
عارفة فى الخارج المنهج بيحدد نقط معينة لازم الطالب يعرفها و عليا للاستاذ حرية التدريس بالشكل الى عايزة المهم فى الاخر يوصل النقط الاساسية الى حيتسال عنها الطلبة فى اخر العام الدراسى
الحرية تحت السيطرة ديه بتخلي للتدريس طعم ثانى

ثالثا
امتحانات و الغش الجماعى :-))
شوفته فى ابتدائى و اعدادية و ثانوى كمان مرقبة بتغشش اللجنة كلها و بتغششهم غلط :-))
انا طبعا طنشتها
و فى مادة زميلة قصدت المرقبة (واسطة) تغشلها من ورقتى لانى كنت اشطرهم فى المدرسة كنت متغاظة بشكل

رابعا
متابعات
ربنا يعينك معنديش كلمة ثانية
بس الى فاكرة و انا طالبة ساعات المفتشين بيغلسوا على المدرسين الكويسين

خامسا
المرتب
ربنا يرزقك و يرزقنا بيالى يغض البصر عن الحرام

و اخيرا
عرابية انا مفرحتش مع الفرحانين
لانى حسيت انها بلطجة مش اصلاح


فكرتينى
لما شوفت مسلسل ضمير ابله حكمت
قولت هى فيه مدرسة و ناظرة بالشكل ده فعلا ؟؟ انت رايك ايه ؟
انا قابلت نظار كويس بس مش بالشكل الملائكى ده

تايه في وسط البلد يقول...

كيف حالك يا فندم

والله بودي لو السيد الوزير يشوف التدوين ده ويقراه بتركيز عشان يوصل للأفة الفعلية في نظام التعليم

وانا حاسس انه لو وصل لاس البلاء مش بعيد يعلن وفاة الوزارة بالسكتة الدماغية!!!ه

عموما يا فندم لنا الله بس مش تبطلي تدوري علي حلول


دمتي بالف خير

حفيدة عرابى يقول...

أليس
طيب سؤال صغنن
3 ثانوى عام ولا فنى
اصلها تفرق معايا:)

بمناسبة موضوع الحمار وصاحبه
فى قرار محترم رقمه 219 كان صدر فى عهد الوزير الذى نال التطعيم ثم أقيل:)
الموضة حاليا كل متابع يقولى لازم القرار يكون فى دفترك
مدرستنا الاولى اخر مازهقت صورته وقالت علشان خاطرى خلوه معاكم يابنات
بس مين
وأنا دماغى بتصغر الايام قوى سبت كل حاجة وقلت الا دى
وأى متابع ييجى أغيظه واقوله مش لازم القرار يكون فى دفترى
المهم حضرتك تلاقينى بنفذه
وعندى الادلة والشواهد على تنفيذه
حلوة الادلة والشواهد ؟
اصل دى من مصطلحات الجودة


دعواتك جميلة جدا
جزاك الله خيرا واستجاب منك



لكن تقصدى ايه بنقعد جنب الحيطة
وطير ووقع
هه
ايه
تقصدى ايه؟:)

تحياتى لك

حفيدة عرابى يقول...

واندتى
التى اختفت ثم عادت
سلامتك من المزاج السىء
قول لى بس مين ضايق مزاجك وانا أخليه فى نفس المكان فى قلبى للى بيضايقوا مزاجى:)
والله ياواندتى عاتبتك كتير مع نفسى
وقلت كده تقفل المدونة فى وشى
ده عشرة البلوجر ماتهونش:)

اولا
مش فاهمة ليه رجعت الريدر
علشان البوست طويل قوى:)
وش واحدة مكسوفة بس رغاية ومش قالت كل اللى عندها



بصى ياستى
دراسات اجتماعية حاليا فى اعدادى
يعنى تاريخ وجغرافيا بس
التربية القومية دى كانت على ايامنا احنا
مش تكبرينا :)


ثانيا
منهج
لا طبعا مش بنلغى منه حاجة
التيرم اللى فات بس اتلغت حاجات حجمها محدود علشان الانفلونزا
ومهمة للاسف
ومرتبطة بمنهجهم دلوقت بيبقى نفسى اعيط وانا بشرحها
لانها لو اتشرحت قبل كده كنت ارتحت كتير
قدر الله وماشاء فعل


ثالثا
غش جماعى
ده اكبر مشكلة
والطلبة صدقينى ممكن السيطرة عليهم لكن الاصرار على ارتكاب الفعل ده بيكون من المدرسين



رابعا متابعات
شكرا جزيلا على الدعاء
وربنا يعينك ويعيننا جميعا
هو ربنااللى بيسترنا
لكن انا بمشى حاليا بخطى حثيثة فى مجال التزوير فى الحاجات الروتينية بالنسبة لى
وحتى اليوم اتمتع بستر الله
ربنا لا يحرمنى من ستره


خامسا المرتب
ربنا يزيدنا جميعا من الحلال
لكن مرتب ايه ياماما
انا بشتغل بس
علشان وقت فراغى كبير مش اكتر:)



جميل جدا انك مافرحتيش مع الفرحانين
مع انى فاهمة ليه ناس كتير فرحت فينا



عن نفسى ماشفتش مدير ملاك كده
لكن مديرتنا بتصعب على جدا
النهارده بتقولنا ياريتنى ادخل حصص واشتغل زيكم ومااقابلش المشاكل طول النهار فى المكتب
قلت لها عندك حق والله
لو الظروف خليتنى استنى فى مكتبها دقائق بتعاطف معاها جدا فى كم المشاكل التى تواجهها


رغاية انا مش كده؟

تحياتى لك

حفيدة عرابى يقول...

تايه فى وسط البلد
أهلا بحضرتك
مقدرة جدا لحضرتك اصرارك على عدم الانغماس فى الشكوى وسرد الصعوبات
واهميةاننا نحاول التغيير والاصلاح


لكن تفتكر حضرتك انه ممكن يعلن وفاة الوزارة بالسكتة الدماغية
كده انا ممكن افكر اوصل له أفكار التدوينة:)


فى ابتسامة كبيرة جدا مقدرتش امنعها
لماشوفت تعليق حضرتك
لانى فى نفس الوقت كنت فى مدونة حضرتك
انا دايما اقرأ تدويناتك بمجرد نشرها
لكن دائما من جمالها بدون مجاملة بحس انى معنديش القدرة اعلق عليها

لو حضرتك مش لقيت تعليق لى
تأكد انى موجودة وبقوة
بالعكس مدونة حضرتك بالنسبة لى اكتشاف جميل
ودايما تلاقينى هناك اقلب فى القديم
سواء تدوين سياسى غير معهود
او تدوين انسانى غير معهود

عندى امنية غريبة
انى أعرف كل المدونين اللى بحترمهم وكتابتهم جدا ببعض
لان حالة العجز عن كتابة تعليق فى التدوينات التى احترمها موجودة معايا فى اكتر من مدونة
لكن مش عارفة احقق الامنية ازاى

تحياتى لحضرتك

أليس يقول...

فني خدمي بس مش دا لوحده اللي كده.. الدنيا فيها منه كتير
يا مؤمنة ما في خريجين جامعة ومعهد ولا عدوا علي تعليم .. بقت عادي بيغشوا ويعدوا وخلاص
أمي بتفتكر مدرساتها لحد دلوقتي ولو مرة صادفنا منهم واحدة ساكنة قريب كانت تفضل تشكرها و تمدح فيها .. بصراحة محترمة جدا احترامهم لبعض

جدي لأمي كان استاذ جغرافيا وتاريخ بس أنا موعاش عليه .. بفتكره لما بتتكلمي علي الدراسة.. أمي شايلة اطلس بتاعه فيه دول انقرضت واسامي عجيبة :) .. ربنا يوفقك يارب ويجعل العلم اللي بتعلميه شاهد حق علي اجتهادك في الدنيا :)

احساس انك عملتي اضافة لحد وممكن يضيفها هو لغيره احساس مفرح و معز :)

مش هتكملي هذا الرجل أحبه ؟؟

في انتظارك

وتفائلي كده .. البلد بلدنا علشان ميستحملهاش غيرنا :) شفتي حد شايلها زي أهلها وصابر ومستني الفرج :)

بس قولي يا رب ..إلا ان نصر الله قريب

حفيدة عرابى يقول...

أليس
جزيت خيرا
انت بنت حلال مصفى
لان تعليقك وصل فى لحظة سمعت فيها خبر احبطنى جدا

البلد بلدنا علشان محدش يستحملها غيرنا
لا والله هى تستاهل احسن مننا
بس قدرها هنعمل ايه
فى حلم من احلام النقاهة لنجيب محفوظ
مش فاكرة اسمه
كان بيصور مصر سيدة
امتص ابنائها خيرها لدرجة نهشها
انا خايفة نوصل مع بعض لكده

لا انا كده بقيت كئيبة قوى

كويس والله انك فاكرة هذا الرجل أحبه

انا ارجع لسيرة الرجل الذى أحبه احسن:)


فعلا التدريس برغم كل النكد ده متعة
وبيديك شعور بالانجاز

وانك مسئولة مسئولية كبيرة جدا
فى ايديك عقول وأرواح
كلمة منك
ممكن تشكل تفكيرهم لفترات طويلة
ربنا يقوينا
ويهدينا
ويجعل عملنا فى ميزان الحسنات وليس نقمة علينا
تحياتى لك

أليس يقول...

في كل زمان ومكان كان وهيفضل الشر مع الخير

ادعي بس ربنا يفضل في خير في الناس .. صحيح كتير منهم متشال من قلوبها الخير بس بردة لسه فيه اللي لما تقومي وتقعديها مكانك تقول كتر خيرك ولا لما تشيلي حاجة تقيلة مع حد يبتسملك بعرفان بالجميل والله لسه فيها خير بس لو بس كل واحد يأخذ باله من أهله وعياله كويس ويراعيهم كويس ويراعي ربنا فيهم .. ويتقي الله قبل كل نفس يتنفسه

وبعدين لا تنسي ان الظلم ظلمات. وربنا لا يرد دعوة مظلوم واللي النهاردة ظالم بكرة مقصوم بأمر الله

فكرتيني:) طالبة نصيحة بصورة شخصية لو تقدري من خبراتك تساعديني
عارفة ان قدرات الولاد بتختلف مش كلهم بيستوعبوا زي بعض .. لو جاتلك طالبة فهمها علي أدها أو تحسيها بتفهم بصعوبة جدااااا .... بتتصرفي معاها ازاي؟؟ قوليلي أي حاجة غير انك تهمليها وتقولي مفقود الأمل فيها..ممكن :)

في ناس منتظراكي الصبح مشرقة وفايقة ومركزة :)

دوشتك معلش

حفيدة عرابى يقول...

لا ابدا ياحبيبتى ولا دوشة ولا حاجة
لكن انا خبراتى ضئيلة
وكنت بزهق بسرعة
لغاية مرة موجهتى دخلت الفصل
وهى بتحب الشرح جدا وتخصصها جغرافيا
وساعة لما تلاقى الحصة جغرافيا يبقى عليه العوض فى :)
وبدأت هى شرح درس انا بعتبره صعب
والعجيب ان البنات حتى اللى انا كنت فاقدة فيهم الامل نطقوا واتكلموا معاها
أصريت يومها اعرف ايه السر
وسر هذا اليوم كان الدافعية
فهمتهم هى الله يكرمها ان كلهم اذكياء
لكن مش بيستغلوا نعمة ربنا صح
واعادت الشرح اكتر من مرة
وأى اجابة كانت بتصدر منهم كان رد فعلها علي الاجابة طيب جدا
ومحاولتش فى الاول تطلب منهم الاجابة النموذجية
أى اجابةفى البداية كانت مرضية لمجرد تشجيعهم على محاولة الفهم والاشتراك فى النقاش


طبعا الكلام ده انا كنت سمعت عنه فى الكلية
لكن وقت التطبيق العملى نسيت
لكن بعد الموقف ده
والحصة الرائعة دى بفكر نفسى
ان السر فعلا فى الدافعية والتشجيع
والتكرار
ومش لازم نطلب منهم فوق طاقتهم
يعنى مستوى ما من الفهم والتطبيق
ممكن يكون مناسب ليهم
ومش لازم نطلب منهم اجابات نموذجية

لو فصل
مجرد ان زميلاتها يصقفوا ليها كان عمل جيد جدا

احيانا بعمل استفتاء لما الاقى نتيجة فصل مش كويسة
واقولهم انا مصرة ان نتيجتنا تتحسن
انا اكيد غلطت فى حاجات وانتم كمان اكيد غلطتم فى حاجات تانية
اكتبوا بصراحة اللى ضايقكم وكان سبب فى الدرجات دى منى ومنكم وانا هحاول اغيره

وصدقينى البنات الضعيفات حللوا اسباب التأخر بطريقة بسيطة جدا ومفيدة

كمان تتعلم انها تكون شجاعة
ولما تكون مش فاهمة لازم توضح ده
وان توضيحها لعدم استيعابها معلومة
ده عمل طيب منهاتثاب عليه معنويا
ده غير لو سكتت على عدم الفهم

فى حاجة مش تربوية لكن بتجيب نتيجة فى الامتحان
مذكرة صغننة كده
بعد الفهم نحفظ منها الاسئلة المتوقعة
يعنى بينجحوا فى الاخر لو وقتك ضيق


مش عارفة كده انا كنت مفيدة ولا ايه
لانى متعودة اتعامل مع عدد طلاب كبير فى الفصل
لكن مش مع حالات محددة

أليس في بلاد العجائب يقول...

جزاكي الله خيرا

افادكم الله :)

انا مش عارفة المقولة دي صح ولا لا .. ان في ناس لم تخلق للدراسة والتعليم .. فترات طويلة عدت عليا وانا مش مؤمنة بيها وبقول العيب في اللي بيحبب حد في العلم او اللي بيكرهه فيه

يعني مدرس سخيف ممكن يضايقني و يكرهني في مادة معينة او التعليم باللي فيه .. وارد تحصل .. بس في حد تاني ممكن يحببني فيه و يبقي دافع اني ابقي كويس .. ممكن بردة

وبردة لو في بيت بيهتم بالطالب دا ويعوضه نفسيا ومعنويا عن اي تقصير بيشوفه برة اكيد هتفرق ..

الكلام دا غير وارد في المؤسسات الاجتماعية و دور التربية التابعة للحكومة .. اللي ماشية بالعصاية و الكرباج .. اه بيروحوا مدارس و يشتغلوا .. اللي يسقط يسقط اهو في الاخر فيه شغلانة هتلمه يطلع منها مصاريفه لحد ما يجي السن القانوني اللي يخرج بيه من المكان و يخلصوا منه

وفي المدرسة بيكونوا في مركز حساس لانهم مش زي باقي الطلبة و علشان المنظر الحلو اللي حكيتي عليه يبقوا لازم ينجحوا .. محدش فيهم يسقط الا يعني نسبة قليلة علشان يبان ان في بردة ولاد مستواهم قليل مش كلهم عباقرة.. و تفضل الدنيا ماشية كده ..

دوشتك تاني بس الحكاية دي محيراني ومش لاقيالها حل مع انها والله لو اتحلت هتفرق في البلد كتير اوي ... الله المستعان

Wanda يقول...

عرابية
ارغى براحتك انا قصدى الفونت كان كبيرررررررررررررررررررررر
قوى لدرجة ميتقريش من المدونة
بذات اخر نقطة

و بعدين خلاص متزعليش منى بقى :-**
انا اهو
و بناقر و بغلش و بشاكس كالمعتاد

حفيدة عرابى يقول...

أليس
لا انا ماعنديش اى فكرة عن ظروف طلاب المؤسسات
لكن عموما
انا مقتنعة ان مينفعش نقول ان فلان ماينفعش للدراسة والتعليم
لكن المهم يتعلم ايه؟
واللى هيتعلمه ده هيساعده ازاى فى حياته الملخبطة لوحدها
المناهج حاجة غم
مش مؤهلة لأى حاجة ولا حتى فى التعليم الفنى
ربنا يعينهم
ويعينك فى ايجابيتك ويجازيك عليها

حفيدة عرابى يقول...

واندا
لا الله يكرمك فهمينى
انا شايفاه عادى جدا ومش كبير ولا حاجة
كل الموضوع انى لما غيرت قالب المدونة
كبرت الفونت فعلا لانى لقيت الكلام صغر جدا

انت شايفاه ازاى؟

soaad fakoory يقول...

الاخت الحبيبه حفيدة عرابى
لوعندى السلطه اخدك خبيره لاصلاح التعليم فى
المراحل المختلفه ،لانك فاهمه المشاكل ،واللجان اللى بتجتمع ما بتعرفشى اصل المشكله والمشكله فى التعليم مدرس وتلميذ وامكانيات ومبانى واحواش،علشان كده مفيش تعليم؟،قلبى معاكى ومتغيريش ضميرك ابدا ،تحياتى

أليس في بلاد العجائب يقول...

المهم يتعلم ايه ؟!!

قلتي سؤال مهم اوي .. هو يا تري لازم اعلمه صنعة علشان ينفع روحه ويلاقي يأكل نفسه ويفتح بيت .. و مينفعش اخليه يلتزم بالتعليم في المدرسة واقول هي الصنعة اللي بقياله؟ ولا تبقي دي جنب دي ؟

السيد المسئول قال جملة شهيرة سمعتها اكتر من مرة .. اللي ياكل علي ضرسه ينفع نفسه . هو مش عايز يتعلم ضربناه و شتمناه وبهدلناه وبردة مش عايز يتعلم .. اشربهوله بالعافية اكتر من كده ازاي طيب!!

اعتبر الغلطة غلطتنا لاننا مش دافعين حق المجتمع بشكل عادل والا مكانش بقي في فقير مسلم بايت جعان هو وعياله ومش لاقيين اللقمة الناشفة!!قبل حتي ما نفكر نقول يا تعليم

معلش انا طولت والكلام قلب لغم..

حفيدة عرابى يقول...

سعاد
أهلا بك
انا خبيرة تعليم!!
لا
مانفعش ياماما
ده انا غلبااااااااااااان
المهم انك شرفتينى النهارده
تحياتى لك

حفيدة عرابى يقول...

اليس
اسئلتك جميلة
انا عندى رأى ساذج وقديم من ايام طه حسين
ان كل انسان من حقه يحصل على مجموعة من المعارف والقيم والمهارات
والله قدر بعد كده ينميها وساعدته استعداداته الفطرية كان بها
وانا اقصد استعداده الفطرى مش ظروفه السيئة اللى مالوش ذنب فيها

طيب قدراته مش هتساعده يكمل
يتعلم صنعة مفيش مانع
لكن اعلم حد صنعة لانه فشل يتعلم
انا شايفة انه اسلوب فاشل
حتى صاحب الصنعة حقه يحصل على تعليم ما
امال هيتعامل ازاى مع الناس فى المجتمع
ويعرف ربنا ازاى
ويكون عنده وعى ازاى

مش عارفة انا وصلت وجهة نظرى ولا لا
لو وصلتها
ماتشيليش هم ياماما واتكلمى براحتك
هو الغم هيروح مننا فين:)
جدتى الله يرحمها كانت دايما تستعيذ بالله
من الهم والغم والكرب العظيم
اللهم احفظنا

رجل تحت الصفر يقول...

مش عارف ليه افتكرت الحوار اللي كان ما بين توفيق الحكيم و طه حسين

و اعتراض الحكيم على ان التعليم يكون كالماء و الهواء ..

كان عايز التعليم يبقى صعب و ما يتعلمش غير الصفوة

مش عارف ليه ده برضه وداني لحاجة تانية و هي "اليوجينيا" اللي درسناها في الثانوية ... و بالأخص فيما يخص الجزء الخاص بالتعليم (خصخصة :)
انهم هيعلموا الصفوة بس

أو الصفوة هي اللي تتعب عشان تتعلم


مش عارف ليه لفظة مزبلة خضتني لما سمعتها من الوزير

و انه بيتريق و يقول المدرسين مش عاجبهم المكان وديهم المنيا

............

الواحد بجد اتحير .. العيب فينا و لا العيب فيهم


تحياتي

ويكيبيديا الإخوان المسلمين يقول...

ويكيبيديا الإخوان المسلمين الموقع الرسمي الرابع لجماعة الإخوان المسلمين .

http://www.ikhwanwiki.com

الموسوعة الحرة التي يستطيع الجميع تحريرها وهى تسع جميع الآراء ( السياسية – الاقتصادية – الشرعية – التنموية - ....وغيرها) .

وإهتماماً منا بدور المدونين البارز في علم الإنترنت تم تخصيص قسم خاص بالمدونين على الموسوعة هو قسم " مدونون ومدونات " .

سجل الأن وأنشىء صفحة خاصة بمدونتك على الموسوعة في قسم " مدونون ومدونات " يعرض بها جميع ما تحرره من مقالات ومشاركات .

معنا تستطيع نشر أفكارك ومقالاتك ليقرأها أكبر قدر ممكن من القراء والباحثين فالموسوعة تعد مصدراً كبيراً للبحث العلمي.

وقد يتم ترشيح مقالتك لتكون مقالة مختارة على الصفحة الرئيسية للموسوعة .

فى مجتمع الويكيبيديا يمكنك التواصل مع عدد كبير من المستخدمين والمدونين والكتاب المشهورين .

شاركنا من أجل الإفادة والإستفادة .

لمزيد من المعلومات عن كيفية الإشتراك في الموسوعة وإنشاء صفحة خاصة لمدونتك يرجى زيارة الموسوعة والإطلاع على قسم مدونون ومدونات .

http://www.ikhwanwiki.com

م/محمود فوزى يقول...

السلام عليكم
انا اسف جدا للتاخر عن المدونه
على فكره باه انا مش من المؤيدين للى بيعمله الوزير بدر
ومش متفائل بيه اصلا بسبب اللى كان بيعمله فى جامعه عين شمس

فيه لوائح وقوانين للعقاب
مينفعش يهزأ الناظر والمدرسين قدام الطلبه
ولو عايز يعاقب يبقى فيه تحقيق مش يعاقب الكل وخلاص

كمان يعنى لو كان راح ولقى المدرسين موجودين والناظر يبقى التعليم فى احسن حالاته

زي ماقلتى فين المنهج وفين الاهتمام بالطالب والمدرس
معلش مينفعش ادى مدرس 200 جنيه (واحيانا ميه وبعقد مش تعيين) واطالبه انه يبقى فى المدرسه بعد الفجر لغايه العشا

كمان يبقى الكتاب المدرسي يهتموا بيه شويه
لانه اغلب الكتب المدرسيه محدش بيفتحها وبيجيبوا كتب خارجيه لانها بصراحه احسن

كمان ليه ميبقاش فيه مدارس اكثر وبكده نقضى على كثافه الفصول

برضه تبعا للمنهج ازاى يعملوا المنهج والجدول على اساس انه يخلص قبل الامتحانات باسبوع او اتنين
امتى الطلبه هاتراجع
ده معناه بيقولوا للطلبه ذاكروا لوحدكم او خدوا مجموعات ودروس عشان يخلصوا المنهج قبل الامتحان بفتره كافيه

صحيح فيه مدرسين تحرق الدم لكن برضه قبل ما نطالبه بواجبه الافضل نديله حقه

عايزين يجي اليوم اللى فيه الطالب بيروح المدرسه فرحان مش متنكد

ملحوظه بس فى الاخر
المدرسه اللى راحها لقيت (لامؤاخذه يعنى) الحمامات نظيفه رغم انه راح فجاه
وده معناه ان المدرسه مش وحشه قوي كده
ييجي يشوف المدارس التانيه
وده برضه يرجع للوزاره المفروض ان يبقى فيه اهتمام اكثر بصيانه المدارس

معلش طولت
ربنا يصلح الاحوال
ربنا يكرمك ويسعدك