سؤال

ممكن سؤال لو سمحتم00 ؟
ليه كم الكراهية الموجودة عند كتير من المدونين المسلمين
لكل مايمت بصلة للاسلام والعروبة ؟
وليه فى إصرار على الفصل بين حبنا لبلدنا وانتمائنا العربى؟
أنا مش هتكلم عن ماتش الجزائر
لانه أكبر من قدراتى النفسية والعقلية
وبحاول أستوعب الاحداث وتداعياتها مش عارفة
بس بجد والله
لما أنت مسلم وشايف ان الاسلام هو سبب التخلف اللى عايشين فيه
ما تشوف لك يااخى أنت وهو ملة تانية تحققوا بيها التقدم لنفسكم الاول
بتخنقونا فى حياتنا ليه ؟
الاسلام سبب التخلف!!!!!
ومصر عرفت التخلف لما دخلها عمرو بن العاص وفرض عليها لغته!!
عمرو بن العاص اللى كان بيحب مصر من قبل الاسلام
وفضل يلح على الخليفة فى فتحها
هو دلوقت المتهم باحراق مكتبة الاسكندرية
عدو الثقافة والتنوير000 !!
مع ان كل المؤرخين متأكدين انها أحرقت فى عهد كليوباترا السابعة
على يد يوليوس قيصر
بسبب معركة دارت هناك فامتدت السنة اللهب للمكتبة وأحرقتها
ليه كارهين أوى عمرو بن العاص
وروحهم الوطنية بتوجعهم لما بتيجى سيرته
مع انهم بيرحبوا بشدة باجانب كتير دنسوا تراب بلدهم
وبيستشهدوا دايما باقوالهم
ليه صعبان عليهم أوى ان مصر غيرت لغتها للعربية
مع ان محدش فيهم درس الكتابة الهيروغليفية
ومستحيل يقدر يستخدمها دلوقت
ولما عمرو وصل مصر
كانت ماتت من زمان
حتى من غير ماتنال شرف التحنيط
أنا هادية خالص ومش عصبية اهوه
الاسلام وحش
الاسلام ده يع خالص
مصر لو تخلت عن الاسلام
ستعود لركب الحضارة
الذى تركته بمجرد دخول الغازى عمرو بن العاص اليها
متشكرين يااساتذة
أحب أبلغ حضراتكم
ماتعملوش حسابى معاكم
أنا عاجبنى جدا التخلف اللى صنعه الاسلام
وأسفة انى أبلغ حضراتكم
انى سعيدة جدا انى بشتغل مدرسة
و ناوية اكثف جهودى الفترة الجاية
علشان أزرع بذور التخلف والانحطاط فى نفوس الطلاب
والاجمل انهم طالبات
يعنى ان شاء الله فى المستقبل هيكونوا أمهات
وهيعلموا ولادهم الكلام اللى هيسعموه منى
غصم واقتدار على رأى اللمبى
أنا شريرة وسادية
وهستغل وظيفتى ضدكم
هاعملهم غسيل مخ
هافهمهم ان الاسلام نعمة من ربنا
وهو الدين اللى ربنا سبحانه وتعالى اختاره لينا لنتعبده به
وان تخلفنا بسبب ناس عندها انسحاق نفسى تجاه الغرب
ناس حاسة انها ضعيفة
انها هوا
انها مخوخه
ومش مسنودة على حاجة
هفهمهم ان عمرو ده ارطبون العرب
اللى كان بيموت فى حب مصر من قبل الاسلام
وان ربنا شرف مصر بالاسلام
وان كل واحد فينا بيصلى وبيصوم
وبيوحد ربنا
لعمرو نصيب بأذن الله فى أجره
كل شوية هاسمعهم الاية الكريمة
ومن أعرض عن ذكرى فأن له معيشة ضنكا ونحشره يوم القيامة أعمى
هخليهم يمشوا فى الشارع
ويتفرجوا على التليفزيون
ويقرأوا مدونات
وييجوا يقولولى
شافو ا كام واحد أعمى القلب النهارده
هكلمهم عن المنافقين
اللى خطرهم عن الدين اكبر من الكفار
وهحكى لهم حكاية عبد الله بن سلول
لما الغل أكل قلبه من محمد صلى الله عليه وسلم
وقال لئن رجعنا الى المدينة ليخرجن الاعز منها الاذل
وهخليهم يستنتجوا لوحدهم
مين هو الذليل الحقيقى
ساعدنى يارب

51 التعليقات:



الزنارى يقول...

عفوا أختى
لكن أريد أن أعرف من قال هذا الكلام تحديدا حتى نأخذ موقف منة فلا نريد كلام مرسل و لكن أطلب منك تحديد من فعل هذا
مع خالص الاحترام و التقدير
أحمد الزنارى

لورنس العرب يقول...

الحقيقه أنا قلت للفئه دي من زمان
يا سيدي مش عاجبك اللي احنا فيه أتركه وخلصنا



راجع لك تاني

بدراوى يقول...

هو ليه اللهجة ديه فى كلامك
قصدى حاسك متعصبة شوية
و ليه الموضوع تكرار لموضوع اشكى الظلم لسعد يا ويصا

بصى العرب عرق
و الإسلام ديانة

الدين اختيار و اقتناع
العرق لا فيه اختيار و لا فيه اقتناع
ده شىء مفروض عليا

مشكلة اللى بيقولوا ان مصر مش عربية
انهم مش شايفين ان مصر اتعجنت بجينات العرب اللى فيها بعض التخلف و الديكتاتورية و الإستبداد و الفساد
و و وو و
مساوىء كثير

و الموضوع مالهوش علاقة بسيدنا عمرو بن العاص اللى كثير ممكن يختلف معاه لكن مش عليه

الموضوع ان البعض شايف ان العرب دوول زبالة
فعايز يعمل فيها انا مش عربى
و هو للأسف عربى ان مكنش بحكم العرق
بحكم بعض الصفات السيئة

اما سبب تخلف المسلمين فهو كما قولتى
و اضيف الإهتمام بكل ما هو تافه
او كل ما هو قشرى فى الدين
يعنى قصدى فضيان المخ
و التفكير فى امور لو لم نفكر فيها لتقدمنا

بدراوى يقول...

صحيح حضرتك عملتى اشراف على التعليقات ليه ؟!

لقد خلقنا الله احرارا يقول...

الزنارى
اهلا بحضرتك
انا اسفة مش هقدر اقول مين بالظبط لاسباب كتير
بس المدونات فيها كتير بيقول نفس الكلام
لكن كلامى كان على تدوينة مكتوبة قريب
تحياتى لحضرتك

لقد خلقنا الله احرارا يقول...

لورنس العرب
اهلابحضرتك
ده نفس رأيى والله
مش ناقصين خنقة فى كل حاجة

مستنية رجوع حضرتك تانى
تحياتى لحضرتك

لقد خلقنا الله احرارا يقول...

بدراوى
اهلا بك
مش فاهمة ؟
انت كنت تقصد عصبية ولا متعصبة
فى الاول
اول ماقرأت الكلمة كنت ناوية اقولك
لا انا عصبية بس
وبعدين قلت لنفسى
اكيد انا متعصبة برده لدينى ودى حاجة افتخر بيها

لكن الموضوع مش تكرار لاشكى الظلم
لانى بتكلم المرة دى عن المسلمين
المسيحى لما يكره العروبة
انا ممكن افهم بيعمل كده ليه
لكن المسلم كاره ناسه ده
مش قادرة افهمه بصراحة

فى فرق بين واحد قرفان من العرب وتصرفاتهم
وعنده حق فى كده
وبين واحد مش عاجبه الاسلام نفسه
وشايف ان مصر تخلفت بمجرد دخول الغازى عمرو بن العاص اليها
جميل جدا اننا نحتفى بحضارتنا
ودى حاجة مش متعارضة مع التدين الصحيح
لكن الغلط لما توصل تبقى نعرات وتوصلنا للفرقة
ونعاير بعض
انت فرعون
وانت بربر
اغلب كلامى مش رد محدد على تعليقك
لكن توضيح لشعورى وانا بكتب البوست
انا كنت بتكلم عن تدوينة محددة



متفقة معاك فى اسباب تخلف المسلمين
وعليها اسباب كتير تانية


عملت اشراف على التعليقات
علشان دخل عندى واحد
تخيل
بيوجه السب
لربنا سبحانه وتعالى

بس دى ان شاء الله فترة مؤقتة
لغاية ماربنا يهديه او يهده مش مشكلة

تحياتى لك

Appy يقول...

يا شيخه وجالك مراره تقرى الكلام ده

amirelhob يقول...

عاجبنى اوى البوست دا بجد يجنن وتحفه وحلو اوى انك وصفتى نفسك شرير مش عشان انا بحب الشر لكن عشان اثبتيلى ان الشر بيبان دلوقتى انو اقوى لما حبيتى تثبتى انك اقوى قولتى انك شريره يمكن زعلان من جوايا بجد على اللى احنا فيه مصريين وعرب ومسلمين لكن فرحان ان لسه فى ناس حاسه بيمتها وعندها امل وانا اتعودت استمد املى من الاخرين ومن قلبى بتممنى انها يا رب متكونش اخر مره اجى هنا وبتمنلك كل خير وسعاده و صحه وتوفيق وفرح وابتسامه تدوم يا رب طول العمر

لقد خلقنا الله احرارا يقول...

ابى هانم
يامرحبا يامرحبا
احيانا يااخت ابى الانسان بيكون عدو نفسه
وبيعذبها
شرفتينى

لقد خلقنا الله احرارا يقول...

امير الحب
اهلا بك فى اول زيارة
يارب ماتكون الاخيرة
شكرا جزيلا على كلامك الجميل ودعواتك
بس انا كنت اقصد من شريرة
انى متعمدة اضايقهم
فعل التعمد هو اللى ادانى احساس انى شريرة
شرفتنى
واتمنى الزيارة تتكرر

بدراوى يقول...

ايوا انا قصدى عصبية
بس لما قولت متعصبة
قصدى معناها العامى
لما نقول فلان متعصب
بكسر الميم لا ضمها

على فكرة انا كنت اتمنى
اكون مسلم غير عربى
على انى اكون مسلم عربى

العرب دلوقتى بقوا اسف
نوع من الجرب عاوز استئصاله
بتكلم على العرب بتوع دلوقتى

طبعاً حتستغربى كلمتى ديه
بس اتمنى تكونى فاهمة قصدى كويس
و كلامى ميضايقكيش

moma1415 يقول...

تيمووووووووووووو
واحشنى يا راجل
بجد بجد ليك وحشة جامدة جدا
خلاص هانت العيد قرب وهاشوفك
واعملى حسابك انتى وطالق باسا
انى هاشرح لكم الرجل بتاعت الجاموسة حتة حتة يعنى فيها موت وخراب ديار
ولازمن لازمن تكتبى عن شرحى الرائع عندك فى المدونة

ده اولا


ثانيا بقى
عليا النعمة انتى اجدع مدونة شوفتها فى حياتى بغض البصر
عن انتى اللى عرفتينى على التدوين اشاسا
بس والله بتكتبى كلام فى الصميم

اه واكيد انا معاكى انا عجبنى برده التخلف اللىى انا فيه على الاقل ان حبيبى وحبيبك وحبيب الملايين هيتشرف بينا يوم القيامة ويقولنا امتى امتى



واحب ابلغ سياتك برده انى نويت اتسخط وارجع تانى اعدادى عشان حاجتين
عشان ادرس تاريخ البلد دى
لانى ميح ابيض يا ورد احمر يافل
حسيت وانا قاعدة امبارح قدام احمد المسلمانى انى طفلة الحشرة :)))))

وثانيا انى لازم اتعرف واتعمق اكتر فى التخلف اللى هدرسيه للطالبات
وسيبك بقى من الجثث المقرفة اللى عندنا اللى رحتها تمسك فيك يومين قدام



اه صحيح اخبار الواد صاصا ايه

اوعى يكون مضايقك

ابو الرخامة مش كده
ابقى سلميلى عليه


والواد مورا برده مش باين اليومين دول
ربنا معاه ف شغله اهم حاجة يبطل جو الكأبة اللى معيش نفسه فيه ده وقوليله بيطرية بتقولك سلمها لله


وطبعا الباشا ابيه عامل ايه فى شغله

قوليله ان انا العيد ده لازم هو اللى يدينى عدية ماليش دعوة مش هاتنازل عنك ابدا ههههههههههههههههه

وطبعا الكنج الكبير
زوزة بقالى كتير اوى ماسمعتش صوتها
الا طشاش كده وانا لازقة جنب ودن ماما اول امبارح
سلميلى عليها وبوسيهالى بوسة من هنا لحد عندك ماشى
كده يعنى
اموووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووءة
نفسى اتقطع يا اختشى


طولت عليك ولا لسه؟
لسه صح


طب نقول ايه كمان نقول ايه مش عارفة

طب بصى انا هاروح اتغدى وانام واشرب فسفاسية واجيلك تانى

يلا سلام مؤقت

لقد خلقنا الله احرارا يقول...

انا عصبية مقدرش انكر
ادع لى ربنا يهدينى
بس احيانا الاستفزاز بيكون بزيادة اوى
انا مش زعلانة منك ولا حاجة
هزعل ليه
العرب حاليا
قول عليهم اللى انت عايزه يستاهلوا اكتر من كده
لكن الحكاية زى ماانت عارف مش احنا وهما دلوقت
علاقتنا بيهم باقية غصب عننا وعنهم
يبقى الافضل نحط لها استراتيجيات جديدة

تحياتى لك

لقد خلقنا الله احرارا يقول...

بدراوى
انا شفت حاجة غريبة دلوقت
مش عارفة من الارهاق
ولا انا خلاص كده قواى العقلية اتدهورت
انت مش كنت اول تعليق
وانا لما رديت على التعليقات
رديت عليها حسب ما هى مكتوبة فى صفحة التعليقات وقتها
هو انا هيست ولا ايه
انا دلوقت شايفة ترتيب التعليقات متغير

طيب انا بعد السلام عليكم
ماتزعلوش منى لو كنت هيست او لخبطت

لقد خلقنا الله احرارا يقول...

ست الدكتورة
من الاول كده اياك ورجل الجاموسة
والا انت حرة
بيطرية على نفسك ياماما
مش على اللحمة بتاعتنا
انا لسه ماقلتش لابيه ان عيديتك عنده
بس اعتقد انك هتستنى كتير اوى


حلوة جدا حكاية غض البصر دى
وشكرا ياباشا على الكلام الجميل اللى انا مش قده


بتقولى ايه ؟
ناوية تتسخطى
طيب مش هعلق دلوقت
بينا وبين بعضينا

صاصا
كويس الحمد لله
وبيعد الثوانى علشان يرجع عندكم
هو بيصعب عليا دلوقت انا اللى بقيت ام وابو الرخامة
والرخامة ذات نفسها
بدأت اتعاطف معاه يااوختشى
الدنيا بهدلته اوى السنة دى
كلهم كويسين وزوزة الحمدلله كويسة ادع لها
نتقابل فى العيد ان شاء ننم مع بعضينا فى مكاننا اللى اكيد مش هنسيبه
غصم عننا
المطبخ
سلام ياحبيبتى

رجل تحت الصفر يقول...

ومن أعرض عن ذكرى فأن له معيشة ضنكا ونحشره يوم القيامة أعمى



دي الخلاصة...تسلم الأيادي و الادمغة

لقد خلقنا الله احرارا يقول...

رجل تحت الصفر

هو بعد كلام ربنا فى كلام
شكرا على المجاملة
الله يكرمك
شرفتنى

الشجرة الأم يقول...

إن الهمجية التي حدثت رغم تهافتها .. إلا أنها مع الأسف كشفت النقاب عن مدى ضعف الروابط التي تجمعنا أولا كعرب وثانيا كمسلمين وثالثا كأمة محمد ..

لكن اعتقد أن سبب هذا الضعف هو البعد عن المعنى الحقيقي والضمني للإسلام .. لا أكثر ولا أقل ..

أما الجواب لهذا السؤال: فهو أنه هذه الحادثة كانت القشة التي قسمت ظهر البعير ..

وهذا آخر شيء فنحن الآن في القاع ونطلب المدد من الواحد القهار.

تامر علي يقول...

:)
متقلقيش نفسك بالناس دول
دول مش مسلمين أصلاً لكن بيظهروا كده علشان ميتقالش إنهم بيدافعوا عن ديانتهم ضد الاسلام ويبان الهجوم داخلي

موجودين في كل زمان وهم زارعين الفتن على مر العصور

المشكلة اننا نعرفهم ونعلم عليهم لأن للأسف الجهل الشديد اللي كل الناس عايشه فيه بيخليهم يستتروا كويس ويلبسوا على الناس

تحياتي :)

well يقول...

بسم الله الرحمن الرحيم
الاجابة هى ..
اللى شاف ان الاسلام هو سبب التخلف فدى يرجع الى انه هو اصلا ما شفش الاسلام
الفصل بين حبنا لبدنا وانتمائنا العربى ..ده يرجع الى العرب نفسهم احنا قدمنا حبنا وانتمائنا للعرب والاخر خدنا صابونة قالونا دى مشكلتكوا انتوا حلوها لوحدكوا
مكتبة الاسكندرية اتحرقت على يد يوليوس قيصر على ما اتذكر
اللغة العربية هى افضل لغة على وجه الارض ولكن نحن نتحدث اللغة العامية حتى الخليج يتحدثوا خليجى والجزائر وتونس والمغرب يتحدثوا عربى على فرنساوى ..لا يوجد احد يتحدث اللغة العربية اللا الدعاة
يعنى اى (عمرو ده ارطبون العرب )يعنى اى ارطبون ...معلش اصل انا بتكلم عامية مش فصحى
تحياتى ..واتمنى اكون عرفت اجاوب

لقد خلقنا الله احرارا يقول...

الشجرة الام
الله يكرمك
فعلا احنا بعدنا كتير عن تعاليم الاسلام
واللى احنا فيه دلوقت غضب من ربنا
ربنا يرحمنا

تحياتى لك

لقد خلقنا الله احرارا يقول...

استاذ تامر على
اهلا بحضرتك
المشكلة فعلا ان ناس منهم واضحين جدا
مش محتاجين كلام
وبيهاجموا الاسلام بضراواة مستفزة
لكن ناس تانية بتتكلم كويس فى السياسة
وعايزة البلد حالها احسن
وبعدين تلاقى الكره الشديد للاسلام ظهر

ربنا يهدينا
تحياتى لحضرتك

لقد خلقنا الله احرارا يقول...

باشمهندس ويل
بسم الله الرحمن الرحيم
يسر لقد خلقنا الله احرارا ان تعلن نجاح الباشمهندس ويل
لكن مع توضيح بعض النقاط

اولا

انتمائنا العربى مش معناه احنا والعرب دلوقت
ولا احنا عاملناهم ازاى
احنا عرب
بالتاريخ والجغرافيا
وكويس اننا عرب علشان نقدر نتعرف على الاسلام
مشكلتنا اننا بنحكم على التاريخ بالكام سنة اللى مصر فيهم ضعيفة
وكل واحد مالوش لازمة بيعيش عليها
لكن بمجرد دخول مصر الاسلام
ونطقها بالعربية
شرفت العرب
ولا ارادى اختاروها قائدتهم
ده دور احنا مش اخترناه
ومينفعش نتخلى عنه
ومنقدرش نقول احنا مش عرب
او هما بيتكلموا أى لغة
الا لما بعد الشر
نشوف احنا لغة غيرها نتكلم بيها

ثانيا
ارطبون ده كان قائد رومانى كبير
وكان مشهور بالذكاء والدهاء الشديد
والمسلمين كانوا قلقانيين منه
فعمر بن الخطاب قال لهم
لقد رمينا ارطبون الروم بارطبون العرب
يقصد عمرو
المشهور بالدهاء
وفعلا حصلت مقابلة بين عمرو وارطبون
كان عمرو فيها متخفى
ونجح بذكاء شديد
يكسب الجولة دى
بس قالوا لبعض ايه؟
والله مافاكرة بالظبط
بس لما ارجع من الشغل
ادور واقولك

فين فلوس الدرس؟

تحياتى لك

osama44 اسامه 44 يقول...

اولا كل عام وحضرتك بخير والسنه الجايه اشوفك على عرفات
بجد نفس الكلام
اللى نفسى اقوله

اشكرك بجد ربنا يكتر من امثالك فى مدراسنا

بليز مس
لو سمحتى كترى من اللحمه عشان هتحتجى لمجهود كبير عشان تلاميذك
دمتى بالف خير وسعاده

لقد خلقنا الله احرارا يقول...

اسامه
ازيك
فينك من زمان
انا كنت لسه حالا فى مدونتك
علشان اقولك كل سنة وانت طيب
بس معرفتش افتح صفحة التعليقات
كل سنة وانت بخير وصحة وسعادة
ونكون كلنا على عرفات
موضوع اللحمة
موافقاك عليه طبعا
لسه كنت بقول الكلام ده النهارده
الواحد لازم يهتم بصحته شويه

كل سنة وانت طيب

أليس في بلاد العجائب يقول...

ملكيش نصيب في الرغي اللي كتبتهولك امبارح :) :)

مكنتش عارفة اعلق :)

سبهللة يقول...

تسلم ايدك
كلام فى الجون

الحمد لله على نعمة الاسلام وكفى بها نعمة

أليس في بلاد العجائب يقول...

بص انا هبعتلك اللي كتبته ومرضيش يتبعت :) اتحرجت بصراحة دلوقتي بس انتي حرة باه انتي اللي هتصدعي مني :)

أليس في بلاد العجائب يقول...

في مشوار الرجوع باه :)
اتكلم السائق علي الحج والاضاحي .. لقيتها بتقول الاضحية دي لا تقبل الا علي عرفات في الحج غير كده اللي بتعملوه دا زكاة و صدقة .........
من غير ما اكمل باقي الحوار ...
انا رغيت جايز برة الموضوع .. بس بفرجك علي دماغ حد كبير سنا(52) ومتعلم المفروض تعليم ازهري في بيت ازهري !!
قوليلي كده رايك ايه .. دا مش كره للاسلام حاشا لله ... بس معتقدات مترسخة في العقول و مش قليلين اللي كده ..

عجبني اوي تفسير amirelhob
لانك قلتي شريرة من منطلق ان الشر هو القوي ..
هو عمو خير ليه عجوز و هزيل وغلبان في نفسه كده ؟؟؟؟
مع ان ابن عمه شر قوي وعفي و مستقوي بالباطل !!!
ينفع اسيب ورقة الاجابة فاضية الاستاذة .. حكم سؤالك يصعب عليا اجابته :(
كل سنة وانتي طيبة و يارب يعينك المعين علي نيتك الطيبة و تطلعي بنات مسلمات عن حق ويكتب لكي الجزاء في ميزان حسناتك ان شاء الله
بما اني رغيت بردة ..ممكن تقريه انتي بس بدل ما حد يتضايق من طول الرد
ربنا يباركلك :)

أليس في بلاد العجائب يقول...

------------------
25 نوفمبر 2009

السلام عليكم ورحمة الله وبركاته
كل سنة وانتي طيبة يا استاذة و اعادة الله علي المسلمين جميعا بالخير واليمن والرضا
نيتي مش هرغي بس موضوعك جميل ما شاء الله و مستفز بالنسبة لي جدا للرد بس مفيش داعي علشان معملش زي المرة اللي فاتت واضايق حد من الكلام
بس اسمحيلي
احطلك انا سؤال شيك اوي اتسألته اول امبارح.. نزلت مع 3 زميلات نروح نعزي واحدة مسيحية في وفاة والدها .. المشوار كان طويل والسكة زحمة فافتح الكلام علي طقوس الغسل عند المسيحين وان كانوا بيغسوا موتاهم ولا لا ؟
المهم وصل بينا الكلام لموضوع سؤال القبر .. واحدة منهم ازهرية وابنة شيخ ازهري ابا عن جد و كبيرة في السن .. قالت وانتو تعرفوا منين ان في حاجة زي كده في القبر ولا في حاجة اسمها عذاب القبر ولا حساب في القبر !!
الاتنين التانيين ثاروا ولا وازاي وبتقولي كده ازاي .. حتي السائق دخل في الحوار و استشهد بحديث الرسول صلي الله عليه وسلم و قوله لسيدنا عمر انه من قوة ايمانه سيصير السؤال مردود علي الملكين " من ربك" اصبحت بل انتما من ربكما ؟"
المهم من جدال لنقاش .؟. هي قالت كل واحد وله عقله ومعتقداته ومرياحاه !!
الرد اللي استغربته جدااااا بجد لما قالت الرسول صلي الله عليه وسلم ملوش الا الف حديث فقط لا غير وكل اللي روي عن فلان او فلانة (بدون ذكر اسماء) "كلام غير صحيح"
قلتلها يعني اللي نعرفه يعني ان القرآن يليه السنة النبوية الصحيحة في الصحيحين ودول اصدق حاجة بعد القرآن لان اللي جمعوهم حرصوا علي كده !!!
قالتلي كله كلام ... ،،
قلتلها طيب يعني انا لما اعوز اعرف الالف حديث دول اجيبهم منين ؟الاقيهم مجمعين فين؟ عند مين؟
قالتلي هو انتو كده مش عايزين تشغلوا عقلكم ليه وبتاخدوا الدين من القشور .. هيفيدك في ايه لو عرفتي؟ هو دا اللي جايبلنا التخلف و جايبنا ورا!!!!!
بيني وبينك يا استاذة .. انا لما بلاقي حيطة سد كده بسكت .. بس فلتت مني غصب عني كلمة ضايقتها وضايقتني.. قلتلها انتي كده اللي بتقوليه دا شبه القرآنيين اللي بيقولوا القرآن وبس والسنة متتدخلش في حياتنا.. هي اتاخدت من الكلمة قالتلي يعني لما اقول كلام انا مقتنعة بيه تشبهيني بالقرآنيين .. قلتلها انا وصلني المعني كده!!
وسكت انا حفاظا علي المشوار واننا رايحين واجب عزاء في نفس بشرية توفاها الله..

لقد خلقنا الله احرارا يقول...

اليس
لا انا كان ممكن يجيلى احباط لو تعبت نفسى كده وكتبت تعليق ولم ينشر
لكن انا الحمد لله حظى كويس انك حفظتيه
بس ونظرا للذكاء الخارق
نشرت التعليقات كلها مع بعضها
فطلعت مش مترتبة
معلش
الخبرة التكنولوجية عال

أليس في بلاد العجائب يقول...

ولا يهمك انا حاولت ابعته عملي ايرور بردة نفس بتاع المرات اللي فاتت

قلت يمكن حاس بالصدمة من طوله فقلت اقسمه :)

هما ترتيبهم كده 3 1 2

:)

لقد خلقنا الله احرارا يقول...

اليس
انا مش عارفة اعلق على ايه ولا ايه

اولا

ربنا يهدينا جميعا

ثانيا

الدراسة فى الازهر مش سبب كافى ان الكل يعرف تعاليم دينه كويس
لاسباب كتير
بعضها ليه علاقة بالدارسين وبعضها ليه علاقة بالازهر نفسه اللى السلطة من ايام محمد على عندها اصرار تخليه من غير تأثير ويفقد هويته

فظيعة انا لما اتكلم كلام كبير
ههههههههه

انا مش بقصد زميلتك بشخصها
انا بتكلم على ناس كتير


بس موضوع عذاب القبر فعلا محيرنى
يعنى الناس مسلمة ان فى عذاب فى الاخرة
وان فى جنة ونار
وجم على عذاب القبر ودماغهم وقفت
ليه طيب؟
ايه اللى فى عذاب القبر بيستفزهم كده
بعد ما اعتقدوا( من عقيدة) بوجود العذاب فى الاخرة
مش فاهمة بصراحة

كمان الاحاديث كتير فعلا فى اثبات عذاب القبر
وفى ايه قرانية كمان ركن اصيل عند اهل السنة فى اثباته
وهى
( النار يعرضون عليها غدوا وعشياويوم تقوم الساعة أدخلوا ال فرعون سوء العذاب )
مش عارفة لما تكون حاجة مثبتة كده بالقران والسنة
الاختلاف بيكون فين
حتى فى رأى للفراء
عن ان الايه فيها تقديم وتأخير
لكن جمهور المفسرين على غير هذا الرأى
اعمل ايه ماانا قلت اراجع معلوماتى
قبل مااتكلم انا كمان



موضوع الاضحية على عرفات دى
غريبة جدا الحقيقة

هى المشكلة فى الدماغ بصراحة لما تحجر
وتكون مش عاوزة تستوعب او تعدل معلوماتها
استرها معانا يارب
علشان انا بخاف من دماغى لما غدة العند تشتغل



اما موضوع شريرة
فانا قلتها بدون قصد ومن غير ماافكر فى كلامك او كلام امير الحب
عجبنى جدا تفكيركم
فعلا احنا لا ارادى اقتنعناان الخير ضعيف



موضوع البوست بيستفزنى من زمان
بس تدوينة أخيرة جابت اخرى بصراحة
لانها من ناس يبان عليها واعية
ودماغها كويسة
لكن مش عارفة ايه مشكلتهم مع الدين
ومش عارفة برده ينفع حد تكون دماغه وافكاره حلوة فى حاجات كتير ومع ذلك بيعتبر دينه رمز للتخلف مش عارفة تيجى ازاى



لكن انا لاحظتها حتى مش على المدونات
مع شخصيات مشهورة
يبقى بنى ادم خلوق
وافكاره السياسية داخلة دماغى بصراحة
وبعدين
الاقيه معترض على فرضية الحجاب مثلا

انا حاسة ان الناس دى بتضايقنى
التناقض ده بينرفزنى




انا بكون سعيدة جدا بتعليقاتك ونقاشك
والمرة اللى فاتت ماحصلش حاجة

هى ساعات الدنيا بتبوظ كده من غير قصد



أمانة عليك تدع لى ربنا يهدينى

لقد خلقنا الله احرارا يقول...

سبهلله
تسلم ايديك انت ياحبيبتى
ربنا يعينك ويصبرك ويقويك
ويرحم اموات المسلمين جميعا
ويجمعنا بيهم على خير

أليس في بلاد العجائب يقول...

انا سمعت نقلا عن حد عن نفس الشخصية دي رأيها في الحجاب كمان .. بس مفيش داعي يعني تقدري تستنتجي انتي الرأي كان ايه


هو في عيب لما اسلم دماغي للي خلقها وامشي في غيبيات مسلم بيها علشان انا عايزة اسلم بيها انا حرة يعني لما افهم ان ربنا عايز كده واعمله بالشكل دا .. ولا هي حلال اللي تدعو للتحرر و المعاصي صغرت ولا كبرت وحرام اللي تدعو لله عن طريق اي حاجة ولو يكون حتة قماشة ساترة بيها بدنها من راسها لقدمها؟؟


وبعدين كمان يا ستي حتي لو مفيش عذاب ولا حساب اصلا ... تفتكري يعني اللي بيمنع حد عن الزنا ايه مثلا الا خوفه من انه بيرتكب معصية كبيرة يتهز لها عرش الرحمن ؟؟ مش خوفه انه تقبض روحه علي معصية؟؟
يعني ربنا خلقنا في الارض علشان اللي عايز يلعب يلعب واللي عايز يعمل يعمل؟؟ تبقي فايدتها ايه يعني الدنيا

ولا العابد التقي الورع اللي عاش عمره كله لله و في لحظة اذنب و قبض علي الذنب دا .. نقول ان ربنا مش عدل -استغفر الله تعالي عما يصفون


متفكرنيش بكلام المشاهير علشان الواحد بجد بيحزن ان دول صوتهم عالي و ليهم معجبين بيمشوا وراهم مهما قالوا ولا يعقلون .. ربنا يهدينا جميعا


انا شاغلاني حكاية كده بصرف فكري عنها بقالي كتير و زادت بعد ما رجعت من العزاء اليوم دا
احنا ممكن نشوف رؤي و كرامات كده من فرج الله ونعمه علينا .. اصحاب الديانات التانية بردة بيحسوا انهم بيشوفوا كده ... بيوهموا نفسهم مثلا ولا هي ارادة ربنا يضلهم ؟؟ بحاول مركزش فيه علشان عارفة انه شوية حيطة سد بس لفت انتباهي جدااا من اللي بسمعه من اهل المتوفي مثلا عن امارات شفوها ولا كلام قرأوه.. حاجات كده ... الله يثبت قلوبناعلي دين الحق ويكفينا شرور انفسنا

كفاية كده انا دخلتك في كذا حاجة :) بس الكلام معاكي جميل ربنا يباركلك

لقد خلقنا الله احرارا يقول...

أليس
انا اسفة اتأخرت فى الرد على تعليقك
لظروف خارجة عن ارادتى معلش
متفقة معاك فى كلامك
بس الموضوع الاخير ده فعلا مش عارفة افسره
فكرت كتير ومقدرتش اوصل لحاجة
يمكن الناس يكون عندها ايحاء
عايزة تطمن على موتاها
وده شعور طبيعى
فبيتهيألهم
او ربنا بيضل
زى ماقلت
او بيخترعوا
او الايمان بشىء والاعتقاد فيه بقوة
بيدينا احساس انه حقيقى
عارفة من الحاجات الجميلة اللى عرفتها ان سيدنا جبريل عليه السلام
فى اول نزول بالقران على سيدنا محمد صلى الله عليه وسلم
كان بيهزه اوى ويضمه ليه
علشان النبى عليه الصلاة والسلام يتأكد انه شايف سيدنا جبريل فعلا
وانه مش وهم
وعلشان ده أبلغ رد على اى حد هيشكك فى حقيقة الوحى
فده يكون يكون اثبات انه منفصل عن كيان وعقل النبى صلى الله عليه وسلم


الظاهر ان انا توهتك
معلش حظك
هنعمل ايه

أليس في بلاد العجائب يقول...

ابدا مش توهتيني

انا الحكاية اللي بقولك عليها دي هبلتني بصراحة مش علشان بحاول اقنع نفسي اننا صح وهما واهمين .. بس لاني حاسة ان في حاجة المفروض افهمها ومش قادرة اعرف سكتها من فين .. والموضوع دا بالذات شائك جدا جدا

وكمان معرفش لو حبيت اسأل اروح لمين في الزمن العجيب اللي عايشين فيه دا
اما حد هيشخط فيا علشان مفكرش في حاجة زي كده واخليني جنب الحيط ويقولي التفتي لعباداتك الاول لما تبقي تؤديها كويس ابقي شوفي غيرك
او حد هيتوهني في سكك تانية زي بتوع الفضائيات
او او
بصي انا مش قادرة اتخيل السكة هتكون ايه وهتيجي من مين .. بس بجد نفسي اعرف عن يقين ان الدين عند الله الاسلام .. بس اعرف هما صح فعلا؟ اصل الاشارات والرسائل والرؤي والدلالات مش كل مرة هتبقي صدفة والله اعلي واعلم

حيرتك معايا معلش
بس لو في يوم صادفك حاجة ليها علاقة بالموضوع دا ابقي دليني الله يكرمك :)

مهندس مصري يقول...

معاكي حق
بس ده يعبر عن حالة إنهزامهم الحضاري أمام الغرب
زي لما كانت الحضارة العربية هي المتفوقة كانت تعلم اللغة العربية هو الموضة في فرنسا
و وجدوا وثيقة لمؤرخ فرنسي وقتها بيشتكي مر الشكوى من إن شباب الطبقة الراقية اهمل اللغة اللاتينية و بقى بينظم قصائد شعرية موزونة و مقفاة باللغة العربية تقليداً لعرب و مسلمي الأندلس المتحضرين
:)

مهندس مصري يقول...

و أسف على التأخير في الرد بس كنت غايب عن النت لمدة إسبوع

لقد خلقنا الله احرارا يقول...

اليس

اسفة للمرة ال00000 الكتير اوى لتأخيرى فى الرد على تعليقك
بس فى أوقات كده ببص على الكمبيوتر وانا واقفة
معلش سامحينى

اجمل حاجة فى كلامك لما قلت انك مش عارفة
تسألى ازاى ومين
حسيت بيها اوى الكلمة دى
فاكرة لما قلت لى لما اعرف رأى الدكاترة فى المعهد ابلغك
انا فعلا قلت اسأل دكتور الفقه
هيكون اكتر واحد ممكن يفهمنى بالدليل
للاسف وقت المحاضرة كان ضيق ومقدرتش اقول سؤالى
واضطريت انى اسأله بعد انتهاء المحاضرة
وانا مش بحب كده
وكانت النتيجة المتوقعة
كلمة ورد غطاها

وانت اصلا تقولى السلام عليكم ليه
ماتقوليش

بصراحة اتاخدت
كان نفسى اقوله فلان قال وفلان قال
وحضرتك رأيك ايه

كسفنى


اما بالنسبة لموضوعك انا هدور عليه ان شاء الله
اما بسؤال فى ورقة لدكتور لانهم بيستفيضوا فى الاجابة ساعتها
او اشوف كتب ربنا يسهل

نورتينى ياحبيبتى
والكلام معاك لذيذ جدا
ومفيد جدا
ربنا يكرمك

لقد خلقنا الله احرارا يقول...

مهندس مصرى
يامرحبا يامرحبا
حجا مبرورا وذنبا مغفورا بأذن الله


كانت أيام
شباب الطبقة الراقية بيكتبو شعر بالعربى
وكانوا بيستخدموا كلمات عربى كتير دخلت فى لغاتهم
وبيترجموا كتبنا
وبيسافروا لمدارسنا فى الاندلس
علشان يبقوا تعلموا فى جامعات بلاد بره


طيب كفاية علشان هعيط

اكيد فى اوقات الضعف بيكون فى ناس شايفة ان الصح تقليد التقدم فى الدول التانية

بس بلاش الدين
فى مليون سبب للتخلف
سابهم وشايف اننا تخلفنا من اول ماعرفنا الاسلام
مش مذهب معين مثلا
او فكر معين
لا الكلام واضح
الاسلام
ده اللى ضايقنى الحقيقة
الدين بالذات واعتزازى بيه
لازم يكون شعور قلبى فى الاول
قبل ماانطقه بلسانى وانفذه بجوارحى

معلش على الرغى
حمدا لله على السلامة
ويارب ماتكونش نسيتنا من الدعاء

أليس في بلاد العجائب يقول...

انا فاكرة الموضوع وكنت هسألك لو سألتي حد ولا لا بس قلت اكيد لو انتي عرفتي جديد هتقوليلي :)

بصي انا اتصدمت صدمة وحشة اوي رمضان اللي فات في المسجد .. كان في صوت بسمعه يأمنا في الصلاة وصوته سبحان الله رائع .. ودعائه في القنوت خاشع و بيخلي القلب ينزف حزن علي ما فرط في جنب الله .. يعني كان يوم ولا اتنين بيصلي فيهم بتحسي بفرق شتان بينه وبين امام المسجد نفسه
مرة واحدة سامعين الامام في الخطبة اللي بين ركعات القيام .. بيقول فلان اللي بيستجدي الناس و بيسب بافظع الشتائم و و و و
الوصف كان وحش اوي
وسمعنا اصوات ما بين رافض ومؤيد
طلع الكلام علي الراجل اللي بحكيلك عليه
بجد اتصدمت
لان في كان واحدة ست من اللي دايما هناك .. بتقول علي فلان دا كلام الامام مظبوط هو بيعمل كده فعلا وكذا واحدة أيدت الكلام!!
بجد حسيت بكسرة نفس اوي و اتلهيت من كتر ما انا مش مصدقة ان اللي بيتقال دا بيحصل
ازاي تقف امام للناس في قيام لله و بتبكي بالخشوع دا و تسب وتلعن الاهل والدين ؟؟

والكلام العجيب اللي بيتقال في التليفزيون

و اللي بيتكتب في الجرائد اعجب وعايزين جنازة ويشبعوا فيها لطم
متفهميش مع العلمانية ولا  ضدها
عايزين الدين يقوم علي حيله ولا يتخفس بيه الارض

أسال مين بجد؟؟

انا لما بدور علي النت او حتي في كتب من القديمة .. في منهم حبة من ايام جدي الله يرحمه و بفتكر خالي الله يرحمه و جلسات العلم اللي كانت بتتعمل في مسجد المواساة في اسكندرية .. بقول لو احنا متمسكين بقشور و محتاسين فيها للدرجة دي .. اما لو بندرس علم شرعي بجد بجد وبما يرضي الله مش ما يلائم اهواء بعض الافراد واغراضهم.. كنا حصل فينا ايه ؟؟

ابسط حاجة بجد .. مش عارفة قريتيته ولا لا .. كان في موضوع كتبته عن "جوزةالطيب" اللي بتلاقيها في وصفات اكل كتيرة و في القنوات الفضائية زي الملح والفلفل كده في الاكلات .. وتكتشفي من ضمن مكوناتها مواد مخدرة لها تأثير المسكرات..يعني ما كثيره مسكر فقليله حرام والسعودية محرمة استيرادها .. كام مسلم من المليار يعرف حرمانية استعمالها؟؟؟

ولما عرفتها عرفتها بالصدفة لان بنت خالي بتدرس في معهد دراسات اسلامية في الخليج .. فدرستها هناك .. ولا كنت اتخيل ان في حاجة كده اصلا .. بس لما دورت اتأكدت .. مش من مواقع عربية علشان محدش يقول متلفقة .. لا من مواقع طبية اجنبية !!

دوشتك انا و برغي كتير اوي بس انتي بتدوسي علي الجرح :)

لقد خلقنا الله احرارا يقول...

اليس
لا موقف صعب فعلا
بس انا كنت بصلى فى رمضان فى جامع مش بيقرأ جزء كامل
وبعدين رحت جامع تانى بيقرأ بجزء
بس كنت متأخرة
والدنيا كانت زحمة
والسيدات تصرفاتهم مستفزة بصراحة
الشيطان اقنعنى مااجيش تانى
لغاية ماامام هناك
دعا ربنا دعاء رائع
خلانى اصريت ارجع الجامع تانى
وكان صوته وقراءته فى منتهى الجمال
تحسى ان صوته بيطلع السما
وماشاء الله احساسه بالقران
يخليكى مش تسرحى فى الصلاة
فى ايات كتير جدا انا مش حافظاها
بفتكر لغاية دلوقت قراءته ليها
وبعدين يغيب اسأل عنه بعدها
الاقيه توفى فى حادثة

مش قادرة اوصف لك انا زعلت عليه اد ايه


المهم زى مافى ناس تدينها ظاهرى
فى ناس نحسبهم على خير
بيعيشوا على الارض ضيوف


موضوع جوزة الطيب
انا مش قرأته عندك
والحمد لله مش اشتريتها غير يمكن مرة او اتنين
ولسه سامعة قريب انها حرام
مش كده بس
فى حاجات كتير بسيطة جدا
احنا مانعرفهاش
مرة قلت انى صمت الايام البيض فى ذى الحجة
وانا مش عارفة ان يوم 13 من ايام التشريق المنهى عن صيامها


ربنا يعلمنا ويهدينا
انا شايفة
اننا اتحرمنا كتير ندرس دين بجد
ومحتاجين وقت طويل نتعرف حتى على العبادات بتؤدى ازاى
فما بالك بالمعاملات
اللى عايزة تربية ودين مستقر فى القلب
وضمير يمنع

ربنا يسترنا ويرحمنا
تحياتى لك

أليس في بلاد العجائب يقول...

بيتهيألي دا من رضا ربنا عنه انك تفضلي فاكرة فعل صالح عمله ولو كان قراءة أية من كتاب الله :)

ربنا يرحمه ويلحقنا بالصالحين ان شاء الله .. كفياني دوشة كده :)
اجازة سعيدة ان شاء الله :)

لقد خلقنا الله احرارا يقول...

اليس
اللهم امين
لا انت مش عاملة دوشة ولا حاجة
انت منورانى وبيسعدنى الكلام معاك
انا فاضية خالص الليلة دى مش ورايا حاجة

انت تشرفينى فى أى وقت

أليس في بلاد العجائب يقول...

اخليني قاعدة يعني ولاايه D:

يجعله عامر دايما :)

تسلمي علي ذوقك

لقد خلقنا الله احرارا يقول...

طيب تشربى شاى
قولى بس متتكسفيش
الله يكرمك ياحبيبتى
انت اللى كلك ذوق

م/محمود فوزى يقول...

اختى الكريمه
جزاكم الله خيرا على هذا الموضوع الرائع
بصراحه الاخت جيجي هى التى نوهت عنه فى مدونتها
http://gigiandworld.blogspot.com/2009/12/blog-post_08.html

للاسف عندنا فى مصر فيه ناس من العلمانيين يتهجمون على الاسلام والمسلمين من غير اى دليل
وتلاقى كلامهم غريب ومصادرهم مشبوهه
ويرددوا الاكاذيب حت يصدقوها هم انفسهم
تبعالمقولة جوبلز (وزير اعلام هتلر) استمر فى الكذب حتى يصدقك الناس

رغم ان عمرو بن العاص رضى الله عنه كان له فضل كبير باننا اصبحنا مسلمين

وبرضه مصر كانت واقعه تحت الظلم الرومانى وكانت الناس مضطهده جدا ومفيش حد عايش فى امان ومفيش حريه دينيه ولا حريه اصلا
حتى كبار الرهبان كانوا هربانين فى الصحرا
وعمرو بن العاص رضى الله عنه هو اللى رجعهم

ودى وقائع تاريخيه
يعنى لا قدر الله من غير الاسلام كان زماننا قعدنا فتره زياده فى التخلف والانحطاط
والاسلام هو اللى خلانا نتقدم

اما انهم بياخدوا بكلام اللى بره بثقه فده لانهم فى الغالب من نتيجه الانهزاميه الثقافيه

ربنا يهدى الجميع
اشكرك مره تانيه واسف للاطاله

لقد خلقنا الله احرارا يقول...

م محمود فوزى
أهلا بحضرتك
سعيدة جدا بزيارة حضرتك
وأتمنى تتكرر
الناس دى مش عايزة تسمع
ومش عايزة تعرف تاريخ
حتى لو حاولنا
المشكلة مش فى عمرو بن العاص
هما بيكرهوه
لنفس الاسباب
اللى بتخلينا نحترمه
هما كراهيتهم محددة للاسلام
وشايفينه سبب للتخلف
مطلوب منهم
يعرفوا لنا يعنى ايه تخلف
وايه الخطة اللى عندهم للتخلص منه
ويعنى ايه تقدم من وجهة نظرهم
لوعندهم فهم خاطىء للاسلام
نتيجة لظروف معينة
مفيش مشكلة
نتفاهم
ومنعلم كلنا
لو هما زى ظنونى فيهم
بيكرهوا الاسلام كدين
ورغبتهم قوية فى الصاق تهم التخلف والانحطاط ليه
ربنا يهديهم
لانهم بجد ساعتها
هيصعبوا عليا اوى
حرموا نفسهم من خير كتير جدا

اسفة على الرغى
تحياتى لحضرتك
واتمنى الزيارة تتكرر

م/محمود فوزى يقول...

السلام عليكم
اختى الكريمه
اشكرك على ردك الجميل
انا اتفق معكي فى كل كلامك تقريبا
للعلم فان الكثير منهم لديه الفرصه للتعلم عن قرب عن الدين من اصوله وليس من طريق مايقوله الاعداء عنا

ولكنهم يتجاهلون ذلك
الافضل لنا ان نوضح لهم وللناس الحقائق
حتى لا يكون هناك تشويش على بعض الناس الذين ربما يتم النصب عليهم بمعلومات خاطئه

اما هم فربنا يهدينا ويهديهم
فهم امامهم وامامنا كنز كبير وهو الاسلام
من يفرط فيه فهو الخاسر اما الاسلام فهو عزيز وسيظل كذلك مهما عملوا

تشرفت بالتواجد هنا
ربنا يوفقكم