اشكى الظلم لسعد يا ويصا (2)

أبتدى منين الحكاية
بصراحة عندى حاجات كتير
مثلا
دايما وأنت رافع حواجبك وفخور بنفسك أوى
بتقولى أنا قبطى
طيب على أساس إيه مثلا
ان أنا لقيونى جنب جامع فى صحراء الربع الخالى
يعنى أنت بكلمة واحدة بتسحب منى بلدى وتنسبها لنفسك بس
اقعد أقولك قبطى يعنى مصرى
وأنا مصرية زيى زيك
وجدى وجدك
كانوا بيعبدوا الاصنام هما الاتنين
مع انى حاسة ان المصرى القديم عرف التوحيد فى أوقات كتير جدا
بصرف النظر عن التاريخ الرسمى ا لمكتوب
وجدى وجدك
نشفوا دماغهم هما الاتنين وأصروا على المسيحية
ومين مايصرش عليها
كفايه السيرة العطرة للمسيح عليه السلام وأمه المصطفاة خير نساء العالمين
ياعم ده أنت اللى اديت المسيحية روحك
أنت اللى ربطت بين الطاهرة مريم
وحبيبة قلبك ايزيس
وصورتها شايلة طفلها زيها
بس جدى الله يرحمه ويحسن اليه
قلبه رفرف مع دخول عمرو بن العاص مصر وأعجب جدا بالقعقاع بن عمرو
وورثنى حب عمر بن الخطاب
فقعد يكتر من الاسئلة
لغاية ماعرف الرسول عليه الصلاة والسلام
الموضوع وقتها انتهى بالنسبة له
جدك
اختلف معاه
حس انه لو دخل الاسلام
هيضيع الميراث الطويل من الاضطهاد اللى عانى منه من الرومان
لو سألت نفسك بحيادية
جدى ليه دخل الاسلام
مع انه هو اللى استحمل الرومان وغبائهم مرتين
مرة أيام وثنيتهم ومرة أيام مسيحيتهم
اللى حاولوا بكل الطرق يفرضوا مذهبهم علينا فيها
لو فكرت بحياد شوية
مش هتقول إنى مسلمة علشان فقيرة وما قدرتش أدفع الجزية بس
انا مش هناقشك فى الجزية وقيمتها ومين بيعفى منها
وهدفها ايه
وليه مالهاش لازمة دلوقت
انا بس عندى سؤال
عملت ايه فى فاتورة الكهرباء الشهرده ؟
دفعتها ومعاها فلوس النظافة
ولا رفضت تدفع
اهى دى أفظع من الجزية
بصراحة أنت بتتعمد اهانتى لما بتقول الكلام ده
النقاش فى الموضوع ده
لو على مستوى الناس العادية اللى أنا بقابلهم
مش هيكون فيه مشكلة
لكن المشكلة لما ييجى من مناصب كبيرة جدا فى الكنيسة
زى أسقف القوصية مثلا ومحاضرته المليئة بالالغام فى امريكا
ياربنا
بتفكرنى بأمريكا ليه ؟
كل ماتحصل حاجة
بتبقى هى أملك ومناك
عيب يابن بلدى ياصعيدى
ده انا واخويا على ابن عمى
وأمريكا دى عمرها ماكانت ابن عمنا ولا حتى من دمنا
نيجى للكوميديا السوداء فعلا
انت بتقول كلام مش ممكن تكون مصدقه
طيب ودينك ياراجل
انت مصدق حكاية ان المسلمين
بيخطفوا البنات المسيحيات ويجبروهم على الاسلام
لا شديدة دى !!
مش أنت اللى تقول الكلام ده
امريكا تقوله ماشى
دى ماتعرفش ربنا
لكن انت يامسيحى يامتدين
مصدق الكلام ده
طيب بعد ماخطفناها
ايه !!؟
شحناها مثلا على الاخرة
ولا بعناها فى أسواق الرقيق
لا الكلام ده بجد مايصحش
انا مدرسة ياباشا
واحتكاكى بالبنات كتير
وهقولك على حاجة انا شايفاها بعنيا
محدش الا مارحم ربى بيربى عياله دلوقت
سايبين البنات منتهى الانحلال
لا بتفرق معاهم
الولد اللى مستنيهم عند المدرسة ده مسيحى ولا مسلم ولا البلد كله تولع مش مشكلة
كمان عندك عداء مقصود للغة العربية
أنا معاك فى انك تتلو صلواتك وتمارس طقوسك باللغة اللى تشوفها مناسبة
لكن ايه مشكلتك مع العربى
ومين قال ان القبطية لغتنا الاصلية
هى صحيح فى مرحلة ما من تاريخنا كانت تعبير عن الاستقلال
لكن هى اساسا مكتوبة بحروف يونانى
ايه وجه المصرية فيها يعنى
ان اصلها الهيروغليفية
طيب ما الهيروغليفية اساسا
لغة مش كاملة النمو
وبتعتمد اساسا على المقاطع الصوتية مش حروف الهجاء
وغير صالحة للتعامل فى زماننا
وكمان ياراجل
انت ادرى اكتر منى
انها ماتت من زمان وشبعت موت من قبل الفتح العربى بمئات السنين
اه فكرتنى
الغزو العربى
وواجعك اوى الاستقلال الضائع
طيب ماتزعلش منى انا غلسة اوى المرة دى
لما عمرو بن العاص دخل مصر
البابا كان فين
انا عرفت انه كان فى الصحراء 10 سنين
وان عمرو هو اللى رجعه كنيسته
دلوقت عمرو اصبح شيطان ومحتل
ونابليون كان ملاك بجناحين
علشان كده زعلت اوى
لما جبنا سيرة المعلم يعقوب
مين فينا دلوقت اللى باع القضية
لا أنا رغيت كتير المرة دى
وشكلك كده زعلت منى
معلش ماهو ميراث سنين كتير
يمكن اتكلم معاك تانى
يمكن

102 التعليقات:



المعتصم يقول...

يعنى مالقيتيش غير الموضوع ده وتتكلمى فيه اليومين دول؟؟؟؟؟؟؟
دى الدنيا مولعه هنا عندنا فى البلد
قاعدين فى البلد على نار
ان كان مسلمين او مسيحيين
معلش مش هقدر اعلق عشان مايغلبش على كلامى موقف معين ومكونش عادل وانا بتكلم ومش حيادى
انا بس قلت اسلم وامشى
ســـــــــــلام

أليس في بلاد العجائب يقول...

مع احترامي للمناقشة

بس لا انا ولا انتي ولا هو واخدين حقنا
اسال عن اصلي واصلك لما يبقي في حقي وحقك
انما حقنا منهوب
الموت لما بيجي مبيفرقش بين مسلم ومسيحي .. اللي بيموتوا في المصائب الللي عمالة تحصلنا من الاهمال و فجر الكبار مش بيفرق فيها بشاعتها موتة المسلم عن موتة المسيحي .. الكل مصاب في نفسه واهله وماله ودينه

يعني الاولي بدل ما ازق اللي جنبي و العن واسب .. احط ايدي في ايده علي خير في الخير .. علشان الارض دي ارض ربنا انعم بيها علينا كلنا لم تخلق للمسلم بس ولا للمسيحي بس .. ارض الله لخلق الله .. ظلمناها واتظلمنا عليها فبلاش يبقي ظلمنا مننا فينا

ربنا يكفينا شر فتنة الدنيا ويهدينا

لقد خلقنا الله احرارا يقول...

المعتصم
اهلا وسهلا بك
سواء بتعليق او من غير
هو فعلا انا بعيد عن الاحداث
مش حاسة بالشد والتوتر اللى الناس فيه
ربنا يستر
الله يسلمك

لقد خلقنا الله احرارا يقول...

اليس
لتانى مرة
معنديش كلام اقوله بعد كلامك
ربنا يحفظنا ويحفظ بلادنا من كل سوء
ويهدينا لخيرها وخيرنا
ويبعد عننا مصاصين الدماء
عديمى الملة
اللى بيلعبوا على خلافاتنا

الشجرة الأم يقول...

في الحقيقة هذه المسألة قد وجدت في اعتقادي حتى تزيد من فرقة البلد الواحد بكل أديانه وطوائفه وخصوصا أنه عرف الدول الإسلامية السابقة التسامح بين الأديان ومراعاة حقوق أهل الذمة الذين لم يشعروا قط أنهم في بلد غريب.

لورنس العرب يقول...

فيه بعض الاخوه ينكرون التاريخ وخاصة فيما يتعلق بعمرو بن العاص
ولله عندي كلام كتير في الموضوع ده كنت كتبته زمان في منتدى ابن مريم
لكن متهيألي صعب الكلام دلوقت لأن خلاص اللي في دماغه حاجه لايمكن يغيرها ابدا

لقد خلقنا الله احرارا يقول...

الشجرة الام
اهلا بك فى اول زيارة
يارب تتكرر تانى
بس كلامك عن تاريخ المسلمين مع أهل الذمة كان زمان
دلوقت سب المسلمين وعهدهم وتاريخهم اصبح موضة

لقد خلقنا الله احرارا يقول...

لورنس العرب
الله يكرمك
انشر موضوعك عن عمرو بن العاص ولو فى نحن والغرب
لان عمرو بن العاص حقيقى من البنى ادمين
اللى انا حاسة انهم هيمسكوا فى رقبتى يوم القيامة
لانى قعدت فترة احفظ البنات الكلام الفارغ اللى درسناه عن خبثه والتحكيم والقصص دى
دلوقت الحمد لله بصلح الدنيا شوية
بس الاجيال اللى عدت وهى فاهمة القصة غلط
انا مشتركة فى ذنب عمرو بالنسبة لها
الله يكرمك انشره
على ماأنا ربنا يكرمنى
وافضى شوية وأجمع معلومات عنه

well يقول...

يعنى اى قبطى ؟
وهو ليه المصريين تركوا عبادة الاصنام؟
علشان يعبدوا الله الواحد
ماذا تقول المسيحية وماذا يقول الاسلام؟
اعبدوا الله الواحد
يعنى اى كل مشكلة نلجأ الى امريكا ؟
يعنى اى فاتورة كهربا ويعنى اى جزية ؟
استاذتى ..اتمنى ان صوتك يوصل لهم .
تحياتى

لقد خلقنا الله احرارا يقول...

اسئلة جميلة جدا ياويل
باختصار زى مابتحب
وقلت كل حاجة
بس صوتى يوصل فين ولمين
اللى فى القلب فى القلب
وللى بيزكوا الفتنة
ليهم مصالح بيسعوا لتحقيقها
ربنا يستر

بدراوى يقول...

ازيك
انا قريت الموضوعين بجزئيهم الإثنين
بس ليا تعليق حيكون صادم شوية
الأول انا مسلم و ده لتوضيح الموضوع

بس حضرتك دافعتى عن تصرفات المسلمين
رغم ان الاولى هو ادانة بعض تصرفات المسلمين المسيئة للإسلام و لصورته

زى الخبر ده مثلاً

http://www.youm7.com/News.asp?NewsID=150140

و ليا تعليق تانى
على اللينك اللى اشارت اليه اليس فى بلاد العجائب - ده

http://www.islamway.com/?iw_s=Fatawa&iw_a=view&fatwa_id=9310

ابن عثيمين اخر واحد اسمعله
و الحديث كمان انا مش مقتنع بيه
و ربنا يسامحنى بقى لو هو حديث صحيح فعلاً
لأنه لا يتفق مع روح الإسلام السمحة
اللى نتمناها
لا يتفق مع سلوك الرسول عليه الصلاة و السلام اللى راح يسأل على اليهودى اللى كان بيرمى القاذورات عند بيته

لا يتفق مع الموقف ده

إن رسول الله صلى الله عليه وسلم مرت به جنازة فقام فقيل إنه يهودي فقال أليست نفسا
---
مع تحياتى
---
و ياريت حضرتك تشوفى المواضيع ديه
انا كتبتها من حوالى سنة و يهمنى اطلاعك عليها عشان تفهمى رأيى اكثر

http://ta3melboyout.blogspot.com/2008/06/blog-post_5040.html

http://ta3melboyout.blogspot.com/2008/06/blog-post_2505.html

أليس في بلاد العجائب يقول...

السلام عليكم ورحمة الله وبركاته

بعد اذنك يا اختي ، ممكن ارد علي بدراوي :)

اعترض علي رجل علم دون رجل علم اخر زي ما تحب .. قبول المعلومة من اكس لي ممكن متكونش مقبولة منه ليك .. والعكس صحيح طبعا :)

علشان كده اختلاف الائمة رحمة بينا .. في امور ميسرة ما بين الطاعات ممكن تختار اقربها لقلبك لتؤديها وتتبع قول رسول الله صلي الله عليه وسلم "استف قلبك وان افتوك"

دي نقرة يا محمد و موضوع الحديث النبوي الشريف نقرة اخري خالص


انا قبل ما انقله هناك عملت عليه بحث كتير
وفي ردي قولت ان في كلام من الافضل عدم ذكره رغم صحته جداااااااااا .. علشان احنا أمة وصف رسولنا لينا ان المسلم لازم يكون كيس وفطن و يعرف امتي يتكلم وامتي يسكت وليه

بغض النظر عن شخصي خالص وعن رايي وعن اي حاجة قولتها

الحديث النبوي الشريف صحيح
وراوية سيدنا ابو هريرة عن الرسول صلي الله عليه وسلم


مش الغرض منه تحقير ولا تقليل شأن اصحاب الكتاب (شوف زمان باه علي عهد الرسول صلي الله عليه وسلم كانت اخلاقهم ازاي ودلوقتي ازاي)

http://hadith.al-islam.com/Display/Display.asp?Doc=2&ID=2380&SearchText=%E1%C7%20%CA%C8%CF%C3%E6%C7%20%C7%E1%ED%E5%E6%CF%20%E6%C7%E1%E4%D5%C7%D1%ED%20%C8%C7%E1%D3%E1%C7%E3&SearchType=root&Scope=all&Offset=20&SearchLevel=QBE

خد اللينك دا واقرأ الحديث و شرحه

http://hadith.al-islam.com/Display/Display.asp?Doc=11&ID=81359&SearchText=%E1%C7%20%CA%C8%CF%C3%E6%C7%20%C7%E1%ED%E5%E6%CF%20%E6%C7%E1%E4%D5%C7%D1%ED%20%C8%C7%E1%D3%E1%C7%E3&SearchType=root&Scope=all&Offset=120&SearchLevel=QBE

ودا كمان

بس انا كان غرضي الاساسي من ذكره في التعليق

اني اقولها انها متفرضش علي غير المسلم انه يرد عليها تحية الاسلام .. علي فرض ان السلام دا مش بيعجبه .. مش هيرد .. وهي هتزعل وتقول عليه بيكرهنا .. وهو هيقول عليها عايزة تضايقه او الافلام بتاعت الاجبار علي اعتناق افكار اسلامية .. وهكذا

وليه كل دا

سهل جدا اسلم عليه باي تحية و احفظ تحية ديني متصانة لاخي المسلم اللي يعرف قيمة يعني ايه بتلقي السلام علي اخيك و بتدعو له بالسلام والرحمة والبركة :)


احنا كنا بنتناقش ومازلنا

لو بان اني بثير نقطة المفروض لا تثار .. انا حبيت اوضح سببها ايه لاني احسبها عند الله علي خير وانها بتسمع كلام المصطفي صلي الله عليه وسلم ..

يعني الخلاصة .. حيي غير المسلم بتحية غير تحية الاسلام


و علي فكرة في اوامر نبوية كتيرة جدا في السنة فيها امر بمخالفة اليهود والنصاري في افعالهم .. و مذكورة في كتب موثوق فيها ..

كل مش معناها حاجة غير " لكم دينكم ولي دين"

التعايش بين بني البشر ابسط كتير من اللي حاصل الايام دي .. بس لو كل واحد يخليه في حاله و يسمع كلام ربنا يطيع اوامره و يتجب نواهيه!!!


معلش انا طولت بس صعبان علي اوي انك شفته لا يتفق مع روح الاسلام السمحة .. هو لا دعي لاهانة ولا تقليل شأن ولا غيره ..

انا تعاملاتي مع المسيحيين كتيرة جدا .. كتير جدا منهم بيقبلوا اللي يلقي عليهم (السلام عليكم) ويردوا (وعليكم السلام) .. وفي بردة كتير مش بيردوا خالص ساعتها الا لو قلتله تحية تانية بعدها يتجاهل السلام ويرد علي اللي بعدها
دي حقيقة


ويبقي اللي في القلب في القلب لا يعلمه الا الله

بس نتعامل انسان لانسان نراعي بعض و نحط ايدينا في ايدين بعض لمصلحتنا كلنا لاننا كلنا عايشين علي نفس الارض بنشرب نفس المية و الموت بيجيلنا كلنا بدون تمييز

معذرة اذا ازعجتكم

غير معرف يقول...

ربنا يكرمك
حقيقى بوست هايل ربنا يعزك يارب

وانتى جبتى كل اللى عايزين نقوله وبرفض كلام الاستاذ بدراوى احنا مازيدناش ممنعناش حد يدخل المسيحيه فروحناش نقتل فى الناس
كاعملناش دوله جوا دوله زي الكنائس
جيجى والعالم

بدراوى يقول...

اخت اليس فى بلاد العجائب
حتى تفسير الحديث فيه اهانة للأسلام
و للأسف تفسيره كله غير مقتنع بيه

و وواضح منه تحقير اهل الكتاب

عشان كدة كلام زى ده من الافضل عدم ذكره

----
اما اخت جيجى و العالم

انا مفهمتش تعليقك خالص
خاصة انه مالوش اى علاقة بالكلام اللى انا قولته اصلاً

أليس في بلاد العجائب يقول...

" وَمَا آتَاكُمُ الرَّسُولُ فَخُذُوهُ وَمَا نَهَاكُمْ عَنْهُ فَانتَهُوا" [الحشر 7]

"أَطِيعُواْ اللّهَ وَأَطِيعُواْ الرَّسُولَ وَأُوْلِي الأَمْرِ مِنكُمْ.. " [النساء 59]

وفي غيرها آيات كثيرة جدا وردت في القرآن الكريم


قال رسول الله صلى الله عليه وسلم فى حديث العرباض ابن سارية:

"فإنه من يَعِشْ منكم بعدي فسيرى اختلافا كثيرا
فعليكم بسنتي وسنة الخلفاء الراشدين المهديين
عضوا عليها بالنواجذ
وإياكم والمحدثات فإن كل محدثة بدعة ،
وقال أبو عاصم مرة وإياكم ومحدثات الأمور
فإن كل بدعة ضلالة"
قال الترمذى حسن صحيح, وصححه الألبانى

-----------------

ممكن سؤال بدون تسفيه لو تسمح يا استاذ بدراوي

اهل الكتاب ،، ذكرهم الله باوصاف ايه في القرآن ؟؟

---------------------------------

عدم اقتناعك بحديث لا ينفي انه حديث صحيح ..


معتقدش انك بتحكم عقلك في الدين في كل حاجة ..
والا بتركع ليه مثلا مرة وتسجد مرتين ؟؟


ربنا قال من صفات المؤمنين انهم يطيعوا الرسول فما ينطق عن الهوي .. المعصوم صلي الله عليه وسلم

بدراوى يقول...

أخت اليس فى بلاد العجائب
هو مش حضرتك لسة قايلة

وفي ردي قولت ان في كلام من الافضل عدم ذكره رغم صحته جداااااااااا .. علشان احنا أمة وصف رسولنا لينا ان المسلم لازم يكون كيس وفطن و يعرف امتي يتكلم وامتي يسكت وليه
؟!

بدراوى يقول...

أليس و بعدين انا مش بحكم عقلى ففط
عقلى و ايمانى
ما هو مش معقولة نقول الإسلام بيحترم حقوق اصحاب الديانات الأخرى و
حديث للرسول بيقول من اذى ذمياً
فانا خصيمه يوم القيامة

و فى حديث اخر فقد اذانى

حسب ما اتذكر لأنى ثقافتى الدينية مش واسعة

و بعدين الاقى حديث بيقول ما ترميش السلام على ذمياً و لو ماشى معاه فى طريق ضيقه عليه لأ و القاء السلام عليه فيه رفعه لمكانة عالية
!!!!

انا جوايا افكار كثير مش مقتنع بيها
و بدعى انه ربنا يرحمنى و يسامحنى
لأن للأسف هناك افكار كثير حوالين الإسلام
من السهل اى حد يتخذها كدليل ضد الإسلام

و اشهد ان لا اله الا الله و ان محمد رسول الله

أليس في بلاد العجائب يقول...

انا موجهتش كلامي لا ليهود ولا نصاري
وجهت لفتة بنية حسنة لمسلمة .. ولها حرية اتباع ما ورد فيها او لا

وتكلمت عن اليهود والنصاري بردة بنية حسنة من سابق عشرة طويلة مع مسيحيين و كام سنة تعامل عملي مع شوية يهود من جنسيات مختلفة

حسيتك متخيل اني بصب بنزين علي النار ...

انا لما بشوف كلام بين غير المسلم وغير المسلم عن معتقداته .. مش بقراها ولا بسمعها ولا بلتفت اليها لانها لا تلزمني في شيء .. وبناءا عليه اتوقع ان الاخر هيتعامل من نفس المنطلق بما ان كل واحد مقتنع انه الاصح و انه قابض علي الحق

وبردة انت مجاوبتنيش علي السؤال !!

أليس في بلاد العجائب يقول...

انا والله مكنتش بتريق ولا بحاول اضايقك بسؤالي

بس لو انت دورت بنفسك علي اجابة السؤال و ربنا وصف اهل الكتاب باية مش هتلاقي اي اختلاف من اللي انت شفته دا بين الحديثين

بدراوى يقول...

انا عملت سيرش على مصحف الكترونى عندى على الجهاز و لقيت الأيات ديه
-------------
{مَّا يَوَدُّ الَّذِينَ كَفَرُواْ مِنْ أَهْلِ الْكِتَابِ وَلاَ الْمُشْرِكِينَ أَن يُنَزَّلَ عَلَيْكُم مِّنْ خَيْرٍ مِّن رَّبِّكُمْ وَاللّهُ يَخْتَصُّ بِرَحْمَتِهِ مَن يَشَاءُ وَاللّهُ ذُو الْفَضْلِ الْعَظِيمِ }البقرة105

{وَدَّ كَثِيرٌ مِّنْ أَهْلِ الْكِتَابِ لَوْ يَرُدُّونَكُم مِّن بَعْدِ إِيمَانِكُمْ كُفَّاراً حَسَداً مِّنْ عِندِ أَنفُسِهِم مِّن بَعْدِ مَا تَبَيَّنَ لَهُمُ الْحَقُّ فَاعْفُواْ وَاصْفَحُواْ حَتَّى يَأْتِيَ اللّهُ بِأَمْرِهِ إِنَّ اللّهَ عَلَى كُلِّ شَيْءٍ قَدِيرٌ }البقرة109

{قُلْ يَا أَهْلَ الْكِتَابِ تَعَالَوْاْ إِلَى كَلَمَةٍ سَوَاء بَيْنَنَا وَبَيْنَكُمْ أَلاَّ نَعْبُدَ إِلاَّ اللّهَ وَلاَ نُشْرِكَ بِهِ شَيْئاً وَلاَ يَتَّخِذَ بَعْضُنَا بَعْضاً أَرْبَاباً مِّن دُونِ اللّهِ فَإِن تَوَلَّوْاْ فَقُولُواْ اشْهَدُواْ بِأَنَّا مُسْلِمُونَ }آل عمران64

{يَا أَهْلَ الْكِتَابِ لِمَ تُحَآجُّونَ فِي إِبْرَاهِيمَ وَمَا أُنزِلَتِ التَّورَاةُ وَالإنجِيلُ إِلاَّ مِن بَعْدِهِ أَفَلاَ تَعْقِلُونَ }آل عمران65

{وَدَّت طَّآئِفَةٌ مِّنْ أَهْلِ الْكِتَابِ لَوْ يُضِلُّونَكُمْ وَمَا يُضِلُّونَ إِلاَّ أَنفُسَهُمْ وَمَا يَشْعُرُونَ }آل عمران69

{يَا أَهْلَ الْكِتَابِ لِمَ تَكْفُرُونَ بِآيَاتِ اللّهِ وَأَنتُمْ تَشْهَدُونَ }آل عمران70

{يَا أَهْلَ الْكِتَابِ لِمَ تَلْبِسُونَ الْحَقَّ بِالْبَاطِلِ وَتَكْتُمُونَ الْحَقَّ وَأَنتُمْ تَعْلَمُونَ }آل عمران71

{وَقَالَت طَّآئِفَةٌ مِّنْ أَهْلِ الْكِتَابِ آمِنُواْ بِالَّذِيَ أُنزِلَ عَلَى الَّذِينَ آمَنُواْ وَجْهَ النَّهَارِ وَاكْفُرُواْ آخِرَهُ لَعَلَّهُمْ يَرْجِعُونَ }آل عمران72

{وَمِنْ أَهْلِ الْكِتَابِ مَنْ إِن تَأْمَنْهُ بِقِنطَارٍ يُؤَدِّهِ إِلَيْكَ وَمِنْهُم مَّنْ إِن تَأْمَنْهُ بِدِينَارٍ لاَّ يُؤَدِّهِ إِلَيْكَ إِلاَّ مَا دُمْتَ عَلَيْهِ قَآئِماً ذَلِكَ بِأَنَّهُمْ قَالُواْ لَيْسَ عَلَيْنَا فِي الأُمِّيِّينَ سَبِيلٌ وَيَقُولُونَ عَلَى اللّهِ الْكَذِبَ وَهُمْ يَعْلَمُونَ }آل عمران75

{قُلْ يَا أَهْلَ الْكِتَابِ لِمَ تَكْفُرُونَ بِآيَاتِ اللّهِ وَاللّهُ شَهِيدٌ عَلَى مَا تَعْمَلُونَ }آل عمران98

{قُلْ يَا أَهْلَ الْكِتَابِ لِمَ تَصُدُّونَ عَن سَبِيلِ اللّهِ مَنْ آمَنَ تَبْغُونَهَا عِوَجاً وَأَنتُمْ شُهَدَاء وَمَا اللّهُ بِغَافِلٍ عَمَّا تَعْمَلُونَ }آل عمران99

{كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ وَلَوْ آمَنَ أَهْلُ الْكِتَابِ لَكَانَ خَيْراً لَّهُم مِّنْهُمُ الْمُؤْمِنُونَ وَأَكْثَرُهُمُ الْفَاسِقُونَ }آل عمران110

{لَيْسُواْ سَوَاء مِّنْ أَهْلِ الْكِتَابِ أُمَّةٌ قَآئِمَةٌ يَتْلُونَ آيَاتِ اللّهِ آنَاء اللَّيْلِ وَهُمْ يَسْجُدُونَ }آل عمران113

{وَإِنَّ مِنْ أَهْلِ الْكِتَابِ لَمَن يُؤْمِنُ بِاللّهِ وَمَا أُنزِلَ إِلَيْكُمْ وَمَا أُنزِلَ إِلَيْهِمْ خَاشِعِينَ لِلّهِ لاَ يَشْتَرُونَ بِآيَاتِ اللّهِ ثَمَناً قَلِيلاً أُوْلَـئِكَ لَهُمْ أَجْرُهُمْ عِندَ رَبِّهِمْ إِنَّ اللّهَ سَرِيعُ الْحِسَابِ }آل عمران199

{لَّيْسَ بِأَمَانِيِّكُمْ وَلا أَمَانِيِّ أَهْلِ الْكِتَابِ مَن يَعْمَلْ سُوءاً يُجْزَ بِهِ وَلاَ يَجِدْ لَهُ مِن دُونِ اللّهِ وَلِيّاً وَلاَ نَصِيراً }النساء123

{يَسْأَلُكَ أَهْلُ الْكِتَابِ أَن تُنَزِّلَ عَلَيْهِمْ كِتَاباً مِّنَ السَّمَاءِ فَقَدْ سَأَلُواْ مُوسَى أَكْبَرَ مِن ذَلِكَ فَقَالُواْ أَرِنَا اللّهِ جَهْرَةً فَأَخَذَتْهُمُ الصَّاعِقَةُ بِظُلْمِهِمْ ثُمَّ اتَّخَذُواْ الْعِجْلَ مِن بَعْدِ مَا جَاءتْهُمُ الْبَيِّنَاتُ فَعَفَوْنَا عَن ذَلِكَ وَآتَيْنَا مُوسَى سُلْطَاناً مُّبِيناً }النساء153

{وَإِن مِّنْ أَهْلِ الْكِتَابِ إِلاَّ لَيُؤْمِنَنَّ بِهِ قَبْلَ مَوْتِهِ وَيَوْمَ الْقِيَامَةِ يَكُونُ عَلَيْهِمْ شَهِيداً }النساء159

{يَا أَهْلَ الْكِتَابِ لاَ تَغْلُواْ فِي دِينِكُمْ وَلاَ تَقُولُواْ عَلَى اللّهِ إِلاَّ الْحَقِّ إِنَّمَا الْمَسِيحُ عِيسَى ابْنُ مَرْيَمَ رَسُولُ اللّهِ وَكَلِمَتُهُ أَلْقَاهَا إِلَى مَرْيَمَ وَرُوحٌ مِّنْهُ فَآمِنُواْ بِاللّهِ وَرُسُلِهِ وَلاَ تَقُولُواْ ثَلاَثَةٌ انتَهُواْ خَيْراً لَّكُمْ إِنَّمَا اللّهُ إِلَـهٌ وَاحِدٌ سُبْحَانَهُ أَن يَكُونَ لَهُ وَلَدٌ لَّهُ مَا فِي السَّمَاوَات وَمَا فِي الأَرْضِ وَكَفَى بِاللّهِ وَكِيلاً }النساء171

بدراوى يقول...

و ديه
--------
{يَا أَهْلَ الْكِتَابِ قَدْ جَاءكُمْ رَسُولُنَا يُبَيِّنُ لَكُمْ كَثِيراً مِّمَّا كُنتُمْ تُخْفُونَ مِنَ الْكِتَابِ وَيَعْفُو عَن كَثِيرٍ قَدْ جَاءكُم مِّنَ اللّهِ نُورٌ وَكِتَابٌ مُّبِينٌ }المائدة15

{يَا أَهْلَ الْكِتَابِ قَدْ جَاءكُمْ رَسُولُنَا يُبَيِّنُ لَكُمْ عَلَى فَتْرَةٍ مِّنَ الرُّسُلِ أَن تَقُولُواْ مَا جَاءنَا مِن بَشِيرٍ وَلاَ نَذِيرٍ فَقَدْ جَاءكُم بَشِيرٌ وَنَذِيرٌ وَاللّهُ عَلَى كُلِّ شَيْءٍ قَدِيرٌ }المائدة19

{قُلْ يَا أَهْلَ الْكِتَابِ هَلْ تَنقِمُونَ مِنَّا إِلاَّ أَنْ آمَنَّا بِاللّهِ وَمَا أُنزِلَ إِلَيْنَا وَمَا أُنزِلَ مِن قَبْلُ وَأَنَّ أَكْثَرَكُمْ فَاسِقُونَ }المائدة59

{وَلَوْ أَنَّ أَهْلَ الْكِتَابِ آمَنُواْ وَاتَّقَوْاْ لَكَفَّرْنَا عَنْهُمْ سَيِّئَاتِهِمْ وَلأدْخَلْنَاهُمْ جَنَّاتِ النَّعِيمِ }المائدة65

{قُلْ يَا أَهْلَ الْكِتَابِ لَسْتُمْ عَلَى شَيْءٍ حَتَّىَ تُقِيمُواْ التَّوْرَاةَ وَالإِنجِيلَ وَمَا أُنزِلَ إِلَيْكُم مِّن رَّبِّكُمْ وَلَيَزِيدَنَّ كَثِيراً مِّنْهُم مَّا أُنزِلَ إِلَيْكَ مِن رَّبِّكَ طُغْيَاناً وَكُفْراً فَلاَ تَأْسَ عَلَى الْقَوْمِ الْكَافِرِينَ }المائدة68

{قُلْ يَا أَهْلَ الْكِتَابِ لاَ تَغْلُواْ فِي دِينِكُمْ غَيْرَ الْحَقِّ وَلاَ تَتَّبِعُواْ أَهْوَاء قَوْمٍ قَدْ ضَلُّواْ مِن قَبْلُ وَأَضَلُّواْ كَثِيراً وَضَلُّواْ عَن سَوَاء السَّبِيلِ }المائدة77

{وَلَا تُجَادِلُوا أَهْلَ الْكِتَابِ إِلَّا بِالَّتِي هِيَ أَحْسَنُ إِلَّا الَّذِينَ ظَلَمُوا مِنْهُمْ وَقُولُوا آمَنَّا بِالَّذِي أُنزِلَ إِلَيْنَا وَأُنزِلَ إِلَيْكُمْ وَإِلَهُنَا وَإِلَهُكُمْ وَاحِدٌ وَنَحْنُ لَهُ مُسْلِمُونَ }العنكبوت46

{وَأَنزَلَ الَّذِينَ ظَاهَرُوهُم مِّنْ أَهْلِ الْكِتَابِ مِن صَيَاصِيهِمْ وَقَذَفَ فِي قُلُوبِهِمُ الرُّعْبَ فَرِيقاً تَقْتُلُونَ وَتَأْسِرُونَ فَرِيقاً }الأحزاب26

{لِئَلَّا يَعْلَمَ أَهْلُ الْكِتَابِ أَلَّا يَقْدِرُونَ عَلَى شَيْءٍ مِّن فَضْلِ اللَّهِ وَأَنَّ الْفَضْلَ بِيَدِ اللَّهِ يُؤْتِيهِ مَن يَشَاءُ وَاللَّهُ ذُو الْفَضْلِ الْعَظِيمِ }الحديد29

{هُوَ الَّذِي أَخْرَجَ الَّذِينَ كَفَرُوا مِنْ أَهْلِ الْكِتَابِ مِن دِيَارِهِمْ لِأَوَّلِ الْحَشْرِ مَا ظَنَنتُمْ أَن يَخْرُجُوا وَظَنُّوا أَنَّهُم مَّانِعَتُهُمْ حُصُونُهُم مِّنَ اللَّهِ فَأَتَاهُمُ اللَّهُ مِنْ حَيْثُ لَمْ يَحْتَسِبُوا وَقَذَفَ فِي قُلُوبِهِمُ الرُّعْبَ يُخْرِبُونَ بُيُوتَهُم بِأَيْدِيهِمْ وَأَيْدِي الْمُؤْمِنِينَ فَاعْتَبِرُوا يَا أُولِي الْأَبْصَارِ }الحشر2

{أَلَمْ تَر إِلَى الَّذِينَ نَافَقُوا يَقُولُونَ لِإِخْوَانِهِمُ الَّذِينَ كَفَرُوا مِنْ أَهْلِ الْكِتَابِ لَئِنْ أُخْرِجْتُمْ لَنَخْرُجَنَّ مَعَكُمْ وَلَا نُطِيعُ فِيكُمْ أَحَداً أَبَداً وَإِن قُوتِلْتُمْ لَنَنصُرَنَّكُمْ وَاللَّهُ يَشْهَدُ إِنَّهُمْ لَكَاذِبُونَ }الحشر11

{لَمْ يَكُنِ الَّذِينَ كَفَرُوا مِنْ أَهْلِ الْكِتَابِ وَالْمُشْرِكِينَ مُنفَكِّينَ حَتَّى تَأْتِيَهُمُ الْبَيِّنَةُ }البينة1

{إِنَّ الَّذِينَ كَفَرُوا مِنْ أَهْلِ الْكِتَابِ وَالْمُشْرِكِينَ فِي نَارِ جَهَنَّمَ خَالِدِينَ فِيهَا أُوْلَئِكَ هُمْ شَرُّ الْبَرِيَّةِ }البينة6

بدراوى يقول...

و انا فى انتظار ردك على الكلام ده
اللى حعيده تانى
------------------
أخت
أليس

و بعدين انا مش بحكم عقلى ففط
عقلى و ايمانى
ما هو مش معقولة نقول الإسلام بيحترم حقوق اصحاب الديانات الأخرى و
حديث للرسول بيقول من اذى ذمياً
فانا خصيمه يوم القيامة

و فى حديث اخر فقد اذانى

حسب ما اتذكر لأنى ثقافتى الدينية مش واسعة

و بعدين الاقى حديث بيقول ما ترميش السلام على ذمياً و لو ماشى معاه فى طريق ضيقه عليه لأ و القاء السلام عليه فيه رفعه لمكانة عالية
!!!!

أليس في بلاد العجائب يقول...

من آذى ذميا فأنا خصمه يوم القيامة
الراوي: - خلاصة الدرجة: ليس له أصل - المحدث: الإمام أحمد - المصدر: تنقيح تحقيق التعليق - الصفحة أو الرقم: 2/267
وجاء في كشف الخفاء 2/152



من ظلم ذميا كنت خصمه:
رواه أبو داود بسند حسن بلفظ من ظلم معاهدا أو تنقصه حقه أو كلفه فوق طاقته أو أخذ منه شيئا بغير طيب نفس فأنا خصمه يوم القيامة . وتقدم في : من آذى ذميا
وقال الشوكاني في الفوائد المجموعة ص213
حديث من آذى ذميا فأنا خصمه يوم القيامة قيل موضوع وقال العراقي له طرق.
وجاء في ضعيف الجامع الصغير :
12093 - من آذى ذميا فأنا خصمه و من كنت خصمه خصمته يوم القيامة
( خط ) عن ابن مسعود .

قال الشيخ الألباني : ( ضعيف ) انظر حديث رقم : 5314 في ضعيف الجامع

ومما يحسن نقله لإتمام هذا البحث: توضيح حكم إيذاء (المعاهد) أو (الذمي)، كيلا يظن أحدٌ أن إيذاءهم جائز لكون الحديث -السابق ذكره في البحث- مكذوب، فهناك الحديث:

(ألا من ظلم معاهدًا أو انتقصه أو كلفه فوق طاقته أو أخذ منه شيئا بغير طيب نفس: فأنا حجيجه يوم القيامة) رواه أبو داود، وهو صحيح أو حسن على أقل تقدير، وحسنه ابن حجر والألباني رحمهما الله

-------------------------------


يعني الحديث اللي حضرتك ذكرته قيل عنه موضوع ولا اصل لسنده اوصحته و ضعيف .. باللفظ دا

اما عن الظلم .. فقد حرم الله الظلم علي نفسه .. و دعوة المظلوم ليس بينها وبين الله حجاب

دا الاسلام

لا ظلم ولا اكل حق حد ولا جبر ولا لعن

أليس في بلاد العجائب يقول...

بالله عليك

اقرأ الايات اللي حضرتك نقلتها كده

و طلع منها الصفات ..

وقولي اللي لقيته فيها.. فيه ايه مخالف للحديث اللي انت معترض عليه ؟؟

osama44 اسامه 44 يقول...

استاذتنا
بجد انا اسف اتخرت فى التعليق انا قرات الموضوع فى يوم وعلقت فى يوم تانى خالص
اما بخصوص البوست فانا شايف خناقه حاصله بين اليس وبدرواى
وخلاصة كلامى فهذا الموضوع كتاب وسنه
هما دليلى وعلى راى الامام الشافعى
اذا صح الحديث فهو مذهبى
ولذلك اقول بقول ربنا
لن ترضى عنك اليهود ولا النصارى حتى تتبع ملتهتم
ومع ذلك نتعامل معهم بخلق الاسلام
دمتى بجد رائعه

أليس في بلاد العجائب يقول...

خناقة ايه بس :)

دا احنا بنتناقش وفي فرق رهيب بين النقاش و الخناق ..

علي الاقل من ناحيتي انا لو غلط اديني بتعلم ولو صح اكون مش حابس علم ..
ربنا يهدي حالنا جميعا لما يحب ويرضي


ارجو مكونش ازعجتكم

لقد خلقنا الله احرارا يقول...

اولا
انا اسفة جدا على تأخير الرد
بس هو مش مقصود
لانى كنت مشغولة جدا ومرهقة جدا
معلش اعذرونى

لقد خلقنا الله احرارا يقول...

ثانيا
ابدأ باستاذ بدراوى
ازى حضرتك
ليه حاسس ان ردك صادم؟
الحكاية بسيطة اوى
انا فى البوستين واخدة خط الفضفضة
بتكلم عن نفسى وعن كل الناس اللى اعرفهم
اللى بيحاولوا على اد مايقدروا يفهموا ويطبقوا اسلام صح
بالنسبة للنك اليوم السابع
منطقى جدا
انى عمرى لا ولاغيرى ولا اى حد عنده عقل يوافق على حرق وهدم كنيسة
وطبيعى جدا ان التصرفات دى تكون مسيئة للاسلام
د ى حاجة انا حسيت انها مش محتاجة منى توضيح



ثانيا
هكلمك بصراحة
الحديث اللى مامعناه لاتبدءوا اليهود والنصارى بالسلام
والحديث الشريف الاخر اللى معناه
اننا نضيق عليهم الطريق
كان فى قلبى منهم حاجات
وبقول لنفسى دايما فى الاوقات دى اما ان الحديث يكون ضعيف
او فهمنا ليه خطأ
لان الاسلام والرسول عليه الصلاة والسلام
لا يمكن ان يصدر عنهم اساءةلاى دين

بس اليس اكدت حسب المصادر ان الحديث صحيح

يكون الحل المنطقى ان فى اختلاف فى فهمنا للحديث


انا حقيقى زى ماقلت قبل كده بدرس فى معهد اعداد دعاة
ومش علشان شايفى نفسى هكون داعية ولا حاجة
لا علشان لقيت نفسى مادرستش دين بجد لا فى المدرسة ولا فى الكلية
وبصراحة بيدرس لى دكاترة
احسبهم على خير
وجهة نظرى كانت انى استنى لغاية ما اسألهم عن تفسيرهم للحديث ده
يمكن يشيلوا الحاجات اللى قلبى منه
بس النهارده
ببحث سريع جدا على جوجل
قرأت عن الدكتور سلمان العوده
قال رأى عجبنى جدا

ان الفقهاء اتفقوا على الرد على الكافر والذمى بالسلام عليكم
اذا بدأ بالسلام
اما الاختلاف فكان فى البدء بالسلام
وكان رأيه
ان بعض الفقهاء اجازه مثل ابى امامة
وابن مسعود وكثير من الحنيفية والشافعية
والامام الاوزاعى لما سئل عن القاء السلام على الكافر قال
ان سلمت فقد سلم الصالحون وان تركت فقد ترك الصالحون
يعنى الامر فيه سعة زى ماالدكتور قال

وكمان اليس قالت لى استفت قلبك

وانا قلبى بصراحة كان ميال لكده

القى السلام على المسيحى الذى يتعامل معى باحترام وحيادية حتى ولو فى الظاهر
ولو حسيت منه بأى شى اخر والتعامل معه ضرورى
مش لازم السلام عليكم
حقيقى هيكون لا يستحقها
اقوله صباح الخير مش بتعجبه
مفيهاش حاجة

كمان الدكتور وضح ان الحديث الخاص بعدم بدأهم بالسلام كان ليه ظروف
ان النبى كان بيجهز لقتال مع اليهود
بس على ما فهمت التجهيز ماكانش سرى
فالنبى عليه الصلاة والسلام كان بيوصل رسالة فى وقت معين لليهود
انه مصر على قتالهم
فأمر المسلمين بعدم البداية بالسلام

لقد خلقنا الله احرارا يقول...

استاذ بدراوى
انا شايفة انك واليس متفقين فى حاجات كتير جدا
بس مش عارفين تتواصلوا سوا
انت شايف
انك مش مقتنع
ان الاسلام ممكن يأمرنى اضيق الطريق على المخالف لى فى الدين


واليس عندها مبدأ مهم جدا جدا
وهو
سمعنا واطعنا

عارف الاختلاف فين

انك معتقد ان سمعنا واطعنا
مرحلة دنيا من الايمان

واليس
شايفاها مرتبة عليا من الايمان


طيب انا فين
انا معاكم والله انتم الاتنين
ازاى؟
علشان احنا مناخدش ذنوب منقدرش عليها
يبقى سمعنا واطعنا
لغاية ماندرس ونفهم ونوصل لما يقنع قلوبنا قبل عقولنا
اليس قالت لك
بتحكم عقلك وجابت مثل تقريبا من الصلاة
وانت قلت بحكم عقلى وايمانى

انا معاك تماما فى دى
الامور التعبدية وكمان الغيبية
انا مااتكلمش فيها نهائى
مينفعش
دى سمعنا واطعنا
اما الامور الفقهية ربنا وسع علينا فيها باختلاف الفقهاء
ليه نضايق نفسنا
دى اليس قالتها
فانا معاها فيها

الحديث الخاص بالتضييق عليهم
انا لسه ماوصلتش فيه لحل
بس اللى فى قلبى
انه
يمكن
ومصرة على يمكن لانى معرفش
يمكن يكون خاص بمرحلة معينة
كان المسلمين فيها بيعانوا من مؤامرات اليهود والنصارى
واصرارهم على القضاء على نور الله ممثل فى الدعوة الوليدة

ده رأيى انا
لسه الرأى العلمى



حاجة كمان

نصيحة من اخت اكبر منك
اتعرفت على افكار بدراوى من فترة
من تعليقاته فى مدونات كتير
ماتكرهش عالم من العلماء
حتى لو معاك رأى لعالم اخر بيخالفه تماما
لانى اعتقادى
ان العلماء دول يستاهلوا حتى لو تشددوا جدا
كل احترام مننا
لانهم تعبوا نفسهم لنفسهم ولينا
يبقى على الاقل نقدرهم لتقديرنا لشرف العلم اللى درسوه وبيدرسوه لينا


ابن عثيمين
وغيره من مشايخ السعودية
بيتعرضوا لهجوم ضارى عندنا
من غير مانقرأ بالتفصيل فى ارائهم الفقهية
وكمان احنا معندناش القدرة على ضبط الادلة وتحقيقها
عارف انا شايفة ان الفقه يشبه الفلسفة
ازاى
انه مرتبط جدا بالبيئة والظروف فى المجتمع وشخصية صاحبه
يعنى لو احنا فى فترة فيها هجمة على الاسلام
لازم تفسيرنا لايات واحاديث كتير يكون متطابق مع الفترة دى
لو احنا فى مجتمع مغلق الفقه هيكون مرتبط بشدة بعاداتنا وتقاليدنا

مش عارفة انا وضحت وجهة نظرى ولا لا
بس شيوخ السعودية علماء اجلاء
حتى لو اختلفنا معاهم
حتى لو ارائهم الفقهية حسينا انها مش مناسبة لينا

حسب معلوماتى المتواضعة
ان عرف كل بلد
من الادلة التى يأخذ بها الفقهاء

لقد خلقنا الله احرارا يقول...

استاذ بدراوى
انا بصراحة مش فهمت ايه غرضك من ذكر الايات القرانية عن اهل الكتاب

وانا حاسة ان كل اختلاف بينك وبين اليس النهارده
كان فرصة كويسة لنقاش محترم
لاتنين يبان انهم مختلفين
لكن الحقيقة ان كل واحد فيهم غيران على الاسلام
بس طريقته




اه فى حاجة كمان
انا كان نفسى اكون اول واحدة تهنئك
بالعودة للكتابة فى المدونة
وخصوصاالاختيار الجميل لمقال الله يرحمه مجدى مهنا
لكن صفحة التعليقات عندك عذبتنى
ومارضيتش تقبلنى
مش عارفة ليه
مع انى فى الوقت علقت فى اماكن كتير بدون مشاكل
تحياتى لك

مهندس مصري يقول...

متفق معاكي في كل اللي قولتيه
للأسف بعد ما كان الرهبان و القساوسة هما اللي بيساعدوا جيش عمرو بن العاص ضد الرومان
و بعد ما عمرو بن العاص رجع الأب بينيامين لكرسيه البابوي في الإسكندرية بعد ما كان هربان و محمكوم عليه بالإعدام من الروم
و بعد ما كان عمرو بن العاص محبوب جداً من أهل مصر الأقباط و بضربوا المثل بسماحته و عدله
فجأة بقينا نسمع دلوقتي من مزوري التاريخ الطعن و اللعن الشديد له

حسبنا الله و نعم الوكيل

لقد خلقنا الله احرارا يقول...

اليس
لا تعتذرى على الازعاج
لان مفيش ازعاج ولا حاجة
بالعكس انا سعيدة بالمناقشة اللى دارت
لانى استفدت منها كتير

انا كلامى معاك مش هيكون كتير
لانى فاهمة انت تقصدى ايه
وفاهمة بدراوى برده يقصد ايه

وقتنعة بوجهة نظرك جدا
وبنيتك الطيبة فى النصيحة
لما انا قلت انى بزعل لما مش بيردوا على السلام
فحاولتى توضح لى الحكم
وتحلى المشكلة بتاعتى
بس كل الموضوع زى ما شفت ردى على بدراوى
ان قلبنا لسه فى حاجة
مش عدم رضا ابدا
لكن شعور ان المعنى مش واضح
وانه متضارب مع روح الاسلام
ومع احاديث اخرى وايات كثيرة
هى رغبة منى ومن بدراوى فى الفهم العميق علشان تكون سمعنا واطعنا
مش باللسان بس
لا
انا نفسى ربنا يكرمنى
ويكرمنا جميعا وتكون بالقلب وكل الجوارح قبل اللسان

انا سعيدة جدا بتشريفك لى
وماتحرمينيش
من النقاشات دى
والثواب اللى هناخده ان شاء الله
فى وقتنا اللى قضيناه بنحاول نفهم

يارب يفهمنا ويرضينا وينير بصائرنا

تحياتى لك

مهندس مصري يقول...

على فكرة إستفدت جداً من النقاش بين أليس و بدراوي
و أنا بأبدأ زملائي و معارفي المسيحين بالسلام
مفيش أي مشكلة
و لي زميل مهندس مسيحي سوري قمة في الأدب و الأخلاق و المعاملة الحسنة
و على فكرة مسيحين مصر هما اللي متنشنين زيادة عن اللزوم بينما ما تلاقيش ده عند مسيحيين سوريا و العراق مثلاً

لقد خلقنا الله احرارا يقول...

اسامة
شكرا على زيارتك
وماتعتذرتش على عدم التعليق يااسامة
انت تشرفنى بتعليقك طبعا
لكن الحكاية مشستاهلة اعتذار
مفيش خناقة ولا حاجة الحمد لله
هو اختلاف كويس ومفيد
هو الاتنين غيرانين على الدين بس كل واحد بطريقته
تحياتى لك

GiGi world يقول...

اسمحولى اعتذر بس على تعليقى

وبعتذر لاستاذ بدراوى


لكن بس لما قرات انه بيقول ان ابن عثيمين اخر واحد اسمعله
انا ادايقت وقلت انى رافضه اى حاجه بس يمكن رد انفعالى


علماء الدين دايما ليهم احترامهم حتى اذا اختلفنا معاهم

متاسفه تانى على الطريقه

لقد خلقنا الله احرارا يقول...

الباشمهندس المصرى
اهلا بك
فعلا الهجمة شرسة جدا على عمرو بن العاص
وتاريخه فى مصر بيتكتب من اول وجديد ببشاعة
بعد ماكان البابا صديقه المقرب
وهو اللى انقذ المسيحيين من الاضطهاد المذهبى الرومانى
مش عارفة اجندتهمحصل فيها ايه
بقى عمرو العاشق لمصر من قبل الاسلام عدوهم اللدود
عارف ان من اشهر الجمل فى الفتح العربى لمصر
ان القبط فى الفرما
كانوا يومئذ لعمرو اعوانا
ايه اللى قلبهم اعداء
اكيد الكبر والسياسة وامريكا والغيرة
ومصالح الدنيا

ربنا يستر
شرفتنى

لقد خلقنا الله احرارا يقول...

جيجى
معلش ياحبيبتى
دماغى لفت والله
شرفتينى
واسفة على حركة الندالة اللى عملتها معاك
انى مارديتش عليك فى موضوع الزيارة
بس انا انسانه قدراتى العقلية بتنهار من الضغوط
والايام اللى فاتت ولسه لغاية النهاردة مضغوطة جدا
سامحينى معلش
وادع لى

أليس في بلاد العجائب يقول...

الله يفتح عليكي ويزيدك علما وفهما وادراكا :)

والحمد لله انك فهمتي غرضي

انا والله دورت كتير جدا في موضوع الحديث دا
و افتكر ان مقالة دكتور سلمان كانت من ضمن الروابط اللي سيبتهالك التدوينة اللي فاتت

انا كنت بدور علي معلومات مختلفة في نفس نص الحديث
مش علشان انا مش مقتنعة بس علشان اسد الثغرات زي الثغرة اللي اثارها بدراوي

بصراحة مش اول مرة اقع في موضوع زي كده

حاجات كتيرة بنتعلمها في مشوارنا بنستغربها جدا لاننا مكناش نعرفها

وزي ما انتي قولتي كده العلم اللي بالمدرسة ولا كلية ولا حتي قراءات حرة ولا حاجة جنب دراسة العلم الشرعي من اهله علي يد متخصص .. الله يوفقك يارب

انا سعيدة بالمناقشة دي جدا و مش عايزة بدراوي يكون اتضايق من الكلام

واسمحيلي موضوع الايات دا انا اللي سالته عن وصف الله لاهل الكتاب
علشان لو بص علي الايات كويس هيلاقيها بتتكلم عليهم بوصف لا يخالف وصف الحديث.. والله تعالي اعلي واعلم

ربنا يردنا اليه ردا جميلا و ينور بصيرتنا وقلوبنا للحق

جزاكم الله خيرا

لقد خلقنا الله احرارا يقول...

مهندس مصرى
انا كمان استفدت جدا من النقاش بينهم
وسعيدة ان ده اول مرة يحصل فى مدونتى
والاجمل انى لاول مرة احس انى فاهماهم هما الاتنين
من غير مااكون اعرف مباشرة حد منهم
انا مكنش فى بالى
ان النت و المدونة ممكن يسعدونى كده ويعرفونى على ناس اتأثر بيهم بالشكل ده



وانا كمان معايا مدرس زميلى
فى منتهى الانضباط والضمير فى الشغل
وبيقولى السلام عليكم
لكن فى مدرسين تانيين مسيحيين
صدقنى الذمة والضمير معدومين تماما
لكن الغباء كله بيظهر لما اقول السلام عليكم

لقد خلقنا الله احرارا يقول...

جيجى حبيبتى
هو سوء تفاهم بس مفيش حاجة حصلت
وان شاء الله مفيش زعل ولا حاجة
مينفعش اخواتى الصغننين
جيجى وبدراوى يزعلوا من بعض

لقد خلقنا الله احرارا يقول...

اليس
اللهم امين
وجزاك الله خيرا على الدعاء
مع ان انا اللى بدعيلك على الكلام الجميل
وحبك للبحث
ربنا يكرمك
زى ماقلت لك
انا ماحستش ان فى مشكلة
لانى كنت فاهمة تقصدى ايه
بس هعترف بحاجة
انا مفتحتش كل اللنكات
لانى زى ماقلت لك فى تعليق سابق
كنت مضغوطة جدا
مش استهانة بتعبك
ربنا يجازيك عليه
بس احساس انى مش هفهم لو قرأت
لانه ماكانش فى دماغ اصلا

تحياتى لك

لقد خلقنا الله احرارا يقول...

بدراووووووووووووووووووووووووى
أين أنت؟

أليس في بلاد العجائب يقول...

ممكن بعد اذنك لما تسألي الاساتذة بتوعك و يردوا عليكي .. من فضلك تقوليلي ردهم كان ايه ؟

لقد خلقنا الله احرارا يقول...

اليس
بس كده
ده أقل واجب
ماينفعش نسيب الموضوع كده
بعد مااتفتح للنقاش
تحياتى لك

بدراوى يقول...

انا جيت
مين بينادى

و انا كمان سعدت بالمناقشة
و شكراً ليكى يا لقد خلقنا الله احراراً
على ظهورك اخيراًَ
عشان نجدتينى و قفلتى المناقشة
هههههه
اصلى كنت حسلم نمر
اصلى ماليش خلق على المناقشات البيزنطية

هههه
بهزر طبعاً و ان كان هزار بجد شوية

و سعدت بأستاذة اليس
او مهندس مصرى كنت منتظر ظهوره
لأنه ما شاء الله قارينى كويس
و انا و هو دافنينه سوا
:-)

و شكراً لجيجى و العالم على التوضيح
----------
بخصوص التعليق عندى فى المدونة
معلش اصلى عامل صفحة التعليقات
فى صفحة لواحدة عشان حقوق النشر
عشان محدش يكوبى البوست من صفحة التعليقات

اكيد حتفتح الصفحة جربى تانى

لقد خلقنا الله احرارا يقول...

بدراوى
كويس انك سمعتنى وانا بنادى
واضح انت تعبت من المناقشة
لكن اتمنى انك مش تكون زعلان
مع انى مش شايفة حاجة تزعل
تحياتى لك
وخلى نفسك طويل
دى النصيحة اللى دايما بقولها لنفسى

سهيل ولى الدين علام يقول...

اختى لقد خلقنا الله احرارا
انا قرأت البوستين فى موضوع مصر والاقباط وعجبنى تساؤلاتك عن السبب فى الخلاف ،ولى ملاحظات ارجوان تتقبليها ..
لم توجهى اى تقصير من المسلمين واختصرتى
المشااكل فى انكى عندما تقرأيه السلام فيرد مساء الخير ..ولم تتحدثى عن الدوافع لتغير موقف الاقباط مما يسمى بالوحده الوطنيه ولم تتحدثى عن مشكلاتهم اليوميه منذ بدأت ما اطلقتوا عليه الصحوه الاسلاميه تريدون تحويل الاقباط الى الى مواطنيين
من الدرجه الثانيه وادنى وتريدين بناء مسجدفى اسفل كل بيت اما بناءالكنائس فيحتاج قرارات عليا تريدين دخول اولادك الكليات العسكريه اما اولادهم فليذهبوا بعيدا.اما حوار الاخت اليس والاخ بدراوى الذى ينحصر فى كيفية التضييق على الذميين فى الطريق وحديثك بأن الحديث صحيحةوان علماء الفتنه يجب احترامهم ..سيدتى انا اآسف ان اسمع منكى هذا الحديث ثم تطلبى منهم المصالحه..
اغفرى لى انفعالى ووصفى لهذا الحوار بانه حوار الطرشان ..يا سيدتى انها بلدهم كما هى بلادك .. ياسيدتى اهم حاربوا كما حاربتم فى سينااء والاسماعيليه وبورسعيد انها بلهم كما هى بلدكم..
اخيرا انا مسلم دينا مصرى اولا..

لقد خلقنا الله احرارا يقول...

استاذ سهيل
انا مش فاهمة حضرتك منفعل ليه
حضرتك زعلان لانى لم اوجه اى اتهام بالتقصير للمسلمين
اقول لحضرتك ليه
لانى بتكلم عن نفسى وعن الناس اللى اعرفهم فى البوستين
انا لا صحفى ولا مسئول حكومى ولا مؤرخ ولا خبير فى مش عارفة ايه
انا مش بعمل اى حاجة تؤذى المسيحى فى حاجة
بالعكس
بنسى نفسى كتير
تصرفات كتير بيعملوها وبقول بشر
وكلنا بشر وطباعنا مختلفة

نيجى للكلام المهم
حضرتك قلت انى مااتكلمتش عن المشاكل اليومية للاقباط التى بدأت مع الصحوة الاسلامية


لا اسمح لى
المشاكل دى قديمة جدا وبيعانى منها المسلمين والمسيحيين

بس المشكلة
ان المسيحى بيقول ان الاسلام والصحوة الاسلامية هى السبب
وانا متأكده ان السبب فى مشاكله الحكومة ممثلة فى حسنى مبارك شخصيا
حسنى مبارك اللى البابا حريص فى كل مناسبة انه يسانده ويمهد الطريق لابنه من بعده
انا يافندم لا هديت كنيسة
ولا حرقت انجيل
ولا منعت حد يدخل كلية عسكرية
انا عايشة فى حالى
مش بسبب أذى لحد
علشان كده
من حقى اضايق لما اقول لزميلى السلام عليكم مايردش على لانى ماضايقتوش فى حاجة
وانا مش عايزة ولا من اخلاقى ولا اخلاق دينى انى احول حد لمواطن من الدرجة التانية
وفعلا اتمنى ان تحت كل بيت يكون فى جامع
والكنيسة اللى بتتبنى بقرارات عليا
دى مش مشكلتى
الريس حبيب البابا
هو اللى مصر على كده
علشان تفضل نسبة من المشاكل موجودة بينا وبين بعض
يقوم هو يدخل هنا شوية وهنا شوية
ويبقى هو دايما المسيطر على مقدرات البلد
الاحباب
البابا والريس
هما اللى مصدعين دماغنا بحكاية عدد الاقباط اد ايه
لو النوايا صافية
بمنتهى البساطة
يتقال العدد كام ويتعمل دراسة
توضح العدد الفعلى للكنائس المطلوبة
لكن زى ماالمسلمين بيتصرفوا غلط
المسيحيين بيتعمدوا احيانا الاستفزاز والاستقواء
وبعدين يلعبوا على النغمة البايخة الاضطهاد

لو فى اسلام بيتطبق صح
عمر ما هيكون بنى ادم درجة تانية ابدا
لان ربنا هو اللى قال مامعناه
لقد كرمنا بنى ادم



انا مش شايفة اى تعارض بين المصرية والاسلام
انا مسلمة نعمة من ربنا انعم بيها على من غير مااطلبها
ومصرية نعمة من ربنابرده انعم بيها على من غير مااطلبها
يعنى لا انا ولا حضرتك ولا اى حد مننا
اختار اسلامه فى البداية ولا اختار بلده

والاسلام كمان عمره مايتعارض مع مصريتى وحبى لبلدى
الرسول عليه الصلاة والسلام كان فى منتهى الحزن لما اهله اخرجوه من بلده

مش عارفة مسيطر على جدا ان حضرتك ومدونين غيرك
بتتكلموا عن اسلام غير اللى اعرفه انا اهلى وجيرانى وزمايلى وكل الناس اللى اعرفهم


انا ماقلتش يافندم ان مصر بلدى ومش بلدهم
بالعكس
انا قلت انهم بيعاملونى على انى لقيونى جنب جامع فى صحراء الربع الخالى وكنت اقصد المكان مكنتش بهزر
انا اشتكيت ان المسيحى بيعتبر انى مش مصرية اصيلة لمجرد انى اسلمت
الحمد لله على نعمة الاسلام



انا مش عارفة حضرتك قلت فعلا علماء الفتنة
ولا دى غلطة بسبب السرعة
بس بعد اذن حضرتك
لو كنت قلت كده
انا مش موافقه على الكلام ده
ومش مستعدة انى اسمح انه يكون فى مدونتى اهانة لعلماء الفقه
حتى لو انا مش فاهمة اراء ليهم


اخر حاجة
انا مش موافقه على عبارة حوار الطرشان

لانى بعتبرها اهانة لى ولضيوفى اللى اتناقشوا طول النهار مع بعض
من غير ما حد فيهم يوجه اهانة للتانى

بدراوى يقول...

بدون زعل
بعض كلام الأخ سهيل عنده حق فيه
و اعذرينى حضرتك انفعلتى فى ردك عليه

كون ان فيه سلوكيات خاطئة من بعض المسلمين انتى مش بتعمليها
لا ينفى كون ان من المفروض تقوم بإدانتها عشان ميتقلش انك موافقاهم على تصرفاتهم
حسب فهمى من الحق انى اما اشوف مسلم بيعمل شىء غلط يسىء للدين اقول انى مش موافق

مش اقول

حضرتك زعلان لانى لم اوجه اى اتهام بالتقصير للمسلمين
اقول لحضرتك ليه
لانى بتكلم عن نفسى وعن الناس اللى اعرفهم فى البوستين
انا لا صحفى ولا مسئول حكومى ولا مؤرخ ولا خبير فى مش عارفة ايه
انا مش بعمل اى حاجة تؤذى المسيحى فى حاجة

سهيل ولى الدين علام يقول...

سيدتى ..
آسف يا سيدتى لابداء رأى فيما تكتبينه
واعدك بأن لا ادخل هنا مره أخره حتى لا اهينك ولا اهين ضيوفك ..اما الاقباط فلهم
البابا والريس..
وشكرا............

د. ياسر عمر عبد الفتاح يقول...

أنا مش متابع الموضوع من الأول
لكن عجبني الكلام ده ,, أغلبه يعني

وحبيت كمان أشكر حضرتك علي سؤالك عني في غيابي
وأنا الحمد لله بخير
محتاج لدعوات حضرتك

د. ياسر عمر عبد الفتاح يقول...

أنا مش متابع الموضوع من الأول
لكن عجبني الكلام ده ,, أغلبه يعني

وحبيت كمان أشكر حضرتك علي سؤالك عني في غيابي
وأنا الحمد لله بخير
محتاج لدعوات حضرتك

لقد خلقنا الله احرارا يقول...

استاذ بدراوى
من غير زعل ومن غير انفعال
مش انا فى ردى عليك قولت لك
ان التصرفات المسيئة للاسلام دى بيعملها اشخاص ما يعرفوش حاجة عن الاسلام
هو فى حد يعرف ربنا
يهدم او يحرق دار عبادة لحد غيره
انا شايفة ان دى حاجة منطقية
مش محتاجة اننا كل شوية نقول
المسلمين بيعملوا حاجات كتير غلط
ماشى بيعملوا
بس دول مش رمز الاسلام
مش دول اللى انا شايفاهم معبرين عن الفهم الصحيح للاسلام


انا انفعلت فعلا فى ردى على الاستاذ سهيل
لانى حسيت انه معتقد
انى لما احاول اعرف دينى شوية
ده هيكون سبب انى امنع عن المسيحى حقه فى المواطنة

يابدراوى
علشان اكون منصفة مش لازم اجلد نفسى كل شوية
انا مش مؤذية للمسيحى فى حاجة
ولسه عاملة استبيان فى فصل عندى
اول كلمة البنات قالوها فى حقى
ان فى عدل
هو فصل اغلبهم مسيحيات
على اد مافرحت ان البنات فهموا انى حريصة على العدل بينهم ومش بفرق زى غيرى وخلى بالك من كلمة زى غيرى دى
بينهم على اد ما زعلت انهم فى سن صغير وحاسين ان مفيش عدل


رأيى المتواضع
علم اصحاب الديانات السماوية دين صح
اللى هو عبادات ومعاملات

تلاقى منهم اروع صور الانتماء والمواطنة

لكن احنا كلنا محرومين من ده
نعمل ايه
نبدأ بنفسنا
انا بحاول
بحاول والله ابدأ بنفسى

علشان كده بنفعل لما اتهمنى انى عايزاهم مواطنين من الدرجة التانية
البوست كان واخد خط فضفضة من حاجات زعلانه منها لقد خلقنا الله احرارا
من حفيد ويصا واصف
منين بقى عايزة ادخل ولادى كليات عسكرية وهو ولاده مايدخلوش

المسيحيين بصراحة بيحملوا المسلمين اخطاء مالناش ذنب فيها
اللى بيظلمنا احنا الاتنين الحكومة
مش الاسلام


لما بشرح الجزية فى اى فصل
بكون حريصة انى اوضح ان المسيحى دلوقت مايدفعش جزية
لانه بيدافع عن البلد
زى زيه
لكن زمان كان جيش عمرو هدفه الاول نشر الاسلام والدفاع عن البلاد المفتوحة
علشان كده عمرو بن العاص مكنش يقدر يدخل المصريين الجيش
من هنا دفعوا الجزية
لكن دلوقت الجيش مش بينشر اسلام
الجيش بيدافع عن مصر وبس
يبقى المسيحى زيه زى المسلم بالظبط


لما انت تضيع وقتك وتتكلم من قلبك فى الفصل كلام زى ده
اكيد يصعب عليك نفسك لما تتهم اتهامات زى اللى شفتها

ارجو انى اكون وضحت بعض اسباب انفعالى مش كلها

لقد خلقنا الله احرارا يقول...

استاذ سهيل
ابداء الرأى لا يحتاج للاعتذار منه
انا زعلت من كلامك بصراحة
واتهامى انا او اى حد بيحاول يتناقش
اننا عايزين المسيحيين مواطنين درجة تانية
وزعلت تانى لما حضرتك سخرت من العلماء وقلت علماء الفتنة
وزعلت من الكلام عن ان مشاكل الاقباط بسبب الصحوة الاسلامية
هو الاسلام ده مش دين هنقابل ربنا يوم القيامة

وبعدين زعلت اوى لما حضرتك قلت على حوارنا حوار طرشان
عارف لو اتكلمت فى العموم
مش مشكلة
لكن الناس تاعبة نفسها وبتتناقش من الصبح
نقول عليها كلام زى ده


يبقى مين اللى من حقه يزعل
ممكن حضرتك تقرأ ردى الاخير على استاذ بدراوى
بيوضح اكتر انا انفعلت ليه


اهم حاجة
المدونة مدونة حضرتك
مينفعش تقول انا مش جاى تانى
حضرتك صاحب بيت تيجى فى اى وقت
سواء اختلفنا او اتفقنا

لقد خلقنا الله احرارا يقول...

دكتور ياسر
المهم ان حضرتك بخير
ربنا يعينك ويقويك ويكتب لك الخير

بدراوى يقول...

طب تمام انا فهمت كلامك
بس عاوز اقول
علم الناس دين صح
حيطلع منهم مواطنة
اى تعليم هل تعليم الشيوخ اللى حضرتك
اعترضتى على كلام سهيل ليهم
و قولتى معترضة على وجود اى اهانة ليهم فى المدونة فقط

الشيوخ دووول بيصبوا البنزين على النار
مش معنى انى معتقد ان دينى هو الصح و الباقى مش صح او دينى هو الحق و الباقى مش حق انى ابهدل التانى و اقول كلام ميصحش عليهم
و ده اللى مش قادر يفهموا الشيوخ اللى مش حسميهم و اقول مين عشان متزعليش

نقطه كمان انا لما بقول انى مش انتقد تصرفات بعض المسلمين عشان بديهى ان اى حد بيعبد ربنا يبقى عمره ما يعمل اى فعل عنيف ضد اى شخص يعتقد فى دين ثانى

معناه انى كدة بقول المسلمين زى الفل مش بتطلع منهم العيبة و الأخر المسيحى او الغير مسيحى هو اللى المشكلة فيه و هو اللى بيعمل

كلنا مضطهدين من الحكومة و النظام
لكن للأسف بعض الأخوة المسيحيين مضطهدون على يد فئة متطرفة من المسلمين الذين يتصورون انهم بده بيخدموا الإسلام و انهم بيعبدوا ربنا صح

مش عارف فكرتى وصلت و لا لأ
بس اتمنى ان اى خلاف فى الرأى ميكونش سبب لأى ضيق قد تكنيه ناحيتى

رأيى شىء و انى بحترم حضرتك شىء تانى
و بعزك زى أختى زى ما حضرتك قولتى
ليا و لجيجى و لأليس
----
مع تحياتى

لقد خلقنا الله احرارا يقول...

لا بجدانا مش مضايقة منك
بس لو اخدت بالك
انا فى تعليق قلت لك انت بدراوى اللى انا قرأت ليه تعليقات كتير فى مدونات كتير
فانا بتكلم معاك وانا تقريبا فاهمة افكارك ايه
علشان كده مش هزعل حتى لو مختلفين فى الرأى
نيجى للموضوع الشائك

انا رغاية اوى استحملنى معلش

الشيوخ

ساعات ببقى قاعدة ادام التليفزيون بتخنق من الكلام اللى باسمعه

بس مش بهينهم
اختلف معاهم
وشايفة انى مش عارفة حاجة بس فاهمة روح الاسلام اكتر من بعض منهم
احيانا ليهم اراء مستفزة
مش عايزة اكررها علشان بضايق لما بسمعها

بس برده بضايق جدا من اهانتهم
دول بشر
بس قضوا عمرهم يدرسوا دين
ممكن يكونوا حطوا نفسهم فى قالب واحد وماحاولوش يوصلوا لروح الدين
معاك
ممكن يكون بعضهم
ينفع يشتغل اى حاجة غير انه يكون داعية
بس هعترف لك بحاجة
انا حصل لى صدمة لما اتعرفت على المدونات
النت كان فى بيتنا سنين من غير افكر انى ممكن يكون لى فيه
لما اتعرفت عليه
خدته بحماس اوى
حظى السىء انى وقعت فى مدونات مش زيك كده عايزه عدل وفكر مستنير اللى هو روح الاسلام بجد
دخلت على الالحاد والسخرية من أى رمز دينى حتى لو انا مش موافقاه
علشان كده حاسة ان ناس كتير بتهاجم الشيوخ لاغراض مش طيبة
رد فعل لاارادى انى ادافع بلا هواده

بس انا اتبسطت اوى
انك مش عايز تقول اسامى علشان ماتزعلنيش
اقولك انا
انا بحترم جدا محمد حسان
بحس انه مؤدب ومتواضع بالرغم من علمه الغزير
بحترم جدا عمر عبد الكافى المظلوم المشتوم ابدا ابدا فى صحافتنا
مع انى سمعته كتير مش لاقيه حاجة وحشة الراجل بيقولها
بحب جدا حازم صلاح ابو اسماعيل
لانه بالاضافة لعلمه بيعمل الحاجة اللى محمد حسان وشيوخ كتير مش بيعملوها
الا وهى
الكلام عن الفساد السياسى

بتخنق جدا لما يقولوا طاعة ولى الامر
ورأى الشخصى
ان ابوبكر الصديق رسم لنا سياسة الحكم فى اول خطبة ليه لما قال
انى وليت عليكم ولست بخيركم
ان احسنت فاعينونى وان اسأت فقومونى
اطيعونى مااطعت الله ورسوله فأن عصيت الله ورسوله فلا طاعة لى عليكم


شكلك نمت
انا قلت لك انى رغاية
المهم

انا بشوف انهم قضوا حياتهم يدرسوا علم شرعى
بحترمهم لاحترامى للعلم اللى درسوه
ولما بيتهاجموا
لازم بيكون رد فعلى عنيف
ده فى ناس تخصص هجوم عليهم عمال على بطال
المسلم والمسيحى فى مصر الاتنين غلطانيين فى حق بعض
انا معاك
يبقى السؤال
اللى انا مش عارفة ليه اجابة
الحل ايه؟

بس هارجع ابقى رخمة واقولك
المسلم مش مستقوى بحد بره
لانه ياحبيبى مالوش حد بره
ولا حتى عنده امام يشيل همه ويدور على مصلحته زى ماالبابا بيعمل



حاجة تانية

انا بحاول اكون محايدة
لكن ماتطمعش فى الحكاية دى اوى
لازم هلاقى نفسى متحيزة ولو نفسيا للمسلم لانى حاسة بمشاكله اكتر

اسفة على الازعاج

أليس في بلاد العجائب يقول...

ممكن اوضح كلمة اخيرة علشان احسب انه حقي المرة دي

انا لما اقرأ تدوينة او مقالة او حتي كتاب

اظن انه لي حرية التعليق علي جزء منها ولو كلمة واحدة حابة اتكلم عليها .. ارجو اني مكونش مخطئة في رايي دا

واتكلمت في اللي عايزة اتكلم فيه مش اللي حد عايز يتكلم فيه


واعذريني
الحوار طالما قلب باستهزاء .. بقي زيه زي اي حاجة في البلد .. ملهاش رابط ولا قاعدة تحكمها
احنا كنا بنتكلم في حاجة تخص دينا بصفة خاصة واللي معترض علي سنة النبي يتحمل ذنب نفسه .. من غير استهزاء ولا دفاع عن باطل

وان شاء الله هتتأكديلنا من اهل الذكر اللي هنسألهم علشان احنا ممن حق فيهم قول الله "ان كنتم لا تعلمون"

واشكر لك سعة صدرك وقبولك لكلام اخد كتير من وقتك

لقد خلقنا الله احرارا يقول...

اليس
الله يكرمك
انا مش فاهمة تعليقك
وضحيه لو سمحت
وكمان وضحى انت زعلتى من ايه

بدراوى يقول...

لأ منمتش بس شوية و حخش انام

هو بخصوص الشيوخ انا ضد اهانتهم
لكن مع انتقادهم او نقدهم حتى من غير المتخصصين
ليه ؟!
لأنهم مش معنى انهم بيقولوا كلام دينى
يبقى مقدسين و تابو ممنوع اى انتقاد ليهم
زى ما حصل من فترة ان صحفى كتب مقالات انتقد فيها الشيخ حسان و يعقوب و الحوينى
فبدل ما الناس تناقشه شتمته و كفرته

حضرتك حتقوليلى المثل الشهير
انت لما بتعيى بتروح لدكتور و لا بتأخذ اى دواء و تقول انا فاهم
لأ بروح لدكتور طبعاً

يبقى ليه ماشى بدماغك و مش بتسأل الشيوخ المتخصصين؟!

حقولك ان الدين الشىء الوحيد اللى لازم اكون مقتنع عشان اعمله
لازم قلباً و عقلاً اقتنع
فلان حيقولى الشىء الفلانى غلط
و انا مش مقتنع قلباً و عقلاً
يبقى حشوف شىء تانى

لكن فى الطب مفيش اقتناع
دواء فلانى بيعالج ايه
مش لازم اكون راضى و مقتنع عشان اخذ الدواء
---
على فكرة انا بحترم جداً الشيخ عمر عبد الكافى و الشيخ وجدى غنيم كمان

اما مجموعة قناة الناس
حسان - يعقوب - الحوينى

فالصراحة مش بحبهم و رافض طريقتهم
ليهم دروس و افكار جميلة
لكن المجمل العام مش بيحببك فى الدين

بس اقدر اقول افضلهم حسان و محمود المصرى

و اسوءهم الحوينى
اللى قال بيقولوا عليه اعلم اهل الأرض بالحديث
ههههههههههه

معلش اعذرينى على انتقادى للحوينى لأنه الصراحة ليه شوية اراء عجب بجد
و غير مستنده لاى دليل شرعى اصلاً
مجرد كلام يحمل كذا معنى

بدراوى يقول...

أليس فى بلاد العجائب
------
هل انا الكلام ده موجه ليا انا ؟!

أليس في بلاد العجائب يقول...

انا قصدت اني لو علقت مش لازم التعليق يغطي كل النقط المثارة في التدوينة

اللي خلاني اعلق اصلا موضوع السلام

لو كنتي متكلمتيش فيه مكنتش هعلق

اتكلمت في الشيء اللي حسيته و قلت اللي اعرفه واللي لقيته ولما اتناقشت مع بدراوي مكنتش بغصب عليه يقتنع بحاجة مش عايز يقتنع بيها لانه حر يصدق اللي يعجبه

انا لما بعرف معلومة بدور علي اصلها ومن كذا مصدر علشان اتاكد منها
فبالتالي حق اي حد يتاكد من اي معلومة اتقالت قدامه

مينفعش المسلم يعيش عمره يفضل يقول للعالم جوة وبرة "انا مسلم كويس و طيب و مش بأذي حد .. او انا مسلمة طيبة و في حالي محجبة او منتقبة و مش بأذي حد"
متخلقناش علشان تعيش حياتنا كلها نقنع في الاخر اننا علي حق
احنا نعمل الصح واللي عايز يقلد الصح دا او يبحث وراه هو حر
محدش بيضرب حد علي ايده ويقوله اعمل ومتعملش


وَلَوْ شَاءَ رَبُّكَ لآمَنَ مَنْ فِي الأَرْضِ كُلُّهُمْ جَمِيعاً أَفَأَنْتَ تُكْرِهُ النَّاسَ حَتَّى يَكُونُوا مُؤْمِنِينَ. [يونس:99].

واشكر لكِ اهتمامك بالرد و بعتذر ان كنت سببت ضيق للأي من زائرينك

أليس في بلاد العجائب يقول...

مش لحد يا بدراوي

عموما


والله اعلم بما تخفي الصدور

وارجو متكونش اتضايقت

لقد خلقنا الله احرارا يقول...

استاذ بدراوى
هى اليلة دى مش باين فيها نوم
محدش والله قال ولا يجرؤ يقول انهم انهم تابو ومقدسين
لكن هقولك حاجة انا اكتشفتها عن نفسى
مهما قلنا عن نفسنا كويسين
والحمد لله متدينين بالفطرة
لكن انا عن نفسى لما رحت المعهد لقيتنى مااخدتش دين نهائى فى حياتى
ايه حلاوة علم مصطلح الحديث
وايه روعة اصول الفقه
مع انى لسه بسمى
والسنة دى بدأوا معانا حاجة اسمها تخريج الاحاديث
الخلاصة انى جاهلة بامتياز
فلما الحوينى او غيره
وانا برده مش مقتنعة ببعض اراء ليه
يقول حاجة حتى لو ربنا مافتحش قلبى ليها
انا بحترمه
لان الاحتمال الوارد الاكبران انا اللى مش فاهمة
لكن بصراحة زعلت منك لما سخرت منه
ده انت لو اتريقت على مرتضى منصور
يقرفنا فى حياتنا
اشمعنى الشيوخ مالهمش دية
اما صحفى اليوم السابع
انا ضد اى حد يكفر التانى
لكن الحق بصراحة
انه هو وجريدته مستفزين
ومقالش فى مقاله اى حاجة مفيدة
غير نظرية شكل للبيع
اللى بتمشى عليها اليوم السابع بجدارة لزيارة زوارها
وانت عارف الثلاثى السحرى لجلب القراء للصحف الفاشلة
اهم عنصر فيه الدين


اليس انا لسه بجد مافهمتش هى زعلانه من ايه

لقد خلقنا الله احرارا يقول...

لا انا كده زعلت
انت زعلانه منى انا
انا مقدرش على زعلك
معاك
انى مينفعش اقول عمال على بطال انا مسلمة كويسة
انا طيبة
لان ده معناه احساس بالضعف والدونية جوايا
لكن انا معملتش كده
انا برد على اتهامات اتوجهت لى فلازم ادافع عن نفسى

عموما ياستى مشكورة على غيرتك على دينك
وماتزعليش منى
لو كلامى اللى مزعلك
لانى فعلا حاسة انك مضايقة اوى وماقلتيش كل اللى مضايقك

لقد خلقنا الله احرارا يقول...

اليس
بالله عليك
انا مش عايزةالموضوع يبقى فيه زعل
اهدى كده
وقولى لى انت مضايقة من ايه بالضبط

بدراوى يقول...

انا اعلن كدة ان ده اخر رد ليا
و كدة خلاص انتظر رد حضرتك على كلامى و دمتم

بخصوص الشيوخ انا فاهم حضرتك كويس
بس ده دين ربنا
مش معنى ان الشيخ الفلانى درس و تعب و اكل الكتب اكل
يبقى يستغلنى و بالعامى يثبتنى عشان اشرب كل افكاره اللى بعضها لا علاقة لها بالدين

حضرتك بتقولى قلبى متفتحش لأراء الفلان
فالإحتمال الوارد انى انا اللى مش فاهمة

ما هو المشكلة انه الراجل يبقى هو سورى اللى بيستعبط و بيلهو بدين ربنا
و بيفرض اشياء لا علاقة لها بالدين
بيتشددوا فى اشياء غير طبيعية

زى الشيخ الحوينى اللى عاوز يعملوا مدينة كاملة للنساء منعاً للإختلاط
!!!!
هههههههههههههه

و لا لما قال
ان الرجالة هى القادرة على العلم الشرعى فقط و الستات لأ مينفعوش
الحقيقة مش فاكر بالضبط منطوق كلامه
لكن ده ما معناه

انا كدة خلصت كلامى
و نلتقى فى بوست جديد عندك
ان شاء الله
---
و ده يعتبر اخر كلام حقوله فى الموضوع ده

بدراوى يقول...

و اتمنى اخت اليس متكونش زعلانة من اى كلامى ممكن يكون ضايقها بشكل و بأخر

لقد خلقنا الله احرارا يقول...

طيب اخر كلام
احنا ليه مختلفين؟
انا اقصد بقول لنفسى الاحتمال الاكبر انى انا اللى مش فاهمة
لانى افضل انى اجى على نفسى و اخد وقت لغاية مااتعلم وافهم
لكن فكرة يثبتنى دى صعبة اوى
انا اعرف ان التثبيت ده بيعمله المجرمين

الخلاصة
سيرة الرسول عليه الصلاة والسلام بتوضح
احترامه الشديد للمرأة كأنسان

لما حد يحب يقلل من شأن المرأة
اكيد هيكون بيعبر عن رأيه الخاص بناء على عادات وتقاليد مجتمعه مش دينه

لكن انا ماسمعتش منه الكلام ده حقيقى
انا اختلافى معاه
كان فى نقاط تانية

يساري نوبي يقول...

بصراحه اول مره ادخل علي المدونه هنا بس اكتشفت اني خسرت كتير جدا طول الفتره اللي ماكنتش عارفها فيها
فعلا شكرا جزيلا علي الموضوعات الجميله دي
مشكلتنا فعلا الطائفيه الغبيه اللي ممكن تدمرنا زي ماعملت ف لبنان ....كلنا نسينا اننا مصريين و كل واحد اخد اتجاه طائفي لوحده المسلمين بيتكلموا عن جزيه يدفعها المسيحين حتي نحميهم و نسيوا ان الصواريخ الاسرائيليه ف 1967 مافرقتش بين مسلم و مسيحي
المسيحين بيتكلموا عن انهم اصحاب الارض الحقيقيه و نسيوا ان المسلمين بنوا حضاره عظيمه ف مصر و القاهره كانت من اجمل المدن ف العالم و الناس كانوا بيجوا من كل مكان عشان يدرسوا فيها
اتمني ان تنتهي الطائفيه و ان تنتهي العنصريه ايضا
شكرا جزيلا

بدراوى يقول...

معلش مضطر يبقى فيه رد كمان ليا
لتوضيح امر مهم
---------------
استاذة لقد خلقنا الله أحراراً
شايف منطق غريب فى كلامك

اقولك فيه بعض المسلمين بيعاملوا الأخوة المسيحيون كذا

تقوليلى
ان التصرفات المسيئة للاسلام دى بيعملها اشخاص ما يعرفوش حاجة عن الاسلام
هو فى حد يعرف ربنا
يهدم او يحرق دار عبادة لحد غيره
انا شايفة ان دى حاجة منطقية
مش محتاجة اننا كل شوية نقول
المسلمين بيعملوا حاجات كتير غلط
ماشى بيعملوا
بس دول مش رمز الاسلام
مش دول اللى انا شايفاهم معبرين عن الفهم الصحيح للاسلام

اقولك الشيخ الفلانى بيتكلم كلام مسىء للإسلام و بيهين المرأة

تقوليلى

لما حد يحب يقلل من شأن المرأة
اكيد هيكون بيعبر عن رأيه الخاص بناء على عادات وتقاليد مجتمعه مش دينه
!!!

------------------
طب شوفى الفيديو ده لأبو اسحاق الحوينى
اللى انا كنت قاصد بيه كلامى

لما هو قال العلم للرجالة بس و الستات دووول عوام مفيش واحدة ست تعرف فى العلم الشرعى و لا تعرف تستنبط و ان تعمل تخريج لحديث !!!

http://www.youtube.com/watch?v=BpSHALk1htI
---
اهو ده عينة من اللى مسميينه اعلم اهل الأرض بالحديث !!!!

ده اللى حضرتك شايفه ان ممكن كلامه
يكون رأيه الخاص المبنى على عادات و تقاليد مجتمعه!!!

المشكلة ان دلوقتى بقى الشيوخ دووول هم الإسلام و اى حد ينتقدهم او يختلف معاهم بيتشتم بمعنى كلمة شتيمة

حضرتك انسانة مهذبة صحيح منكرش بتنفعلى لكن مشوفتش اى لفظ فيه شتيمة فى كلامك

غيرك ممكن يشتم شتيمة بشعة

اهو ده الشيخ اللى بقى صورة للإسلام
هو و امثاله اللى باينين على الوش
اما الشيوخ المحترمة بجد فدول مش باينين للأسف
لأن اللى متصدى للدعوة الإسلامية الأن
امثال الحوينى و غيره

دووول بيسيئوا للإسلام اساءة بشعة
و الناس بتعتبر كلامهم هو الإسلام

ارجوكى بلاش حسن الظن اللى عند حضرتك ده

لأ هو مش بيقول بناء على عاداته و تقاليده ده بيقول بناء على انه رأيه هو رأى الدين

انا لما قولت تثبيت كنت اعنى الكلمة كلها
بمعنى العامى ايوا تثبيت
---
حنتظر ردك تانى
بس عاوز حضرتك تبقى فاهمة انى بزعل اوووووى من اى شىء يسيىء للإسلام
عشان كدة بهاجم الحوينى و امثاله غيره على الإسلام

أليس في بلاد العجائب يقول...

انا مزعلتش ولا حاجة لا منك ولا من بدراوي ولا حتي اللي استهزأ بكل اللي اتقال ..

انا بس شكلي مش عارفة اوصل اللي قصدته

و ممكن اكون اتكلمت كتير و كان الافضل خير الكلام ما قل ودل !!


انا مازلت عند رايي انها كانت مناقشة الغرض منها النقاش مش الخناق ولا فرض راي حد علي حد


اما بخصوص عدم رضاي مثلا عن احد علماء الدين

اسمحلي يا بدراوي (عارفة انك زهقت مني بس اخر حاجة)

هي تقصد ان الانسان اللي اجتهد و اتعلم و درس و تعب سنين في تحصيل علم .. جدير الاحترام .. احنا علمنا قليل قليل قليل جدا وفي االلي موقفش عند العلم القليل دا و اخد طريق يلتمس فيه علم
مش معني ان طريقه دا له وجهة نظر انت مقتنعتش بيها .. يبقي هو وحش وغيره كويس او العكس

اختلافهم رحمة .. ورأيهم خطأ يحتمل الصواب و صواب يحتمل الخطأ
وكل كلام مردود الا كلام رسول الله صلي الله عليه وسلم

تعامل من المنطلق دا

"لا يسخر قوم من قوم عسي ان يكونوا خير منهم"

انت بتجتهد علشان ترضي ربنا
وغيرك كمان بيجتهد علشان يرضي ربنا

هو ربنا اعلم بقلب كل واحد ونواياه

مش معني ان كلامه مدخلش قلبي يبقي كلامه غلط

دا معناه ان ربنا سبحانه وتعالي اد كده رحيم بينا
لانه اتاح لينا فرصة نعرف اجتهاد عالم واتنين و الف
و الرسول كان عارف ان هيحصل كده
علشان كده قال استف قلبك وان افتوك
بس المهم يكون القلب دا نضيف كفاية علشان يقدر يميز


خلاصة الكلام

اللي بتشوفه بيريحك و كلامه بيدخل قلبك .. اسمعله وشوفه
المهم تفضل طالب علم عايز يعرف عن الله
بدل ما تنشغل بنقد الاخر .. اسعي انت لطلب العلم .. مين عارف مش يمكن لو تعمقت في العلم اضعاف العلم الحالي .. تفيد نفسك و دينك بصورة افضل
ويجعلك ربنا سبب في نصرة الدين
الكلام مش موجه لحضرتك بشخصك .. انا بقول انت بس بقصد انت او انا او اي حد مسلم

"وتحسبونه هينا وهو عند الله عظيم"

وربنا يجعل اجتماعنا اجتماعا مرحوما لوجه الله ودايما في الخير

أليس في بلاد العجائب يقول...

وعلشان مكونش بكذب وربنا اعلم بالخفايا

بداروي

(اصلى ماليش خلق على المناقشات البيزنطية)
كان سهل تقولي متتكلميش تاني ،، او موجهتش ليكي كلام مثلا .. بدل ما يبقي دا شعورك تجاه النقاش

ويكتفي بهذا القدر من الكلام علشان مفيش حد يتضايق مني زيادة

لقد خلقنا الله احرارا يقول...

يسارى نوبى
اهلا بحضرتك فى اول زيارة
اتمنى ماتكونش الاخيرة
شكرا على المجاملة
ياريت فعلا نبعد عن العنصرية والطائفية
ربنا يهدينا

لقد خلقنا الله احرارا يقول...

يا استاذ بدراوى
انا متأكدة تماما انك بتزعل اوى من التصرفات المسيئة للاسلام
من غيرتك عليه
والا مكنتش تعبت نفسى فى النقاش
وانا معاك تماما
ان ابى اسحاق او غيره لما بيقول رأى احنا بنشوفه مسىء للاسلام بيكون هو بيتكلم لانه شايف ان ده رأى الدين
دى حاجة انا مقدرش اعارضك فيها
لكن انا بقول ان رأيه ده نابع من العادات والتقاليد مش من الدين
يعنى هو شايف انه بيعبر عن الدين
ده رأيه
وانا شايفه ان رأيه ده متأثر بحاجات تانية غير الدين
لان مثلا مكانة المرأة فى الاسلام
انا مش محتاجة رأى فقهى يقول لى
ان الاسلام كرمنى
كفاية ان انا انسانة
علشان استحق التكريم ده
والسيرة والقران والاحاديث والتاريخ بيثبتوا كلامى
لما شيخ يقول كده
انا مش هضايق نفسى
واقعد ادافع عن الاسلام اللى هو واضح جدا براءته التامة من تصرفات الشيخ وكلامه
عندك حق فى انه بيأثر فى شريحة كبيرة بأسم ان ده رأى الدين
طيب نعمل ايه؟
الناس بتسمع كلامه
لانه فعلا درس علم شرعى
ومفيد لهم
الحل من وجهة نظرى
مش اهانته
انما يكون فى فرصة للمناقشة معاه من شيوخ لهم اراء تانية
وكل واحد يذكر أدلته
لكن من عيوب الدعاة عندنا انهم جزر منعزلة
الازهريين مش بيتكلموا مع انصار السنة
وانصار السنة مش بيفضلوا منهج الاخوان

ايه الحل؟
مش عارفة
بس هو اى حاجة تانية غير اهانتهم
انت
انا فاهمة غرضك ايه
لكن فى مدونات كتير وصحف وبرامج
عايشين حياتهم على سبهم واهانتهم
وده بيدى نتيجة عكسية
مش فى مصلحتنا كلنا

هقولك حاجة مش عارفة هتوضح وجهة نظرى ولا هتبوظ الدنيا زيادة
صدام حسين
هقولك الكلام اللى مزعلك منى
فى حد يعرف ربنا ايا كان دينه
يوافق على احتلال بلد مسلم
والسيطرة على مقدرات العراق سنين بالشكل اللى عمله صدام
انا مش معاه تماما فى تصرفاته
لكن عيطت واتقهرت لما امريكا دخلت بلده
ولما قالوا انهم قبضوا عليه
كان يوم من ايام النكد فى حياتى
ولما اتعدم يوم العيد
كنت حاسة ان امريكا بتوجه الاهانة لى انا شخصيا

مش عارفة فكرتى وصلت ولا لا
بس الظالم زى صدام
واخد بالك الظالم
مش الشيخ اللى غلط
وبيبوظ دماغ الناس ايا كان الشيخ ده
ارجع تانى
الظالم ماتظلموش
لان ظلمك ليه
هيخلق تعاطف شديد معاه
والشيوخ ماينفعش
انا مش بتكلم عنك انت
ناخدهم مدعاة للسخرية
نعترض ونرد لما يكون معانا ادلة
او نطلب من العلماء يردوا عليه
بس بلاش اهانتهم

بلاش نسمع الشيخ اللى ارائه صادمة
مع انى افضل انى اسمعه يمكن افهم بيفكر ازاى

هقول حاجة تانى
قلتها عند دكتور اشرف حمدى
فى فئات كتيرة جدا جعانة دين
بمعنى كلمة جعانة
لازم فى الاول بعد جوعنا الشديد ده
يكون فى لخبطة مننا ومن الدعاة
عارف اللى ماكانش ملتزم
واول ما بيعرف الدين بيدخل فيه بقوة
احنا كتير بنعمل كده
لغاية ما يعدى وقت
نحس فعلا بحلاوة الالتزام
هتلاقى وقتها
الوسطية اللى انت بتبحث عنها
والاعتدال
والفقه اللى بيعبر عن رأى الدين مش قناعات صاحبه الشخصية




اتمنى انك تكون مش زعلان
وانا بجد استفدت من المناقشة دى
مع انى نمت قدام الكمبيوتر امبارح


بس
لسه فى حاجة
اليس زعلانة منك من كلمة قلتها
انا متأكدة انك ماتقصدش تزعلها

لقد خلقنا الله احرارا يقول...

اه معلش
اليس اتكلمت عن نقطة مهمة جدا
ان كل فرد يؤخذ من كلامه ويرد الا الرسول عليه الصلاة والسلام
بمعنى ان كلام النبى الواضح القاطع الذى لا يحتمل تفسير
عمرنا ما هنختلف عليه
لكن اختلافنا على التفسيرات التى تتبع كلام الرسول عليه الصلاة والسلام

حاجة كمان معلش
انا بحب جدا جدا الى مالا نهاية عمر بن الخطاب
ومع ذلك عمر
اللى القران كان بيؤيد قلبه ورأيه
فى مرة قال مامعناه
ان المهاجرين كانوا لا يعدون للنساء شيئا
انا مش عارفة اوصل المعنى
بس بالبلدى
شايفين ان المرأة دى مالهاش حقوق
مالهاش رأى
ولما راحو المدينة لقوا الوضع غير كده
اهل المدينة ببيئتهم وطبيعة حياتهم المختلفة عن المكيين
بيتعاملوا مع المرأة معاملة افضل وارقى

مين اللى قال الكلام ده
عمر بن الخطاب
الراشد
اللى النبى صلى الله عليه وسلم قال ان الشيطان بيسلك طريق غير طريق عمر
ومع ذلك فى مواقف ما
كان بيعبر عن قناعاته هو ورأيه هو مش رأى الدين
من غير ده ماينقص من قدر عمر

لقد خلقنا الله احرارا يقول...

اليس
اتمنى من قلبى ان اى كلمة اتقالت هنا ماتكونش زعلتك
لانى فاهمة زى ماقلت لك
انك بتتكلمى من منطلق الدين النصيحة
ولاحساسك بواجبك فى الأمر بالمعروف والنهى عن المنكر
ودى الصفة بصراحة
اللى انا نفسى انميها عندى وعند غيرى
اننا ننصح
ونقبل النصح
او على الاقل فى الاول علشان احنا بشر
مانهاجمش اللى بينصحنا وبيدور على مصلحتنا


من قبل بدراوى ما يرد
انا متأكده انه ميقصدش يزعلك
بس انت عارفة ان أى نقاش بيطول ايا كانت الاسباب
بتلاقيه خرج عن السيطرة
والكلام بيودينا ويجيبنا لحاجات ماكانتش تخطر على بالنا فى الاول


انا استفدت جدا من المناقشة دى
ويارب يكتب لنا الوقت اللى قضيناه فيها لينا مش علينا

انا بنصح نفسى كمان
انى لما احاول اعمل حاجة صح وتتقلب الدنيا ضدى
بحاول ماازعلش واقول مش مشكلة انا نيتى كانت خير
ويمكن الشيطان بيدخل وبيخلى حاجات تزعلنى من الخير اللى عملته
علشان صعبان عليه الثواب اللى هاخده
فمتزعليش علشان خاطرى

أليس في بلاد العجائب يقول...

بجد مش زعلانة :) لا منك ولا منه بجد

انا بس كنت بتكلم بطبيعتي مفترضتش انه اتضايقق طالما مناقشة كل واحد محافظ علي حدوده فيها لم يتعداها وكنت متخيلة لو المناقشة مضايقاه انه هيقول .. اتاريه بيدعي عليا من تحت لتحت :) طالبا الغوث :)

بصي حتي لو كرهتوني انا استفدت علي حس المناقشة دي حاجات كتيرة و اتكعلبت وانا بدور في حاجات مكنتش اعرفها .. يعني انا الكسبانة في الاول والاخر .. الحمد لله

احسب ان نوايانا كلها كانت طيبة بهدف طيب لدين الله .. فحتي يا ستي لو حاجة خبطت فيا انا مبسوطة :) يمكن تتكتبلي حسنة علشان حاولت ادور علي حاجة مكنتش عارفاها واتأكد من حاجة عرفاها ..

الله المستعان واتطمئني اني دخلت مدونتك برضايا و هخرج مرضية ان شاء الله :) :)

مهندس مصري يقول...

بدراوي
=======
عايز أقولك حاجة
إحنا منهيين عن تتبع زلات العلماء
و لكل جواد كبوة
و محدش معصوم بعد النبي عليه الصلاة و السلام
و إختلاف العلماء رحمة فإذا إستفتيت قلبك فإرتاح لرأي عالم معين فإتبعته فلا تعيب و لا تسخر من العالم الآخر و متبعيه
و لكن يجب على من يناقش هذا العالم فيما تعتقده خطأ من رأيه الشخصي يجب أن يكون عالماً مثله و يقارعا بعضهم بالحجة و بالأدلة من الكتاب و السنة
و في النهاية لهم جميعاً كل الإحترام

كمان فيه حاجة إسمها خلاف شرعي سائغ
حيث يكون هناك فريقين من العلماء لهم رأيين شرعيين في مسألة واحدة و الرأيين متساويين من حيث قوة الأدلة و لا يمكن ترجيح احدهما على الآخر
زي مسألة النقاب مثلاً
و ساعتها فلا حرج عليك أن تتبع أي من الرأيين بدون أن تقلل من أتباع الرأي الآخر
و كلاكما مأجور من الله إن شاء الله
و تذكر قول الله سبحانه و تعالى : لا يسخر قوم من قوم عسى أن يكونوا خيراً منهم

أدع لمن إختلفت معه بالهداية بدلاً من أن تسخر منه
و حسبنا في ذلك قدوتنا رسول اله صلى الله عليه و سلم حيث كان يدعو لقومه من الكفار فيقول : اللهم إهد قومي فإنهم لا يعلمون
أفنبخل نحن بالدعاء لإخوتنا في الإسلام

بدراوى يقول...

طب يا اليس اعتذر عن كلمة مناقشات بيزنطية و ان كنت بقول كدة عشان مليت من النقاش خاصة فى الموضوع ده
و بزهق بسرعة

و الكلام ده لأى حد مش ليكى كأليس فى بلاد العجائب

و حصل خير و شكراً على النقاش
و انا بقى ربنا يتولانى برحمته

بدراوى يقول...

اما مهندس مصرى و أخت لقد خلقنا الله أحراراً مع احترامى و معزتى ليهم
فردى على كلامهم هو

لا تعليق

و نلتقى على خير فى بوست قادم
ان شاء الله

لقد خلقنا الله احرارا يقول...

مهندس مصرى
جزاك الله خيرا

مش قادرة اقولك اكتر من كده

لقد خلقنا الله احرارا يقول...

بدراوى
شكرا انك اهتميت
ترجع وتقول لاليس انك مكنتش تقصد تزعلها
وانا متأكدة ان كلنا مش انت بس
نتمنى ونرجو ان ربنا يتولانا برحمته

لقد خلقنا الله احرارا يقول...

اليس
معلش
دماغى لفت
وافتكرت انى رديت على تعليقك
مين قالك ان انا عايزاك تخرجى من مدونتى
حتى لو مرضية
انت شرفتينى ونورتينى وافدتينى
جزاك الله خيرا

أليس في بلاد العجائب يقول...

ربنا يسعدكم :)

لقد خلقنا الله احرارا يقول...

اللهم امين

مصعب صلاح يقول...

السلام عليكم
الصراع بين المسلمين والمسيحين من فعل الحكومة
أهي حاجة تشغل الناس

لقد خلقنا الله احرارا يقول...

مصعب صلاح
ازيك عامل ايه
كلامك مظبوط
الحكومة من انصار سياسة فرق تسد

أم مالك يقول...

انا جاية اسلم عليكى
واشكرك على سؤالك الدائم عنى
ودعواتك لى
والحمد لله انا بخير
واتمنا استمرار الدعاء
وانى احبك فى الله
تحياتى

بدراوى يقول...

ازى حضرتك
صحيح انا قولت لا تعليق
عشان اقفل النقاش بس الصراحة مش قادر اسكت
لسة اخر كلام قالته اليس و حضرتك
و مهندس مصرى
رداً على كلامى على الحوينى داير فى دماغى
و حاسس حيجرالى حاجة لو مردتش عليه

فمعلش لازم ارد عليه

لما حضرتك او أخت اليس تقولى استفتى قلبك
مش معنى ان شيخ ليه وجهة نظر معينة انت مش مقتنع بيها يبقى هو غلط و ووحش
اختلافهم رحمة

و حضرتك قولتى كمان

الحل مش بإهانة الشيخ و لكن بالنقاش معه من خلال علماء اخرين
حقول لحضرتك حاجة اسف فيها

ده فى المشمش لو حد تقبل نقاش اى شيخ مع هذا المدعى و لن أتنازل عن كلمة مدعى اللى اسمه ابو اسحاق الحوينى

حضرتك مش متخيلة مريدوه بيعملوا ايه فى اى حد يتناقش و يختلف معاه حتى لو كان شيخ او عالم ازهرى بيمسحوا بيه بلاط النت و بيتعتبروه بتاع الحكومة و انا هنا مقصدش شيخ الأزهر طنطاوى بتكلم بصفة عامة على اى عالم

اقسم بالله بيتبهدلوه بهدلة بشعة

بس عند الحوينى انصاره و مريدوه يقولك لا تتنتقد الشيخ فلحوم العلماء المسمومة
فى نفس الوقت اللى هاجم فيه مريدوا الحوينى شيوخ اخرين و نسوا مقولة لحوم العلماء بشكل نهائى

ده يرضى ربنا ده

و الاخت اليس اللى بتقولى استفتى قلبك
و

مش معني ان كلامه مدخلش قلبي يبقي كلامه غلط


طبعاً هى حتقول بتكلم بصفة عامة
و انا حقولك ان ظاهر الكلام انها مش عاجبها انتقادى للعالم العظيم الفظيع ابو اسحاق الحوينى

يعنى انا اعمل ايه ياربى

كلام ايه اللى يدخل قلبى عشان اعرف

و كلامه غلط ايه ده

لما يقول الستات عوام و لا يفقهوا شىء
تقوليلى حضرتك بكل بساطة

لو كلامه مش عاجبك او مش معنى انه مدخلش قلبك يبقى كلامه غلط


الصراحة انا مضايق بجد
و شايفكوا بتدافعوا بشكل غير طبيعى عن ناس بتسىء للدين و مش عاوزين تغلطوهم رغم انهم ليهم اخطاء كثير

و بقول تانى مش بتكلم فى ادلة شرعية
بتكلم فى كلام عام بيقولوا الحوينى

و ده يعتبر اخر كلام ليا
و بخصوص كلام مهندس مصرى مختلف معاه كله

و حضرتك مش حتلاقينى بعلق عندك تانى فى المدونة
لو ده افضل ليكى

و انا شايف انه افضل

و السلام عليكم و رحمه الله و بركاته

أليس في بلاد العجائب يقول...

قال تعالى : (وَمَا كَانَ لِمُؤْمِنٍ وَلا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ)



روى النسائي والترمذي بإسناد صحيح عن وابصة بن معبد قال أتيت النبي صلي الله عليه وسلم أسأله عن البر فقال : جئت تسأل عن البر. قلت نعم قال : البر ما أطمئن إليه القلب واطمأنت إليه النفس والآثم ما حاك في النفس وتردد في الصدر وكرهت أن يطلع عليه الناس . استفتي قلبك وأن أفتاك الناس وأفتوك ( وللحديث روايات أخرى )



قال الإمام ابن رجب الحنبلي رحمه الله في شرح حديث " استفت قلبك " :
وهذا إنما يكون إذا كان صاحبه ممن شرح صدره للإيمان ، وكان الْمُفْتِي يُفْتِي له بِمُجَرَّد ظَن أو مَيل إلى هوى مِن غير دليل شرعي ، فأما ما كان مع الْمُفْتِي به دَليل شرعي فالواجب على الْمُستَفْتِى الرجوع إليه وإن لم ينشرح له صدره ، وهذا كالرخصة الشرعية ، مثل الفِطر في السفر والمرض ، وقصر الصلاة في السفر ونحو ذلك مما لا يَنْشَرِح به صُدور كثير مِن الْجُهَّال فهذا لا ِعبرة به .





يقول ابن القيم رحمه الله في أعلام الموقعين:
لا يجوز للمستفتي العمل بمجرد فتوى المفتي إذا لم تطمئن نفسه، وحَاكَ في صَدْره من قبوله، وتردد فيها؛ لقوله صلى الله عليه وسلم: «اسْتَفْتِ نَفْسَكَ وإن أفتاك الناسُ وأفْتَوكَ» فيجب عليه أن يستفتي نفسه أولاً، ولا تخلصه فتوى المفتي من الله إذا كان يعلم أن الأمر في الباطن بخلاف ما أفتاه، كما لا ينفعه قضاء القاضي له بذلك، كما قال النبي صلى الله عليه وسلم: «مَنْ قضيت له بشيء من حق أخيه فلا يأخذه؛ فإنما أقْطَعُ له قطعة من نار» والمفتي والقاضي في هذا سواء، ولا يظن المستفتي أن مجرد فتوى الفقيه تبيح له ما سأل عنه إذا كان يعلم أن الأمر بخلافه في الباطن، سواء تردد أو حاك في صدره، لعلمه بالحال في الباطن، أو لشكه فيه، أو لجهله به، أو لعلمه جَهْلَ المفتي أو محاباته في فتواه أو عدم تقيـيده بالكتاب والسنة أو لأنه معروف بالفتوى بالحِيَل والرخص المخالفة للسنة وغير ذلك من الأسباب المانعة من الثقة بفَتْوَاه وسكون النفس إليها؛ فإن كان عدم الثقة والطمأنينة لأجل المفتي يسأل ثانياً وثالثاً حتى تحصل له الطمْانينة؛ فإن لم يجد فلا يكلف الله نفساً إلا وسعها، والواجب تقوى الله بحسب الاستطاعة.أهـ [صفحة 192-طبعة دار ابن الجوزي]

أليس في بلاد العجائب يقول...

انا "اللي" بتحط كلام علي لساني مقولتوش

مبدئيا انا معرفش الشيخ الحويني ولا افتكر اني سمعتله حاجة .. عملت سيرش وبصيت علي صورته لقيتني اول مرة اشوفه (( يعني حضرتك ظلمتني وتخيلت اني بدافع عنه وان بعض الظن اثم لاني معرفهوش اصلا))

انا لو بدافع فانا بدافع عن مبدأ
ربنا قال : هل يستوي الذين يعلمون والذين لا يعلمون؟

انا اجهل الجهلاء لاني مدرستش زي الأئمة والعلماء .. وعلمي ضيق وقليل لابعد حد جنب اصل علمهم .. الاعتراف بالحق فضيلة

الحويني او غيره .. معتقدش انه مزور الدكتوراه بتاعته مثلا ولا جايبها من برة بفلوسه .. يعني اعتقد والله اعلي واعلم انه قعد زي غيره يدرس ويقرأ في كتاب الله والسنة و كتب الأئمة الفقهاء و السلف الصالحين

يعني لو حتي رأيه خطأ و بيقول اي كلام .. كونك بتستهزأ بيه .. نتيجتها حاجة بسيطة اوي
هياخد من حسناتك و هتاخد انت من سيئاته .. دا علي احسن الفروض والله اعلي واعلم
لانك بتغتابه مش بتتناقش عن علمه .. هل انت بحثت وراه مثلا شفت هو تتلمذ علي يد مين من العلماء؟؟ متبع اي المذاهب الفقية؟؟ درس علمه فين و خلفيته ايه؟؟

انت زعلان علشان بيقول النساء يتبنيلهم مدينة لوحدهم علشان ميبقاش في اختلاط... وزعلان ان انصاره مش بيدوا فرصة لحد يتناقش معاهم

مش هجادلك في دا .. بس سهل جدا جدا جدا .. تجيب آراء علماء افاضل مؤيدين للرأي دا كانوا او مخالفين .. لو دورت هتلاقي .. وهتتعرف وانت بتدور علي راي الدين ايه و راي العلماء ايه

و في وسط دا اعرف ان كل راي خطأ يحتمل الصواب وصواب يحتمل الخطأ

وتسفيه رأي الاخرين ولا هيقدم ولا هيأخر

ومعلش يعني انت هتستفيد ايه لو دخلت انا مثلا شتمت في الراجل ولا استهزأت بيه زي استهزائك دا؟؟؟؟
هل يرد قوله مثلا لو خطأ؟؟؟
هل يفيد ديني بحاجة؟؟؟
هينفعني لما اموت في اخرتي؟؟


حاول تتقبل ان في رأي في الدنيا غير رأيك .. بل آراء متعددة ممكن جدا يكون كل رأي منهم في اتجاه غير الاخر

و بردة هرجع واقولك طالما ارتضيت المناقشة يبقي المفروض تكون مالك زمام غضبك اكتر من كده .. علشان مش كل حد هيستحمل تهزأ به!!!

انا برد عليك رغم احساسي باد ايه انت مش طايق الكلام و لا اللي بيتكلم .. بس فرض عليا اكمل المناقشة لاني ارتضيتها من الاول

لقد خلقنا الله احرارا يقول...

مبدئيا علشان مايكونش فى زعل
او يكون فى تخيل ان عدم ردى مقضود
انا نازلة دلوقت عندى شغل
وهارجع الساعة 3 تقريبا
وان شاء الله هانزل تانى قبل 4 لو قدرت اعلق وقتها ربنا يسهل
خدوا راحتكم على الاخر فى النقاش
وانا الافضل لى ويشرفنى يابدراوى انك تعلق عندى
وماصدرش منى اى كلمة تديك المعنى ده
فبلاش تبقى زعلان كده لغاية مااجى
السلام عليكم

لقد خلقنا الله احرارا يقول...

ام مالك
اهلا وسهلا بحضرتك
حضرتك عاملة ايه دلوقت ؟
ربنا يرزقك شفاءا لا يغادر سقما
بتحرجينى والله بذوقك وامومتك
ياأم البلوجر كله

لقد خلقنا الله احرارا يقول...

أليس
اعذرينى
انا اغلب كلامى بيكون موجه لبدراوى
لان كلامك انا متفقة معاه
أو فى الاغلب
بيضيف لى معلومات جديدة
فبيكون معنديش تعليق عليه
غير انى أقول حتى لو سرا
جزاك الله خيرا

مهندس مصري يقول...

بدراوي
=======
أولاً : إنت حبيبي و إنت عارف :)
ثانياً : أنا مش بأسمع حد من الشيوخ دول و مش بأسمع القنوات الدينية أساساً و بأفضل القراءة في الكتب أو سؤال أهل العلم مباشرة
ثالثاً : مش معنى إن بعض متبعين عالم من العلماء بيقدسوه بطريقة غريبة و بيتعاملوا مع معارضيهم بطريقة غلط إننا ننحط لمستواهم فكل إناء ينضح بما فيه

و يا سيدي هو غلطان في موضوع النساء الجاهلات ده بس برضه أخلاقنا كناس محترمة - و إنت واحد من المحترمين - لا تسمح لنا بالسخرية منه مهما كان بعض اتباعه على درجة من الفجور في الخصومة

و أخيراً : الخلاف في الرأي لا يفسد للود قضية و أنا ما زلت بأعزك و بأحبك و بأحترمك و أتمنى إنك ما تزعلش مني

لقد خلقنا الله احرارا يقول...

استاذ بدراوى

اولا
اسفة على التأخير فى الرد للظروف المشروحة سابقا

ثانيا

انا دخلت على النت بمشاكل كتير جدا
مش عارفة بصراحة من النت عموما ولا من الكمبيوتر
ربنا يستر

ثالثا

كلامك بيدور فى دماغى طول النهار
مش عارفة اشتغل ربنا يسامحك

هقولك على حاجات

انا مش هتكلم بأدلة شرعية
لانى معنديش القدرة اعمل كده زى أليس

انت زعلان جدا
ان ابو اسحاق قال ان المرأة من العوام
وانها لاتصلح لطلب العلم
انا كمان مضايقنى الكلام ده اوى
ومش هقول زى أليس
ابحث وادور
واتعرف على الاراء المؤيدة والمخالفة
مع ان كلامها صح
انا هقولك حاجة تانية
انا بتكلم مع ماما عادى جدا بحكيلها النقاش الدائر فى المدونة
قالت لى يمكن ابو اسحاق مش يقصد يشوف المرأة فى مكانة متدنية
بس هو طلب العلم بطريقة معينة فيها مشقة وسفر
وفكرتنى بحلقة شفتها ليه زمان بيتكلم عن سفره للامام الالبانى لطلب العلم ومعاناته فى السفر ده
قالت لى
هو شايف ان دى الطريقة اللى طلب بيها العلم
هتكون صعبة على المرأة وفيها مشقة
قلت لها مش مبرر
يمكن فى طرق تانية للعلم غير طريقته
يمكن فى سيدات عندهم الوقت والمال
ومفيش مسئوليات عليهم تمنعهم انهم ينشغلوا بالعلم
يبقى انا فى المطلق كده
مش موافقه على الرأى ده
بس
فى سؤال مهم
هى الدنيا ماشية معاك مظبوطة جدا
كل اللى انت عاوزه بيتحقق
خططك كلها بتنفذها بحذافيرها
مش بتحصل حاجات غصب عنك احيانا تضيع سعادتك بحاجات كنت مستنيها

السؤال الاهم

مش بتيجى على نفسك ابدا

انا باجى على نفسى دايما
اعتبر ياسيدى عدم اهانتك للعلماء
انك بتيجى على نفسك لله
علشان الشيخ ده واحد اكبر منك سنا
انا بقول لنفسى حتى لو مش مقتنعة باراء الشيخ
احترمه علشان القران اللى حفظه حتى لو هو مش فاهم معانى القران لكن انا لسه ماحفظتش
علشان الساعات اللى قضاها يقرأ فى كتب حتى لو مفهمهاش
وانا كنت وقتهابتفرج على الmbc2
بحترمه علشان يمكن اكون انا مش فاهمة
اديك مثال
مرة خطر على بالى اصوم ايام 13 و14 و15 من ذى الحجة
وفاكرة نفسى بقى ماحصلتش
وبعدين بالصدفة الشيخ بيقول فى التليفزيون اللى صام النهارده يفطر
والكلام ده كان بعد العصر
قلت لنفسى
ايه التشدد ده
المنهى عنه صيام يوم العيد بس
ايه الناس دى
بتخنقنا ليه
لكن بعد كده
اكتشفت كم سذاجتى
وان ايام التشريق منهى عن صيامها هى كمان
وانا كبيرة كده ومتخرجة من الجامعة ومش عارفة معلومة بسيطة اوى زى دى

احساسى انى معرفش حاجات كتير
هو اللى بيخلينى احترم ابو اسحاق وغيره
حتى لو مش موافقه على رأيه
انا بعارضه كلقد خلقنا الله احرارا فى
رأيه ان يكون فى مدينة للنساء منعا للاختلاط
وان المرأة من العوام
وتشجيعه الرجال عمال على بطال على التعدد
مع ان التعدد شرع ربنا
لكن مختلفة معاه فى طريقة تطبيق الشرع
بس هقولك تانى
واحد حافظ قران اكتر منى
درس علم شرعى وانا مادرستش
بيؤدى عبادات وربنا اللى بيقبل
بس على الاقل بيجاهد نفسه اكتر منى
ازاى اقول عليه مدعى
مدعى ايه؟
انه درس حديث
لا هو فعلا درس
فهم من الاحاديث حاجات انا شايفاها بديهيا غلط
لو انا عالم والله ماهسكت وهناقشه وارد عليه
بس انا مين
فعلشان خاطر ربنا
وعلشان مااخدش ذنوب من الغيبة
وعلشان ماخدش ذنوب من السخرية منه
وعلشان النبى صلى الله عليه وسلم وصانا نلتمس لاخينا سبعين عذرا
بسكت وانا مش لاقية ولا عذر انه يتهمنا كلنا اننا عوام ولا نصلح لطلب العلم



معلش الكلام الجاى هيزعلك
بس اختك الكبيرة
استحملنى معلش
مريدين ابى اسحاق وغيره غلطانين
انا معاك ومش موافقة على تصرفاتهم
وهى تصرفات مسيئة للاسلام
بيشتموا فى المخالفين ومش بيرضوا اى نقد لشيخهم
بسجل اعتراضى بشدة
بس سيادتك هى دى بس الحاجة الغلط اللى فى الدنيا
مفيش حوالينا حاجات غلط تانية
طيب هفترض دول ناس متشددة ومش بتفهم حاجة وبيسيئوا للاسلام
انا عملت ايه للاسلام
اعرف ايه عنه
طبقت ايه من تعاليمه
اه انا وانت وناس كتير نعمة من عند ربنا حاسين بروح الاسلام وبنحاول نتقى الله فى تصرفاتنا
حلو جدا
من التقوى التغاضى عن الاخطاء وليس الخطايا

مش عارفة انا وصلت وجهة نظرى ولا لا

اقولك
كمان كام يوم
كام شهر
ارجع اقرأ التعليقات دى تانى براحة بعد مانكون نسينا انفعالنا
انا كمان هعمل كده
واراجع نفسى
الانفعال غالبا بيخلى الواحد مش شايف غير رأيه هو بس

لقد خلقنا الله احرارا يقول...

تعال هنا
ايه الكلام الجامد
بتاع مش هدخل هنا تانى
وده من الافضل
والحاجات الغريبة دى


انا ماصدرش منى او من أليس او من مهندس مصرى
اى كلمة تخص شخصك
بالعكس انا شايفة الكلام معاك كان غرضه النصح وبسبب احترامنا لك
انت انسان راشد
وعندك عقل يميز النصيحة اللى تقبلها او لا
بس احنا بنقولك رأينا اللى شايفينه صح
وانت بتقول رأيك اللى مصر عليه وشايفه صح
محصلش حاجة
احنا الحمد لله بدأنا المناقشة مسلمين
وبننهيها مسلمين بفضله
محدش فينا اهان التانى
بالعكس انا الوحيدة اللى انفعلت على استاذ سهيل
بسبب كلامه هنا
ولاسباب تانية مش وقتها دلوقت
لكن بدراوى
انا لو مكنتش شايفة انه بنى ادم كويس ماكنتش اتكلمت معاه كل الكلام ده



بدراوى
على الله اكتب بوست تانى
ومش الاقيك اول تعليق
هتلاقينى قاعدة على باب مدونتك
اشتكيك لكل البلوجارية
وخصوصا ان قوالب مدوناتنا زى بعض
انت حر

لورنس العرب يقول...

اين انتي يا استاذه؟

لقد خلقنا الله احرارا يقول...

لورنس العرب
جزاك الله خيرا على السؤال
أنا الحمد لله فى الدنيا
بس مطحونة فى الشغل
والنت كمان مش طبيعى
بدخل عليه بالعافية
شكرا جزيلا على السؤال

م/ الحسيني لزومي يقول...

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست

لقد خلقنا الله احرارا يقول...

م/الحسينى لزومى
علم ونفذ يافندم