بدر (1)

كنت بفرح جدا بالكتب ا للى بتتكلم
عن ذكاء النبى صلى الله عليه وسلم
وعبقريته السياسية والحربية
لغاية مافهمت ان كتير من الكتب دى
مش كلها طبعا
أهدافها مش طيبة
هى بتشدنا نقرأ
بس بتحاول توصلنا من بعيد
للكلام على محمد صلى الله عليه وسلم
كبشر عبقرى سمت به عبقريته بين قومه
لكن الحقيقة ان محمد عليه الصلاة والسلام
مع إقرارنا ببشريته
اللى هى جزء أصيل من عقيدتنا
ومع إقرارنا بعبقريته
لكن مفتاح شخصيته صلى الله عليه وسلم
هو الوحى
لو ركزنا على النقطة دى هنرتاح كتير
ربنا سبحانه وتعالى اصطفاه وجعله خير البشر
لكن كل توفيق فى دعوته عليه الصلاة والسلام
كان بسبب
أنه يوحى اليه
يعنى مش ذكاء وعبقرية مجردين
ودى حاجة لاتعيب النبى مطلقا
لكن وحى ربنا سبحانه وتعالى
هينزل على بشر معد ومجهز
ويمتلك من الصفات والخلال مايؤهله لنزول الوحى اليه
ليه المقدمة الطويلة دى؟
لان محمد عليه الصلاة والسلام
الموحى اليه
مش ممكن يخرج من يثرب
علشان يستولى على قافلة ابو سفيان
لاسترداد الاموال التى أخدتها قريش قسرا من المسلمين قبل الهجرة
دى مش تصرفات نبى
لكن الاقرب للعقل والمنطق وروح السيرة
ان الخروج السريع قبل بدر
كان ليه أهداف أكبر وأعمق من العير
قريش أشهر قبيلة عربية كانت مرتبطة مع القبائل الاخرى باتفاقيات ومعاهدات
أتم معظمها
قصى بن كلاب
جد الرسول عليه الصلاة والسلام
الاتفاقيات دى بتدى الامان لقوافل قريش
وطبعا كلنا عارفين ان التجارة
كانت مصدرا لرزق الحيوى جدا لمكة المحرومة من الزراعة
النبى عليه الصلاة والسلام خرج بالمسلمين لاعتراض قافلة ابوسفيان فعلا
بس ده كان درس لقريش
تعمل بيه حساب لقوة المسلمين الوليدة
وتفهم بيه ان رزقها فى خطر
لو ماخففتش ضغطها على المسلمين
وسمحت للنبى يمارس دوره الاساسى فى الدعوة للاسلام
وكان رساله للقبائل العربية المحيطة بيثرب
المرتبطة باتفاقيات مع قريش
زى قبيلة غطفان
اللى هتكون من أهم أعمدة الحملات الحربية ضد المسلمين فيما بعد
ان المسلمين ليسوا ضعفاء
كمان بالرغم من المدة القليلة اللى قضاها المسلمين فى يثرب
لكن كان واضح جدا
وجود أعداد كبيرة من المنافقين واليهود
الذين لم يصبروا على اظهار العداوة للمسلمين
النبى صلى الله عليه وسلم كان بيوجه رسائل غير مباشرة لكل العناصردى
ان المسلمين قوة لايستهان بها
وان طلباتهم بسيطة جدا
الدعوة
الدليل على كده
ان بدر لم تكن أول محاولة من المسلمين لاعتراض قوافل قريش
وكانت بتنتهى كل هذه المحاولات
بعقد مصالحات مع قبائل عربية حول يثرب
حتى فى سرية شهيرة جدا
هى سرية
عبد الله بن جحش
كانت فى شعبان
السرية دى مهمة جدا لانها بترسى أسس كانت جديدة بالنسبة للمسلمين
باختصار شديد
كان هدف النبى صلى الله عليه وسلم منها الاستعلام عن أخبار قريش
لكن حصلت تطورات
أدت لاشتباك قتل فيه أحد المشركين واستولى المسلون على بعض العيروأسيرين
النبى عليه الصلاة والسلام غضب بشدة من هذا التصرف
خصوصا لانه تم فى الاشهر الحرم
ورفض أخذ العير والاسيرين
لو الهدف من السرية الغزو كعادة العرب
كان النبى صلى الله عليه وسلم فرح بالنصر البسيط ده
لكن هدفه الاسمى عليه ا لصلاة والسلا م
كان دعوة قريش للتفاهم معه
على اساس
التخلية بين المسلمين والناس للدعوة الى الله
والتخلية بين قريش وتجارتها
فى رأى بيقول
ان لما السرايا الكتير مقدرتش تقنع قريش بقوة المسلمين وتتركهم للدعوة
كان لازم يكون فى عمل كبير
ولازم صدى العمل ده يوصل لكل العرب
فيحرك كتير من المياه الراكده
ويدفعهم للتفكير فى طبيعة الخلاف بين المسلمين وقريش
ويمكن التفكير ده يكون سبب فى اعتناقهم للاسلام
الكلام عن بدر لم يبدأ بعد

8 التعليقات:



tarek momen يقول...

يا سيدي علي شتات الذاكرة لما يجمع
الله ينور
طيب انتي طبعا احسن مني في التاريخ
فانا هاكتب عن الحاضر
تحياتي و في انتظار الكلام عن بدر

A.SAMIR يقول...

قوي الموضوع و عميق فعلا
مدونتك جميلة
اسمح لي ان اكون صديقا دائما

بيطرية ومش بايدى يقول...

يا جماعة
احذروا الاستاذة ماشاء الله واللهم لا حسد كلامها جامد جدا ف سيرة الرسول
عليه افضل الصلاة واتم التسليم
يعنى اكيد لازم هتتنظروا الافضل بالتاكيد
ربنا معاكى يا جميل ويزيدك ودايما كده بتاخدى ثواب تعليم الجهلة اللى زى حالاتى

تامر علي يقول...

فعلاً الرسول مؤيد بالوحي ...لكن في نطاق ما يتصل بأمور الدعوة والشريعة فقط ... أما ما يتعلق بإدارة أمور الدنيا فكان متروك له تماماً ولمشاورة المسلمين لتكون سنة للمسلمين على مر الزمان أن ادارة امور الحياة شيء والمعتقد والشرائع شيء وحلقة الوصل بينهم هي الاتقان والتقوى

بوست جميل وفي انتظار الباقي

تحياتي :)

لقد خلقنا الله احرارا يقول...

استاذ طارق
شكرا على مجاملةحضرتك
بس بجد انا بحب اعرف رأى حضرتك
بحس فيه بحكمة حقيقة مغلفة ببساطة جميلة جدا
تحياتى لحضرتك

لقد خلقنا الله احرارا يقول...

استاذ احمد سمير
اهلا بك يافندم
شكرا على الاطراء
انا يشرفنى وجود حضرتك وتعليقاتك دائما
تحياتى لحضرتك

لقد خلقنا الله احرارا يقول...

دكتورة بيطرية
اهلا بك ياقمر
حلوة الدعاية المستمرة منك دى
ربنا يكرمك ياحبيبتى
احنا نيجى ايه جنب سيادتك ياباشا

لقد خلقنا الله احرارا يقول...

استاذ تامر
اهلا بحضرتك
طبعا كلام مظبوط تماما
بس انا كنت بركز على الوحى
لان كتب كتير كنت بثق فيها
كانت بستطرد فى الحديث عن العبقرية وشجاعته صلى الله عليه وسلم
بغرض البعد تدريجيا عن فكرة الوحى
وعدم الاعتراف بمعجزاته حتى الثابت منها

شكرا على التشجيع
تحياتى لحضرتك