وفاة مايكل جاكسون

زعلت جدا النهارده لما سمعت خبر وفاة مايكل جاكسون
أنا عمرى ما سمعته
وكنت دايما بتضايق منه
ومش من هواة الاغانى الاجنبية أبدا
بس كنت بحس انه انسان ضايع
عايز يكون حاجة ومش عارف
كنت بحس ان الحاجات الغريبة اللى بيعملها فى شكله وشعره
مش مجرد انها تقاليع فنانين
لا ده فى رأيى بيعير عن عدم رضاه عن نفسه وعن حياته وعن لونه
وان كل النجاح اللى حققه ده ماكانش كافى انه يخليه يحس بالرضا
اتضايقت جدا لما سمعت عن الشائعات الاخلاقية اللى كانت بتطارده
لكن النهارده لما أجله انتهى
وأنا فاهمه طبعا ان حسابه على الله
واننا ماينفعش نقول ده فى الجنة وده فى النار
حسيت بجد انى حزينة وانى خايفة على نفسى
وانى مش مستعدة اواجه مصير زى مصيره
الايام دى عماله اذاكر كلام كتير مهم جدا
باختصار
ان جوهر ديننا الامر بالمعروف والنهى عن المنكر
لو كان مايكل صادف فى حياته أشخاص بيحبوه بجد
مش مخابيل أو مستفيدين منه
ولو كان عنده استعداد يسمع نصيحة
مش يمكن كانت نهايته تكون أفضل من كده ؟
من فترة كنت بشوف برامج بتتكلم عن ممثلة امريكية اسمها انا نيكول
ماتت تقريبا بسبب جرعات زايدة من الكحول والمخدرات
وكانت حياتها مادة خصبة للشائعات ومجلات الفضايح
مش عارفة ليه بعد ماتجاوزت مشاعر الضيق منها رجعت تعاطفت معاها
حسيت انها مظلومه وضايعة وكانت محتاجة ايد تتمد ليها بالخير
لما ماتت سعاد حسنى الله يرحمها
وكانت الاخبار كلها عن انتحارها
شخصية عزيزة جدا على قلبى قال ماتت كافرة يالا بلاش قرف
أنا مقتنعة طبعا بحكم المنتحر ده مش موضوع للنقاش
بس لفت نظرى نفس الفكرة
الناس اللى حواليها بشر كتير جدا
يااما بيستفيدوا يااما بيشجعوا على الباطل
حتى أقرب الناس ليها
حتى فى ذكرى وفاتها كل سنة مش بيرحموها
بيسترزقوا من وراها
طيب هى سعاد لوكانت عاشت حياة مستقرة
ولقت أب يوجه ويربى كان ده بقى حالها
لو حد قالها فى شبابها ان جمالها مش هيدوم
وان كل المنتفعين دول هيكونوا أول اللى هيدوسوا عليها
مش يمكن كانت اتغيرت؟
عارفين بيخطر على بالى مين كمان
الملك فاروق
مش عارفة أنا مالى النهارده نفسيتى واجعانى ليه
لكن بجد بحس ان فى بشر كتير ليهم حق علينا
حق النصيحة
لما أسمع الكلام عن استبداد فاروق
أو الروايات المشكوك فيها عن سقطاته الاخلاقية
أحس انه بيصعب عليا
اتربى فى بيئة غير مشجعة
أب قاسى وام مقهورة ياما صدقت يتفتح لها الباب
وطلع هو ابن وحيد مدلل
وجد الخيانه من أقرب الناس ليه
كفاية ان والدته اتنصرت وهاجرت
متهيألى ان دى طعنة هتفضل تنزف لحد مايموت
أنا أكيد مش بقصد أخلى مسئولية الناس دى عن حياتهم اللى ضاعت هدر
ولابقول ان حياتى ماشية صح وانى مطمنة على مصيرى
بس أنا حاسة اننا لينا دور لازم نقوم بيه على اد مانقدر
ننصح بعض ونتعلم ده يكون ازاى
علشان ننقذ بعض
أنا بيلفت نظرى وأنا كمان بعمل كده
اننا بندافع عن بعض عصبية مش اكتر
ياريت ده يكون على حق ولله
أنا أعرف ناس كتير أخلاقيا ودينيا ملتزمين جدا
لكن مفيش الامر بالمعروف ده
أنا درست والله الولاء والبراء
واتناقشت فيه كتير مع اساتذتى اللى بكن ليهم كل احترام
أصل أنا كل ماتكلم عن حد مش مسلم أومسلم مختلف معانا فى المذهب
الاقى الناس بتبص لى باستنكار
بيحسسونى ان عقيدتى والعياذ بالله مشكوك فيها
متهيألى تعاطفى مع بنى ادمين ماتوا
من غير ما يتهنوا حسب الظاهر أمامى بالقرب من ربنا سبحانه وتعالى
مش مرتبط بالولاء والبراء لانى منضمتش ليهم
ولا----
ربنا يستر---
أنا بحب جدا الايه الكريمه دى
لعن الذين كفروا من بنى اسرائيل على لسان داود وعيسى بن مريم ذلك بما عصوا وكانوا يعتدون كانوا لا يتناهون عن منكر فعلوه لبئس ماكانوا يفعلون
والاحداث اللى حصلت دى بتفكرنى باية سورة الكهف
قل هل ننبئكم بالاخسرين اعمالا الذين ضل سعيهم فى الحياة الدنيا وهم يحسبون انهم يحسنون صنعا
صدق الله العظيم
اللهم ارحم موتانا واسترنا فوق الارض وتحت الارض ويوم العرض عليك
اللهم لاتجعلنا ممن قلت فيهم
ومن أعرض عن ذكرى فأن له معيشة ضنكا ونحشره يوم القيامة اعمى قال ربى لما حشرتنى أعمى وقد كنت بصيرا قال كذلك اتتك اياتنا فنسيتها فكذلك اليوم تنسى
اللهم ارزقنا الرضا حتى ترضى
اللهم احسن خواتيمنا
وأمتنا على ملة الاسلام

41 التعليقات:



A.SAMIR يقول...

انا برضة ماليش في الاجنبي و لا عمري سمعته
بس زعلت لما مات
حسيت ان في حاجة و تقليعة كانت موجودة و اختفت
الواحد حاسس ان كل اللي عاش و هم موجودين في الحياة هيبقوا ذكرى ان عاجلا او اجلا

GiGi worled يقول...

الله يرحمه
على فكره انا عارفه انه اسلم بس ماكانش علنى والاغنيه اللى عدنا علىا لموبايلات بتاعت الله غفور اللهرحيم الله يحب المؤمنين دى كانت ليه هو اللى بيغنيه
الله اعلم ياجماعه انا كنت عارفه انه اتجه للاسلام
ربنا يرحم المسلمين جميعا ويرزقنا الخير ويحسن ختامنا ياااااااااااارب

لورنس العرب يقول...

ولله انا فتحت الياهو الصبح اناهردا
فوجئت بالخبر
الحقيقه اتشديت شويه
يعني عشان هو شخصيه العالم كله بيعرفه
لو دخلت على اليوتوب دلوقت هتلائي اعلى نسبة مشاهده بين الكليبات بتاعته

غير معرف يقول...

انا سمعت الخبر امبارح باليل الساعة 2 صباحا انه هو مات بازمة قلبية عن عمر يناهز 50 سنة تقريبا سمعتها ف الراديو بس انا ماكنتش عارفة برده ازعل ولا افرح ان كل اللى اعرفه عنه ان احنا زمان اما نحب نستهزأ بواحد بيرقص رقص هبل يعنى واحنا صغيرين كنا بنقول عليه ده شبه مايكل جاكسون واخر مرة شوفته فيها على التلفزيون كان جايبينوه وهو رايح السجن بس واضح من كلام الناس عن اغنياته انه فعلا كان عاوز يصلح حاجة او يقدم الخير للناس بس معرفش ....خير يا جماعة هم السابقون ونحن اللاحقون اللهم ارزقنا قبل الموت توبة وعند الموت شهادة وبعد الموت راحة اللهم ارحم موتانا وموتى جميع المسلمين اللهم اجعل قبورهم روضة من رياض الجنة قولوا آمين الله آمييييييييييييين

المهاجر يقول...

يا جماعه سواءأسلم أم لم يسلم فهو بشر يسرى عليه الحياة والموت فلا يستحق موت شخص كل هذا العناء إلا للعبرة والعظة
وربنا يكتبنا من اهل الجنة

مصعب صلاح يقول...

السلام عليكم

سواء قيل انه اسلم أو لم يسلم في دي مش هتفيدنا احنا دي ليه هو

المهم ياريت يستاهل نتكلم عنه

لقد خلقنا الله احرارا يقول...

a.samir
اهلا بيك يافندم
شرفتنى بزيارتك
واتمنى ماتكونش الاخيرة
لكن انا بصراحة مازعلتش على التقليعة والمعانى اللى كان بيمثلها جاكسون
انا زعلت على انسان اجله انتهى والله اعلم بيه وبحاله بعد كده بس الاكيد ان فرصته ووقته انتهوا خلاص
ربنا يسترها معانا

لقد خلقنا الله احرارا يقول...

جى جى
اهلا بيك ياحبيبتى
بصراحة انا معلوماتى عنه كانت معدومة بقالى كتير
ومش متأكدة من حكاية اسلامه اوعدمه
لكن انا عندى تحفظ
المفروض نتغلب على عواطفنا وما نفرحش اوى باى حد من المشاهير يقول لنا اسلم
احنا محتاجين مسلمين يكونوا قدوة انا واحدة من الناس كنت فرحانة جدا بتايسون وبعدين حسيت انى لازم ابطل العادة دى
شرفتنينى ونورتينى
وسامحينى على تقصيرى معاكى
بس انا عندى امتحانات الايام دى وبعدى على النت سريعا كده

لقد خلقنا الله احرارا يقول...

لورنس العرب
اهلا بيك يافندم
لكن انا عمرى مااتشديت اسمعه او اسمع اجنبى من زمان
حاسة انى ماينفعش اسمعه دلوقت
وبعدين انا مش بحب اساسا الرقص والبوب والكلام ده

لقد خلقنا الله احرارا يقول...

غير معرف
اللهم امين
شرفتينى بالزيارة
بس لو اعرف حتى اسم مستعار ليك
اصل غير معرف دى حاجة بايخة جدا
حلوة اوى حكاية اى حد برقص بهبل يبقى مايكل


اوعى تكونى منوره
لو انت هى
امشى يابت ذاكرى

لقد خلقنا الله احرارا يقول...

المهاجر
اهلا بيك يافندم
انت جبت الخلاصة
المهم العبرة والعظة
وده كان احساسى لما سمعت الخبر



انا هكرر معلش اعتذارى عن التقصير فى الزيارة
بس بجد بدخل المدونة وبتعجبنى جدا كتابتك
لكن وقتى فى النت قليل اوى الايام دى
اخلص امتحانات بس واركز اكتر من كده ان شلء الله

لقد خلقنا الله احرارا يقول...

مصعب صلاح
اهلا بيك
بس براحة ياعم علينا
انا زعلانة على الانسان اللى مات وانتهت فرصته للابد ايا كان الانسان ده يستاهل ولا لا
وبعدين مش الرسول عليه الصلاة والسلام وقف لجنازة يهودى وقال اليست نفس؟
شرفتنى يامصعب
اوعى تزعل

osama44 يقول...

السلام عليكم استاذتنا
اولا بوستك وكلامك اكثر من رائع
وانا معاكى انى الناس ديه عليهم حق علينا وهو ان نعرفهم الاسلام
والله عزوجل يقول
كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ وَلَوْ آمَنَ أَهْلُ الْكِتَابِ لَكَانَ خَيْرًا لَّهُم مِّنْهُمُ الْمُؤْمِنُونَ وَأَكْثَرُهُمُ الْفَاسِقُونَ} سورة آل عمران - 110.
استاذتنا انا اقصد اننا لو داعين الناس ديه الى الاسلام لتغيرت حياتهم ونهايتها
نسال الله لنا ولكى الهدايه لنا جميعا
دمتى بخير وسعاده

أليس في بلاد العجائب يقول...

السلام عليكم ورحمة الله وبركاته

كلامك ينم عن طيبة قلب والله اعلم :)

بس عندي سؤال : تفتكري هما مكانش قدرهم كده؟؟ اقصد يعني ربنا سابهم يجرالهم اللي جرالهم علشان يجي ناس من بعدهم يتخذوا منهم العظة و العبرة و يفكروا الف مرة قبل ما يحاولوا يبقوا نمرة 2 من اي حد منهم

وربنا قال ان الله يهدي من يشاء .. هتلاقي الوف المسلمين و لا يعرفوا شيء عن اسلامهم و هتجدي كمان كتير من الناس تعرف القشور و حكمتها دائمة ربنا رب قلوب و انهم متخيلين ان الفعل في القلب و الحساب علي القلب فقط !!


احييكي علي تنبيهك عن صفة اصيلة في ديننا الكريم وهي الامر بالمعروف والنهي عن المنكر ..

ربنا يحسن خاتمتنا جميعا و يجعل خير اعمالنا خواتيمها واخر كلامنا في هذه الدنيا شهادة ان لا اله الا الله وان سيدنا محمدا رسول الله

بارك الله فيكِ :)

السلام عليكم ورحمة الله وبركاته

memooo يقول...

أهلا ابلة (ر) على فكرة انا أعرف حضرتك و اتشرف لو تكلمينى على memo_joly@yahoo.com
مواضيعك عاجبانى جدا
التوقيع:
عابر سبيل

لقد خلقنا الله احرارا يقول...

استاذ اسامة

وعليكم السلام ورحمة الله وبركاته
شكرا على الزيارة
لكن انا اقصد اننا ننفذ الامر بالمعروف حتى بينا احنا كمسلمين

لقد خلقنا الله احرارا يقول...

اليس فى بلاد العجائب
السلام عليكم ورحمة الله وبركاته
شرفتينى ونورتينى وكلامك غالى جدا
ربنا يتقبل دعائك اللهم امين
وبالنسبة للسؤال عميق لدرجة انى مش عارفة اركز اجاوب عليه
طبعا ده قدر وياريت يكون حظنا اننا ناخد العبرة ومنكونش نمرة 2 منهم
انا سعيدة جدا بزيارتك لى
لكن متابعاك من زمان حتى لو مش فى مدونتك بتشدنى تعليقاتك جدا عند اصدقائك المدونيين
ربنا يجعل صحبتنا فى الخير دايما

لقد خلقنا الله احرارا يقول...

ازيك ياميمو
طيب عرفينى بيك اكتر
ياترى انت ميمو اللى كلمة السر بتاعتها ميس حنان
عرفينى عليك اكتر علشان اكلمك
كده كده ياستى شرفتينى بالزيارة
ويارب تتكرر تانى

أليس في بلاد العجائب يقول...

ربنا يديم المعروف :)

ممكن اكون بقرأ موضوع بس لضيق الوقت مش بعلق او مش لاقيه اضافة اضيفها

ربنا يباركلك :)

لقد خلقنا الله احرارا يقول...

اليس
اللهم امين
هى فرصة سعيدة جدا وجودك فى مدونتى

محاولة لكسر الصمت يقول...

مختلفة أنت..وأفكارك كذلك...
ليت الجميع كانوا أكثر سماحة..

زيارتي الأولى..تقبلي مروري..

well يقول...

على فكرة كل انسان ربنا بيبعتله رسالة بطريقة مباشرة او غير مباشرة وكل نفس ربنا الهمها فجورها وتقواها
انا بس بدئت بالكلمتين دول عاوز اشيل الحمل من عليكى شوية
وبعدين الغرب متقدمين عنا بكتير يعنى لما نيجى ندعيهم لازم نكون احنا كمان متقدمين ودرسين علم نفس وعلم اجتماع وتنمية ذاتية وشوية حجات من العلوم الجديدة او العلوم الانسانية وطبعا لازم نكون دارسين الدين الاسلامى كويس
وبصراحة هو ده اللى عجبنى فى عمرو خالد ان هو ماشى على الطريقة دى رغم كل الاشاعات عليه والحرب عليه الا ان لسه كلامه بيأثر فيا وبحبه
وعلى فكرة فيه مواقع اسلامية بالغات اجنبية انا كنت ببعتها لناس اجانب فى شات الياهو وكنت مسجل اميلاتهم علشان ابعتلهم باستمرار ..لكن للاسف انقطعت عنهم بس عادى نبدأ من الاول
مرة تانية انا حسيت ان انتى شايلة المسؤولية كلها فى حياة الناس دى ..لكن ربنا بيبعت لكل انسان رسالة بطريقة مباشرة او غير مباشرة
تحياتى

غير معرف يقول...

انا memooo كلمة السر بتاعتى حاجة تانية فكرى كدة
التوقبع:
عابر سبيل

غير معرف يقول...

000

لقد خلقنا الله احرارا يقول...

محاولة لكسر الصمت
شرفتينى بالزيارة واتمنى تتكرر
وشكرا على الاطراء الرقيق

لقد خلقنا الله احرارا يقول...

ويل
معلش سامحنى
الموضوع محتاج مناقشة شوية
هرجع تانى ان شاء الله
شكرا على اهتمامك

لقد خلقنا الله احرارا يقول...

غير معرف
أو ميمو
معلش انا مش بحب الفوازير

لقد خلقنا الله احرارا يقول...

ميمو
طيب هقول على حاجة
أنت منقبة؟

memooo يقول...

أنا محموووووووووووووووووووووووود
أسخنلك السلطة يا حبيبى.
و عاملة إيه يا أبلة:(ر) فى الإمتحانات ربنا يوفقك
التوقيع:
محمود الزيات

لقد خلقنا الله احرارا يقول...

محمووووووووووووووود با حبييييييييييييبى عامل ايه ياحوده
تاكل يامحمود؟
طيب ايه اخبار عجلة عمك؟
ازيك يامحمود والله مفأجاة جميلة
مش تقول ياراجل نروق كده ونرش المطرح
المدونة والبلوجر وعم جوجل ذات نفسه سعيد بوجودك هنا النهار ده
لا بجد انا مش قادرة اقول لك انا سعيدة اد ايه النهاردة
يارب الزيارة تتكرر

انت تسال والكمبيوتر يجيب يقول...

سعداءبالمرور هنا وندعوك للأشتراك فى برنامجنا الأذاعى من الأذاعه الرئيسيه لمصر اى أذاعة البرنامج العام ويذاع يومياالتاسعه وعشر دقائق صباحا عدا الجمعه.

التفاصيل فى
المدونه
http://netonradio.blogspot.com
الموقع
http://stop.to/cairo

تحاتنا وامنياتنا لك بالتوفيق

MEMOOO يقول...

الله يخليكى يا أبلة(ر)أحنا الأسعد والله واحشانى كتير محمد السيد بيسلم على حضرتك وعلى فكرة محمد إللى بيسوق عجلة عمه مش أنا .
أنا باسوق عجلتى أنا .
وياريت تكلمينى على الياهو أو تبعتيلى رسالة فيها إيميلك علشان أنا بأتلخبط من أبلة (ر)دى .
ok
بااااااااااااااااااى
التوقيع:
محمود الزيات
MY e-MAIL: MEMO_JOLY@YAHOO.COM

MEMOOO يقول...

أحسن مدرسة تاريخ فى الدنيا...................................................................................................
وإللى يقول غير كدة يبقى ما بيعرفش تاريخ
التوقيع:
محمود الزيات

لقد خلقنا الله احرارا يقول...
أزال المؤلف هذا التعليق.
memooo يقول...

اوكى أنا نقلت الإيميل
شكرا
التوقيع:
محمود الزيات

غير معرف يقول...

يا تيمو منكن اطلب منك طلب بما ان سياتك عندك اصدقاء كتير على المدونة دى انا عايزة من اى حد يجيب لى نموذج اجابة امتحان الكيمياء 2009ضرورى جدا حاولت اجيبه من على مواقع كتير بس معرفتش دخلت على موقع الوزارة طلعت سكة ولا فيها اى حاجة خالص بس بجد عايزاها ضرورى يقولى على الموقع امتحان الكيمياء .فييزياء نونونونونونو

memooo يقول...

ممكن توضحى أكتر نموذج إمتحان الكيمياء للصف الكام
التوقيع:
محمود الزيات

لقد خلقنا الله احرارا يقول...

لا ياميمو الكلام ده ليا انا
بس لوتعرف تحل المشكلة دى يبقى كتر خيرك
هو امتحان 3 ثانوى
لا ياجماعة انا بتوه كده
ياغيرمعرف
مش انت منوره برده ولا ايه ؟

غير معرف يقول...

انتحان الكيمياء ثانوية عميييييييييييياء هو فيه غيرها المتنيلة على عنيها بس بجد عايزاه ضرورى عشان انا بشد ف شعرى من يوم الامتحان وبحاول اجيب النموذج مش عارفة وجزاك الله كل الخير يا استاذ ميمو

غير معرف يقول...

ايوة انا منورة يا تيمو هو ف غيرى مستر عكشة

Tadwina يقول...

عزيزتي
البشر يميلون إلى اصدار احكام على البشر بدون اب يعرفوهم او يعرفوا الظروف التي مروا بها وقد اعجبنا جدا بهذه التدوينة لأنك نظرت من جانب أخر و بحثي عن المبررات ولم تظلمي او تحكمي فياليت كل الناس تفعل مثلك وتكون رحيمة في احكامها.

وبعد عمل تقييم من قبل تدوينة دوت كوم لجميع المدونات المصرية نبلغك بأن بعد اضافة مدونتك إلى تدوينة دوت كوم قام العديد من القراء بالاطلاع على مدونتك الشيقة والجميله المليئة بالخواطر لذا ترجو منك اسرة تدوينة دوت كوم بمراسلتنا للأهمية على
Tadwina@gmail.com
حتي نتمكن من ارسال البانر الخاص بنا لوضعه على الصفحة الرئيسية حتى يتمكن العديد من القراء في مصر والدول العربية بالاطلاع على مدوناتك المستحدثة
يمكنك متابعة مدونتك على الرابط التالى:
http://www.tadwina.com/feed/270

مع خالص الشكر
فريق عمل تدوينة دوت كوم
www.tadwina.com