خلصت المنهج .........!

طبعا كل اللى هيقرأ العنوان ده
هيقول هو ده وقته
هارد أنا وأقول اه وقته
هى كلها منظومة واحدة
طيب واحدة واحدة كده
ايه العلاقة بين ان ربنا كرمنى من عنده وخلصت المنهج
وبين غزة
لا العلاقة واضحة جدا
أنا كمدرسة حاسة بالاحباط
ازاى أفهم الطلبة بتوعى اللى بيحصل فى غزة
ازاى أربط منهجهم بالاحداث الجارية
وأنا كل هدفى فى الحياة انى أخلص المنهج
ازاى أربى جواهم الانتماء والمواطنة
وبلادى وان جارت على عزيزة
وكل الكلام ده
وأنا كل همى أخد حصص كتير علشان أخلص المنهج فى أقرب فرصة
طيب نسأل ايه أهمية المنهج ده؟
ولاحاجة
بيغرس ايه فى الطلبة ؟
ولاحاجة
بيفتكروا منه ايه بعد الامتحان ؟
ولاحاجة
بيعرفهم تاريخ بلدهم ؟
استحالة
امال ايه لزمته ؟
يخنقنا ويكره الطلاب فى تاريخ بلدهم
فين فلسطين فى المنهج --------؟
مفيش كلام يتقال أكتر من حسبى الله ونعم الوكيل
فى سنة تانية اعدادى خمس أو ست سطور مالهموش لازمة
عن مصر التى وقفت ولازالت تقف بجوار القضية الفلسطينية
طيب عرفونا ايه هى القضية ؟
بدأت امتى؟
ايه اهم محطاتها ؟
مفيش
أما فى فى سنة تالتة فدرس رخم وبايخ مالوش أول من اخر
ويكره الواحد فى نفسه علشان نعرف نجاوب أسئلته بس
كل اللى المنهج بيركز عليه معاهدة السلام
ومزايا السلام لمصر والعرب وجهود مصر من أجل السلام
من غير توضيح لملامح وخصائص السلام المزعوم
وكلمات مالهاش لازمة للريس
بيتكلم كلام مالوش لازمة برده عن السلام
طيب ممكن أختكم تسكت على وضع زى ده ؟
مش ممكن
أفضل أعيد وأزيد وأعلم العيال يكرهوا عدونا الاول اسرائيل
وان كل الهبل اللى فى الكتاب عن العودة لحدود ماقبل 5 يونيو 67 كلام فاضى
وان فلسطين بكاملها بتاعتنا احنا بس
وكل الكلام اللى بيتقال عليه عنصرى ده
واقول ان رمسيس الثانى ماعملش معاهدة سلام مع الحيثيين
الابعد ماحاربهم وهزمهم 15 سنة
واننا ماعندناش مشكلة ان السلام ده يكون مرحلة فى تاريخنا
لغاية مانقدر نرجع أرضنا بالقوة
وتكون النتيجة
بعد ما أعيش حياتى كده
انى أعيط لانى لسه ماخلصتش الباشا المنهج
والاجمل المنهج الجديد لسنة اولى اعدادى
أنا معترفة انه أفضل من المنهج القديم بكتير
بس فى سؤال ساذج أو لئيم
ليه دايما الكتاب الخارجى أجمل 100مرة من كتاب المدرسة
ليه نقول للطلبة ان سنفرو أطلقوا عليه الملك المحسن المحبوب
وانه حكمنا 42 سنة
ايه الحكمة والهدف من انى أعرفهم انه قعد على قلبنا المدة دى
وليه التاريخ الفرعونى جاف كده ومش قريب من قلوب العيال
وليه ياحبايبى وهما لسه صغيرين كده اوجع لهم دماغهم بالا رض كروية تلف حول نفسها ؟
وليه أحذف من المنهج جغرافية مصر
وليه أدوخ المدرس بنظام التقويم الفاشل
وبالمتابعة اللى كل وظيفتها تعطلنا بس عن شغلنا بكلام فاضى
وان لازم مقاعد الطلاب تكون بنظام معين
مع انه متعب جدا ليهم وللمدرس
وليه المتابعة مابقتش تسال عن المنهج
وكل اللى يهمها ملف الانجاز الفاشل
وازاى بعد ده كله يكون عندنا وقت نعرف بس طلابنا ومشاكلهم
علشان نكلمهم بعد كده عن فلسطين
كنتم مع الحلقة الاولى من خلصت المنهج
انتظرونا فى حلقات قادمة

9 التعليقات:



eman يقول...

اخيرا يااختي خلصت المنهج ولا خلصت انت
ربنا يجعله بفايده عليهم
وانت لازم تازميها يعني من كل ناحيه...
ليه مالحياة حلوة والدنيا بمبي وكل حاجه ماشيه زي الفل واخر السطه والوضع تمام والامن مستتب جت على الكلام اللي بتقوليه اللي واجع القلوب كلها ربنا يعين الكل
ويجعله عامر

لقد خلقنا الله احرارا يقول...

ايمان ياحبيبتى حمدالله على السلامة انا مكسوفة منك والله بس فى حاجات ملخبطة كده منعتنى انى اكلمك بس الف حمدلله على السلامة فرحت جدا بتعليقاتك وخصوصا لما اتكلمت عن حلمى القديم انا ماكنتش قلت الكلام ده لحد لما عملت المدونة لكن انت يا حبيبتى فهمتينى بسرعة ربنا يخليكى

eman يقول...

تعرفي يارشا انا بحس اني عايشه وموجوده اما بلقيك بتردي علي بجد انا مبسوووووووووووطه جدا مش عايزة اقولك قد ايه انك شفت التعليقات ورديت عليها ويارب تكتبي كمان وكمان والكل يقرالك اكتر واكتر ويمكن بعد كده تعملي جريده على النت جريده تكون حرة وجريئه وتكون رئيسه تحريها وساعتها هتشغليني عندك ....ببلاش طبعا
عيب يابنتي هو بنت عم صبري ممكن تاخد منك فلوس اخس عليك
كده برده اخد منك انت فلوس ازاي مش عيب برده تقولي كلام زي ده
قبلاتي وتحياتي واحتراماتي لك ياجمييييييييييييييييييييل

لقد خلقنا الله احرارا يقول...

ايمان ايه ياحبيبتى مالك ماانتى زى الفل عارفة انت زعلانة علشان اعدة فى البيت دلوت علشان انتى متعودة على النشاط لكن انا هاعلمك تعلمى مدونة سهلة جدا وبلاش تلفزيون واكتبى فيها اللى انت عايزاه وممكن تخلى ناس محددين بس يدخلوا عليها سلامى ليكى وللباشمهندس والامامير

eman يقول...

تسلمي ياحبيبتي .... يعني هتديني درس عندك ببلاش برده ...ولا ايه النظاااام كل التحيات والاحترامات لشخصكم الجليل ولماما طبعا ست الكل والاخوة الاعداء.. وياترى هتبقي فاضيه تقعدي وانت في فترة الامتحانات دي ولا لا؟؟؟هتوحشينا

لقد خلقنا الله احرارا يقول...

ايمان لا طبعا هتاخدى درس ببلاش مش كفايه شقتى اللى عندكم ولا انت رجعتى فى كلامك وعمو ممكن ياخد منى فلوس-----والله انت حاسة بيا انا النهارده تالت يوم ماشوفش فيه النت وقعدت النهارده بس لانى ماروحتش المعهد سلامى للجميع

eman يقول...

هههههههههههههههههههههههههههه
من قلبي والله بدعيلك ربنا يعينك

احمد سعيد يقول...

ايوة طبعا لما سنفرو يقعد على قلبنا 42 سنه ويبقى الملك المحسن المحبوب يبقى بالتالى اللى يقعد 30سنه بس يبقى الملك المحسن المحبوب الننوس وقائد مسيرة التنميه كمان مش كدة ولا ايه؟؟؟
...............
ربنا يكون فى عونك مش عارف انتى عارفه تشتغلى ازاى فى وسط الهبل اللى بيحصل فى الوزارة دة تحت زعامه الاخ عسرى ابو سنم.
انا برضه والدتى تربيه وتعليم ,ادت المهنه كل حاجه وطلعت السلم من أوله من اول دبلوم المعلمين بتاع زمان لحد مدير ادارة تعليميه.
ياما ربت اجيال ومن كتر ماأثرت فيهم مازالو بيزوروها ويجيبولها هدايا لحد دلوقتى مع العلم ان ولادهم بقوا فى الجامعه..
دايما بسأل نفسى يا ترى لو كانت لسه فى الوزارة لغايه دلوقتى كانت اتصرفت ازاى؟؟؟؟
وساعتها لا املك نفسى الا ان ابتسم فى خبث.
............
الزعيم احمد عرابى:
انصع الصفحات فى تاريخ مصر
رجل اخلص لوطنه ولدينه
لم يعرف المراوغات فى حياته ولم تفسدة السياسه.
مافيش زعيم اتظلم فى مصر واتشوة تاريخه قد الراجل دة ومحمد نجيب
بجد الصورة على العنوان هايله
وعلى فكرة انا ايضا من عشاق التاريخ
وخصوصا ابتداء من عصر المماليك

ملحوظه: هو المفروض يطعم المساكين الاول
ولو ملقاش يبقى يصوم, مش كدة برضه؟؟

ليه كدا يا عرابى يعنى كان لازم تحلف؟

لقد خلقنا الله احرارا يقول...

احمد سعيد شرفتنى بالزيارة يافندم خصوصا بعد سوء التفاهم اللى حصل ده عموما انا فهمت دلوقت تفكيرك حلو ليه ؟علشان الوالدة طبعا تربية وتعليم ربنا يديها الصحة والعمر الطويل بس من غير ماتبتسم فى خبث اوضاع التربية والتعليم سيئة من زمان اوى لدرجة انى مش عارفة احدد من امتى ياترى ؟العثمانيين ولا محمد على اللى كان همه يخرج موظفين بس ويقضى على جوهر التعليم الدينى الازهرىولا ياترى عبد الناصر اللى انا مديونة للثورة اللى لولاها مكناش اتعلمنا احنا واهالينا لكن مع كده اتعامل مع الازهر بخوف اتعامل معاه كمؤسسة سياسية لها اخطار على انفراده بالحكم ولا العهد المباركى وسرور وبهاء الدين والاخ الجديد اللى خانقنى ده بس صدقنى لو والدتك لسه فى التربية والتعليم كانت هتحاول برده بكل الطرق تراعى ضميرها لكن كان هييجى على حساب صحتها النفسية اما بالنسبة لعرابى فده الوطنية البريئةاللى مش بتعمل حساب للتوازنات السياسية والاطراف الاقليمية والدولية والكلام الكبير ده مع انى منكرش ان كان فى عصره سياسين مخضرمين وطنيين زى شريف باشا مثلا بس عرابى اتظلم بجد كفايه ان المصريين لغاية دلوقت اتاثروا بالدعاية البريطانية وبيسموا ثورته هوجة عرابى وانهم بعد رجوعه من المنفى كانوا بيبصقوا عليه حتى راجل وطنى زى مصطفى كامل كان بيعارضه جدا نفس الفكرة اللى اتكلمت فيها عندك بتاعة طاعة ولى الامر الله يخرب بيت ---ولا بلاش---------------اما حكاية ان عرابى يصوم 3ايام والتريب الفقهى للتكفير عن اليمين فبصراحة انا نقلتها زى ماقريتها وده مايمنعش انى لفترة قريبة ماكنتش واخدة بالى من التريب الفقهى للمسالة نورتنى يافندم واتمنى الزيارة تتكرر-------------ااااااااااااااه شفت الظلم نسيت موضوع محمد نجيب بس ده عايز مواضيع لوحده خصوصا انى من فترة قريت مذكراته ووجعنى اوى خصوصا لما طلب من عبد الناصر يشارك فى الحرب ومحدش استجاب لطلبه طبعا