كلاكيت تانى مرة (ابراهيم عيسى)

لافض فوك أستاذى
 بجد تحليل رائع وصادق وعفوى
 حقيقى أنا سعيدة انك أستاذى اللى مسح بكلامه مرارة الكلام عن منتظر الزيدى
 فعلا حسن نصر الله بيتكلم من منطلق مكانته الرمزية اللى هو متأكد من تمتعه بيها
 واللى حصل عليها لاسباب كتير قوى من اهمها الانتماء والقيادة للمقاومة
 وبعدين الراجل بيتكلم صح ويمكن ده هو السبب اللى جنن الحكومة من كلامه
 فاطلقت عليه كلابها بسرعة
 بس المشكلة ان اول ماخطر ببالى بعد ماسمعت خطابه
 انت واهم سماحة السيد
 المصريين بعد عصور طويلة جدا من الحكم البوليسى
 وتفريغ النقابات ومؤسسات المجتمع المدنى والاحزاب من مضمونها
 مش متعودين ينزلوا الشارع بسهولة
 يمكن لان مفيش عندهم القيادة الواعية
 اللى تجمعهم بذكاء زى ما حصل فعلا فى ازمة الضرائب العقارية
 مصر مش لبنان سماحة السيد علشان تنزل تبات فى الشارع لما الزعيم يطلب كده
 بس انا حاسة ان اليوم ده قرب والحكومة كمان حاسة بكده
 والا مكنش الريس يطلع علشان يتكلم كلمتين محدش كان عايز يسمعهم
 اللى يتفهم منهم بجد اننا ماظلمناش الناس دى
 مصر مش هتفتح المعبر لغاية ما الفلسطينيين يتصالحوا
 يعنى أبو مازن المسئول ضمنيا عن قتل عرفات فى ظنى أنا على الاقل
 يرجع تانى غزة
 يعنى حماس المكروهة دى لانها بتقاوم يبقى لازم تتعاقب
 ونخلى اهل فلسطين نفسهم يكرهوا ايامها
 وعلى حسب التحليل الرائع لاستاذى ابراهيم عيسى
 السيد حسن كلم المؤسسة العسكرية بمنتهى الرقى والحرفية زى ماهو متعود فى لبنان
 لكن احنا فعلا خدنا على توجيه الرسائل الفاشلة للدول العربية
 ومش عندنا استعداد حد يوجه لينا اى كلام
لاحساسنا الفاضح بكدبنا وعجزنا وانبطاحنا
 ابراهيم عيسى وحسن نصر الله 
شكرا 
 انتم الامل ان بلادنا لسه فيها رجالة

5 التعليقات:



غير معرف يقول...

استاذ عكاشة يقول بمسى عليكى يا رشة وبجد فرحانلك على التقدم الفظيع ده بس براحة على نفسك لسه عايزينك معانا وكفرى انتى عن عرابى التلات ايام

لقد خلقنا الله احرارا يقول...

استاذ عكاشة والله المدونة نورت يا فندم ودايما معانا فى الافراح ان شاء الله بس شد حيلك كده وخلص مذاكرة علشان نخلص من الابتدائية دى بسرعة

غير معرف يقول...

السلام عليكم ورحمه الله وبركاته
اختى الفاضله
ارى من مدونتك انك مسلمه سنيه وقد وضعتى فى مفضلتلك العديد من شيوخنا الافاضل اهل السلف والسنه
فهل تعلمين عن من تتحدثين ومن هو حسن نصر الله ؟؟!!( انه شيعى رافضى ) لا يهمه امر اهل السنه كما يزعم فهم من حاربهم وقتلوهم اشر قتله
وقد رسم لنا هذا المدعوا حسن نصر مسرحيه هزليه جمع بها العديد من اتباعه واخذ يخطب خطبه عصماء وكانه امير المسلمين
حاشى لله ان يكون اميرهم شيعى رافضى فهم من سبوا الصحابه والتابعين
واخذ يحرض اهل مصر على الانقلاب فاين صوارييخه التى يتباهى بها الم يقل هذا الحزب انه له العده والعتاد الى تستطيع ان تدمر اسرائيل بين عشيه وضحاها ؟؟؟؟
قد تكون كلماته الرنانه وعباراته المؤثره اثارت لب الكثير من الشعب
ولكنى اخشى ما اخشاه ان نقع فى الفتنه

انا مصريه ولا انكر انه يجب ان يكون لنا دور اقوى و ووالله ثم والله نحنوا لسنا باقل غيره من هذا المدعوا حسن نصر الله لا نصره الله على اهل غزه وفلسطين الحبيبه ولكن ان يتم تنصيبه لكى يتحدث بصوره الاسلام فهذا لا نقبله فهو رافضى وخارج عن المله
واخشى اختى الفاضله ان اقول لك ان كل من يتبعه ويؤيده فقد وقع فى الفتنه

فماذا سيفيدنا اذا انتصر عدوا المسلمين( حسن نصر ) على عدو المسلمين( اسرائيل)

سامحينى اختى على الاطاله ولا اعرف ان كنت ستقبيلن باضافه هذه المشاركه ام لاء
ولكنى ما اردت الا النصحيه وارجوا منكى ان تيحثى عن حقيقه الشيعه مع اهل السنه
وفققك الله وراعاك

لقد خلقنا الله احرارا يقول...

الاخت غير معرف وعليكم السلام ورحمة الله وبركاته سعدت جدا بزيارتك لمدونتى واكتر ما اسعدنى حرصك على النصيحة بس معلش اسمح لى ارغى معاكى شوية اولا انا مسلمة سنية وده فضل ربنا علينا وبحترم جدا مشايخ السنة والشيخ محمد حسان بالذات ليه فى قلبى مكانة كبيرة جدا بس فى نقطة تاعبانى جدا فى كلامى مع الناس لو حسن نصر الله ده كافر هل مش من حقى اقف معاه ضد اعدائى الصهاينة ولا لازم اللى يهزم الصهاينة يكون مسلم سنى يعنى مثلا لو شافيز رئيس فنزويلا دخل حرب مع اسرائيل ماينفعش اقف معاه لانه مسيحى ولا احنا وصلنا لمرحلة ان خلافتنا المذهبية اصبحت اقوى من خلافتنا الدينية -------------ثانيا انا مدركة تماما ان معظم الشيعة عقيدتهم فاسدة تصل بهم الى الكفر سواء سب الصحابة او السيدة عائشة او المزارات اوتكريمهم المبالغ فيه جدا لسيدنا على واسرته طبعا مش انتقاص من قدر سيدنا على بس بعضهم بيرفعوه والعياذ بالله لمكانة الرسول صلى الله عليه وسلم بس انا مدرسة تاريخ يافندم ودرست ان بداية ظهور المذهب الشيعى كان فكرة سياسية وبعد فترة تحولت معهم لعقيدة فاسدة انا معاك والله انهم غلط وان واثقة تماما فى كده بس فى سؤال محيرنى هما غلط فى حاجة ماينفعش اتعلم منهم حاجة صح لو عندهم حاجة كويسة ماتعلمش منهم ليه يعنى مثلا امبارح كنت بقرا عن غزوة الخندق لما الرسول عليه الصلاة والسلام وافق على فكرة سلمان الفارسى مع انها فكرة كان بيطبقها الفرس اعداء الاسلام فسألت نفسى طب ماالشيعة حتى ولو كفار عندهم ثقافة الاستشهاد قوية جدا بسبب ظروفهم وتاريخهم مش الجهاد ده دين مش مجرد ثقافة ليه نخليهم يستأثروا بيه اللى انا درسته ان علماء السنة بعد الفتن واللى حصل فى كربلاء اجمعوا مع الاختلاف الطفيف فى الاسلوب على عدم مشروعية الخروج على الحاكم علشان يجنبوا المسلمين مرارة الفتن والحروب تانى طب بالله عليكى اللى احنا فيه دلوقت ايه الناس بتموووووووووووووووت وكل ما اسمع قناة دينية يقولوا ادعوا لغزة انصر غزة بنصرك لدين الله داخلك اولا كلام صح طبعا مفيش جدال بس هو ده الحل طيب ياجماعة ياللى رضيتم لنفسكم بس بالدعاء مش ربنا سبحانه وتعالى لا يغير ما بقوم حتى يغيروا ما بانفسهم احنا كل اللى نقدر عليه العاء للاسف احنا خلطنا الدينى بالمذهبى بالسياسى -------------ثالثا انا لقيت يافندم واحد بيقاوم اسرائيل بجد وهزمها مرتين مع فارق القوة الرهيب بينهم وابنه مات وهو بيحارب اعدائى الصهاينة وحياته كلها وهبها للكفاح والمقاومة وهفترض تانى ان الراجل ده كافر طب انا مش حقى اعجب بيه انا مش لاقيه غيره --------للاسف علماء السنة مع احترامى الشديد ليهم كل همهم يبعدونا عنه ماشى انا ماليش دعوة بمذهبه وعقيدته ده واحد مقاوم ياناس اعملوا زيه ليه مايطلعش من السنة شيخ زى------------العز بن عبدالسلام --------يقف ضد الظالم ويبيع المماليك فى السوق ------------رابعا الشيعى ده ماينفعش اقف معاه ليه ده المسلمين فى وجود النبى عليه الصلاة والسلام زعلوا لما الوم المسحيين اتغلبوا من الفرس المجوس -----------وبعدين نقطة مهمة جدا مش نصر الله ده اللى خطف العساكر علشان يخفف الضغط شوية على حماس السنية -------------انا اسفة على الاطالة بس بجد ده موضوع كبير حضرتك شجعتينى فى اقرب فرصة اعمل بوست عنه ---------ارجو انك تكونى تفهمتى موقفى واتمنى ان تكون فى وسيلة للنقاش بينا بلاش موضوع غير معرف ده وشرفتينى يافندم

مدرسة الرياضيات سابقا يقول...

ايوة ياجميل قول وسمعني احسنت المقال والمقام والاخت اللي غير معرف حانقه اوي على حاجات احنا مالناش يد فيها ومفكرتش تتكلم على اللي نقدر نعمله ومش قادرين نعمله عشان حاجات كتيييييييير اولها الخوف ماعلينا المفروض الاختلاف لايفسد للود قضيه ارجو انها ماتضايقش من الكلام ده انا معاك ان لوحسن نصر الله ده لو مالوش مله اصلا هقف جنبه عشان زعيم بجد وبيعمل مش بيتكلم وبس وربنا يبعتلنا اللي عنده المله والدين والشجاعه وووووو......الخ طبعا
المهم انا قلت اقولك اني وصلت خلاص بعد رحلة كفاح الى مطار برج العرب والطياره تحفه والاكل خطير والمعامله مالهاش حل وانت كنت دايما على بالي
ويجعله عامر