فى القلب (غزة )

تحديث
الظاهر انا عدوة نفسى وغاوية اعذبها
امبارح اسمع تامر امين والنهاردة عمرو اديب
بس نفسى اقول كلمتين
باختصار علشان انا واحدة نفسيتى تعبانة
سماحة السيد حسن نصر الله ده
ارجل مافيكم
هو ده اللى عبر عنكم بكلمة واحدة
(أنصاف الرجال )
فلما يتكلم ابقوا افهموا الراجل بيقول ايه
عمرو اديب بيتسول وبيقول مصر فقيرة مصر غلبانة هتجيب منين
لا يا باشا ياللى بتدافع عن مصر وعن كرامتها وسيادتها
مرتبات اتباع السلطان امثالك
هى اللى فقرتنا
على اعتبار اننا مصدقين اننا فقرا
صعبان عليكم اوى الرائد الله يرحمه اللى اتقتل برصاص فلسطينى
الرائد الله يرحمه دمه فى رقبة
اللى اجبروه يقفل طاقة الحياة الوحيدة فى وش اخواته
انا مستنية بجد اليوم اللى نجرى فبه على حدود فلسطين وليبيا والسودان
ومحدش يفتح لنا
ساعتها هنقول أكلت يوم أكل الثور الابيض
ملاحظة مهمة
لكل اللى بيعيطوا على مصر
اللى بتتشتم
احنا وحكومتنا والله ا لمقصودين بالسب مش بلدنا المبلية بينا
انا رايحة ادور على حلم من احلام النقاهة
لنجيب محفوظ
بيصور مصر بعد ماولادها كلوا خيرها وقعدوا ياكلوا فى بعض جنب جثمانهاايوه فى القلب غزة
 طيب كنا بنستعبط وساكتين لغاية ما الهانم وزيرة الخارجية جت تهدد غزة من عندنا
هو خلاص حكومتنا وصلت للمرحلة دى من الفشل وقصر النظر
 مش هتكلم على العروبة والاسلام واخواتنا فى الانسانية علشان الكلام ده مش بيدى مع الحكومة ومع ناس كتير
 هعتبر نفسى لمدة 3دقائق بس بتاعة مصلحتى وبراجماتية
 هو لما مصر تشجع اسرائيل على ضرب غزة حتى ولو ضمنيا
حتى ولو عن طريق ا لمقالات اللى بقالها كام شهر بتشتم فى حماس واللى جابوها
 وبتندب على الشرعية على اعتبار ان حماس جاية يعنى بانتخابات مضروبة زى بتاعتنا
والاجمل الكلام الصريح الواضح عن ان مصر مش هتقبل قيام امارة اسلامية على حدودها
 معلش انا واحدة فهمى على قدى فهمت ان مصر مش عايزة حماس
 طيب براحة عليا علشان استوعب
 مصر مش عايزة حماس
 قوم ايه
 نولع فيها
 طيب ماهو الناس لبعضيها
 مين ممكن يقوم بالمهمة دى علشانا واحنا دايما يعنى فى الخدمة غير اسرائيل
 زى ماكنا مضايقين من البتاع ده (الاسم الحركى لحزب الله ) واسرائيل قامت بالواجب
 تصدقوا انتم بتظلموا الحكومة دى بتتهموها انها بتسمع كلام اسرائيل
 مع انها حكومة واعرة قوى وهى اللى مخلية اسرائيل خاتم فى صباعها
 اتنين وبيحبوا بعض وقلبهم على بعض ندخل بينهم احنا ليه
 بس بجد علشان اناهحاول اركز
 الغباء الحالى لحكومتنا اللى ماوردش قبل كده
 انها مش فاهمة حسب خبرتى الكبيرة قوى الف باء السياسة والامن القومى
 صدعولنا دماغنا بتضحيات مصر من اجل القضية الفلسطينية
 وعن الجحود الذى تعانى منه الشقيقة الكبرى من الصغار الذين لا يعلمون
 واى عيل صغير فى تانية اعدادى يعرف ان اى حاكم مصرى كان بيدور على مصلحة البلد
 او حتى بيأمن حكمه بيعمل حاجة من اتنين
 يحتل الشام اوجزء منها
 او يخلى علاقته ودية ووثيقة مع حكامها
من اول تحتمس اللى بهدلهم حملات وبعدين ربى ولادهم عندنا علشان يطلعوا ولائهم لمصر
 او رمسيس اللى تقريبا هزمهم وبعدين سبلهم وعمل معاهم معاهدة سلام
لاى حاكم تانى فى اى مرحلة من التاريخ علشان مطولش شاف ان أمن مصر القومى جزء كبير منه فى ضمان امن الشام
ملحوظة مهمة
 انا مقصدش ابدا اننا نحتل غزة او اى بلد تانية
انما كل اللى اقصده ان مش معقول الحكومة الذكية تكون غافلة عن ان غزة اماننا وضهرنا
 وانها من مصلحتها انه يكون فى غزة حكومة علاقتها حسنة معاها
 انما نبيع الناس وش كده!!
 ووزير الخارجية المصرى فاضله شوية ويحلف ان اسرائيل مابلغتناش
 طيب قالوا للحرامى احلف
 رسالة الى ذكى حكومة فى تاريخ البنى ادمين
 خيبك الله فضحتينا
 يعنى لازم تاخدى صفر فى كل حاجة
 ماسمعتيش عن المثل اللىبيقول اكلت يوم اكل الثور الابيض
 تصدقى بالله ياحكومة انا مش عارفة اركز من ساعة ماسمعت الخبر
 بس بجد كل اللى جاى على بالى لك الله يا فلسطين
ويارب احنا متبريين من الحكومة دى ليوم الدين
 ده انا زى مايكون قلبى حاسس من اول ما سمعت عن التلطيش بغباوة فى اى مظاهرة لغزة
 حسيت ان فى احداث سودة جاية
 صبرنا يارب على مابليتنا

17 التعليقات:



سبهللة يقول...

لا يمكن ابدا ازعل منك
بس الحقيقة انا بقالى فترة ما دخلتش على النت
واليوم اللى اجى ادخل فيه الاقى المصيبة بتاعة غزة
رحمتك بينا يا رب

tamer.sala7 يقول...

للأسف الحكومة المصرية كانت سبب في احراج كامل لكل المصريين بجد شئ مؤسف

بس مش عايزين نحمل مصر المسئولية كاملة لا كل العرب عليهم نفس مسئولية مصر

وطبعا الـ 200 واحد اللي استشهدوا دول دمهم في رقبة كل عربي

حسبي الله ونعم الوكيل في النظام المصري بالكامل

Post Man يقول...

الله ما انني ابرأ مما فعل حكامنا
الله ما انني ابرأ مما فعل حكامنا
الله ما انني ابرأ مما فعل حكامنا
الله ما انني ابرأ مما فعل حكامنا
الله ما انني ابرأ مما فعل حكامنا
احنا نتستاهل اللي بيقولوه علينا في العالم كله حالا ( مصر خائنة ) هو صحيح احنا مخناش بس نظامنا خان واحنا خنا لما سكتنا .
لكي الله يا غزة
لكي الله يا حماس
لكي الله يا فلسطين
لك الله يا اقصى
لك الله يا كل عربي مسلم حر ابى يرفض ما يحدث .

بحـــر الدموع يقول...

السلام عليكم ..
يا حي يا قيوم برحمتك نستغيث
يا واحد يا احد يا فرد يا صمد
اللهم كن مع اهل غــزة ، اللهم فرج همهم
اللهم عليك بمن ظلمهم من اليهود واعوانهم من العرب
اللهم ايقظ الضمائر الميتة من امتنا
اللهم انت حسبنا ونعم الوكيل
ولا حول ولا قوة الا بالله العلي العظيم

اخرجوا ايها المسلمين اخرجوا من بيوتكم اهتفوا كفى ظلما كفى قتلاً لاهل غزة ، اخرجوا وأشعروا اهل غزة انكم تقفون معهم ، ولو بالكلمة ..
اخرجوا بارك الله فيكم

لا تنسوا اخوانكم في غزة من دعائكم

||..بحـر الدموع..||ِ

بحـــر الدموع يقول...

لماذا اشعلت النيران وقامت الدنيا ولم تقعد في اليونان حينما قتل طفل صغير هنالك على يد احد افراد الشرطة ..؟؟
بينما اهلكم في غزة يموتون ويقتلون امام اعينكم ولا تتحركون يا ابناء المسلمين .؟
هل قليل على غزة ان يموت احدكم دفاعا عنهم . اخرجوا وقفوا امام حكوماتكم وقولوا لهم كفى قتلاً لأهل غزة .!!

350 شهيد فلسطيني على ارض غزة واكثر من 1650 جريح سقطوا خلال يومين .؟
ماذا تنتظرون اكثر من ذلك .؟
غـــــــزة تنزف .. ودمها برقابكم انتم ..

لا تنسوا اخوانكم في غزة من دعائكم

||..بحــر الدموع..||

soaad fakoory يقول...

اول لمره ازور المدونه صادقه جداوواقعيه واشعر ان هذة المشاعر الصادقه نابعه من قلب طيب قلبى معك.....

eman يقول...

اضم صوتي واحساسي اليكم ياخواتي نحن مكسوفين جدا ان احنا عرب اصلا مش مصريين بس كل العرب ......... طبعا انتم عارفين الباقي حزينه وبدعي ربنا يعوض علينا من كله من الشهداء مرة والحكام مره .....وعوضنا عليك يارب وحسبنا الله ونعم الوكيل ولازم كلنا نتفق على حاجه واحده نعملها مع بعض يمكن لما نفكر نعمل حاجه مع بعض نعرف نعملها بجد احسن من اللي مابيفكروش اصلا وعجبي

لقد خلقنا الله احرارا يقول...

استاذ تامر الحكومة المصرية دايما سبب فى احراج المصريين لكن المرة دى الحكاية باينة قوى مش عارفين يداروها يعنى انا حاسة ان الفضيحة المرة دى اكبر من قدرات تامر أمين وأشباهه وبالنسبة للعرب احنا الدولة الوحيدة اللى عندها حدود مع غزة احنا بلدنا أم الدنيا زى ماعبر سماحة السيد نصر الله يبقى اكيد مطلوب مننا أكتر مش ممكن ننزل لمستوى المقارنة مع دول زى الاردن وقطر نورت المدونة يافندم بس ليه حضرتك ممتنع عن الكتابة

لقد خلقنا الله احرارا يقول...

post man اللهم امين بجد كلامك هو اللى بيخطر على بالى حتى وانا لوحدى وبفتكر اللى بيحصل ربنا يرحمنا برحمته لان ضعفنا ده اكيد من غضبه علينا

لقد خلقنا الله احرارا يقول...

بحر الدموع انا مكسوفة من نفسى قدام اى فلسطينى يمكن اكتر واحدة عبرت عنى نوارة نجم لما قالت بعفويتها انا مكسوفة انى مصرية اللهم اشغل الظالمين بالظالمين

لقد خلقنا الله احرارا يقول...

استاذة سعاد شكرا على زيارة مدونتى وشكرا على مجاملتك الرقيقه وانا زرت مدونتك سريعا بس مش مجاملة حسيت اد ايه رقتها

لقد خلقنا الله احرارا يقول...

ازيك يا ايمان عاملة ايه شوفت مصر بقت ازاى ياايمان مش هطول عليكى علشان انا حاسة اد ايه انت مخنوقة ربنا يصلح الاحوال

العجوز والبحر يقول...

قرأت لك تعليق لدى جبهة التهييس شعرت انك من المصريين القلائل
من يستشعرون الخطر الصهيونى على مصرحين قلتى ان امن مصر القومى يبدأ من بوابة مصر(غزه) وللاسف فأغلب الذى نشأ
فى ظل ابواق هذا العهد يعتقد ان معاهدة الشؤم تحمى مصر وقد يكون هذا ايضا موقف النظام . ولم يعلم هؤلاء ان
من قراءة الاحداث فى المائة سنه الماضيه
فقط .....شكراااا.أصدعتك...!!!!!!!!

لقد خلقنا الله احرارا يقول...

العجوزوالبحر حضرتك شرفتنى يافندم وفرحت جدا لما دخلت مدونتك وعرفت ان حضرتك مؤرخ وبعدين يافندم انا زمايلى فى المدرسة قالولى النهارده ماينفعش نقف مع حماس دى خاينة ده محمود عباس قال كده حقيقى حاولت اوضح لهم الصورة بس اعلامنا نجح يبعدنا عن القضية ويخلى الناس كل كلامها ياعينى الاطفال بيموتوا طيب والكبار دول فى داهية ولا ايه؟

العجوز والبحر يقول...

سيدتى
بعد هزيمة مصر ومؤتمر الخرطوم 1967 وقف العرب جميعا خلف دول المواجهه مصر وسوريا والاردن ماديا وعسكريا واستمر هذا حتى زيارة القدس 1977 وكانت مصر
الدوله الاقليميه الكبرى حتى المعاهده
التى قسمت العرب والتى نعانى من آثارها وتضرب غزه بسببها. وفى الثلاثين عاما
الماضيه ضاع دور مصر. وصارت قطر دوله
لها دورها الهام فى المنطقه واصبحت مصر تلجأ لتركيا لحل خلافتها مع السوريين
فمصر هى التى تنازلت عن دورها واستطاعت الصهيونيه والامريكان زرع الاحباط والفرقه بين العرب وظهرت التعبيرات الجديده كالسنه والشيعه والفرس والعرب و....وهانت مصر على
نفسها..فلاتلومن..الا نفسها.!!!!!!!

eman يقول...

على فكرة المشكله مش في مصر بس في كل حتة في عالمنا بس احنا عشان دمنا حامي وبنغلي من جوانا على طول حاسين ان لازم يكون في نقطة نظام ويحصل حاجه تغسل القرف اللي البلد فيه
بلدنا ع الترعه بتغسل شعرها ..... ويجعله عامر

eman يقول...

عايزة اقولك يارشا انك بتمارسي مهنتك الاساسيه وحلمك الصغير من هنا
فاكراه ولانسيتيه
انا حاسه انه بيمشي في دمك اصلاومش ممكن تكوني نسيتيه اذاكنت انا مانسيتوش ياايتها الصحافيه الحالمه
وعقبال مااحقق حلمي انا كمان